UZOẸME UWUHRẸ 21
Ẹvẹ Obe Eviavia O Ta nọ Akpọ Ra Ọ te Jọ Evaọ Obaro?
“Ami! Nyaze, Olori Jesu.”—EVIA. 22:20.
OLE AVỌ 142 Ma rẹ Dadabọ Mu Ẹruore Mai
EWARE NỌ MA TI WUHRẸa
1. Eme o gba ohwo-akpọ kpobi họ nọ o re ru nẹnẹ?
NẸNẸ na, o gwọlọ nọ ohwo kpobi ọ rẹ jọ abọ jọ. Kọ ma te jọ abọ Jihova Ọghẹnẹ fikinọ ma vuhumu nọ ọye o fo ọnọ o re su odhiwu gbe akpọ na? Manikọ abọ Setan, ọwegrẹ ologbo Ọghẹnẹ ma te jọ? Ohwo nọ ọ rrọ abọ Jihova ha, kiyọ abọ Setan ọ rrọ. Whọ tẹ rrọ abọ Jihova, ẹsiẹe ọvo whọ sai ro wo uzuazọ ebẹdẹ bẹdẹ. (Mat. 25:31-33, 46) Evaọ oke “uye ulogbo na,” ahwo nọ a kpe oka họ ọvo a te zọ, enọ i kiọkọ kọ ọrahakufiẹ.—Evia. 7:14; 14:9-11; Izik. 9:4, 6.
2. (a) Eme obe Ahwo Hibru 10:35-39 o vuẹ omai nọ ma ru? (b) Eme obe Eviavia o sai fiobọhọ kẹ omai ru?
2 Se Ahwo Hibru 10:35-39. Otẹrọnọ whọ ta nọ abọ Jihova whọ rẹ jọ, yọ emamọ iroro whọ jẹ na. U fo nọ who re fiobọhọ kẹ amọfa re a rọwo nọ abọ Jihova a rẹ jọ re. Whọ rẹ sae rọ eware nọ e rrọ obe Eviavia na fiobọhọ kẹ ae. A jọ obe yena ta kpahe uye nọ u ti te ahwo nọ a rọwo nọ Jihova o su ai hi, gbe eghale nọ i ti te enọ e romakpotọ kẹ esuo riẹ. Joma ta kpahe eware nana. U ti fiobọhọ kẹ omai gbẹ gọ Jihova ziezi nọ orọnọ ma salọ nọ abọ riẹ ma rẹ jọ na. U te no ere no, ma sae rehọ eware nọ ma wuhrẹ na wuhrẹ amọfa re a nyaziọ abọ Jihova jẹ whaha oware kpobi nọ u re si ai no abọ riẹ.
3. Eme ma te ta ẹme kpahe evaọ uzoẹme nana?
3 Ma te jọ uzoẹme nana kẹ uyo enọ nana: Eghale vẹ i ti te ahwo nọ a rọwo nọ Ọghẹnẹ o su ai? Eme ọ te via kẹ ahwo nọ a rrọ abọ arao ojihẹ ọwawae nọ a ta ẹme kpahe evaọ obe Eviavia na?
EGHALE NỌ I TI TE AHWO NỌ A YOẸME KẸ ỌGHẸNẸ
4. Amono Jọn ukọ na ọ ruẹ nọ a dikihẹ kugbe Jesu evaọ obọ odhiwu?
4 Jọn ukọ na ọ jọ eruẹaruẹ ruẹ itu ahwo ivẹ jọ nọ e be romakpotọ kẹ Jihova, nọ i ti wo uzuazọ ebẹdẹ bẹdẹ. Utu ọsosuọ họ ahwo nọ a bu te idu udhuhrẹ-gbene (144,000). (Evia. 7:4) A te rehọ ae kpobọ odhiwu, a ve ti lele Jesu su otọakpọ na. (Evia. 5:9, 10; 14:3, 4) Jọn ọ jọ eruẹaruẹ na ruẹ nọ ahwo nana a dikihẹ kugbe Jesu evaọ Ugbehru Zayọn, koyehọ obọ odhiwu.—Evia. 14:1.
