Eghale Emamọ Usi Na
“ỌNOWO na o wholo omẹ, re mẹ vuẹ emamọ usi kẹ enọ a nwẹ, o vi omẹ re mẹ sasa ahwo nọ a rọ uweli oma . . . re mẹ jaja enọ e [rrọ] uweli oma.”—AIZAYA 61:1, 2.
1, 2. (a) Eme Jesu o dhesẹ oma riẹ nọ ọ rrọ, kọ evaọ oghẹrẹ vẹ? (b) Didi eghale emamọ usi nọ Jesu o whowho na o wha ze?
ẸDIJALA jọ evaọ emuhọ odibọgba riẹ, Jesu ọ jọ uwou-egagọ na evaọ Nazarẹt. Wọhọ epanọ ikere na e ta, “a tẹ rehọ obe Aizaya kẹe, o te rovie obe, ọ jẹ ruẹ oria nọ a kere họ nọ, ‘Ẹzi Ọnowo na ọ rọ omẹ oma, fiki epanọ o ku ewhri ku omẹ re [mẹ] vuẹovuẹ emamọ usi.’ ” Jesu o te se oria eruẹaruẹ na haro. Ọ tẹ keria jẹ ta nọ: “Nẹnẹna ekere na ọgba eva ezọ rai.”—Luk 4:16-21.
2 Jesu ọ rọ edhere nana dhesẹ oma riẹ wọhọ ọtausiuwoma nọ a ruẹaro riẹ na, ọnọ o re whowho emamọ usi jẹ wha omosasọ ze. (Matiu 4:23) Yọ dai roro kpahe emamọ usi nọ Jesu ọ ta! Ọ ta kẹ enọ e jẹ gaviezọ kẹe nọ: “Mẹ họ elo akpọ na; ọnọ o lele omẹ ọ rẹ nya evaọ ebi hi, rekọ o re wo elo uzuazọ.” (Jọn 8:12) Ọ tẹ jẹ ta nọ: “Wha tẹ ria evaọ eme mẹ, yọ whai ghinọ ilele mẹ, wha rẹ te riẹ uzẹme na, uzẹme na u re ti ru owhai emuyẹ.” (Jọn 8:31, 32) Ẹhẹ, Jesu o wo “ẹme uzuazọ ebẹdẹ bẹdẹ.” (Jọn 6:68, 69) Elo, uzuazọ, ufuoma—evaọ uzẹme enana yọ eghale nọ a re rri kuẹku hu!
3. Didi emamọ usi ilele Jesu a whowho?
3 Nọ Pẹntikọst 33 C.E. o vrẹ no, ilele na e ruabọhọ iruo usiuwoma ota Jesu. A whowho “usiuwoma uvie na” kẹ emọ Izrẹl jẹ rọ kẹ ahwo erẹwho na. (Matiu 24:14; Iruẹru 15:7; Ahwo Rom 1:16) Enọ e gaviezọ a tẹ te riẹ Jihova Ọghẹnẹ. A kẹ rae ufuoma no igbo egagọ a te zihe ruọ abọ orẹwho abọ-ẹzi okpokpọ na, ‘Izrẹl Ọghẹnẹ,’ onọ ahwo riẹ a wo ẹruore nọ a ti ro su bẹdẹ bẹdẹ evaọ obọ odhiwu kugbe Olori rai, Jesu Kristi. (Ahwo Galesha 5:1; 6:16; Ahwo Ẹfẹsọs 3:5-7; Ahwo Kọlọsi 1:4, 5; Eviavia 22:5) Eyena ghinọ eghale ilogbo!
