Idhere nọ A be Rọ Vuẹ Emamọ Usi Na

A KẸ Ileleikristi ujaje nọ a ‘ru ilele ahwo erẹwho kpobi,’ rekọ orọnikọ onana u dhesẹ nọ a rẹ rọ ọgbahọ ku amọfa rẹriẹ hẹ. Uwou nọ Jesu o vi họ re a “vuẹ emamọ usi kẹ enọ a nwẹ,” re a “sasa ahwo nọ a rọ uweli oma,” re a “jaja enọ e [rọ] uweli oma.” (Matiu 28:19; Aizaya 61:1, 2; Luk 4:18, 19) Isẹri Jihova a be gwọlọ ru onana ẹkwoma ewhowho emamọ usi na rono Ebaibol ze. Wọhọ Izikiẹl ọruẹaro anwae na, Isẹri Jihova nẹnẹ a be daoma gwọlọ enọ i “bi dimẹ je bi bo fiki eware oma-uzue nọ a bi ruẹ.”—Izikiẹl 9:4.

Edhere nọ ọ mai woma nọ a be rọ gwọlọ enọ i bi weri fiki iyero akpọ ọnana họ ẹkwoma ẹnya n’uwou ruọ uwou. Fikiere a be daoma gaga re a nyate ahwo oma, wọhọ epanọ Jesu o ru evaọ okenọ o je “kpo ewho gbe iwhre, [jẹ] vuẹ ovuẹ, [jẹ] rehọ usiuwoma uvie Ọghẹnẹ ze.” Epọvo na ilele ọsosuọ riẹ a ru re. (Luk 8:1; 9:1-6; 10:1-9) Nẹnẹ na, oria nọ o jọ lọhọ, Isẹri Jihova a be daoma nyate uwou kpobi unuẹse buobu evaọ ẹgbukpe, be gwọlọ rehọ iminiti jọ t’ẹme kugbe enọ e rrọ uwou kpahe izoeme jọ nọ e r’oja je wuzou evaọ ẹwho na hayo evaọ akpọ na. A rẹ sai se ikereakere ọvo hayo ivẹ jọ, yọ otẹrọnọ ohwo nọ ọ rrọ uwou na o dhesẹ isiuru, Osẹri na ọ sai ru ọruẹrẹfihọ re a t’ẹme na haro evaọ oke ofa nọ u kiehọ. A rẹ ghale Ebaibol gbe ebe nọ e rẹ f’otọ Ebaibol na, yọ otẹrọnọ ọnọ o wo uwou na ọ gwọlọ, a rẹ sai wuhrẹ Ebaibol kugbei ọvọvẹ. A bi ru ima iwuhrẹ Ebaibol itieye na kugbe omomọvo hayo uviuwou kẹse kẹse evaọ akpọ na soso.

Edhere ọfa nọ a be rọ vuẹ amọfa “usiuwoma uvie na” họ ẹkwoma iwuhrẹ nọ a be jọ Egwa Uvie rai ru. Isẹri na a rẹ jọ etẹe ru iwuhrẹ k’ẹkpoka k’ẹkpoka. Ewuhrẹ jọ họ ovuẹ ogbotu kpahe uzoẹme isiuru jọ, a ve ru ewuhrẹ uzoẹme hayo eruaruẹ Ebaibol jọ lele iei rono emagazini Uwou-Eroro na ze. Ewuhrẹ ọfa jọ họ isukulu nọ a rẹ jọ wuhrẹ Isẹri na re a riẹ usiuwoma ta ziezi, kẹsena abọ nọ a rẹ jọ t’ẹme te iruo isẹri-ise na evaọ ẹkwotọ na o ve lele iei. Ofariẹ, ẹsiẹvo evaọ ẹkpoka Isẹri na a re kokohọ iwou, evaọ itu esese, rọkẹ iwuhrẹ Ebaibol.

Iwuhrẹ enana kpobi i rovie fihọ kẹ ahwo kpobi. A re ghoro umudo ho. Iwuhrẹ eyena e rrọ erere kẹ ahwo kpobi. Ebaibol na ọ ta nọ: “Fikiere jọ mai ohwo o he roro epanọ ọ rẹrọ jaja ọrivẹ riẹ oma, re o wo uyoyou, je ru iruo ezi kpobi, [wha hẹ] se oma ba e kugbe he, wọhọ epanọ uruemu otu jọ o rọ, rekọ whai ohwo ọ hẹ ta udu họ ohwo awọ, ofa riẹ, wha riẹ nọ ẹdẹ na ọ kẹlino.” Uwuhrẹ obọ ohwo gbe ekiakiẹ i wuzou, rekọ omakugbe amọfa o rẹ sasa oma: “Utehru a rọ thọ utehru da, ohwo o ve ru ohwo woma.”—Ahwo Hibru 10:24, 25; Itẹ 27:17.

