Kọ Whọ te rọ Uvẹ na Ruiruo Ziezi? Ekareghẹhọ nọ Ọ be Tha na O ti Rovie Uvẹ nọ Ma re ro Dhesẹ Edẹro
1. Uvẹ obọdẹ vẹ Ekareghẹhọ na o rovie fihọ kẹ omai?
1 Ekareghẹhọ nọ ma ti ru evaọ edẹ 14 Ane na o te kẹ omai obọdẹ uvẹ nọ ma re ro yere Jihova kẹ iruo iwoma riẹ. Iku nọ e rrọ obe Luk 17:11-18 na i dhesẹ oghẹrẹ nọ Jihova avọ Jesu a rri ohwo nọ o re dhesẹ edẹro. U yoma kẹhẹ inọ evaọ usu emoti ikpe nọ Jesu o siwi na, ọvuọvo o zihe ze ti yere Jesu. Evaọ obaro, idhe ẹtanigbo na u ti ru nọ oghẹrẹ ẹyao kpobi o ti ro n’otọ, ahwo a vẹ te rria bẹdẹ bẹdẹ. Evaọ oke yena, ma ti yere Jihova kẹdẹ kẹdẹ rọkẹ iruo iwoma nana. Kọ ẹvẹ ma ti ro dhesẹ edẹro mai evaọ eka nọ e be tha na?
2. Ẹvẹ ma sai ro wo edẹro kẹ idhe ẹtanigbo na?
2 Wo Edẹro: Iroro ohwo eye e rẹ wọe dhesẹ edẹro. Re ma sai wo edẹro rọkẹ idhe ẹtanigbo na, a fi omaa isase Ebaibol Ekareghẹhọ na họ eria sa-sa nọ ma sae jọ ruẹ e rai se, wọhọ ẹme-ofiba B12 nọ ọ rrọ Ebaibol ọ New World Translation nọ a siobọno kẹle na, ukeledẹ, gbe Ẹkiẹriwo Ikereakere na Kẹdẹ Kẹdẹ. Whẹ avọ ahwo uviuwou ra wha daoma se eria Ebaibol nana. Nọ ma te ru ere, ma ti wo edẹro ziezi rọkẹ idhe ẹtanigbo na. Onana u ve ru omai dhesẹ edẹro mai via.—2 Kọr. 5:14, 15; 1 Jọn 4:11.
3. Idhere sa-sa vẹ ma sai ro dhesẹ edẹro mai evaọ ezi Ekareghẹhọ na?
3 Dhesẹ Edẹro: Ohwo nọ o wo edẹro o re ru oware jọ ro dhesẹ iẹe. (Kọl. 3:15) Ọmoti nọ o wo edẹro na ọ daoma gwọlọ Jesu re o yere iei. Ababọ avro, ọmoti na ọ rọ oghọghọ vuẹ amọfa kpahe iruo igbunu nọ Jesu o ru kẹe na re. (Luk 6:45) Kọ edẹro nọ who wo kẹ idhe ẹtanigbo na u ti ru owhẹ zizie amọfa ziọ Ekareghẹhọ na avọ ọwhọ? Ọkobaro obufihọ nọ ma re ru hayo oke nọ ma rẹ rọ ta usiuwoma na ziezi yọ edhere ọfa jọ nọ ma re ro dhesẹ edẹro. Evaọ owọwọ nọ ma ti ru Ekareghẹhọ na, edẹro mai u ti ru omai dede erara nọ e nyaze rehọ, ma ve je ru ọruẹrẹfihotọ nọ ma re ro zihe bru rai.
4. Eme ma re ru re uvẹ nọ u rovie fihọ evaọ oke Ekareghẹhọ na o gbẹ rọ vrẹ omai hi?
4 Kọ Ekareghẹhọ nana họ orọ urere nọ ma ti ru? (1 Kọr. 11:26) Ma riẹ hẹ. Rekọ oware nọ ma riẹ họ, nọ Ekareghẹhọ nana ọ tẹ vrẹ no, yọ obọdẹ uvẹ nọ ma hai ro dhesẹ edẹro o vrẹ no. Kọ whọ te rọ uvẹ nana ruiruo ziezi? Jọ ẹmeunu mai gbe iroro mai e wha evawere se Jihova, Ọnọ ọ kẹ omai okẹ ẹtanigbo na.—Ol. 19:14.