Gbẹ Daoma Wo Ẹnyaharo Evaọ Odibọgba Na
1. Iriruo Ileleikristi ikpe-udhusoi ọsosuọ vẹ i dhesẹ nọ ma rẹ gbẹ daoma wo ẹnyaharo evaọ odibọgba na?
1 Wọhọ egbodibo, Ileleikristi a rẹ dọmu oria ovo ho. Fiki oye Jesu o je ro wuhrẹ ilele riẹ re a wo ẹnyaharo evaọ iruo usiuwoma na. (Luk 9:1-5; 10:1-11) Yọ fiki oye ovona Akwila avọ Prisila a rọ rehọ Apọlọs gboma re a “ru idhere Ọghẹnẹ vẹ kẹe gbagba vi epanọ ọ riẹ vẹre.” (Iruẹru 18:24-26) Fiki ẹjiroro ọvona Pọl ọ rọ tuduhọ Timoti awọ dede nọ o wo onaa ziezi no vẹre, re ọ gbẹ daoma fihọ onaa ewuhrẹ riẹ “re ahwo kpobi a sae ruẹ ẹnyaharo” riẹ vevẹ. (1 Tim. 4:13-15) O tẹ make rọnọ ma gbodibo kẹ Olori na kri no evaọ iruo usiuwoma ota na, ma rẹ gbẹ daoma wo ẹnyaharo evaọ onaa mai.
2. Ẹvẹ ma sai ro wuhrẹ mi amọfa?
2 Wuhrẹ Mi Amọfa: Oghẹrẹ jọ nọ ma re ro fiba onaa mai họ ma re wuhrẹ mi amọfa. (Itẹ 27:17) Fikiere, daoma muẹrohọ nọ iwhowho-uvie efa e tẹ be ta usiuwoma. Ta kẹ iwhowho-uvie nọ i wo onaa ziezi re a vuẹ owhẹ oware nọ who re ru re who wo onaa viere, whọ vẹ gaviezọ ziezi. (Itẹ 1:5) Kọ o rrọ bẹbẹ kẹ owhẹ re who wo ozihebro, mu obe-uwuhrẹ Ebaibol họ, hayo w’obọ evaọ abọjọ usiuwoma ota na? Ru oware jọ kpahe iẹe, ta kẹ ọsẹro utu usiuwoma ota ra hayo owhowho-uvie jọ nọ o wo onaa ziezi re o fiobọhọ kẹ owhẹ. Kareghẹhọ re nọ Jihova ọ sae rọ ẹzi ọfuafo riẹ fiobọhọ kẹ omai wo onaa ziezi, fikiere hae yare Jihova kẹ ẹzi riẹ ẹsikpobi.—Luk 11:13.
3. Eme ma re ru nọ oniọvo jọ ọ tẹ vuẹ omai abọ nọ o jọ gwọlọ nọ ma rẹ gbẹ jọ daoma?
3 Jọ eva e dha owhẹ hẹ nọ oniọvo jọ ọ tẹ vuẹ owhẹ abọ nọ whọ rẹ gbẹ jọ daoma, o tẹ make rọnọ whọ nọ riẹ tao ho. (Ọtausi. 7:9) Wọhọ Apọlọs, rọ omaurokpotọ gbe edẹro jẹ obufihọ na rehọ. Who te ru ere, u re dhesẹ nọ who wo areghẹ.—Itẹ 12:15.
4. Eme Jesu ọ ta nọ o re noi ze nọ ma tẹ be daoma wo ẹnyaharo evaọ usiuwoma ota na?
4 Ẹnyaharo Ra O rẹ Wha Orro Se Ọghẹnẹ: Jesu ọ rọ ọtadhesẹ jọ fiobọhọ kẹ ilele riẹ oware nọ o rọ gwọlọ nọ a re wo ẹnyaharo evaọ iruo usiuwoma ota na. Ọ ta nọ ọyomariẹ yọ ure evaene, ilele riẹ nọ a rọ ẹzi wholo na kọ egha. Ọ ta nọ Ọsẹ riẹ ọ rẹ rẹrote ogha kpobi nọ o be mọ ibi re “o gbẹ mọ ibi viere.” (Jọn 15:2) Wọhọ epanọ ohwo nọ o wo ọgbọ evaene ọ rẹ gwọlọ nọ egha ure na e mọ ibi ziezi na, ere ọvona Jihova ọ gwọlọ nọ ma re gbe wo ẹnyaharo ẹkwoma “unu mai” nọ ma re ro whowho odẹ riẹ. (Hib. 13:15) Eme o re noi ze nọ ma tẹ be daoma wo ẹnyaharo evaọ usiuwoma ota na? Jesu ọ kuyo na nọ: “Onana o rẹ kẹ Ọsẹ mẹ oruaro, nọ wha tẹ be mọ ibi buobu.”—Jọn 15:8.