5. Kẹle na, ẹvẹ Ọghẹnẹ o ti ru ahwo nọ a kiọkọ otọakpọ evaọ usu ahwo idu udhuhrẹ-gbene na?
5 Anwọ oke ikọ na ze Jihova ọ be rọ salọ ahwo nọ a te jọ usu ahwo idu udhuhrẹ-gbene (144,000) na. (Luk 12:32; Rom 8:17) Rekọ a jọ eruẹaruẹ na vuẹ Jọn nọ evaọ edẹ urere na, umutho rai ọvo a te gbẹ jọ otọakpọ na. Taure uye ulogbo na u te ti muhọ, a ti “kpe oka” urere họ “enọ i kiọkọ” otọakpọ na. Onana u dhesẹ nọ Jihova o rri rai nọ a te ahwo nọ a re kpobọ odhiwu. (Evia. 7:2, 3; 12:17) Kẹsena nọ uye ulogbo na u te muhọ no, a vẹ te rehọ ae kpobọ odhiwu nyai kuomagbe enọ i kpobọ odhiwu no vẹre. A vẹ te jọ obọ odhiwu lele Jesu su evaọ Uvie Ọghẹnẹ.—Mat. 24:31; Evia. 5:9, 10.
6-7. (a) Amono ọfa Jọn ọ ruẹ, kọ eme a ta kpahe ae? (b) Fikieme u ro fo re ikpodhiwu na gbe “ogbotu obuobu” na a riẹ eware nọ e rrọ Eviavia uzou avọ 7 na?
6 Nọ Jọn ọ ruẹ ahwo idu udhuhrẹ-gbene (144,000) na no, ọ tẹ ruẹ “ogbotu obuobu” jọ. Utu ọsosuọ na a wo unu, rekọ utu avọ ivẹ na, a rẹ sai kele ai mu hu. (Evia. 7:9, 10) Nọ amono na? Jọn ọ ta nọ: “Enana họ enọ i no uye ulogbo na ze, yọ a fọrọ iwu ithethei rai je ru ae fo no evaọ azẹ Omogodẹ na.” (Evia. 7:14) “Ogbotu obuobu” na a te zọ evaọ uye ulogbo na, a vẹ te rọ otọakpọ na reuku, yọ eghale buobu i ti te ae obọ.—Ol. 37:9-11, 27-29; Itẹ 2:21, 22; Evia. 7:16, 17.
7 Otẹrọnọ usu ahwo nọ a ti kpobọ odhiwu whọ rrọ, hayo enọ e te jọ otọakpọ na, kọ u mu owhẹ ẹro nọ eghale nọ a ta kpahe evaọ obe Eviavia uzou avọ 7 na i ti te owhẹ obọ? Jọ u mu owhẹ ẹro. Eghale buobu e rrọ obaro tha nọ i ti te idibo Ọghẹnẹ nọ i ti kpobọ odhiwu gbe enọ e te jọ otọakpọ na. Eva e te were omai gaga inọ ma rọwo nọ ma rẹ jọ abọ Jihova re o su omai. Eme ọfa obe Eviavia o vuẹ omai kpahe uye ulogbo na?—Mat. 24:21.
OWARE NỌ O TE VIA KẸ AHWO NỌ A WỌSO ỌGHẸNẸ
8. Eme o ti dhesẹ nọ uye ulogbo na u muhọ no, kọ eme ahwo a ti ru evaọ oke yena?
8 Wọhọ epanọ ma ta evaọ uzoẹme nọ o vrẹ na, isu akpọ na a te họre Babilọn Ologbo na, koyehọ egagọ erue nọ e rrọ akpọ na soso. (Evia. 17:16, 17) Enẹ uye ulogbo na u ti ro muhọ. Kọ onana o te whae ze nọ ahwo a ti ro zurie ze te gọ Jihova evaọ oke yena? Ijo. Ukpenọ a dhẹ bru Jihova re ọ thọ ae, obe Eviavia uzou avọ 6 u dhesẹ nọ ahwo buobu a te dhẹ bru isu akpọ na gbe itu ekiọthuọ re a thọ ae. Isu gbe egba-ihreki nana eye a jọ oria Ebaibol yena se igbehru na. Jihova o ti rri rai inọ a be wọso ẹe keme a be romakpotọ kẹ esuo riẹ hẹ.—Luk 11:23; Evia. 6:15-17.
9. Eme ọ te lẹliẹ idibo Ọghẹnẹ wo ohẹriẹ no ahwo nọ i kiọkọ evaọ oke uye ulogbo na, kọ eme o ti noi ze?
9 Idibo Jihova a ti wo ohẹriẹ no ahwo nọ i kiọkọ kpobi evaọ oke uye ulogbo na. Ae ọvo a te jọ ahwo nọ a gbẹ be gọ Jihova Ọghẹnẹ evaọ otọakpọ na. A te rọwo nọ a rẹ jọ abọ “arao ojihẹ na” vievie he. (Evia. 13:14-17) Onana o te whae ze nọ ahwo nọ a be wọso Jihova a ti ro mukpahe ae. Uwhremu na, erẹwho buobu a ve ti kuomagbe re a họre idibo Ọghẹnẹ nọ e rrọ akpọ na soso. Erẹwho nana nọ e te wọ ohọre bru ae na eye a jọ Ebaibol se Gọg obọ Magọg na.—Izik. 38:14-16.
