Wo Ẹruore nọ O re Kiekpe Ohwo Ho

1. Eme o lẹliẹ Abraham je rẹro nọ o ti yẹ ọmọ dede nọ ọ kpako no?

JIHOVA ọ ya eyaa kẹ Abraham ogbẹnyusu riẹ nọ “ẹkwoma ọmọ ra erẹwho otọakpọ na kpobi a ti wo oghale.” (Emu. 15:5; 22:18) Fikinọ Abraham o wo ẹrọwọ gaga, u mu rie ẹro nọ oware nọ Ọghẹnẹ ọ ta nọ o ti ru na o ti ru ei. Nọ ọ maki te ikpe udhusoi no, yọ aye riẹ o te ikpe udhone-gbikpe no, yọ o ri yẹ ọmọ họ. (Emu. 21:1-7) O make rrọ ere ghele na, Ebaibol ọ ta nọ: “[Abraham] ọ rọ fiki ẹruore wo ẹrọwọ inọ ọ te sae jọ ọsẹ erẹwho buobu wọhọ epanọ a ya eyaa kẹe.” (Rom 4:18) Whọ riẹ nọ Abraham ọ ginẹ rọ ẹro riẹ ruẹ oware nọ Ọghẹnẹ ọ ya eyaa riẹ kẹe na. O yẹ ọmọzae nọ o mu odẹ kẹ inọ Aiziki. Kọ eme o lẹliẹ Abraham riẹ nọ Ọghẹnẹ o ti gine ru oware nọ ọ ya eyaa riẹ na?

2. Fikieme u ro mu Abraham ẹro nọ oware nọ Jihova ọ ya eyaa riẹ na o ti gine ru ei gba?

² Fikinọ Abraham ọ riẹ Jihova ziezi, “u mu rie ẹro ziezi nọ oware nọ Ọghẹnẹ ọ ya eyaa riẹ na Ọ te sai ru ei gba.” (Rom 4:21) Fiki ẹrọwọ nọ Abraham o wo, Ọghẹnẹ ọ tẹ ta nọ o kiẹrẹe. (Jem. 2:23) Ma te rri ẹme nọ ọ rrọ obe Ahwo Rom 4:18, ma rẹ ruẹ nọ fikinọ Abraham o wo ẹruore, o lẹliẹ ẹrọwọ riẹ ga. Obọnana ma te ta ẹme kpahe oware nọ Pọl o kere kpahe ẹruore evaọ obe Ahwo Rom izou 5.

3. Eme Pọl ọ ta kpahe ẹruore?

³ Pọl ọ ta ẹme te ẹruore nọ ma wo. Ọ tẹ fodẹ oware nọ o lẹliẹ omai riẹ nọ “ẹruore na o re kiekpe ohwo ho.” (Rom 5:5) Pọl ọ ta re nọ ẹruore nọ ma wo ọ rẹ sae ga vi epanọ o jọ vẹre. Pọl ọ jọ obe Ahwo Rom 5:1-5 ta oghẹrẹ nọ ẹruore mai ọ rẹ rọ ga. Nọ ma ti wuhrẹ kpahe ẹme nọ ọ rrọ oria Ebaibol yena, hai roro kpahe ẹruore ra. Ẹsejọhọ whọ te ruẹ nọ ẹruore ra ọ ga vi epanọ o jọ no vẹre. Eware nọ ma ti wuhrẹ na e te lẹliẹ owhẹ ruẹ nọ whọ sai ru epanọ ẹruore ra o re ro mu owhẹ ẹro vi epanọ o mu owhẹ ẹro te enẹna. Joma ta ẹme kpahe obọdẹ ẹruore jọ nọ Pọl ọ ta ẹme te. Ọ ta nọ ẹruore na o re kiekpe ohwo ho.

OBỌDẸ ẸRUORE NỌ MA WO

4. Eme a jọ obe Ahwo Rom 5:1, 2 ta?

⁴ Se Ahwo Rom 5:1, 2. Pọl o kere ẹme yena se inievo nọ e jọ ukoko nọ o jọ obọ Rom. Inievo yena yọ ahwo nọ a wuhrẹ kpahe Jihova avọ Jesu no, a te je fi ẹrọwọ họ Ọghẹnẹ no. Yọ a kurẹriẹ ziọ ukoko Ileleikristi na no. Ọghẹnẹ ọ tẹ ‘rọ fiki ẹrọwọ kuenu kẹ ae nọ a kiẹrẹe.’ Ọ tẹ jẹ rọ ẹzi riẹ wholo ae. Fikiere Ileleikristi yena a wo obọdẹ ẹruore, yọ a riẹ nọ oware nọ a bi rẹro riẹ na u ti te ae obọ.

