Uzou Avọ 103

Ẹwariẹ Zihe Kpohọ Etẹmpol Na

JESU avọ ilele riẹ a raha aso avesa rai no evaọ Bẹtani anwẹ nọ a no Jeriko ze. Irioke ohiohiẹ Ẹdọvo-Oka, Nisan 10, a tẹ ruọ edhere bi kpohọ Jerusalẹm. Ohọwo u kpe Jesu no. Fikiere nọ ọ ruẹ ure ojo jọ avọ ebe, ọ tẹ nya kẹle iẹe sọ ọ sae jọ ehru riẹ ruẹ ibi jọ.

Ure na o kake whẹ ebe họ, keme ezi ojo họ emuhọ June, yọ amara March o bi kuhọ obọ. Rekọ Jesu o roro inọ nọ o kake whẹ ebe họ na, o te kake mọ ibi re. Rekọ o via kẹe ere he. Ẹbe na o wha eviẹhọ họ ure na oma. Jesu ọ tẹ la ure na eka, ta nọ: “Ohwo ọvo ọ gbẹ re ubi ra ofa ha.” A te ruẹ ẹgba eka Jesu na gbe otofa riẹ ohiohiẹ n’otha.

Nọ a ruabọhọ erẹ rai, Jesu avọ ilele riẹ a te te Jerusalẹm. O te kpohọ etẹmpol na, onọ ọ kiẹ riwi no uvo odẹnukpo. Rekọ, nẹnẹ ọ tẹ jowọ, wọhọ epanọ o ru ikpe esa nọ i kpo no nọ ọ nyaze Ọnyavrẹ na evaọ 30 C.E. Jesu o te le enọ e be zẹ jẹ dẹ evaọ etẹmpol na no ọ tẹ gale emẹjẹ enọ i bi nwene igho na vi gbe ekpala enọ e be zẹ irueruẹ na. Ọ tubẹ kẹ ohwo ọvo uvẹ re ọ wọ oware ovo jọ nya etẹmpol na vrẹ hẹ.

Nọ o je brukpe enọ i bi nwene igho jẹ zẹ erao evaọ etẹmpol na, ọ tẹ ta nọ: “Ogbẹrọnọ a kere nọ, ‘A re se uwou mẹ uwou olẹ kẹ erẹwho kpobi’? Rekọ wha ru rie i họ [eghogho] iwhewheriwhe [no].” A rọ igbulegbu keme a be zẹ eware rai ghaghae kẹ ahwo nọ o gba họ nọ a rẹ dẹ erao mi ai kẹ idhe. Fikiere Jesu o te rri ekiọthuọ ọnana wọhọ ofruriọ hayo ujitho.

Nọ ilori izerẹ na, ikere-ebe, gbe ikpahwo na a yo oware nọ Jesu o ru, a tẹ jẹ gwọlọ nọ a re kpei no. A tẹ rọ enẹ dhesẹ nọ a sai nwene he. Ghele na, a riẹ epanọ a re ro kpe Jesu hu, keme ahwo na kpobi a bi bigbae ẹsikpobi re a gaviezọ kẹe.

U te no emotọ ahwo Ju no, ahwo orẹwho Egedhọ a ziọ Ọnyavrẹ na re. Enana họ enọ i kurẹriẹ, koyehọ enọ i kurẹriẹ ziọ egagọ ahwo Ju no. Ahwo Grik jọ, ẹsejọhọ enọ i kurẹriẹ no, a tẹ nyabru Filip ze be yare nọ a gwọlọ ruẹ Jesu. Filip ọ tẹ nya bru Andru, ẹsejọhọ re ọ nọ sọ ẹgwae otiọye na o fo. O wọhọ nọ Jesu ọ gbẹ rọ etẹmpol na, oria nọ ahwo Grik na a jọ rue riẹ.

Jesu ọ riẹ nọ emedẹ jọ ọvo i kiọkọ kẹe, fikiere ọ tẹ fodẹ eyero riẹ: “Okenọ a rẹ rọ kẹ Ọmọ ohwo oro, u te no. Uzẹme, uzẹme mẹ ta kẹ owhai, ubi-ọka u gbe kie otọ re u whu hu, oye ọvo o rẹ jọ; rekọ u te whu, o [vẹ] mọ ibi buobu.”

Ubi-ọka ọvo u wo aghare ọsese. Ghele na, kọ eme ọ rẹ via otẹrọnọ a tọ riẹ họ otọ u je “whu,” ku uzuazọ riẹ họ wọhọ ubi? O vẹ rro fihọ okakọ o vẹ mọ ibi-eka buobu. Epọvo na, Jesu yọ ọzae ọgbagba ọvuọvo. Rekọ otẹrọnọ o whu fi ẹrọwọ họ Ọghẹnẹ, o ve zihe ruọ edhere nọ ọ rẹ rọ rehọ uzuazọ ebẹdẹ bẹdẹ rọ kẹ enọ i wo ẹrọwọ enọ i wo ẹzi omolahiẹ ọvo na nọ o wo na. Fikiere, Jesu ọ tẹ ta nọ: “Ọnọ o you uzuazọ riẹ, o re ti ku ei fiẹ; ọnọ o mukpahe uzuazọ riẹ eva akpọ nana o re ti woi eva uzuazọ ebẹdẹ bẹdẹ.”

Orọnikọ Jesu o bi roro kpahe omobọ riẹ ọvo ho, keme ọ ta haro nọ: “Ohwo nọ ọ rọ odibo mẹ, jọ o lele omẹ, obonọ omẹ rọ etẹe odibo mẹ ọ rẹ jọ; ohwo nọ ọ gba odibo kẹ omẹ, Ọsẹ mẹ ọ rẹ te kẹe adhẹẹ.” Ẹvẹ osa na o rro te re a lele Jesu jẹ gbodibo kẹe! O rọ osohwa nọ Ọsẹ na ọ rẹ rọ kẹ ohwo ọghọ re o lele Kristi evaọ Uvie na.

Bi roro kpahe uye-oruẹ ulogbo gbe uwhu oja nọ o be hẹrẹ iẹe, Jesu ọ tẹ ta haro nọ: “Whaọ ẹwẹ mẹ ọ be rova, kẹvẹ mẹ rẹ ta? Ọsẹ, siwi omẹ no auwa ọnana.” (NW ) Otẹrọnọ a rẹ sae whaha oware nọ o be hẹrẹ iẹe! Rekọ, ijo, wọhọ epanọ ọ ta: “Rekọ fiki onana mẹ jẹ nyaze oke nana.” Jesu ọ rọwo kugbe ọruẹrẹfihọ Ọghẹnẹ riẹriẹriẹ, kugbe uwhu idhe riẹ. Matiu 21:12, 13, 18, 19; Mak 11:12-18; Luk 19:45-48; Jọn 12:20-27.

▪ Fikieme Jesu o ro rẹro nnọ ọ te jọ ure ojo na ruẹ ibi dede nọ ezi riẹ u ti te he?

▪ Fikieme Jesu o ro se enọ e rọ etẹmpol na be zẹ “iwhewheriwhe”?

▪ Edhere vẹ Jesu ọ rọ wọhọ ubi-ọka ọvo nọ o whu?

▪ Ẹvẹ o rọ Jesu oma kpahe uye-oruẹ gbe uwhu nọ o be hẹrẹ iẹe na?