Uwuhrẹ 17

Eroruiruo Emaekrofonu

Eme o gwọlọ nọ who re ru?

Emaekrofonu ọ tẹ riẹ nọ a re ro ru urru do via eva oria iwuhrẹ ra, rehọ iẹe ruiruo ziezi.

FIKIEME U JE WUZOU?

Ẹme nọ a ta ọ rẹ kẹ amọfa erere otẹrọnọ a yo rie vevẹ.

INIEVO Ileleikristi mai e rẹ raha oke avọ omodawọ gaga re a ziọ iwuhrẹ Ileleikristi na. Otẹrọnọ a re wo erere no ẹme nọ a ta ze, u fo hrọ re a yo eme na vevẹ.

Evaọ edẹ Izrẹl anwae, ekwakwa egba ẹlẹtriki e jariẹ hẹ. Okenọ Mosis ọ t’ẹme kẹ orẹwho Izrẹl evaọ Ukiekpotọ Moab taure a tẹ te ruọ Ẹkwotọ Eyaa na, ẹvẹ enọ e jọ ogbotu na kpobi, enọ i bu te ima buobu na, a ro yo eme riẹ? O wọhọ nọ Mosis ọ ghale ahwo fihọ eria sa-sa nya evuẹ na wariẹ, enọ e jẹ wariẹ eme nọ a yo kẹ ohwohwo unọjọ utọjọ. (Izie. 1:1; 31:1) U kri hi nọ emọ Izrẹl i muọ ekwotọ ofẹ ukiediwo-ọre Jọdan họ efikparobọ no, Joshua o te koko ahwo na họ aro Ugbehru Gẹrizim gbe Ugbehru Ebal, yọ o wọhọ nọ ahwo Livai a jọ ukiekpotọ nọ o hẹriẹ e rai na. Etẹe ahwo na kpobi a je yo jẹ k’uyo kẹ eghale Ọghẹnẹ gbe eka nọ a fihọ otọ kẹ ae. (Jos. 8:33-35) O wọhọ nọ evaọ oke nana re, ahwo a jẹ rọ wariẹ eme na, rekọ avro ọ riẹ hẹ inọ oria nọ ẹme ọ rẹ jọ ruae nọ a jọ t’ẹme na u fiobọhọ re.

Oware wọhọ ikpe 1,500 evaọ uwhremu na okenọ “otu obuobu jọ o kuku” Abade Galili ti yo eme Jesu, ọ tẹ ruọ okọ, dina gele okọ na no okpa, ọ tẹ keria re ọ t’ẹme kẹ ogbotu na. (Mak 4:1, 2) Fikieme Jesu ọ jẹ rọ t’ẹme no okọ ze? Ẹsejọhọ fikinọ uvo ohwo o rẹ jọ ehru ame ruae.

Taure emuhọ ikpe-udhusoi avọ 20 na o te ti te, edo-ẹme gbe urru ọ oruẹme oye u re dhesẹ unu ahwo nọ a rẹ jọ ogbotu na yo ẹme nọ ọ ta. Ghele na, muhọ evaọ etoke ikpe 1920, idibo Jihova a tẹ rehọ uvẹ ekwakwa egba ẹlẹtriki nọ e rẹ kpare edo uvo ohwo ro ruiruo eva ikokohọ rai.

Ekwakwa Edo. Ekwakwa itieye na e rẹ sae kpare edo-uvo oruẹme kpehru gaga yọ evaọ oke ovona who re gbe vuhu uvo ohwo na. Oruẹme na o re du va ha. Enọ e be kezọ a re du ru omodawọ ogaga re a te yo ẹme nọ ọ be ta ha. Ukpoye, a rẹ sai fi iroro kpobi họ ovuẹ na.

A daoma gaga no re a ruẹ nọ ekwakwa edo e rọ ikokohọ ilogbo gbe esese erọ Isẹri Jihova. Fibae, Egwa Uvie buobu i wo ekwakwa edo re i ru urru enọ e be kẹ ovuẹ, ru iwuhrẹ, hayo se no eplatfọmo ze do. Yọ ikoko jọ i wo emaekrofonu nọ ogbotu na ọ rẹ rọ kpahe fihọ enọ evaọ iwuhrẹ. Otẹrọnọ ukoko ra u wo ekwakwa itieye na, wuhrẹ epanọ whọ rẹ rehọ ai ruiruo ziezi.

