Uzou Avọ 68

Ewuhrẹ Ọfa Evaọ Ẹdẹ avọ Ihrẹ Na

ẸDẸ urere Ehaa Uwou-Udhu na, ẹdẹ avọ ihrẹ na, o gbẹ rọ otọ. Jesu o bi wuhrẹ evaọ ofẹ etẹmpol na nọ a re se “emetehe-okẹ.” O wọhọ nọ onana o rọ oria nọ a re se Afe Eyae eria nọ itehe nọ ahwo a re fi unevaze rai họ e rọ.

K’aso k’aso evaọ etoke ehaa na, obọdẹ elo o rẹ jọ oria etẹmpol ọnana. A rehọ edada-ikpẹ ilogbo ene ro vi etenẹ, ọvuọvo avọ idhe ilogbo ene nọ ewhri ọ vọ. Elo ikpẹ enana, nọ o be rehọ ewhri no idhe 16 ze na, ọ ga te epanọ u re ro fi elo họ okegbe na thethabọ evaọ oke aso. Ẹme nọ Jesu ọ ta obọnana o rẹ kareghẹhọ enọ e be gaviezọ kẹe kpahe ikpẹ enana. Jesu o whowho nọ: “Mẹ họ elo akpọ na; ọnọ o lele omẹ ọ rẹ nya evaọ ebi hi, rekọ o re wo elo uzuazọ.”

Otu Farisi na a tẹ vro: “Whẹ ọvo who se isẹi oma ra; isẹi ra uzẹme he.”

Jesu ọ tẹ k’uyo nọ: “Makọ me se isẹi oma mẹ, isẹi mẹ uzẹme, keme mẹ riẹ obonọ me nọ ze, gbe obonọ mẹ rẹ nya, rekọ wha riẹ obonọ me nọ ze hayo obonọ mẹ rẹ nya ha.” O te fibae nọ: “Mẹ họ ọnọ o se isẹi oma mẹ, Ọsẹ nọ o vi omẹ ze o se isẹi kẹ omẹ.”

Otu Farisi na a tẹ gwọlọ riẹ nọ: “Bovẹ Ọsẹ ra ọ rọ?”

Jesu ọ tẹ kuyo nọ: “Wha riẹ omẹ hayo Ọsẹ mẹ gbe he; wha hẹ riẹ omẹ, wha hẹ riẹ Ọsẹ mẹ re.” Dede nọ otu Farisi na a gbẹ gwọlọ mu Jesu ghele, ohwo ọvo ọ kaobọ tei hi.

‘Mẹ be nya kpo,’ ere Jesu ọ wariẹ ta. ‘Oria nọ mẹ be nya, wha sae tha ha.’

U te gbe ahwo Ju na unu: “Kọ o re ti kpe oma riẹ, epanọ ọ ta nọ, ‘Oria nọ mẹ be nya, wha sae tha ha’?”

Jesu ọ tẹ ta nọ: “Otọ wha nọ ze, ehru me nọ ze, whai e rọ akpọ nana, mẹ rọ ọrọ akpọ ọnana ha.” Kẹsena o te fibae nọ: “Wha gbẹ rọwo nọ mẹ họ ọye he, wha re ti whuẹ evaọ izieraha rai.”

Rekọ Jesu ọ be ta kpahe uzuazọ riẹ taure ọ tẹ te ziọ ohwo-akpọ gbe nọ ọye họ Mesaya hayo Kristi nọ a yaa na. Ghele na, a tẹ nọ, ababọ avro avọ ọjẹfiẹ inọ: “Whẹ ono?”

Fikinọ a rọwo ho, Jesu ọ tẹ kuyo nọ: “Fikieme me je bi lele owhai ta ẹme dede?” (NW ) Ghele na ọ tẹ nyaharo ta nọ: “Ọ nọ o vi omẹ o kiẹrẹe, eme eware nọ mẹ jọ obọ riẹ yo, enana mẹ ta kẹ akpọ na.” Jesu ọ tẹ taharo nọ: “Nọ wha kpare Ọmọ ohwo no, kẹsena wha [vẹ] te riẹ nọ mẹ họ ọye, jegbọ mẹ be rọ [ẹjiroro] obọ mẹ ru oware ovo ho, rekọ epanọ Ọsẹ o wuhrẹ omẹ, mẹ rọ ta eme eware enana. Ọnọ o vi omẹ avọ omẹ a gbẹrọ; ọ se omẹ ọvo ba ha, keme me bi ru eware nọ e be were iẹe kẹse kẹse.”

Nọ Jesu ọ ta eme enana no, ibuobu a te fi ẹrọwọ họ iẹe. Rọ kẹ enana ọ tẹ ta nọ: “Wha tẹ ria evaọ eme mẹ, yọ whai ghinọ ilele mẹ, wha rẹ te riẹ uzẹme na, uzẹme na u re ti ru owhai emuyẹ.”

Otu ewọsuọ riẹ a tẹ la ruọ ẹme na: “Mai ibi Abraham, ma te jọ erigbo obọ ohwo ọvo ho. Kẹvẹ whọ jẹ ta nọ, ‘A re ti ru owhai emuyẹ’?”

Dede nọ ahwo Ju a jọ otọ esuo erara unuẹse buobu no, a rẹ jẹ ohwo okienyẹ jọ rehọ wọhọ olori hi. A se inọ a re se ai erigbo. Rekọ Jesu ọ tẹ riobọhọ inọ erigbo a ghinẹ rọ. Evaọ edhere vẹ? Jesu ọ ta nọ: “Uzẹme, uzẹme, mẹ ta kẹ owhai, kohwo kohwo nọ ọ raha uzi ọye họ ọrigbo uzioraha.”

Fikinọ a se nọ erigbo uzioraha a rọ u te fi ahwo Ju na họ oria enwoma. Jesu o ru rie vevẹ kẹ ai nọ: “Ọrigbo ọ rẹ jọ uwou bẹdẹ bẹdẹ hẹ; rekọ ọmọ ọ rẹ jọ bẹdẹ bẹdẹ.” Nọ o rọnọ ọrigbo o wo udu ukuoriọ họ na, a rẹ sai lei no uwou na oke kpobi. Ajokpanọ ọmọ nọ a yẹ fihọ uwou na hayo ọnọ a jọ uwou na yọrọ ọvo ọ rẹ jọ uwou na “bẹdẹ bẹdẹ,” koyehọ, evaọ edẹ uzuazọ riẹ kpobi.

Jesu ọ tẹ taharo nọ: “Fikiere Ọmọ o te . . . ru owhai emuyẹ, wha rẹ te ghinẹ jọ emuyẹ.” Fikiere, uzẹme nọ u re ru ahwo fihọ emuyẹ na họ uzẹme kpahe Ọmọ na, Jesu Kristi. Ajokpa ẹkwoma idhe uzuazọ ohwo-akpọ ọgbagba riẹ ọvo ohwo jọ ọ jẹ jọ ọmuyẹ no uzioraha uwhu. Jọn 8:12-36.

▪ Diẹse Jesu o je wuhrẹ evaọ ẹdẹ avọ ihrẹ? Eme ọ rẹ jọ etẹe via evaọ aso, kọ ẹvẹ onana u ro wo obọ kpahe ewuhrẹ Jesu?

▪ Eme Jesu ọ ta kpahe emuhọ riẹ, kọ eme onana u re dhesẹ kpahe oghẹrẹ ohwo nọ ọ rọ?

▪ Evaọ edhere vẹ ahwo Ju a rọ rọ erigbo, kọ didi uzẹme u re ru ai họ emuyẹ?