Kọ Akpọ na O ti Kuhọ?

Ẹsejọhọ whọ riẹ nọ Ebaibol na ọ ta kpahe ekuhọ akpọ na. (1 Jọn 2:17) Kọ ekuhọ ahwo-akpọ Ebaibol na ọ be ta kpahe na? Kọ a te raha otọakpọ na no hayo ru ei fihọ oghẹrẹ nọ a gbẹ sae rọ rriae he?

UYO NỌ EBAIBOL NA Ọ KẸ KPAHE ENỌ IVẸ NANA HỌ IJO!

Eme O ti Kuhọ Họ?

AHWO-AKPỌ

Oware nọ Ebaibol na ọ ta: Orọnikọ Ọghẹnẹ ọ ma otọakpọ na “gheghe ababọ ẹjiroro ho, rekọ ọ ruẹrẹ iẹe họ re a rriae.”—AIZAYA 45:18.

OTỌAKPỌ NA

Oware nọ Ebaibol na ọ ta: “Oge jọ ọ be vrẹ yọ oge ọfa ọ be tha, rekọ otọakpọ na o rẹ jọ bẹdẹ bẹdẹ.”—ỌTAUSIUWOMA NA 1:4.

OWARE NỌ ONANA U DHESẸ: Ebaibol na o dhesẹ nọ a te raha otọakpọ na no vievie he, ukpoye ahwo a te rriae bẹdẹ bẹdẹ. Fikiere, eme ekuhọ akpọ na u dhesẹ?

RORO KPAHE ONANA: Ebaibol na ọ rehọ ekuhọ akpọ na rọ wawo epanọ eware e jọ evaọ oke Noa. Evaọ oke yena, “ozighi” o da otọakpọ na fia. (Emuhọ 6:13) Rekọ Noa ọ jọ ohwo okiẹrẹe. Fikiere Ọghẹnẹ o siwi Noa avọ ahwo uviuwou riẹ evaọ okenọ ọ rọ owhe raha ahwo oyoma. Ebaibol ọ ta kpahe oware nọ o via evaọ oke Noa na inọ a “raha akpọ oke yena okenọ ame o ku ei.” (2 Pita 3:6) Ere akpọ oke yena o ro kuhọ. Rekọ eme a raha? Orọnikọ otọakpọ na a raha ha, rekọ ahwo oyoma nọ a jọ akpọ na. Fikiere nọ Ebaibol na ọ tẹ ta kpahe ekuhọ akpọ na, orọnikọ ọ be ta nọ a te raha otọakpọ na no ho. Ukpoye o be ta kpahe ekuhọ ahwo oyoma gbe eyoma kpobi nọ o da akpọ na fia na.

Eme O ti Kuhọ?

EBẸBẸ GBE EMUEMU

Oware nọ Ebaibol na ọ ta: “Omoke kakao ọvo u kiọkọ, ahwo omuomu na a gbẹ te jọ họ; who ti rri oria nọ a jọ vẹre, a gbẹ te jọ etẹe he. Rekọ enọ e be romakpotọ na e te rọ otọakpọ na reuku, yọ eva e te were ae gaga fiki udhedhẹ nọ o dafia.”—OLEZI 37:10, 11.

Iwoho na: 1. Iji jọ nọ i bi no uwou-eki nọ a je tho eware ze avọ eware nọ a rọ gba ovao rai. 2. Ọzae jọ nọ ọ be rehọ ẹkpa nọ igho e vọ eva rọkẹ ọzae ọfa jọ.

OWARE NỌ ONANA U DHESẸ: Owhe nọ o ku evaọ oke Noa na o si emuemu no akpọ na riẹriẹriẹ hẹ. Nọ owhe na o ku vrẹ no, ahwo omuomu a jẹ wariẹ ru eware iyoma nọ uzuazọ o jẹ rọ bẹ ahwo no. Rekọ kẹle na, Ọghẹnẹ o ti si emuemu kpobi no. Ọso-ilezi na ọ ta nọ: “Ahwo omuomu na a gbẹ te jọ họ.” Ọghẹnẹ ọ te rehọ ẹkwoma Uvie riẹ ro si emuemu kpobi no. Uvie Ọghẹnẹ u ti su no obọ odhiwu ziọ otọakpọ na, yọ u ti su ahwo kpobi nọ a yoẹme kẹ Ọghẹnẹ.

RORO KPAHE ONANA: Kọ isu akpọ na a te rọwo nọ Uvie Ọghẹnẹ o su ae? Ebaibol na o dhesẹ vevẹ nọ a te rọwo ho. Ukpoye, a te wọso Uvie Ọghẹnẹ. (Olezi 2:2) Eme o ti noi ze? Uvie Ọghẹnẹ o te raha egọmeti akpọ na kpobi no, kẹsena “oye ọvo u ve ti dikihẹ bẹdẹ bẹdẹ.” (Daniẹl 2:44) Rekọ fikieme o rọ gwọlọ nọ isuẹsu ahwo-akpọ i re kuhọ?

MA GWỌLỌ—Ekuhọ Isuẹsu Ahwo-Akpọ

Oware nọ Ebaibol na ọ ta: “Ohwo-akpọ nọ ọ be nya onya o wo ogaga nọ ọ rẹ rọ tubẹ kpọ ithihi riẹ dede he.”—JERIMAYA 10:23.

Ahwo a be nya oria jọ nọ a rọ iwoho ahwo nọ a gwọlọ ruọ esuo rọ tamu vrẹ.

OWARE NỌ ONANA U DHESẸ: Ọghẹnẹ ọ ma ahwo-akpọ re a su omarai hi. Oyejabọ nọ o rọ rrọ bẹbẹ kẹ ahwo-akpọ re a su ahwo-akpọ ibe rai hayo ku ebẹbẹ rai họ na.

RORO KPAHE ONANA: Obe jọ nọ a re se Britannica Academic o dhesẹ nọ o rrọ bẹbẹ kẹ egọmeti erẹwho kpobi re a “ku ebẹbẹ ahwo-akpọ họ, wọhọ uvuhu, ohọo, ẹyao, okpẹtu nọ ohwo ọ rọ obọ so ho, gbe ẹmo hayo ozighi.” O tẹ jẹ ta nọ: “Ahwo jọ . . . a roro nọ egọmeti nọ ọ rẹ sai ku ebẹbẹ ahwo-akpọ họ họ, egọmeti ọvo nọ o re su akpọ na soso.” O tẹ make rọnọ egọmeti akpọ na soso a kuomagbe, fikinọ a gbaha na, a te sai ku ebẹbẹ nọ ma fodẹ na họ ghele he. Uvie Ọghẹnẹ ọvo họ egọmeti nọ o wo ogaga nọ ọ sai ro ku ebẹbẹ ahwo-akpọ họ riẹriẹriẹ.

Fikiere wọhọ epanọ Ebaibol na o dhesẹ, u du gwọlọ nọ ahwo owoma a rẹ dhozọ ukuhọ akpọ na ha. Ukpoye, u fo nọ a re rẹro riẹ keme nọ Ọghẹnẹ ọ tẹ raha akpọ omuomu nana no, o ve ti zihe otọakpọ na kpobi ruọ akpọ ọkpokpọ!