5. Ẹruore vẹ Ileleikristi nọ a rọ ẹzi wholo na a wo?

⁵ Okenọ Pọl o je kere ileta se Ileleikristi nọ e jọ obọ Ẹfisọs, ọ ta ẹme kpahe ẹruore nọ a wo. Ọ ta nọ a ti wo “efe obọdẹ nọ [Ọghẹnẹ] ọ te kẹ erẹri na wọhọ ukuoriọ.” (Ẹf. 1:18) Yọ okenọ Pọl o je kere ileta se Ileleikristi nọ e jọ obọ Kọlọsi, ọ vuẹ rai oria nọ osa na u ti jo te ae obọ. Ọ ta nọ a wo “ẹruore eware nọ a ruẹrẹhọ kẹ [ae] evaọ obọ idhiwu na.” (Kọl. 1:4, 5) Ileleikristi nọ a rọ ẹzi wholo a wo ẹruore nọ a te whu no, Ọghẹnẹ ọ te kpare ae kpobọ odhiwu, a vẹ te rria bẹdẹ bẹdẹ je lele Jesu su.—1 Tẹs. 4:13-17; Evia. 20:6.

6. Eme oniọvo jọ nọ a rọ ẹzi wholo ọ ta kpahe ẹruore riẹ?

⁶ Ẹruore nọ Ileleikristi nọ a rọ ẹzi wholo na a wo ọ were rai gaga. Oniọvo jọ nọ a re se Frederick Franz nọ ọ jọ usu inievo nọ a rọ ẹzi wholo ọ ta epanọ o rri ẹruore nọ o wo. Ọ ta nọ: “Oware nọ ma bi rẹro riẹ na o te via. O ti te ahwo idu udhuhrẹ-gbene (144,000) nọ a bi se uthuru okakao na kpobi obọ. O ti tube woma vi epanọ ma roro nọ o te jọ.” Nọ Brọda Franz ọ gọ Jihova te ikpe buobu no, evaọ ukpe 1991, ọ ta nọ: “Avro ọvuọvo ọ rrọ [omai] udu hu inọ oware nọ ma bi rẹro riẹ na o te via ha. . . . Dede nọ u kri no nọ ma bi ro rẹro riẹ, ẹruore na ọ be tubẹ were omai vi epaọ anwẹdẹ. Ma riẹ nọ oware nọ Ọghẹnẹ o ti ru kẹ omai na okpoware. Fikiere u te oware nọ ma rẹ hẹrẹ ikpe buobu, makọ ikpe ima ọvo dede. Ẹruore na ọ were omẹ tube vi epaọ anwẹdẹ no dede.”

7-8. Ẹruore vẹ idibo Jihova buobu a wo? (Ahwo Rom 8:20, 21)

⁷ Ahwo buobu nọ a be gọ Jihova nẹnẹ na a wo oghẹrẹ ẹruore ọfa jọ. A wo ẹruore inọ a te rria otọakpọ na bẹdẹ bẹdẹ nọ Uvie Ọghẹnẹ u te mu otọakpọ na họ esu no. Ẹruore yena Abraham o wo re. (Hib. 11:8-10, 13) Pọl o kere kpahe epanọ eware i ti woma te kẹ ahwo nọ a wo ẹruore yena. (Se Ahwo Rom 8:20, 21.) Evaọ oke ọsosuọ nọ whọ rọ jọ Ebaibol wuhrẹ kpahe obọdẹ eware nọ Ọghẹnẹ ọ ta nọ o ti ru kẹ omai, ọvẹ ọ mae were owhẹ evaọ usu rai? Kọ eyaa nọ Ọghẹnẹ ọ ya inọ whọ te jọ gbagba, oware ovo o te gbẹ thọ owhẹ obọ họ? Binikọ ahwo ra nọ a whu no nọ Ọghẹnẹ ọ te kpare ze evaọ akpọ ọkpokpọ na, whọ vẹ te wariẹ ruẹ e rai? Ma riẹ nọ who bi rẹro emamọ eware buobu fiki “ẹruore” akpọ ọkpokpọ nọ who wo na.