Usiuwoma Ota Nẹnẹ
4. Edhere vẹ uwou nọ a vi re a whowho emamọ usi na u bi ro rugba nẹnẹ?
4 Nẹnẹ, Ileleikristi nọ a wholo, avọ uketha “otu obuobu” ọrọ “igodẹ efa” na, a gbẹ be wha uwou nọ Jesu o vi anwẹdẹ na haro. (Eviavia 7:9; Jọn 10:16) Fikiere, a bi whowho usiuwoma na kẹre te epanọ a re ruẹ vẹre he. Evaọ ekwotọ 235, Isẹri Jihova a nya lahwe no re a “vuẹ emamọ usi kẹ enọ a nwẹ . . . re [a] sasa ahwo nọ a rọ uweli oma, je woro obọusino kẹ enọ a mu [je] fi enọ a kienyẹ họ omofọwẹ; re [a] woro ukpe aruoriwo ỌNOWO na, gbe ẹdẹ orukele Ọghẹnẹ mai; re [a] jaja enọ e [rọ] uweli oma.” (Aizaya 61:1, 2) Fikiere, iruo usiuwoma ota Ileleikristi na o gbẹ be wha eghale se ibuobu gbe uvi omosasọ se “enọ erọ eva uye kpobi.”—2 Ahwo Kọrint 1:3, 4.
5. Kpahe ewhowho emamọ usi na, ẹvẹ Isẹri Jihova a ro wo ohẹriẹ no ichọche Kristẹndọm?
5 Uzẹme o rọ inọ ichọche Kristẹndọm a bi w’obọ evaọ eghẹrẹ usiuwoma ota jọ. Ibuobu i re vi imishọnare re a ta ahwo kurẹriẹ evaọ ekwotọ efa. Wọhọ oriruo, The Orthodox Christian Mission Center Magazine o niyẹrẹ kpahe iruẹru imishọnare Ọtọdọks evaọ Madagascar, obọze-ọre Africa, Tanzania, gbe Zimbabwe. Rekọ, evaọ Ichọche Ọtọdọks na, wọhọ epanọ o rọ ichọche Kristẹndọm efa, ibuobu ahwo rai a re w’obọ evaọ iruo na ha. Wo ohẹrioma, Isẹri Jihova kpobi nọ e roma mudhe no a be daoma w’obọ evaọ usiuwoma ota. A vuhumu nnọ ewhowho emamọ usi na yọ imuẹro ọ uvi ẹrọwọ rai. Pọl ọ ta nọ: “Keme iroro eva ohwo ọ rẹ rọ rọwa ọ vẹ rọ ere wo unuzou, ọ vẹ jẹ rehọ igbenu riẹ ta via, a vẹ rọ ere siwi ei.” Ẹrọwọ nọ ọ rẹ wọ ohwo kpohọ iruo ho o whu no.—Ahwo Rom 10:10; Jemis 2:17.
Emamọ Usi nọ O rẹ Wha Eghale Ebẹdẹ Bẹdẹ Ze
6. Didi emamọ usi a bi whowho nẹnẹ?
6 Isẹri Jihova a bi whowho usi nọ o mai woma kpobi. A re rovie Ebaibol rai a ve dhesẹ kẹ enọ e rẹ gaviezọ inọ Jesu ọ rehọ uzuazọ riẹ dheidhe re ọ kẹ ahwo edhere nọ a re ro bru Ọghẹnẹ, erọvrẹ izieraha, gbe ẹruore uzuazọ ebẹdẹ bẹdẹ. (Jọn 3:16; 2 Ahwo Kọrint 5:18, 19) A re whowho nnọ a rehọ Uvie Ọghẹnẹ mu evaọ obọ odhiwu evaọ otọ Ovie nọ a wholo na, Jesu Kristi, gbe nnọ kẹle na o ti si emuemu no otọakpọ na jẹ rẹrote ezihetha Aparadase. (Eviavia 11:15; 21:3, 4) Evaọ erugba eruẹaruẹ Aizaya, a rẹ vuẹ erivẹ rai inọ enẹna họ “ukpe aruoriwo ỌNOWO na” nọ ahwo-akpọ a sae gbẹ rọ j’owọ kẹ emamọ usi na. A be jẹ vẹvẹ unu inọ kẹle na “ẹdẹ orukele Ọghẹnẹ mai” ọ te tha nọ Jihova o ti ro kpe irumuomu nọ i kurẹriẹ hẹ no.—Olezi 37:9-11.