Ekpọvio Jọ. Re whọ rehọ ekwakwa na ruiruo ziezi, wo eware enana họ iroro: (1) Emaekrofonu na ọ rẹ rehọ enwenọ ubro urula hayo omojọ u no rie ro thabọ no unu ra. Emaekrofonu na ọ tẹ kẹle hrọ, eme ra i re do vaha vaha. U te thabọ hrọ, a ti yo eme na vevẹ hẹ. (2) Emaekrofonu na ọ rẹ jọ aro ra, orọnikọ akotọ họ. Who te bi rri t’ofẹ t’ofẹ ra, t’ẹme evaọ okenọ whọ tẹ rọ ovao rri emaekrofonu na no ọvo. (3) Dina kpare uvo ra kpehru omojọ vi ẹkoma ẹmeọta ra. Rekọ who du va ha. Ekwakwa edo na i ti ru urru ra do te enọ e keria obọ emu kpobi. (4) Whọ tẹ gwọlọ ka urru ra hayo wọre owọre hayo zehe azehe, si unu ra no emaekrofonu na no.

Okenọ Who te Bi Ru Ẹme. Okenọ who te dikihẹ aro agbada ẹmeọta na no, oniọvo jọ ọ rẹ ruẹrẹ emaekrofonu na họ owhẹ unu. Dikihẹ kpomavi avọ ovao ra nọ u re rri ogbotu na nọ oniọvo na ọ be ruẹrẹ iẹe họ na. Fi ebe ra họ ehru agbada ẹmeọta na, jẹ ruẹ nọ emaekrofonu na o di owhẹ ude he.

Who te mu ẹme họ ẹta, gaviezọ kẹ edo uvo ra nọ o te jọ egba na do lahwe na. Kọ u do kpehru hrọ, hayo kọ eme jọ i bi do wọhọ edo umu nọ a bi je? O sai woma re whọ dina go h’emu. Who te bi rri ebe ra, kareghẹhọ nọ whọ rẹ t’ẹme hayo se evaọ okenọ whọ tẹ kpare ovao ra riwi emaekrofonu na no hayo nọ ovao ra o tẹ dina rọ ehru riẹ, orọnikọ otọ riẹ hẹ.

Okenọ Who te Bi Se no Eplatfọmo Ze. O rẹ mai woma re who kru Ebaibol ra hayo ebe efa kpehru re ovao ra u riwi ogbotu na. Nọ o rọnọ emaekrofonu na ọ te jọ aro ra na, u re fo re whọ dina kru obe nọ who bi se họ akotọ ra. Onana u dhesẹ nọ uzou ra o rẹ dina jọ akotọ emaekrofonu na. Nọ who bi ti se, uvo ra o vẹ nya ovavo ruọ emaekrofonu na.

Inievo-emezae buobu nọ i re se evaọ Uwuhrẹ Uwou-Eroro na a re dikihẹ je se ovavo ruọ emaekrofonu na. Edikihẹ nana o rẹ lẹliẹ ai kuẹwẹ wowoma ziezi je se liọ viere. Kareghẹhọ nọ isase idhe-eme na yọ abọ ologbo ọrọ uwuhrẹ na. Irere nọ ogbotu na o re wo o roma hwa eme nọ who bi se na gaga.

Okenọ Whọ tẹ be Kpahe Fihọ Onọ Evaọ Ewuhrẹ. Otẹrọnọ a rẹ jọ ukoko ra ghoro emaekrofonu kẹ ogbotu t’ẹme, kareghẹhọ nọ u fo re whọ t’ẹme via ziezi avọ uvo nọ a re yo. Okenọ whọ tẹ be t’ẹme, daoma kru obe hayo Ebaibol ra h’obọ. Onana u ti fiobọhọ k’owhẹ ruẹ obe na ziezi nọ whọ be t’ẹme fihọ emaekrofonu na.

Evaọ ikoko jọ, a rẹ rehọ inievo-emezae mu re a ghoro emaekrofonu bru enọ a se re a kpahe fihọ onọ. O tẹ rọ ere evaọ ukoko ra, evaọ okenọ a te s’owhẹ, fi obọ ra h’ehru re oniọvo nọ o bi ghoro emaekrofonu na ọ sae ruẹ oria nọ whọ keria re ọ sae nya t’owhẹ oma vẹrẹ. Emaekrofonu na ọ tẹ rọ onọ who re kru, ruẹrẹ oma kpahe who mi ei re who kru riei. Who mu ẹme họ ẹta ha bẹsenọ who re fi emaekrofonu na họ unu no ziezi. Whọ tẹ ta ẹme ra no, zihe emaekrofonu na kẹ oniọvo na.