⁸ Te ma wo ẹruore inọ ma te rria bẹdẹ bẹdẹ evaọ obọ odhiwu hayo evaọ obọ otọakpọ obonẹ, obọdẹ ẹruore ma wo na. Yọ o rẹ lẹliẹ omai ghọghọ. Ẹruore na ọ sae tubẹ ga vi epanọ o jọ vẹre. Pọl ọ ta oware nọ o rẹ lẹliẹ ẹruore mai ga viere. Ma te ta ẹme kpahe iẹe. Eware nọ ma be te ta na e te lẹliẹ eyaa Ọghẹnẹ mu omai ẹro vi epaọ anwẹdẹ.

EPANỌ ẸRUORE MAI Ọ RẸ RỌ GA

9-10. Eme o via kẹ Pọl nọ ma riẹ nọ o sae via kẹ omai re? (Ahwo Rom 5:3) (Rri iwoho na re.)

⁹ Se Ahwo Rom 5:3. Obe Ahwo Rom izou 5 o dhesẹ nọ uye nọ u re te omai o rẹ lẹliẹ ẹruore mai ga. Ẹsejọ ẹme yena ọ sai gbe owhẹ unu. Uzẹme riẹ họ, u fo re Oleleikristi kpobi ọ riẹ nọ a te wọso ẹe. Yọ a wọso Pọl re. O kere se inievo nọ e jọ obọ Tẹsalonika nọ: “Nọ ma jọ kugbe owhai, ma vuẹ owhai kpahotọ nọ ma te ruẹ uye ukpokpoma, yọ oye o via no na.” (1 Tẹs. 3:4) O te je kere se inievo obọ Kọrint nọ: “Inievo, ma gwọlọ nọ wha jọ igbori uye nọ o bẹ omai evaọ ubrotọ Esia ha.” Ọ ta re nọ, u “te epanọ ma je ro roro nọ ma te zọ họ.”—2 Kọr. 1:8; 11:23-27.

¹⁰ Mai Ileleikristi nẹnẹ ma riẹ nọ uye o te siọ omai ba ete he. (2 Tim. 3:12) Kọ uye jọ u te owhẹ no anwẹnọ whọ rọ rrọ ukoko na? Ẹsejọhọ imoni ra hayo egbẹnyusu ra a je se owhẹ ẹkoko. O sae jọnọ a je tube mukpahe owhẹ dede. Kọ a be wọso owhẹ evaọ oria nọ who bi jo ru iruo fikinọ who bi lele ai ru eware iwhayo nọ a bi ru hu? (Hib. 13:18) Kọ ahwo egọmeti a be wọso owhẹ fikinọ whọ be ta usi uwoma kẹ ahwo kpahe eware nọ who bi rẹro rai? Pọl ọ ta nọ oghẹrẹ uye kpobi nọ u te omai kẹhẹ, joma hae ghọghọ. Fikieme ma jẹ ghọghọ?

11. Fikieme ma re ro thihakọ ẹbẹbẹ kpobi nọ o te omai?

¹¹ Ma te roro te oware nọ u re noi ze nọ uye u te te omai, o rẹ lẹliẹ omai ghọghọ. Obe Ahwo Rom 5:3 o ta nọ, “uye o rẹ wha ithihakọ ze.” Ebaibol ọ ta nọ a ti kpokpo Ileleikristi kpobi. Fikiere ma rẹ daoma thihakọ ẹbẹbẹ kpobi nọ o te omai. Keme ma riẹ nọ ohwo nọ o thihakọ te urere ọvo o ti wo eware nọ ma bi rẹro rai na. U wo oghẹrẹ ahwo jọ nọ Jesu ọ ta ẹme kpahe nọ ọ jẹ kẹ oriruo ibi nọ i kie fihọ itho. Oke ọsosuọ nọ a ta ẹme Ọghẹnẹ kẹ ae, o were rai. Rekọ nọ “uye hayo ukpokpoma o ze,” a te kie no. Joma jọ wọhọ ahwo otiọye na ha. (Mat. 13:5, 6, 20, 21) Ma riẹ nọ re ohwo o thihakọ ẹbẹbẹ, o lọhọ họ. Rekọ ma tẹ sai thihakọ, ma rẹ re erere riẹ. Erere vẹ?

12. Erere vẹ o re te omai nọ ma te thihakọ ebẹbẹ?

¹² Jemis olele na ọ fodẹ erere nọ o re te omai nọ ma te thihakọ ebẹbẹ. Ọ ta nọ: “Wha kuvẹ re ithihakọ i ru iruo riẹ gba, re wha sae gbunu jẹ kare afuẹwẹ evaọ kabọ kabọ, oware ovo o gbẹ kare owhai hi.” (Jem. 1:2-4) Jemis ọ be jọ etẹe ta nọ u wo iruo jọ nọ ithihakọ i re ru evaọ omamai. Kọ iruo vẹ eye? Nọ ma te bi thihakọ, o rẹ lẹliẹ omai wo odiri gbe ẹrọwọ gaga, jẹ rẹroso Jihova vi epaọ ọsosuọ. Rekọ erere ọfa ọ riẹ nọ ma re wo nọ ma te bi thihakọ.