7. Didi iku i dhesẹ okugbe Isẹri Jihova, kọ fikieme a be rọ reawere okugbe otiọye na?
7 Evaọ akpọ nọ okpẹtu gbe idabolo e vọ, onana ovo họ emamọ usi nọ u wo irere ebẹdẹ bẹdẹ. Enọ e jẹ riẹ rehọ a re zihe ruọ abọ okugbe-inievo Ileleikristi akpọ-soso enọ e be kuvẹ re ohẹriẹ orẹwho, uyẹ, gbe uyero abọ-ugho o hẹriẹ ae he. A “whẹ uyoyou họ oma, onọ orọ ọwhẹgbe eware kpobi.” (Ahwo Kọlọsi 3:14; Jọn 15:12) A jọ orẹwho Africa jọ ruẹ onana evaọ ukpe n’ukpo. Ohiohiẹ jọ edo igbeke e rọwo ahwo evaọ okpẹwho na. A be gwọlọ rọ ogaga nwene egọmeti na. Nọ ohọre na u zihe ruọ orọ uyẹ avọ uyẹ no, a tẹ be fo uviuwou Isẹri jọ fikinọ a fi ohwo uyẹ ọdekọ nọ ọ rrọ ibe Isẹri họ uwou rai. Uviuwou na o tẹ ta nọ: “Isẹri Jihova ọvo e be rria uwou mai.” Rọ kẹ ae, ohẹriẹ uyẹ u muẹme he; uyoyou Ileleikristi—re a sasa enọ i wo ẹgwọlọ omosasọ oma—họ oware nọ u muẹme. Omoni rai jọ nọ ọ rọ Osẹri hi ọ ta nọ: “Ahwo egagọ kpobi a bi vivie ibe egegagọ rai. Isẹri Jihova ọvo a ru ere he.” Iyẹrẹ itieye na nọ a nẹ no ekwotọ nọ ẹmo ọ tahaku no ze i dhesẹ nọ Isẹri Jihova a ghine “you imoni na.”—1 Pita 2:17.
Emamọ Usi na U re Nwene Ahwo
8, 9. (a) Didi inwene enọ e jẹ emamọ usi na rehọ a ru? (b) Didi oriruo o dhesẹ ẹgba emamọ usi na?
8 Emamọ usi na u w’obọ kugbe oware nọ Pọl o se “uzuazọ onana jegbe rọ kẹ uzuazọ no tha.” (1 Timoti 4:8) Orọnikọ o rẹ kẹ uvi ẹruore igbunu kẹ obaro na ọvo ho rekọ u re je ru “uzuazọ onana” woma viere. Wọhọ omomọvo, Ẹme Ọghẹnẹ, Ebaibol na, ọ be kpọ Isẹri Jihova, re a nwene izuazọ rai lele oreva Ọghẹnẹ. (Olezi 119:101) Iruemu rai i bi nwene nọ a be bọ ekwakwa wọhọ ẹrẹreokie gbe omarokpotọ na.—Ahwo Ẹfẹsọs 4:24.
9 Roro kpahe oriruo Franco. O wo ẹbẹbẹ evedha. Oke kpobi nọ eware e tẹ nyathọ, o ve muhọ edo je mu eware họ ẹraha. Isẹri Jihova a je wuhrẹ Ebaibol kugbe aye riẹ, ẹmẹrera oriruo Ileleikristi rai o te fiobọhọ kẹ Franco ruẹ nọ u fo re o nwene. A te wuhrẹ Ebaibol kugbei, o te ti wuhrẹ udhedhẹ gbe oma-oriẹsuo, ibi ẹzi ọfuafo na. (Ahwo Galesha 5:22, 23) Ọ rọ omọvo ahwo 492 nọ e jọ Belgium họ-ame evaọ ukpe iruo 2001 na. Je roro kpahe oriruo Alejandro. Imu egaga e reria ọmoha na oma te epanọ ọ jẹ rọ jọ ezuzu kwa eware zẹ re ọ ruẹ ugho dẹ imu nọ ọ rẹ lọ. Okenọ ọ jọ ikpe 22, Isẹri Jihova a te zizie Alejandro re o wuhrẹ Ebaibol na, ọ tẹ rọwo. O je se Ebaibol na kẹdẹ kẹdẹ je kpohọ iwuhrẹ Ileleikristi. O nwene uzuazọ riẹ vẹrẹ vẹrẹ te epanọ, u te emerae ezeza ha, o te muọ usiuwoma họ ẹta—omọvo jọ evaọ usu ahwo 10,115 nọ e ta usiuwoma evaọ Panama ukpe n’ukpo na.
