A Ru Oreva Jihova

A Dede Jesu Wọhọ Mesaya gbe Ovie!

OGBOTU edo nọ a be ruọ Jerusalẹm eva Nisan 9, 33 C.E., u gbe ahwo Judia buobu unu. Dede nọ o jọ oware aghẹruẹ re a ruẹ ahwo nọ i bi su ruọ okpẹwho na taure ehaa Ọnyavrẹ na o te muhọ họ, erara enana a wo ohẹriẹ. Ugogo ohwo nọ ọ jọ udevie rai na họ ọzae jọ nọ ọ keria ehru eketekete. Ọzae na họ Jesu Kristi, yọ ahwo na a be riẹ iwu rai gbe eya iriẹ hotọ yọ a bi bo nọ: “Hosana kẹ Ọmọ Devidi! Ọnọ ọ be rehọ odẹ Ọnowo na tha o wo oghale! Hosana eva eria ikpehru!” Nọ a ruẹ ogbotu na, oma o tẹ wọ ahwo buobu nọ e rọ eva Jerusalẹm re a kuomagbe usu-ehaa na.—Matiu 21:7-9; Jọn 12:12, 13.

Dede nọ a bi dede iei enẹna, Jesu ọ riẹ nọ edawọ e be hẹrẹ iẹe. Whaọ, edẹ isoi ọvo i kiọkọ, a ve ti kpei evaọ okpẹwho ọvo na! Ẹhẹ, Jesu ọ riẹ nọ Jerusalẹm yọ ẹkuotọ nọ a rẹ jọ gbẹroma, yọ o wo iroro nana họ eva okenọ ọ roma via evaọ okpẹwho na.

Erugba Eruẹaruẹ Anwae Jọ

Evaọ 518 B.C.E., Zekaraya ọ rọ ruẹaro kpahe ẹruọ Jerusalẹm Jesu avọ obokparọ. O kere nọ: “Do edo oghọghọ, O ọmọtẹ Jerusalẹm! Ri, Ovie ra o bi bru owhẹ tha; avọ ogaga gbe obọokparọ, ọ be rọ oma urokpotọ dhẹ eva ehru ọmọ eketekete ọzae. . . . Ọ vẹ te rehọ udhedhẹ rọ kẹ erẹwho na, isuẹsu riẹ i re ti no abade te abade, jeno Ethẹ ri te oka akpọ na.”—Zekaraya 9:9, 10.

Fikiere Jerusalẹm nọ Jesu ọ ro eva Nisan 9 o te ru eruẹaruẹ Ebaibol na gba. O rọ oware nọ u mu via ha, rekọ a nabe m’oma riẹ ziezi. Vẹre, nọ ọ jọ otafe Jerusalẹm, Jesu ọ hrẹ ilele ivẹ riẹ no nọ: “Wha nya kpo obọ iwhre nọ erọ aro rai na, wha te nwane ruẹ eketekete nọ a thuru avọ ọmọ, rae wha rehọ ai se omẹ. Re ohwo ọ tẹ ta ẹme jọ kẹ owhai, wha vẹ ta nọ, ‘[Olori] na ọ be rehọ ae ru oware,’ ọ rẹ te nwani siobọnọ ai kẹ owhai.” (Matiu 21:1-3) Rekọ fikieme Jesu ọ jẹ gwọlọ dhẹ ruọ Jerusalẹm evaọ ehru eketekete, kọ eme họ otofa ubo ogbotu na?

Ovuẹ Kpahe Ọkwa-Ovie

Oware nọ ẹro ọ ruẹ o rẹ mai w’ẹgba vi onọ a yo. Fikiere, ẹsejọ Jihova o re ru re eruaro riẹ a ru odhesẹvia ovuẹ rai re o ruẹse fiẹgba họ ovuẹ eruaruẹ na. (1 Ivie 11:29-32; Jerimaya 27:1-6; Izikiẹl 4:1-17) Odhesẹvia ẹmeọta ọnana nọ a rẹ rẹro ruẹ o rẹ lẹliẹ ẹme daruọ oma oriughe nọ udu riẹ o rẹ gaga dede. Epọvo na re, Jesu o ru odhesẹvia ọgaga ẹkwoma eketekete nọ ọ dhẹ rueva okpẹwho Jerusalẹm. Evaọ oghẹrẹ vẹ?