13-14. Ẹvẹ Ọghẹnẹ o re rri omai nọ ma te bi thihakọ ẹbẹbẹ, kọ ẹvẹ o rẹ lẹliẹ ẹruore mai jọ? (Ahwo Rom 5:4)

¹³ Se Ahwo Rom 5:4. Pọl ọ ta nọ ithihakọ o rẹ whae ze nọ ma re ro wo “ọjẹrehọ Ọghẹnẹ.” Koyehọ who te bi thihakọ, o rẹ lẹliẹ eva ra were Ọghẹnẹ. Orọnikọ eva e rẹ were Jihova inọ uye u te owhẹ oma ha. Rekọ oware nọ o rẹ were iẹe na họ, who bi thihakọ ru oware nọ u fo. O tẹ so ẹe ze nọ ọ rọ rehọ owhẹ nọ whẹ yọ emamọ ohwo. Kọ oware u re gbe woma viere?—Ol. 5:12.

¹⁴ Kareghẹhọ nọ Abraham o thihakọ ebẹbẹ buobu. Yọ o wha riẹ ze nọ eva riẹ e rọ were Jihova gaga. Jihova o se rie ogbẹnyusu riẹ, o te je rri rie inọ o kiẹrẹe. (Emu. 15:6; Rom 4:13, 22) Ma sae jọ egbẹnyusu Ọghẹnẹ re, o ve je rri omai nọ ma kiẹrẹe. Orọnikọ epanọ ma ru iruo te no evaọ ukoko na hayo fiki iruo jọ nọ a kẹ omai evaọ ukoko na, oye ọvo eva mai e rẹ rọ were Ọghẹnẹ hẹ. Rekọ nọ ma te bi thihakọ ebẹbẹ jẹ be gọe vrẹ ghele. Mai kpobi ma sai thihakọ ebẹbẹ nọ i te omai, te omai ekpako, te omai emaha, te eware e rrọ oghẹrẹ jọ kẹ omai, hayo ma nwane riẹ te ahwo ho. Kọ ẹbẹbẹ jọ ọ rrọ otọ kẹ owhẹ nọ who bi thihakọ riẹ obọnana? O tẹ rrọ ere, riẹ nọ eva ra e be were Ọghẹnẹ. Yọ ma tẹ riẹ nọ eva mai e be were Ọghẹnẹ, o rẹ lẹliẹ omai gbẹ gọ Jihova vrẹ. Ẹruore mai ọ vẹ ga viere.

ẸRUORE MAI Ọ RẸ GA VI EPAỌ ỌSOSUỌ

15. Eme ọfa Pọl ọ ta kpahe ẹruore, kọ eme o sae lẹliẹ ẹme riẹ na gbe ohwo unu?

¹⁵ Pọl ọ ta nọ ma te bi thihakọ ẹbẹbẹ, eva mai e rẹ were Jihova. Rekọ o jọ etẹe kuhọ họ. Pọl ọ ta nọ: “Ọjẹrehọ Ọghẹnẹ o vẹ wha ẹruore ze, yọ ẹruore na o re kiekpe ohwo ho.” (Rom 5:4, 5) Ẹme yena ọ sai gbe ohwo unu. Fikieme? Keme evaọ obe Ahwo Rom 5:2, Pọl ọ ta nọ Ileleikristi obọ Rom na yọ ahwo nọ a wo ẹruore no vẹre. O se rie “ẹruore oruaro Ọghẹnẹ.” Kọ otẹrọnọ a wo ẹruore no vẹre, fikieme Pọl ọ be jẹ rọ ta nọ a ti wo ẹruore?

16. Oghẹrẹ vẹ ẹruore nọ ohwo o wo o rẹ rọ ga? (Rri iwoho na re.)

¹⁶ Ma tẹ riẹ nọ ẹruore nọ ma wo na ọ rẹ ga, ẹme Pọl na o ti vẹ omai ẹro. Kọ whọ kareghẹhọ oke ọsosuọ nọ whọ rọ riẹ kpahe emamọ ẹruore nọ Ebaibol ọ ta ẹme te na? Ẹsejọhọ oke yena o nwani mu owhẹ ẹro tere he inọ aparadase ọ te ginẹ ze, whọ vẹ te rria bẹdẹ bẹdẹ. Rekọ nọ who je bi wuhrẹ kpahe Jihova gbe eyaa nọ ọ ya evaọ Ebaibol na ziezi, ẹmẹrera na, u te ti mu owhẹ ẹro gaga inọ eware na e te ginẹ via.

