“Uzẹme Na U Re Ti Ru Owhai Emuyẹ”

“Wha rẹ te riẹ uzẹme na, uzẹme na u re ti ru owhai emuyẹ.” Ere Jesu o whowho evaọ okenọ o je wuhrẹ ogbotu ahwo evaọ etẹmpol Jerusalẹm. (Jọn 8:32) O jọ lọlọhọ re ikọ Jesu a vuhu iwuhrẹ Jesu mu wọhọ uzẹme na. A ruẹ imuẹro buobu no inọ obọ Ọghẹnẹ owuhrẹ rai o no ze.

REKỌ, nẹnẹ na, o sae jọ bẹbẹ kẹ otujọ re a vuhu uzẹme nọ Jesu ọ ta kpahe na. Wọhọ epanọ o jọ evaọ edẹ Aizaya ọruẹaro na, nẹnẹ ejọ e riẹ “enọ i re se eyoma ewoma, gbe ewoma eyoma, enọ e rẹ rẹriẹ ebi họ elo gbe elo họ ebi, nọ e rẹ rẹriẹ oyayare họ omemere gbe omemere họ oyayare!” (Aizaya 5:20) Avọ iroro sa-sa, ereghẹ-ididi, gbe edhere-uzuazọ nọ a be whaharo nẹnẹ, ahwo buobu a roro nọ eware kpobi i wo umuo, inọ oware nọ a re se uzẹme o rọ họ.

Okenọ Jesu ọ ta kẹ ogbotu riẹ nnọ uzẹme na u ti ru ai fihọ emuyẹ, a tẹ kpunu ta nọ: “Mai ibi Abraham, ma te jọ erigbo obọ ohwo ọvo ho. Kẹvẹ whọ jẹ ta nọ, ‘A re ti ru owhai emuyẹ’?” (Jọn 8:33) A roro nọ a wo ẹgwọlọ ohwo hayo oware jọ nọ u re ru ai emuyẹ hẹ. Rekọ Jesu o te ru ei vevẹ nọ: “Uzẹme, uzẹme, mẹ ta kẹ owhai, kohwo kohwo nọ ọ raha uzi ọye họ ọrigbo uzioraha.” (Jọn 8:34) Uzẹme nọ Jesu ọ jẹ ta kpahe na o rẹ sai rovie edhere kẹ ufuoma no uzioraha. Jesu ọ ta nọ: “Fikiere Ọmọ o te zi ru owhai emuyẹ, wha rẹ te ghinẹ jọ emuyẹ.” (Jọn 8:36) Fikiere uzẹme nọ u re ru whai họ emuyẹ họ uzẹme kpahe Jesu Kristi, Ọmọ Ọghẹnẹ. Ẹrọwọ nọ a re wo fihọ idhe uzuazọ ogbagba Jesu ọvo họ oware nọ o rẹ kẹ ohwo ufuoma no uzioraha gbe uwhu.

Evaọ oke ofa jọ Jesu ọ ta nọ: “Ru ai erẹri eva uzẹme na; ẹme ra uzẹme.” (Jọn 17:17) Ẹme Ọghẹnẹ nọ ọ rọ Ebaibol na họ uzẹme nọ o rẹ sae kẹ ufuoma no ogbẹrọwọ gbe egagọ erue. Uzẹme kpahe Jesu Kristi o rọ eva Ebaibol na, onọ u re ru ahwo fi ẹrọwọ họ iẹe je rovie edhere kẹ ẹruore ọnwranwra kẹ obaro. O rọ oware obọdẹ re a riẹ uzẹme ọ Ẹme Ọghẹnẹ!

Ẹvẹ u wuzou te re a riẹ uzẹme na? Egagọ buobu nẹnẹ, dede nọ a be ta nọ a bi lele Ebaibol na, a be dhẹ lele ereghẹ-ididi gbe uruemu anwae. Ẹsibuobu, oware nọ o rẹ mae were ahwo na o r’oja kẹ isu egagọ na vi ẹgbagba ẹme nọ a rẹ ta. Ahwo jọ a roro nọ oghẹrẹ egagọ kpobi e rẹ were Ọghẹnẹ, thakpinọ u no ohwo udu ze. Rekọ Jesu Kristi ọ ta nọ: “Oke o be tha, orọ enẹna, nọ e nọ e rẹ ghinẹ gọ e, a rẹ te rehọ ẹzi gbe uzẹme gọ Ọsẹ na; keme itieye Ọsẹ na ọ guọlọ nọ e rẹ gọ e.”—Jọn 4:23.

Ma tẹ gwọlọ gọ Ọghẹnẹ avọ ọjẹrehọ, ma rẹ riẹ uzẹme na hrọ. Onana yọ ẹme ologbo. Evawere ebẹdẹ bẹdẹ mai e rọ ẹro suẹe. Fikiere, ohwo kpobi ọ rẹ nọ oma riẹ nọ: ‘Kọ Ọghẹnẹ ọ be jẹ oghẹrẹ egagọ mẹ rehọ? Kọ me ghine wo isiuru kpahe ewuhrẹ uzẹme ọ Ẹme Ọghẹnẹ? Hayo kọ ozọ u bi mu omẹ nnọ mẹ tẹ kiẹ egagọ mẹ riwi, mẹ riẹ oware nọ mẹ te kiẹ ku hu?’