Emamọ Usi Na—Oghale kẹ Erọ Omarokpotọ
10. Amono a be j’owọ kẹ emamọ usi na, kọ ẹvẹ eriwo rai o bi ro nwene?
10 Aizaya ọ ruẹaro nnọ a ti whowho emamọ usi na kẹ otu omarokpotọ na. Amono họ erọ omarokpotọ nana? Ae họ enọ a dhesẹ evaọ obe Iruẹru na wọhọ enọ “a ro mu kẹ uzuazọ ebẹdẹ bẹdẹ.” (Iruẹru 13:48) Oghẹrẹ ahwo uyerakpọ sa-sa nọ i rovie udu rai kẹ ovuẹ uzẹme na họ enọ i ru ahwo omarokpotọ nana via. Ahwo otiọye na a wuhrẹ inọ eruo oreva Ọghẹnẹ o rẹ wha eghale ze, enọ i vi oware kpobi nọ eyero akpọ na ọ rẹ kẹ. (1 Jọn 2:15-17) Rekọ ẹvẹ Isẹri Jihova a be rọ nyate idu ahwo evaọ iruo usiuwoma ota rai?
11. Wọhọ epanọ Pọl ọ ta, ẹvẹ a re whowho emamọ usi na?
11 Whaọ, roro kpahe oriruo Pọl ukọ na, ọnọ o kere se ahwo Kọrint nọ: “Oke nọ me bru owhai ze, imoni, mẹ nyaze te rehọ omoro hayo areghẹ ro se isẹi ẹme Ọghẹnẹ kẹ owhai hi. Keme mẹ guọlọ nọ mẹ rẹ riẹ oware ovuovo eva evie rai hi, ajokpa Jesu Kristi nọ a kare [veghe] ọvo.” (1 Ahwo Kọrint 2:1, 2) Pọl ọ daoma rehọ eriariẹ riẹ duorro họ oma kẹ enọ e jẹ kezọ kẹe he. Uzẹme nọ u n’obọ Ọghẹnẹ ze o wuhrẹ, uzẹme nọ a kere fihọ Ebaibol na nẹnẹ na. Je muẹrohọ uduotahawọ Pọl kẹ ibe ọtausiuwoma riẹ, Timoti: “Vuẹ ovuẹ ẹme na, mu ọwhọ riẹ.” (2 Timoti 4:2) “Ẹme na,” ovuẹ Ọghẹnẹ oye Timoti o re whowho. Pọl o te je kere se Timoti nọ: “Dawo oma re whọ [sai] ru oma ra wọhọ [ọnọ] a jẹrehọ no, obọ aro Ọghẹnẹ [jẹ] wọhọ oruiruo ọnọ ọ kare omaovuọ, nọ rẹ yọrọ ẹme uzẹme na ziezi.”—2 Timoti 2:15.
12. Ẹvẹ Isẹri Jihova nẹnẹ a bi ro lele eme Pọl jegbe oriruo riẹ?
12 Isẹri Jihova a bi lele oriruo Pọl, jegbe eme riẹ ro se Timoti. A riẹ ogaga Ẹme Ọghẹnẹ a tẹ be jẹ rehọ iẹe ruiruo ziezi jẹ be daoma dhesẹ kẹ erivẹ rai eme ẹruore gbe omosasọ nọ i fo. (Olezi 119:52; 2 Timoti 3:16, 17; Ahwo Hibru 4:12) Uzẹme, a be rehọ ebe nọ a kere no Ebaibol ze ruiruo re enọ i wo isiuru a sai wo eriariẹ Ebaibol evaọ oke uvẹ rai. Rekọ ẹsikpobi a rẹ gwọlọ dhesẹ eme Ikereakere na kẹ ahwo. A riẹ nọ Ẹme nọ Ọghẹnẹ o gie ẹwolo ku o ti duobọte idu ahwo omarokpotọ. Yọ enẹ nọ a be rọ rehọ iẹe ruiruo o be bọ ẹrọwọ rai ga re.
