Uzou Avọ 102
Kristi Ọ Ruọ Jerusalẹm avọ Obokparọ
OHIOHIẸ okioke riẹ, Ẹdoka, Nisan 9, Jesu o te no Bẹtani avọ ilele riẹ a tẹ fa Ugbehru Olivi vrẹ bi kpohọ Jerusalẹm. U kri hi, a tẹ kẹle Bẹtfagi, nọ o rọ Ugbehru Olivi. Jesu ọ tẹ ta kẹ ilele ivẹ riẹ nọ:
“Wha nya kpo obọ iwhre nọ erọ aro rai na, wha te nwane ruẹ eketekete nọ a thuru avọ ọmọ, rae wha rehọ ai se omẹ. Re ohwo ọ tẹ ta ẹme jọ kẹ owhai, wha vẹ ta nọ, ‘[Olori] na ọ be rehọ ae ru oware,’ ọ rẹ te nwani siobọno ai kẹ owhai.”
Dede nọ oke ọsosuọ ilele na a vuhumu nnọ uthubro onana o rọ orugba eruẹaruẹ Ebaibol ho, uwhremu na a te ti vuhumu nọ ere o rọ. Zekaraya ọruẹaro na ọ ruẹaro inọ Ovie nọ Ọghẹnẹ ọ yeyaa riẹ ọ te dhẹ ruọ Jerusalẹm evaọ ehru eketekete, ẹhẹ, ‘ehru ọmọ eketekete aye.’ Epọvo na Solomọn Ovie na ọ dhẹ ọmọ eketekete kpohọ oria nọ a jo wholo iei.
Okenọ ilele na a rueva Bẹtfagi a jẹ be ra eketekete na avọ oni riẹ, ahwo jọ nọ a dikihẹ kẹle oyena a tẹ ta nọ: “Eme wha re ruo?” Rekọ nọ a ta nọ erao na e rọ kẹ Olori na, ezae na a tẹ kuvẹ re a rehọ ai bru Jesu. Ilele na a tẹ rọ iwu rai hwa ehru eketekete ivẹ na, rekọ Jesu ọ tẹ keria ehru ọmọ na.
Nọ Jesu ọ be dhẹ kpohọ Jerusalẹm na, ogbotu na a te bi vihọ. Ahwo na buobu a tẹ ba iwu rai rọ hwa edhere, efa a te bru egha ire a tẹ rehọ ai hwa. A te muhọ ebo nọ: “Ovie, nọ ọ be rehọ odẹ Ọnowo tha o wo oghale; udhedhẹ o rọ obọ odhiwu, jegbe oruaro evaọ oria nọ omai kpehru!”
Eme nana e tẹ dha otu Farisi jọ nọ e rọ ogbotu na eva a te gu inoma kẹ Jesu nọ: “Owuhrẹ, whọku ilele ra.” Rekọ Jesu ọ tẹ kuyo nọ: “Mẹ ta kẹ owhai nọ, enana i te fibo, itho na i re ti bo.”
Nọ Jesu o si kẹle Jerusalẹm no, o te rri okpẹwho na ọ tẹ viẹ kẹe, ta nọ: “[Dede] kọ whọ riẹ nẹnẹ na eware nọ e rẹ wha udhedhẹ! Rekọ enẹna a si rai no dhere aro ra.” Fiki aghẹmeeyo aro koko rai, Jerusalẹm ọ te hwa osa riẹ, wọhọ epanọ Jesu ọ ruẹaro na:
“Ewegrẹ ra [ahwo Rom evaọ otọ Titus Ọgbaẹmo na] e rẹ te tọ ewala wariẹ owhẹ, a vẹ te keria [wariẹ] owhẹ, a re ti je owhẹ nya via eva kabọ kabọ họ. A rẹ te raha owhẹ muotọ jegbọ emọ ra; a rẹ te siọ utho ovo ba ehru o jọ eva ra ha.” Ọraha Jerusalẹm ọnana nọ Jesu ọ ruẹaro kpahe na o ghinẹ via ikpe 37 evaọ obaro, evaọ ukpe ọ 70 C.E.
Umutho eka jọ nọ e vrẹ, ahwo buobu evaọ ogbotu na a ruẹ Jesu nọ ọ kpare Lazarọs. Ahwo nana a tẹ be ta oware igbunu onana kẹ amọfa. Fikiere nọ Jesu ọ ruọ Jerusalẹm, ozighi ọ tẹ ruọ okpẹwho na kpobi. Ahwo a tẹ jẹ nọ re a riẹ nọ: “Nọ ono?” Ogbotu na ọ vẹ kuyo ta nọ: “Ọna họ Jesu ọruẹaro na, ọnọ o no Nazarẹt Galili ze.” Nọ a ruẹ oware nọ o be via, otu Farisi na a te bruenu inọ u ku rai no, keme wọhọ epanọ a ta: “Keme na ahwo kpobi a dhẹ lele iei no.”
Wọhọ uruemu riẹ nọ o te kpohọ Jerusalẹm, Jesu o te kpohọ etẹmpol na re o wuhrẹ. Ituaro gbe enọ e ko a tẹ nyabru ei ziọ etẹ, o te siwi ai! Nọ ilori izerẹ gbe ikere-ebe na a ruẹ eware igbunu nọ Jesu o bi ru nọ a je yo emezae na evaọ etẹmpol na nọ a bi bo nọ, “Hosana kẹ Ọmọ Devidi!” eva e tẹ dhae. A te gu inoma nọ: “Who bi yo epanọ enana e rẹ ta na?”
Jesu o te yo nọ: “E; wha ri se [onana], ‘Wha rẹ rehọ ejiro nọ o no unu emaha gbe emọ unuevie [tha]’?”
Jesu ọ tẹ ruabọhọ ewuhrẹ riẹ, ọ tẹ kiẹ eware etẹmpol na kpobi riwi. Oke u te ti siaro họ. Fikiere ọ tẹ wọ, te 12 na, a tẹ nya ikilomita esa na zihe kpohọ Bẹtani. Obei ọ wezẹ evaọ aso Ẹdoka, ẹsejọhọ evaọ uwou Lazarọs ogbẹnyusu riẹ. Matiu 21:1-11, 14-17; Mak 11:1-11; Luk 19:29-44; Jọn 12:12-19; Zekaraya 9:9.
▪ Okevẹ gbe oghẹrẹ vẹ Jesu ọ rọ ruọ Jerusalẹm wọhọ Ovie?
▪ Ẹvẹ u w’uzou te re ogbotu na a jiri Jesu?
▪ Ẹvẹ oma o jọ Jesu nọ o rri Jerusalẹm, kọ didi aro ọ ruẹ?
▪ Eme ọ via nọ Jesu o kpohọ etẹmpol na?