Evaọ oke Ebaibol ovie ọ jẹ hae rehọ eketekete ruiruo. Wọhọ oriruo, Solomọn ọ dhẹ “anyenya” ọsẹ riẹ kpohọ oria nọ a jọ rehọ iẹe mu ovie, arao nọ ọ rọ eketekete ọzae ologbo. (1 Ivie 1:33-40) Fikiere re Jesu ọ dhẹ eketekete ruọ Jerusalẹm u re dhesẹ nọ ọ be rehọ oma via wọhọ ovie.a Ubo ogbotu na u te je fiẹgba họ ovuẹ onana. Ogbotu na, nọ ahwo Galili a mai ru via na, a tẹ riẹ iwu rai họ aro Jesu—oware nọ o kareghẹhọ omai kpahe ewhowho ẹgbede ọkwa-ovie Jehu. (2 Ivie 9:13) Ẹme nọ a ta fodẹ Jesu wọhọ “Ọmọ Devidi” na u te dhesẹ udu nọ o wo re ọ jọ osu. (Luk 1:31-33) Yọ eya iriẹ, ababọ avro, u dhesẹ omarokpotọ rai kẹ udu-esuo ovie riẹ.—Wawo Eviavia 7:9, 10.

Fikiere usu-ehaa nọ i zurie ziọ Jerusalẹm evaọ Nisan 9 na yọ odhesẹvia ovevẹ inọ Jesu họ Mesaya gbe Ovie nọ Ọghẹnẹ o ro mu. Dede, ahwo kpobi eva e were he re a dede Jesu rehọ evaọ edhere ọnana. Otu Farisi na a mai roro iei nọ o thọ thesiwa re a ku orro uvie otiọye ku Jesu. A tẹ ta, ababọ avro avọ ofu, inọ: “Owuhrẹ, whọku ilele ra.” Jesu ọ tẹ kuyo nọ: “Mẹ ta kẹ owhai nọ, enana i te fibo, itho na i re ti bo.” (Luk 19:39, 40) Ẹhẹ, Uvie Ọghẹnẹ o jọ uzoẹme usiuwoma ota Jesu. Ọ rẹ rehọ aruọwha whowho ovuẹ nana te ahwo a jẹ riẹ rehọ hayo a se riẹ.

Uwuhrẹ k’Omai

O gwọlọ aruọwha gaga kẹ Jesu re ọ rueva Jerusalẹm evaọ edhere nọ Zekaraya ọruaro na ọ ruẹaro riẹ na. Ọ riẹ nọ ere oruo yọ ọ be kpọ ewegrẹ riẹ eva. Taure o te tovrẹ kpohọ odhiwu, Jesu o vi ilele riẹ re a ta usiuwoma Uvie Ọghẹnẹ na re a je ‘ru ilele ahwo erẹwho kpobi.’ (Matiu 24:14; 28:19, 20) Re a ru iruo nana gba o gwọlọ aruọwha re. Orọnikọ ahwo kpobi ovuẹ na o be were he. Ahwo jọ a se rie gboja ha, yọ efa a rẹ wọso ovuẹ na. Egọmeti jọ a fi ezadhe jọ họ iruo usiuwoma ota na no, hayo a tubẹ whaha iẹe muotọ no dede.

Ghele, Isẹri Jihova a vuhumu nọ usiuwoma Uvie Ọghẹnẹ nọ a ro mu no na a rẹ tae hrọ, te ahwo a gaviezọ hayo a gaviezọ họ. (Izikiẹl 2:7) Nọ a gbe bi ru iruo esiwo uzuazọ ọnana na, a wo uduotahawọ no eyaa Jesu ze: “Ri, mẹ avọ owhai a gbẹ jọ kẹse kẹse, makọ te urere akpọ na.”—Matiu 28:20.

[Footnotes]