Epanọ Ma Sai ro Wo Onaa Ziezi Evaọ Usiuwoma Ota —Rehọ Ifonu Ta Usiuwoma

Oware nọ U ro Wuzou: Onana yọ edhere ọfa jọ nọ ma sai ro fiobọhọ kẹ ahwo wo eriariẹ egbagba nọ e rẹ wha esiwo se ai. (2 Pita 3:9) Dede nọ usiuwoma n’uwou ruọ uwou na họ ugogo edhere nọ ma bi ro whowho emamọ usi Uvie Ọghẹnẹ, ma rẹ daoma re ma rọ idhere efa ta usiuwoma kẹ ahwo nọ ma re dihọ uwou hu.—Mat. 24:14; Luk 10:1-7; Evia. 14:6.

Epanọ A re ro Ru Ei:

Nọ ma tẹ be rehọ ifonu ta usiuwoma, jọ ẹme mai ọ jọ wọhọ epanọ imava e be ta ẹme. Iwhowho-uvie nọ i bi mu onana họ obọ a sai se ẹme na no obe ze, rekọ ọ jọ evaọ edhere nọ ohwo ọdekọ ọ sae rọ kpahe fihọ ẹme na.
Eme-emuhọ nọ e rrọ obe Reasoning From the Scriptures, Odibọgba Uvie Mai, gbe omobe-ovẹvẹ na Kọ Whọ Gwọlọ Riẹ Uzẹme Na? e rẹ sai fiobọhọ evaọ abọ nana. Nọ whọ tẹ be ruẹrẹ ẹme nọ whọ te ta họ, wo uzoẹme jọ họ iroro, ruẹrẹ onọ jọ kpahe, jẹ ruẹrẹ eria Ebaibol nọ e kẹ uyo onọ na fihọ.
Ta kpahe ebe nọ ma be rọ kẹ ahwo evaọ amara yena.
Whọ ta ẹme na kpata kpata ha. Dhesẹ adhẹẹ, odiri, jẹ jọ whẹtiẹ whẹtiẹ, keme ohwo nọ whọ be jọ ifonu lele ta ẹme na ọ rẹ sai vuhu onana mu. Gaviezọ nọ ohwo na ọ tẹ be ta ẹme, je yere iei kẹ ọkpahefihọ riẹ.
Whọ fodẹ ọruẹrẹfihotọ azọhọ unevaze na ha, keme ohwo na ọ sai roro nọ onana yọ edhere nọ a be rọ yare igho evaọ ifonu.

Dao Onana Evaọ Amara Na:

Nọ wha te bi ru egagọ uviuwou, jọ imava jọ i ru odhesẹvia nọ a be jọ ta ẹme thabọ no ohwohwo, yọ a kiuke ku ohwohwo.