Kọ Ẹme Ọghẹnẹ Ọ be Jọ Oma Ra Ru Iruo Kẹdẹ Kẹdẹ?

Ma te bi se Ebaibol na kẹdẹ kẹdẹ, u re fiobọhọ kẹ omai “dadawọ mu otọ” je “dikihẹ ga evaọ ẹrọwọ na.” (Kọl. 2:​6, 7) Rekọ, re Ẹme Ọghẹnẹ ọ sae jọ oma mai ru iruo, ma re roro didi kpahe eware nọ ma se je fi ai họ iruo. (Hib. 4:12; Jem. 1:​22-25) A jọ obe Joshua 1:8 dhesẹ eware esa nọ ma re ru: (1) Se Ẹme Ọghẹnẹ “te aso te uvo.” (2) Romatotọ sei, onọ u dhesẹ nọ who re sei evaọ oghẹrẹ nọ whọ sai ro roro didi kpahe oware nọ who bi se, je fi omara họ iku na. (3) Daoma “ru epanọ a kere fihọ eva riẹ.” Ma tẹ be hai ru eware esa nana, eware i ti “kiehọ” kẹ omai, ma ve ti je wo “obọ okparọ,” hayo areghẹ evaọ uzuazọ.