Isẹri na a be jẹ rehọ uvẹ nọ u rovie fihọ kpobi ruiruo re a ta usiuwoma na kẹ ahwo nọ a nyaku evaọ uzuazọ ikẹdẹ kẹdẹ rai. O rẹ sae jọ umutho eme nọ a re fi se ọrivẹ hayo enọ a gbẹ rrọ omoto hayo arupre, ẹme nọ o theri viere kugbe ogbẹnyusu hayo omoni, hayo ẹmeọta kugbe ibe oruiruo evaọ etoke ibreki. Oghẹrẹ utiona Jesu o ro ru abọ buobu isẹri ise riẹ okenọ ọ jọ otọakpọ—nọ ọ jẹ nya akotọ abade vrẹ, nọ ọ kerria oria ugbehru, nọ ọ jẹ re emu evaọ uwou ohwo jọ, nọ o kpohọ ehaa-orọo, hayo nọ ọ jọ evaọ okọ ikuori evaọ Abade Galili. O wuhrẹ evaọ uwou-egagọ gbe etẹmpol nọ e jọ Jerusalẹm. Oria nọ ọ jọ kpobi, ọ rẹ gwọlọ uvẹ nọ ọ rẹ rọ t’ẹme kpahe Uvie Ọghẹnẹ. Isẹri Jihova a be daoma lele ithihi riẹ evaọ abọ nana re.—1 Pita 2:21.

USIUWOMA OTA ẸKWOMA ORIRUO

Uvumọ idhere enana nọ a rẹ rọ ta usiuwoma na k’owhẹ na i re w’iruo ho otẹrọnọ ọnọ ọ be tae kẹ owhẹ na ọ be rria lele iwuhrẹ na ha. O rrọ eviẹhọ re ohwo o ru oware nọ o hẹrioma no onọ ọ ta, yọ eviẹhọ egagọ i ku ima ahwo buobu rẹriẹ no Ebaibol na no. Ahwo a be fo Ebaibol na gheghe. Ikere-ebe gbe ahwo Farisi na a wo Ikereakere Hibru na, rekọ Jesu o se rai eviẹwẹ. Ọ ta kpahe ese nọ a bi se no Uzi Mosis ze, o te fibae kẹ ilele riẹ nọ: “Wha ru oware nọ a ta kẹ owhai, wha gaviezọ kẹ eme rai; rekọ wha ru eruo rai hi, keme a re ru epanọ a ta ha.” (Matiu 23:3) Ẹrria kpatiẹ Oleleikristi o re w’iruo vi euwa nọ a rẹ raha rọ ta usiuwoma. A rehọ onana hrẹ eyae Ileleikristi nọ i wo ezae egedhọ: “A vẹ te rọ fiki uruemu eyae rai ze edhere na, omake rọnọ a yo ẹme na ha, okenọ a ruẹ uruemu rai fuafo.”—1 Pita 3:1, 2.

Fikiere, Isẹri Jihova a be rọ edhere nana ta usiuwoma na kẹ amọfa re: ẹkwoma ẹkpatiẹ uruemu Oleleikristi rai nọ a be tudu riẹ họ amọfa awọ na. A be jẹ daoma ‘ru kẹ amọfa epanọ a gwọlọ nọ a ru kẹ ai.’ (Matiu 7:12) A be daoma ru enẹ kẹ ahwo kpobi, orọnikọ kẹ ibe Isẹri, egbẹnyusu, erivẹ, hayo imoni rai ọvo ho. Nọ a gba ha na, a rẹ sae kparobọ riẹriẹriẹ hẹ. Rekọ o rrọ isiuru rai re a ru ewoma kẹ ahwo kpobi orọnikọ evaọ usiuwoma Uvie na nọ a rẹ ta kẹ ae ọvo ho rekọ evaọ obọ nọ a re je fihọ kẹ ae evaọ okenọ o tẹ lọhọ.—Jemis 2:14-17.

[Uwoho nọ o rrọ ẹwẹ-obe avọ 19]

Hawaii

[Uwoho nọ o rrọ ẹwẹ-obe avọ 19]

Venezuela

[Uwoho nọ o rrọ ẹwẹ-obe avọ 19]

Yugoslavia

[Iwoho nọ e rrọ ẹwẹ-obe avọ 20]

Egwa Uvie, nọ e rrọ kpatiẹ, yọ eria ẹmeọta Ebaibol

[Iwoho nọ e rrọ ẹwẹ-obe avọ 21]

Evaọ uzuazọ uviuwou rai, jegbe amọfa nọ a be nyaku, Isẹri na a be daoma ru epanọ a be ta na