10. Wọhọ epanọ o rrọ Eviavia 19:19-21, eme Jihova o ti ru ahwo nọ a wọ ohọre bru idibo riẹ?
10 Eme Jihova o ti ru evaọ oke nọ a te rọ wọ ohọre bru ahwo riẹ ze na? Ọ ta nọ: “Ofu ọgaga mẹ ọ te wọ ze.” (Izik. 38:18, 21-23) Obe Eviavia uzou avọ 19 o vuẹ omai oware nọ Jihova o ti ru. O ti vi Ọmọ riẹ re ọ thọ ahwo riẹ je kpe ewegrẹ riẹ kpobi no. “Egbaẹmo obọ odhiwu,” koyehọ ikọ-odhiwu gbe ahwo idu udhuhrẹ-gbene (144,000) na a ti lele Jesu wọ ohọre bru ewegrẹ Ọghẹnẹ. (Evia. 17:14; 19:11-15) Ẹvẹ ẹmo nana o ti ro kuhọ? A ti kpe ahwo gbe ikoko kpobi nọ e be wọso Jihova Ọghẹnẹ no.—Se Eviavia 19:19-21.
A TE FI ẸMO NA NO, A VE TI RU EHAA ORỌO
11. Oware oghọghọ vẹ a ta ẹme kpahe evaọ ubrobọ ekuhọ obe Eviavia?
11 Eva e te were idibo Ọghẹnẹ nọ e zọ evaọ ẹmo na gaga nọ a tẹ raha ewegrẹ Ọghẹnẹ kpobi no. Dede nọ a te jọ obọ odhiwu ghọghọ gaga nọ a tẹ raha Babilọn Ologbo na no, oware ofa jọ o riẹ nọ o te tubẹ mae lẹliẹ ae ghọghọ. (Evia. 19:1-3) Oye họ “orọo Omogodẹ na” nọ a ta ẹme kpahe evaọ ubrobọ ekuhọ obe Eviavia na.—Evia. 19:6-9.
12. Wọhọ epanọ o rrọ Eviavia 21:1, 2, oke vẹ a ti ro ru ehaa orọo Omogodẹ na?
12 Oke vẹ a ti ro ru ehaa orọo na? Taure a te ti fi ẹmo Amagidọn, yọ ahwo idu udhuhrẹ-gbene (144,000) na kpobi a kpobọ odhiwu no. Rekọ orọnọ oke yena a ti ro ru ehaa orọo Omogodẹ na ha. (Se Eviavia 21:1, 2.) A ti ru ehaa orọo Omogodẹ na nọ a te fi ẹmo Amagidọn no. Oke yena yọ a si Ẹdhọ avọ idhivẹri riẹ no otọakpọ na no, jẹ raha ewegrẹ Ọghẹnẹ efa kpobi no.—Ol. 45:3, 4, 13-17.
13. Eme họ ehaa orọo Omogodẹ na?
13 Eme họ ehaa orọo Omogodẹ na nọ ma be ta ẹme riẹ na? Nọ a tẹ ta ẹme te ehaa orọo, u dhesẹ nọ ọzae avọ aye a bi ti kuomagbe re a jọ ọvo. Epọvo na re, ehaa orọo Jesu Kristi Ovie na họ oke nọ ahwo idu udhuhrẹ-gbene (144,000) nọ a se “ọmọtibobo” riẹ na a ti ro kuomagbei re a muhọ esu, yọ a ti su otọakpọ na ikpe odu (1,000).—Evia. 20:6.
OKPẸWHO OWOMA JỌ GBE EGHALE NỌ I TI TE OWHẸ
Okpẹwho Jerusalẹm Ọkpokpọ na nọ a ta kpahe evaọ obe Eviavia uzou avọ 21 na. Ebaibol ọ jọ etẹe ta nọ okpẹwho na “o bi no obọ odhiwu ze, no obọ Ọghẹnẹ ze.” Jerusalẹm Ọkpokpọ na ọ te whae ze nọ ahwo nọ a yoẹme kẹ Ọghẹnẹ a ti ro wo eghale buobu evaọ oke Esuo Odu-Ikpe na (Rri edhe-ẹme avọ 14-16)
14-15. Ẹvẹ a se ahwo idu udhuhrẹ-gbene na evaọ Eviavia uzou avọ 21? (Rri uwoho nọ o rrọ uke emagazini na.)