‘Sasa Enọ e Rrọ Uweli Oma’
13. Evaọ ukpe 2001, didi oware o via nọ o wha ẹgwọlọ ologbo nọ a rẹ rọ rehọ omosasọ kẹ enọ i bi weri ze?
13 Ukpe 2001 na o ruẹ okpẹtu buobu, fikiere ahwo buobu a gwọlọ omosasọ. Amara September n’okpo ọ ruẹ oriruo ologbo evaọ obọ United States, ọraha Oria Ekiọthuọ Akpọ-Soso evaọ New York gbe Pentagon nọ o kẹle Washington, D.C. Dai roro iguegue nọ ọraha ọyena o fihọ orẹwho na soso! Evaọ udevie ọraha ọyena, Isẹri Jihova a daoma re a ru uwou nọ a vi rai na gba re a ‘sasa enọ e rrọ uweli oma.’ Iriruo jọ kakao i ti dhesẹ oghẹrẹ nọ a ro ru onana.
14, 15. Ẹvẹ Isẹri evaọ iriruo ivẹ jọ a sae rọ rehọ ikereakere na rọ sasa enọ i bi weri oma ziezi?
14 Osẹri jọ nọ ọ rrọ ọtausiuwoma oke-kpobi ọ nyabru uvovo-aye jọ evaọ akotọ edhere ọ tẹ nọe oware nọ o roro kpahe ọraha ugbarugba na. Aye na o te muhọ ẹviẹ. Ọ ta nọ oware na o da riẹ jẹ ta nọ o hae were iẹe otẹrọnọ ọ sai fiobọhọ. Osẹri na ọ tẹ ta kẹe nọ Ọghẹnẹ o wo isiuru kpahe omai kpobi, o te se Aizaya 61:1, 2 kẹe. Eme eyena nọ Ọghẹnẹ ọ kẹ ẹgba na i do were aye na, ọnọ ọ ta nọ ahwo kpobi a bi weri. O te mi obe-ovẹvẹ jọ ọ tẹ ta kẹ Osẹri na nọ o weze bru ei ziọ obọ uwou.
15 Isẹri ivẹ nọ e jọ usiuwoma a nyaku ọzae jọ nọ ọ rrọ oria iruo riẹ. A ta kẹe nọ a wo eme omosasọ no Ikereakere na ze nọ a gwọlọ dhesẹ kẹe fiki ọraha nọ ọ via kẹle evaọ Oria Ekiọthuọ Akpọ-Soso na. Nọ ọ rọwo nọ a t’ẹme kẹe no, a te se 2 Ahwo Kọrint 1:3-7, onọ a rẹ jọ ruẹ eme na: ‘Ma wo omosasọ no obọ Kristi ze.’ O were ọzae na inọ erivẹ riẹ nọ e rrọ Isẹri a be ghale eme omosasọ kugbe amọfa ọ tẹ ta nọ: “Ajọ Ọghẹnẹ ọ ghale emamọ iruo nọ wha bi ru na.”
16, 17. Didi iriruo ivẹ i dhesẹ ogaga Ebaibol na nọ o re ro fiobọhọ kẹ ahwo nọ e rrọ ọkora gbe enọ okpẹtu ọ be k’uye?
16 Osẹri jọ nọ o bi weze bru enọ i wo isiuru ọ nyaku ọmọ aye jọ nọ o dhesẹ isiuru no vẹre, ọ tẹ ta nọ o wo ọdawẹ kpahe oghẹrẹ nọ uyero erivẹ rai o rrọ anwọ etoke okpẹtu nọ ọ via kẹle na. U gbe ọzae na unu inọ Osẹri na ọ be rehọ oke obọ riẹ ro weze bru ahwo jẹ n’ekpẹ rai. Ọ ta nọ o je ruiruo kẹle Oria Ekiọthuọ Akpọ-Soso na evaọ okenọ okpẹtu na ọ via, ọ tẹ jẹ ruẹ epanọ eware kpobi e rrọ via. Okenọ ọ nọ oware nọ Ọghẹnẹ ọ rọ kẹ uye-oruẹ uvẹ, Osẹri na o te se eria jọ no Ebaibol na ze, kugbe Olezi 37:39, onọ o ta nọ: “ỌNOWO họ usiwo enọ ikiẹrẹe, ọye họ ẹruọrọsuọ rai eva oke uye.” Ọzae na ọ tẹ nọ epanọ uzuazọ o rrọ kẹ Osẹri na gbe uviuwou riẹ, zizie ei re o zihe ze, o te je yere iei kẹ iweze na.
