Uzou Avọ 77

Ẹme ọ Ukuoriọ

ẸSEJỌHỌ ahwo na a riẹ nnọ Jesu ọ be re emu evaọ uwou ohwo Farisi na. Fikiere idu rai buobu a te kokohọ otafe uwou na be hẹrẹ okenọ Jesu ọ te rọ ruọ otafe. Hẹriẹ oma no otu Farisi enọ e be wọso Jesu jẹ be daoma mu ei evaọ ẹta oware nọ o thọ, ahwo na a be rọ ọwhọ gaviezọ kẹe avọ ovuhumuo.

Nọ ọ kake rẹriẹ ova ku ilele riẹ, Jesu ọ tẹ ta nọ: “Wha yọrọ oma rai obọ ẹvi otu e Farisi, enọ e rọ eviẹwẹ na.” Wọhọ epanọ o dhesẹ evaọ etoke emuore na, eyero egagọ otu Farisi na kpobi o vọ avọ eviẹhọ. Rekọ dede nọ otu Farisi na a be rehọ edhesẹ ewoma okafe ruru emuemu rai no, u ti rovie fihọ uwhremu na. Jesu ọ ta nọ: “Oware ovuovo nọ a ruru nọ o rẹ te via ha o rọ họ, hayo onọ a sino nọ a rẹ riẹ hẹ, o rọ họ.”

Jesu ọ tẹ wariẹ uduotahawọ onọ ọ rọ kẹ 12 na no vẹre okenọ o vi ai kpohọ usiuwoma ota evaọ Galili. Ọ ta nọ: “Wha dhẹ-ozọ enọ i re kpe oma ha, nọ a ru oye ino a gbẹ sai ru ofa ha.” Nọ o rọnọ ọmọvra ọsese dede ọ rẹ thọrọ Ọghẹnẹ ẹro ho na, Jesu ọ tẹ kẹ ilele riẹ imuẹro inọ a rẹ te thọrọ Ọghẹnẹ ẹro ho. Ọ ta nọ: “Nọ a rehọ owhai ze iwou-egagọ gbe aro ikpahwo gbe enọ i wo udu, . . . [ẹzi ẹri] na ọ rẹ te hrẹ owhai eva okioke oyena onọ wha rẹ te ta.”

Ọzae jọ evaọ ogbotu na ọ tẹ t’ẹme via. Ọ yare nọ: “Owuhrẹ, ta kẹ omoni mẹ re me lele ie ghale uku na.” Uzi Mosis na o ta nọ ọmọzae ọkpako na o re wo abava ukuoriọ na, fikiere u du fo nọ ẹwhọ ọ rẹ jariẹ hẹ. Rekọ o wọhọ nọ ọzae na ọ gwọlọ vi ẹkẹ abọ ukuoriọ riẹ onọ uzi o gwọlọ.

Nwani fo Jesu ọ se inọ o re dhomahọ iẹe. Ọ nọ nọ: “Ọzae na, ono o ru omẹ họ obruoziẹ hayo ọghale rai?” Ọ tẹ rọ ohrẹ obọdẹ onana rọ kẹ ogbotu na: “Wha yọrọ oma, re wha si oma rai no uru eware eguọlọ kpobi; keme uzuazọ ohwo o rọ udevie ekuakua eyero obuobu riẹ hẹ.” Ẹhẹ, makọ eware nọ ohwo o wo kpobi, uzẹme o rọ inọ o re ti whuẹ jẹ nyasiọ eware na kpobi ba. Re o dhesẹ ẹme ọnana vevẹ, re o je dhesẹ ugheghẹ nọ o rọ emamọ odẹ nọ a re ru kugbe Ọghẹnẹ hẹ, Jesu ọ tẹ kẹ ọtadhesẹ jọ. Ọ ta nọ:

“Otọ ohwo jọ o tẹ mọ ibi buobu gaga; o te roro evaọ eva riẹ nọ, ‘Eme me re ruẹ, keme me wo oria nọ me re fi ivuẹvu mẹ họ họ?’ Ọ tẹ ta nọ, ‘Ona me re ruẹ, me re wolo iru mẹ no, mẹ vẹ bọ ae ruaro; kọ etẹe me re fi eka gbe ekakọ edekọ họ. Mẹ vẹ ta kẹ [ẹwẹ] mẹ nọ, [Ẹwẹ], who wo eware buobu nọ e rọ nọ i re te ikpe buobu; rehọ oma totọ, whọ re, da, whọ ghọghọ.’ Rekọ Ọghẹnẹ ọ tẹ ta kẹ e nọ, ‘Whẹ ogheghẹ? aso ọnana a guọlọ ẹwẹ ra; kọ eware nọ whọ ruẹrẹ kpahe na, ono o re ti wo ai?’ ”

Evaọ ekuhọ, Jesu o te muẹrohọ nọ: ‘Whaọ ere o rẹ jọ kẹ ọnọ o koko efe họ kẹ oma riẹ, rekọ o fe obọ Ọghẹnẹ hẹ.’ Nọ ilele na a sae jọ awa ugheghẹ ekoko efe he na, fiki awaọruọ okpẹdẹ uzuazọ o rẹ jọ lọlọhọ re a reghe no egagọ udu kpobi rọ kẹ Jihova. Fikiere Jesu ọ tẹ rehọ uvẹ na rọ wariẹ ohrẹ owoma nọ ọ kẹ ole ukpe gbe ubro nọ o vrẹ no evaọ Ovuẹ obọ Ugbehru na. Nọ ọ rẹriẹ ova ku ilele riẹ, ọ tẹ ta nọ:

“Fikiere mẹ ta kẹ owhai nọ, wha ruawa uzuazọ rai hi, onọ wha rẹ ria, hayo o rọ oma rai hi, onọ wha re fihọ. . . . Wha roro ekọlọbe na: a rẹ kọ họ, hayo ẹkọrọ họ, a wo oho ho, hayo eru hu, rekọ Ọghẹnẹ ọ rọ ae ẹkuọ. . . . Roro ikẹba na, epanọ e be rua; i re ru iruo ho, e rẹ whẹ olulu hu, rekọ mẹ ta kẹ owhai nọ, makọ Solomọn eva oruaro riẹ kpobi ọ gọ-ẹgọ te [enana] ọvo ho. . . .

“Wha du eware nọ wha rẹ ria ha, hayo enọ wha rẹ da ha, wha wo ekuiroro ivẹ hẹ. Keme erẹwho akpọ na kpobi e rọ eware enana ẹ guọlọ; yọ Ọsẹ rai ọ riẹ nọ wha guọlọ e rai. Rekọ wha kake guọlọ uvie riẹ, eware nana kpobi a re ti fi ai họ kẹ owhai re.”

Maerro kọ evaọ etoke ọbẹwẹ eme ọ Jesu na e jẹ mai w’iruo. Ohwo nọ ọ ruawa vrẹta kpahe ẹgwọlọ iwo riẹ o te muọ oma họ esi kpemu evaọ ilale abọ-ẹzi riẹ yọ, evaọ uzẹme, o bi dhesẹ ababọ ẹrọwọ fihọ ẹgba Ọghẹnẹ nọ ọ rẹ rọ rehọ ẹgwọlọ idibo Riẹ kẹ ae. Luk 12:1-31; Iziewariẹ 21:17.

▪ Fikieme ọzae na ọ jẹ nọ kpahe ukuoriọ, kọ didi ohrẹ Jesu ọ kẹ?

▪ Didi ọtadhesẹ Jesu ọ kẹ, kọ eme họ otofa riẹ?

▪ Didi ohrẹ Jesu ọ wariẹ, kọ fikieme u je fo?