14 Jọn ọ ruẹ oware ofa jọ. Ọ jọ obe Eviavia uzou avọ 21 ta nọ ọ ruẹ okpẹwho owowoma jọ. A se rie “Jerusalẹm Ọkpokpọ” na. Oye họ ahwo idu udhuhrẹ-gbene (144,000) na. (Evia. 21:2, 9) Okpẹwho na u wo otọhotọ nọ u wo itho ikpegbivẹ, yọ a kere “edẹ ikpegbivẹ erọ ikọ ikpegbivẹ Omogodẹ na” fihọ ae. Eme ọ lẹliẹ Jọn muẹrohọ edẹ na tere? Keme a kere odẹ riẹ fihọ utho na jọ. Ma riẹ nọ eva e te were iẹe gaga.—Evia. 21:10-14; Ẹf. 2:20.
15 A rẹ ruẹ obọ orẹwho nana ha. Emamọ igoru a ro ru iyẹrẹ ologbo riẹ. O wo inuethẹ ikpegbivẹ, itho eghaghae a ro ru otọhotọ riẹ jẹ ma igbẹhẹ riẹ, yọ igbẹhẹ gbe eware nọ a bọ fihọ iẹe kpobi, a nabe ma ae ziezi. (Evia. 21:15-21) Rekọ u wo oware jọ nọ Jọn ọ ruẹ hẹ evaọ okpẹwho na. Ọ ta nọ: “Mẹ ruẹ etẹmpol evaọ eva riẹ hẹ, keme Jihova Ọghẹnẹ Erumeru na họ etẹmpol riẹ, ere Omogodẹ na re. U du gwọlọ nọ ọre hayo ọvẹre o re lo fihọ okpẹwho na ha, keme oruaro Ọghẹnẹ o whẹ elo fihọ iẹe no, yọ ukpẹ riẹ họ Omogodẹ na.” (Evia. 21:22, 23) Ahwo nọ a se Jerusalẹm Ọkpokpọ na a te jọ kugbe Jihova. (Hib. 7:27; Evia. 22:3, 4) Oyejabọ nọ a rọ ta nọ Jihova avọ Jesu họ etẹmpol nọ ọ rrọ okpẹwho na.
Amono a ti wo eghale nọ a rehọ “ethẹ ame uzuazọ” gbe “ire” dhesẹ na? (Rri edhe-ẹme avọ 16-17)
16. Eghale vẹ i ti te ahwo-akpọ evaọ oke Esuo Odu-Ikpe na?
16 Ileleikristi nọ a rọ ẹzi wholo na a te roro kpahe okpẹwho na, eva e rẹ were ae gaga. Yọ enọ i wo ẹruore inọ a te rọ otọakpọ na reuku na, eva e rẹ were ae re nọ a te roro kpahe iẹe. Nọ Esuo Odu-Ikpe na o te muhọ no, Jerusalẹm Ọkpokpọ na ọ te wha eghale buobu se ahwo-akpọ. Jọn ọ jọ eruẹaruẹ ruẹ eghale nana nọ e wọhọ “ethẹ ame uzuazọ” nọ o bi kporo ẹkẹre. Yọ tabọ tabọ ethẹ na, “ire uzuazọ” e riẹ nọ ebe rai e rrọ rọkẹ “usiwo erẹwho na.” (Evia. 22:1, 2) Ahwo kpobi nọ a yoẹme evaọ oke yena a ti wo eghale nana. Ẹmẹrera na, a ve ti zihe ruọ ahwo ọgbagba. Ẹyao, edada, oviẹ, gbe uweri e gbẹ te jọ họ.—Evia. 21:3-5.