17 Omọvo jọ evaọ usu idu ahwo nọ i bi weri nọ Isẹri Jihova e sasa oma anwẹnọ okpẹtu na ọ via na họ uvovo-aye jọ nọ Isẹri na e nyaku okenọ a je weze bru erivẹ rai. Oware na o dha riẹ eva gaga ọ tẹ gaviezọ okenọ a je se Olezi 72:12-14: “O re siwi oyogbere gbe ọnọ o wo ọthuke he. Ọ be re ohrọ eyẹlẹ gbe iruori, o te bi siwi uzuazọ iruori. O siwi uzuazọ rai no okienyẹ avọ ozighi; azẹ rai ọ tẹ rẹ ghaghae eva aro riẹ.” Ẹvẹ eme eyena i wo otofa te! Aye na ọ tẹ ta kẹ Isẹri na nnọ a wariẹ se ikere na o te zizie ai ruọ uwou riẹ re a ruabọhọ ẹme na. Nọ a ku ẹme na họ, yọ a mu uwuhrẹ Ebaibol họ no.
18. Ẹvẹ Osẹri jọ o ro fiobọhọ kẹ erivẹ riẹ evaọ okenọ a sei re ọ lẹ kẹ ae?
18 Osẹri jọ o bi ruiruo evaọ ehọtẹle evaọ oria nọ ikpahwo a be rria nọ ahwo a re jo dhesẹ isiuru kpahe emamọ usi Uvie na vẹre he. Nọ ọraha na ọ via no, o tẹ wọhọ nọ a nuhu ẹwho na kpobi. Evaọ Edisoi-Oka nọ ọraha na ọ vrẹ no, ọga ehọtẹle na o te zizie ahwo kpobi re a ruọ otafe re a kru ekandoro, re a fọ tou fiki enọ i whu na. Avọ adhẹẹ kẹ iroro rai, Osẹri na o te lele ai dikihẹ otafe ababọ ẹme. Ọga na ọ riẹ nnọ omọvo Isẹri Jihova ọ rrọ, fikiere nọ a fọ kuhọ no, ọga na ọ tẹ yare oniọvo na re ọ lẹ. Osẹri na ọ rọwo. Evaọ olẹ riẹ, o dhunu te uweri ulogbo nọ o r’otọ na rekọ ọ tẹ ta nọ enọ i bi weri na a re weri avọ ẹruore. Ọ ta kpahe okenọ eware iyoma itieye na e gbẹ te via ha jẹ ta nọ ahwo kpobi a rẹ sai si kẹle Ọghẹnẹ omosasọ na ẹkwoma eriariẹ egbagba rono Ebaibol na ze. Nọ ọ ta nọ “Ami” no, ọga na—kugbe ahwo nọ a bu vi 60 nọ e jọ otafe ehọtẹle na—a te bru Osẹri na ze, yere iei, gbalọ iẹe, jẹ ta nọ olẹ na họ onọ o mai woma kpobi nọ a yo no.
