Fikieme Omukpahọ O rọ Da Oria Kpobi Fia?

Fikieme omukpahọ o rọ da akpọ na fia enẹ? Re ma riẹ oware nọ o be whae ze, u fo nọ ma rẹ riẹ oware nọ omukpahọ o rrọ, oware nọ ahwo a re ro mukpahe amọfa, gbe oghẹrẹ nọ uruemu omukpahọ o rẹ rọ vaha no oria ruọ oria.

Eme Họ Omukpahọ?

A sae dhesẹ omukpahọ wọhọ epanọ eva amọfa hayo utu ahwo jọ o rẹ dha ohwo krekrekre. Oghẹrẹ evedha nana e rẹ kaki no ohwo udu hu.

OWARE NỌ AHWO A RE RO MUKPAHE AMỌFA

Eware buobu e rẹ whae ze nọ ahwo a re ro mukpahe amọfa. Ẹsibuobu ahwo a re mukpahe amọfa fiki oria nọ a no ze, orọnikọ fiki oware jọ nọ a ru thọ họ. A re rri ahwo nọ a mukpahe na wọhọ ikpehre ahwo, ahwo nọ a wo ekpehre iroro, hayo ahwo nọ a sai nwene he. A sai je rri rai wọhọ ahwo nọ a woma te amọfa ha, ahwo nọ a rẹ sae nwa amọfa oma, hayo ahwo nọ a rẹ wha okpẹtu ze. O sae jọnọ ahwo nọ a bi mukpahe amọfa na a rẹriẹ ovao dhe ozighi, okienyẹ, gbe eware itienana efa no, yọ fiki onana a bi ro mukpahe amọfa na.

OGHẸRẸ NỌ OMUKPAHỌ O RẸ RỌ VAHA

Ohwo ọ sai mukpahe amọfa o tẹ make rọnọ ọ re ruẹ ahwo na ẹdẹvo ho. Wọhọ oriruo, ohwo ọ sai rri utu ahwo jọ oghẹrẹ nọ u fo ho keme ere ahwo uviuwou riẹ hayo egbẹnyusu riẹ a bi rri ahwo na. Fikiere nọ ahwo a te mukpahe amọfa, o sae jọ lọlọhọ re ahwo uviuwou rai hayo ahwo ẹwho rai a mukpahe utu ahwo na nọ oke o be nyaharo na.

Nọ ma tẹ riẹ nọ omukpahọ o sae vaha no oria ruọ oria lọlọhọ, u re fiobọhọ kẹ omai riẹ oware nọ ahwo buobu a ro mukpahe amọfa. Re ma sae riẹ oware nọ o be whae ze nọ omukpahọ o rọ da akpọ na fia nẹnẹ, u fo nọ ma rẹ riẹ epanọ omukpahọ o ro muhọ, yọ Ebaibol na ọ ta kpahe onana.

EBAIBOL NA O DHESẸ EPANỌ OMUKPAHỌ O RO MUHỌ

Isi ivẹ nọ a ro dhesẹ eware nọ e be whae ze nọ omukpahọ o gbe bi ro kuhọ họ. 1. Eme-ọtaraha evaọ usu ahwo nọ a rrọ utu, evaọ itanẹte, gbe eria iyẹrẹ. 2. Ahwo a rrọ igbori kpahe uruemu ẹwho, ovioma hayo egagọ amọfa. 3. Ozọ inọ eware i ti nwene, a ti mi ae eware rai no, hayo a riẹ oware nọ o te via ha. 4. Omukpahọ, omohẹriẹ, omagbẹre, gbe ozighi.

ORỌNIKỌ OBỌ AHWO-AKPỌ OMUKPAHỌ O MUHỌ NO ZE HE. Omukpahọ o muhọ evaọ oke nọ ukọ-odhiwu jọ nọ a se Setan Ẹdhọ na, ọ wọso Ọghẹnẹ. Ẹdhọ “ọ rrọ ojihẹ anwẹnọ” o ro mu Ọghẹnẹ họ ẹwọso. Ẹdhọ yọ “ọtọrue” gbe “ọsẹ ọrue,” yọ o bi ru nọ ahwo a bi ro mukpahe ohwohwo je ru eware iyoma. (Jọn 8:44; 1 Jọn 3:11, 12) Ebaibol na o dhesẹ nọ Ẹdhọ ọ rrọ muomu, ọ vọ avọ ofu, yọ o bi dhuaro gaga.—Job 2:7; Eviavia 12:9, 12, 17.

FIKINỌ AHWO-AKPỌ A GBA HA, O RRỌ LỌLỌHỌ RE A MUKPAHE ỌRIVẸ RAI. Adamu nọ ọ rrọ ohwo ọsosuọ nọ Ọghẹnẹ ọ ma, ọ rọ aro kele Setan raha uzi. Fikiere ahwo-akpọ kpobi a reuku uzioraha gbe sebaẹgba mi ei. (Ahwo Rom 5:12) Keni nọ ọ jọ ọmọ ọsosuọ Adamu, o kpe oniọvo riẹ Ebẹle fiki omukpahọ. (1 Jọn 3:12) Dede nọ ahwo buobu a bi dhesẹ uyoyou gbe ohrọ-oriọ nẹnẹ, uzioraha nọ ma reuku riẹ na u bi ru nọ ahwo buobu gbidi gbidi a bi ro dhesẹ uruemu oriobọ, ihri-eriọ gbe omorro, yọ iruemu nana e rẹ wha omukpahọ ze.—2 Timoti 3:1-5.

O RRỌ LỌLỌHỌ RE OHWO O MUKPAHE AMỌFA NỌ EVA RAI E TẸ BE HAE DHAE. Omukpahọ o da akpọ na fia keme ahwo buobu a re dhesẹ ekpehre uruemu, a re ru eware nọ e rẹ nwa amọfa oma, yọ a wo ohrọ-oriọ họ. Evedha, ekela, ẹme-ọgwọlọ, gbe ọraha, e da akpọ na fia keme “akpọ na soso ọ rrọ otọ ogaga omuomu na,” Setan Ẹdhọ na.—1 Jọn 5:19.

Dede na, orọnikọ epanọ omukpahọ o ro muhọ ọvo Ebaibol na ọ ta kpahe he. Ọ ta kpahe epanọ o ti ro kuhọ re.