17. Wọhọ epanọ Eviavia 20:11-13 o ta, amono eghale Esuo Odu-Ikpe na i ti te obọ?
17 Amono eghale nana i ti te obọ? Ahwo ọsosuọ họ, ogbotu obuobu nọ e te zọ evaọ Amagidọn, yọ a te yẹ emọ evaọ akpọ ọkpokpọ na, emọ rai a ti wo eghale nana re. Rekọ ae ọvo ho. Eviavia uzou avọ 20 o ta nọ a te kpare ahwo nọ a whu no ze. (Se Eviavia 20:11-13.) Ahwo nọ “i kiẹrẹe” nọ i whu no gbe “enọ i kiẹrẹe he,” koyehọ enọ uvẹ nọ a re ro wuhrẹ kpahe Jihova ziezi u rovie kẹ taure a te ti whu hu, a te kpare ae kpobi ze re a rria otọakpọ na. (Iruẹru 24:15; Jọn 5:28, 29) Kọ onana u dhesẹ nọ ohwo kpobi nọ o whu no a te kpare ze evaọ oke Esuo Odu-Ikpe na? Ijo. Ahwo nọ a hae sae gọ Jihova, rekọ a se thahe thahe inọ a rẹ gọe he, a te kpare ae ze he. Uvẹ u rovie kẹ ae nọ a hae sae rọ gọ Ọghẹnẹ, rekọ ẹse nọ a se na u dhesẹ nọ a fo ahwo nọ a rẹ rria Aparadase otọakpọ ha.—Mat. 25:46; 2 Tẹs. 1:9; Evia. 17:8; 20:15.
NỌ ODU-IKPE NA O TE KUHỌ NO
18. Nọ odu-ikpe na o te kuhọ no, ẹvẹ ahwo-akpọ a te jọ?
18 Nọ odu-ikpe na o te kuhọ no, ahwo nọ a te jọ otọakpọ na kpobi a te jọ gbagba. Eware e gbẹ te thọ omai obọ họ, yọ ma gbẹ te mọ hayo whu fiki uzioraha nọ ma reuku riẹ mi Adamu hu. (Rom 5:12) Oke yena yọ ehao nọ a bọwo omai fiki uzioraha Adamu na i no otọ no riẹriẹriẹ. Nọ odu-ikpe na o te kuhọ no ma te sae rọ ginẹ ta nọ ahwo-akpọ “a ziọ uzuazọ” no, keme ahwo kpobi a te jọ gbagba.—Evia. 20:5.
19. Fikieme a te rọ dawo ahwo-akpọ nọ odu-ikpe na o te re no?
19 Ma riẹ nọ, nọ Setan ọ dawo Jesu, Jesu o kie kẹ odawọ na ha. O kru ẹrọwọ riẹ. Kọ a tẹ kẹ Setan uvẹ re ọ dawo ahwo-akpọ nọ a rrọ gbagba, a te sai kru ẹrọwọ rai? Obọ mai ẹme na ọ rrọ. Nọ odu-ikpe na o te re no, a ti si Setan no ọgọdọ odidi na ze. Ọ vẹ te dawo ahwo kpobi sọ a ti yoẹme kẹ Ọghẹnẹ. (Evia. 20:7) Enọ i kru ẹrọwọ rai, nọ a kie kẹ odawọ urere na ha, a ve ti wo uzuazọ ebẹdẹ bẹdẹ gbe ufuoma nọ Ọghẹnẹ ọ ya eyaa riẹ na. (Rom 8:21) Enọ e wọso Ọghẹnẹ, a vẹ te raha ae kugbe Ẹdhọ avọ idhivẹri riẹ bẹdẹ bẹdẹ.—Evia. 20:8-10.
20. Ẹvẹ who rri eruẹaruẹ nọ ma ta ẹme te evaọ obe Eviavia na?
20 Kọ emeware nọ ma ta ẹme te evaọ obe Eviavia na i gbe ru eva were owhẹ? Kọ whọ gbẹ ruẹ nọ whọ rrọ usu ahwo nọ a ta ẹme kpahe evaọ eruẹaruẹ na? Ma riẹ nọ ọwhọ ọ rrọ owhẹ oma re who fiobọhọ kẹ amọfa nyaze ti kuomagbe omai gọ Jihova. (Evia. 22:17) Eruẹaruẹ nana i duobọte omai gaga, yọ e sae lẹliẹ omai ta ẹme nọ Jọn ukọ na ọ ta inọ: “Ami! Nyaze, Olori Jesu.”—Evia. 22:20.
OLE AVỌ 27 A ti Dhesẹ Emọ Ọghẹnẹ Via
[Ẹme-Obotọ]
a Ọnana họ uzoẹme urere evaọ usu izoẹme nọ ma be jọ ta kpahe obe Eviavia na. Ma te jariẹ wuhrẹ kpahe emamọ eware nọ Jihova o ti ru kẹ ahwo nọ a yoẹme kẹe gbe uye nọ u ti te ahwo nọ a rọwo nọ o su ai hi.