17. Ẹvẹ ẹruore ra ọ rẹ rọ ga nọ whọ tẹ rọ uzuazọ ra kẹ Ọghẹnẹ jẹ họ-ame no?

¹⁷ Nọ whọ make rọ uzuazọ ra kẹ Ọghẹnẹ jẹ họ-ame no, who te gbe bi wuhrẹ kpahe Jihova. Whọ tẹ te kẹle iẹe gaga. Eware nọ who bi rẹro rai na i te bi mu owhẹ ẹro ga. (Hib. 5:13–6:1) Ẹsejọhọ eware nọ e via kẹ owhẹ no e lẹliẹ owhẹ ruẹ nọ ẹme nọ ọ rrọ obe Ahwo Rom 5:2-4 na ginọ uzẹme. O sae jọ nọ ebẹbẹ buobu i te owhẹ no, yọ who thihakọ rai. O tẹ lẹliẹ owhẹ riẹ nọ eva ra e be were Ọghẹnẹ. Yọ fikinọ whọ riẹ nọ eva ra e be were Ọghẹnẹ na, u te mu owhẹ ẹro viere inọ whọ te jọ usu ahwo nọ a te re erere eware nọ Ọghẹnẹ o ti ru kẹ omai evaọ obaro. Whọ ruẹ na? Ẹruore ra ọ ga vi epanọ o jọ no vẹre. Eyaa Ọghẹnẹ i mu owhẹ ẹro gaga. Who bi roro kpahe iẹe ẹsikpobi. Oware kpobi nọ whọ gwọlọ ru, iroro ra i re kpohọ iẹe. Yọ o be lẹliẹ owhẹ rria dhedhẹ kugbe ahwo uwou ra jẹ rọ oke ra ru eware nọ e mae roja.

18. Eme o lẹliẹ omai riẹ nọ Jihova o ti ru eware nọ ọ ya eyaa rai na gba?

¹⁸ Pọl ọ ta ẹme ọfa jọ kpahe ẹruore nọ ohwo o re wo nọ ọ tẹ riẹ nọ eva riẹ e be were Ọghẹnẹ. Ọ ta nọ ẹruore yena o ti kiekpe owhẹ hẹ. Fikieme u ro mu omai ẹro tere? Ọghẹnẹ ọ rọ Pọl vuẹ omai nọ: “Ẹruore na o re kiekpe ohwo ho; keme Ọghẹnẹ ọ rehọ ẹkwoma ẹzi ọfuafo riẹ nọ ọ kẹ omai rọ uyoyou riẹ vọ udu mai no.” (Rom 5:5) Fikiere riẹ nọ eware nọ who bi rẹro rai na e te ginẹ via. Jọ avro ọvuọvo ọ jọ owhẹ udu hu.

19. Eme o lẹliẹ owhẹ riẹ nọ ẹruore ra o ti kiekpe owhẹ hẹ?

¹⁹ Kareghẹhọ nọ eva Abraham e jẹ were Ọghẹnẹ yọ ọ jọ ogbẹnyusu Ọghẹnẹ. Jihova ọ ya eyaa jọ kẹe. Yọ o gine ru eyaa na gba. Ebaibol ọ ta nọ: “Nọ Abraham o wo odiri oke krẹkri no, o te wo eyaa nana tobọ.” (Hib. 6:15; 11:9, 18; Rom 4:20-22) Ere ọvona re, whọ tẹ gọ Jihova te urere, osa nọ who bi rẹro riẹ na u ti te owhẹ obọ. Obọdẹ ẹruore who wo na. Jọ o hae lẹliẹ eva were owhẹ ẹsikpobi. Whọ vro vievie he. (Rom 12:12) Pọl o kere nọ: “Jọ Ọghẹnẹ nọ ọ rẹ kẹ ẹruore na ọ kẹ owhai oghọghọ gbe udhedhẹ ulogbo fiki eva nọ wha fihọ iẹe, re ẹruore rai ọ ruẹse jọ gaga ẹkwoma ogaga ẹzi ọfuafo na.”—Rom 15:13.