Oghale kẹ Ẹwho Na
19. Didi oriruo o dhesẹ nọ ahwo jọ a vuhu itee ikpehru Isẹri Jihova mu?
19 Maero evaọ edẹ enana, ewho nọ Isẹri Jihova e be rria a bi wo erere no iruo rai ze—wọhọ epanọ ibuobu e ta no. Ẹvẹ ahwo nọ a be wha udhedhẹ, oruọzewọ, gbe emamọ uruemu haro a gbe kpomahọ ahwo wowoma ha? Evaọ orẹwho Central Asia jọ, Isẹri na a nyaku ọzae jọ nọ ọ jọ okpohwo isoja ẹkwotọ na. Ọ ta nọ a kẹ riẹ iruo okejọ re ọ kiẹ ikoko egagọ sa-sa riwi. Nọ ọ kiẹ Isẹri Jihova, oruọzewọ gbe uruemu ezi rai o were riẹ. Ẹrọwọ ọgaga riẹ ọ were riẹ gbe nnọ iwuhrẹ rai i no Ikereakere na ze. Ọzae nana ọ tẹ rọwo uwuhrẹ Ebaibol.
20. (a) Eme iruo nọ Isẹri Jihova a niyẹrẹ rai evaọ ukpe n’ukpo i dhesẹ? (b) Eme o dhesẹ nọ iruo e gbẹ riẹ buobu nọ a re ru, kọ ẹvẹ ma re rri uvẹ-ọghọ usiuwoma ota mai na?
20 No umutho iriruo nọ ma jọ etenẹ fodẹ na ze, evaọ usu iriruo idu buobu nọ ma rẹ sae fodẹ, o rrọ vevẹ inọ Isẹri Jihova a ruiruo gaga evaọ ukpe iruo 2001 na.a A lele ima ahwo buobu t’ẹme, a sasa ibuobu nọ i bi weri oma, a tẹ jẹ ghale iruo usiuwoma ota rai. Ahwo 263,431 e rehọ ame-ọhọ dhesẹ omarọkẹ Ọghẹnẹ rai via. Evaọ akpọ na soso, unu etausiuwoma o rehọ 1.7 evaọ udhusoi viharo. Yọ uzẹme na nnọ ahwo 15,374,986 e ziọ ehaa Ekareghẹhọ ẹgbukpe orọ uwhu Jesu na u dhesẹ nnọ iruo buobu e gbẹ riẹ k’omai. (1 Ahwo Kọrint 11:23-26) Joma gbẹ gwọlọ ahwo omarokpotọ nọ e be j’owọ kẹ usiuwoma na. Yọ nọ ukpe aruoriwo Jihova o gbẹ r’otọ na, joma gbẹ sasa enọ e rrọ “uweli” oma. Uvẹ-ọghọ nọ ma wo o rro yọ! Ababọ avro, mai kpobi ma rẹ wariẹ eme Aizaya na: “Mẹ rẹte ghọghọ eva ỌNOWO na, ẹwẹ mẹ ọ rẹte ghọghọ evaọ Ọghẹnẹ mẹ.” (Aizaya 61:10) Ajọ Ọghẹnẹ ọ gbẹ rehọ omai ru eme eruẹaruẹ enana gba: “Ọnowo ỌGHẸNẸ na o reti ru ẹrẹreokie gbe ujiro bọomavia evaọ erẹwho na.”—Aizaya 61:11.
[Oruvẹ-obotọ]
a Omaa-iruo nọ o rrọ ẹwẹ-obe avọ 29 rite 32 na u dhesẹ iyẹrẹ iruẹru Isẹri Jihova evaọ etoke ukpe iruo 2001 na.
Kọ Whọ Kareghẹhọ?
• Ẹvẹ usiuwoma nọ Jesu o whowho o rọ ghale otu omarokpotọ na?
• Didi eghale i re te enọ e j’owọ kẹ iruo ewhowho emamọ usi orọ ilele ikpe-udhusoi ọsosuọ Jesu?
• Ẹvẹ emamọ usi na o rọ ghale enọ e gaviezọ kẹe no nẹnẹ?
• Ẹvẹ who rri uvẹ-ọghọ mai orọ etausiuwoma nọ ma rrọ?
[Iwoho nọ e rrọ ẹwẹ-obe avọ 25]
Isẹri Jihova a rẹ kareghẹhọ owha-iruo usiuwoma ota rai ẹsikpobi
[Iwoho nọ e rrọ ẹwẹ-obe avọ 27]
Enọ e j’owọ kẹ emamọ usi na a re zihe ruọ abọ okugbe-inievo akpọ-soso