Okenọ Who te bi ru Odhesẹvia. Re a rọ emaekrofonu ru odhesẹvia o gwọlọ eroro kparo ziezi. Emaekrofonu na ọ tẹ rọ ọnọ a re dhehọ ọkpọ nọ o dikihẹ, koyehọ who wo uvẹ nọ whọ rẹ rọ rehọ abava ra kru Ebaibol gbe ebe ra. Emaekrofonu na ọ tẹ rrọ ọnọ a re kru h’obọ, o rẹ k’owhẹ uvẹ nọ who re ro go kp’enẹ avọ enẹ ziezi, rekọ whọ rẹ sae gwọlọ ru re ohwo avivẹ ra o kru rie. Abọ ra ọ vẹ jọ vevẹ re whọ sai kru Ebaibol ra. Whẹ avọ ọnọ o wo uwou na wha rẹ jọ obọ uwou wuhrẹ onana ziezi re ọrivẹ-usiuwoma ota ra ọ riẹ epanọ o re kru rie. Jẹ kareghẹhọ inọ whọ tẹ rọ eplatfọmo, who re kiemuku ogbotu na ha, maero evaọ okenọ whọ tẹ be t’ẹme.

Evaọ idhesẹvia Ewuhrẹ Odibọgba, ahwo buobu a sae jariẹ w’obọ, yọ a sae nya kpenẹ avọ enẹ evaọ eplatfọmo na. Fikiere, o sae gwọlọ emaekrofonu buobu. A rẹ ruẹrẹ enana họ eplatfọmo no re oke u te ti te hayo a re fi ai họ oria kẹ enọ i bi ti ru odhesẹvia na. Re u muẹro nọ emaekrofonu na e rọ emamọ oria evaọ ẹruoke o gwọlọ omaruẹrẹhọ re oke u te ti te. Ẹwariẹ idhesẹvia re a te ti ru ai o rẹ kẹ uvẹ nọ a re ro dhesẹ epanọ a rẹ rọ emaekrofonu ruiruo ziezi kẹ enọ i bi ti ru idhesẹvia na. Otẹrọnọ a sae jọ eplatfọmo na wariẹ odhesẹvia na ha, o sae jọ oware areghẹ re enọ i bi ti ru odhesẹvia na a kru oware osese jọ nọ o wọhọ emaekrofonu re a riẹ epanọ a re kru rie ziezi. A te ru odhesẹvia na no, enọ i ru rie na a re fi emaekrofonu na h’otọ ẹmẹrera, yọ a rẹ yọroma re a ruẹ nọ a rọ awọ si ifi emaekrofonu efa ha nọ a bi no eplatfọmo na.

Ẹro nọ ma re muhọ eroruiruo emaekrofonu u w’obọ dẹẹ kugbe ugogo ẹjiroro jọ ọrọ iwuhrẹ mai, koyehọ, obufihọ kẹ ohwohwo ẹkwoma ẹtavia Ẹme Ọghẹnẹ. (Hib. 10:24, 25) Ẹkwoma ewuhrẹ re ma rọ emaekrofonu ruiruo ziezi, ma ti fiba ute obọdẹ nana.

EPANỌ A RE RO RU EI

Dina kru emaekrofonu na no unu ra omojọ.

Ruẹ nọ whọ t’ẹme evaọ okenọ unu ra u te rri emaekrofonu na ọvo.

Dina kpare urru na kpehru omojọ vi ẹkoma ẹmeọta ra.

Whọ tẹ gwọlọ ka uvo ra, go ovao ra no emaekrofonu na.

ORIA IRUO: Wha tẹ be rọ emaekrofonu t’ẹme evaọ Ọgwa Uvie ra, muẹrohọ epanọ iruẹme ona a rẹ rọ emaekrofonu nọ a ro dikihẹ gbe enọ a re kru h’obọ t’ẹme. Muẹrohọ eware nọ whọ gwọlọ ro ruiruo hayo whaha, kugbe oware nọ o wha ẹjiroro ra na ze.