Uye-Oruẹ Kpobi U Ti Kuhọ Kẹle!

Anwẹnọ whọ rọ rrọ uzuazọ na, o sae jọ nọ whọ nọ no ẹdẹjọ inọ, ‘Fikieme uye-oruẹ o jẹ da otọ fia enẹ?’ Anwọ ikpe idu buobu ze na, ahwo-akpọ a ruẹ uye gaga no fiki emo, uvuhu, okpẹtu, ethube, okienyẹ, ẹyao, gbe uwhu. Uye o bẹ ahwo-akpọ no evaọ ikpe udhusoi nọ e vrẹ no na vi epaọ anwẹdẹ kpobi. Kọ uye-oruẹ nana kpobi u ti kuhọ ẹdẹjọ?

Uyo omosasọ na họ Ee, yọ o te jọ kẹle! Ẹme Ọghẹnẹ, Ebaibol na, ọ ta nọ: “Iru-umuomu e gbẹ te jọ họ . . . Rekọ enọ e rọ oma kpotọ, e rẹ te rọ otọ na reuku; oma o rẹ te were ae evaọ omofọwẹ.” Ẹvẹ u ti lehie te? “Ikiẹrẹe e rẹ te rehọ otọ na reuku, a vẹ jẹ ria ae bẹdẹ.”—Olezi 37:10, 11, 29.

Nọ Ọghẹnẹ o te si emuemu gbe uye-oruẹ no otọ no, a ve ti nwene otọakpọ na zihe ruọ aparadase. Kẹsena ahwo a vẹ te sae rria bẹdẹ bẹdẹ evaọ otọ omokpokpọ gbe evawere ọgbagba. Ẹme Ọghẹnẹ ọ ta nọ: “Ọghẹnẹ o ve ti ririe irui kpobi no aro rai; uwhu o gbẹte jọ ofa ha, hayo kọ uweri hi, hayo oviẹ hẹ, hayo edada ọvuọvo ho.”—Eviavia 21:4.

Evaọ akpọ kpokpọ yena, a te kpare enọ i whu no dede zihe ziọ uzuazọ te reawere eghale yena: “Ẹkparomatha enọ ikiete avọ enọ ikiete he e rẹ te jarọ.” (Iruẹru 24:15) Oyejabọ nọ Jesu Kristi ọ sae rọ ta kẹ orumuomu nọ o kurẹriẹ je fi ẹrọwọ họ iẹe inọ: “Who re ti lele omẹ jọ obọ Paradais.”—Luk 23:43.

Fikieme Uye-Oruẹ U ro Muhọ?

Nọ Ọghẹnẹ ọ jiroro emamọ obaro evawere kẹ ahwo-akpọ na, fikieme ọ rọ kuvẹ re uye-oruẹ u muhọ? Fikieme ọ rọ kẹe uvẹ kri te enẹ?

Okenọ Ọghẹnẹ ọ ma Adamu avọ Ivi, Ọ ma rai gbagba evaọ ugboma gbe iroro. O fi rai họ ọgbọ aparadase jẹ kẹ ai iruo nọ a re ru avọ evawere. Ebaibol na e ta nọ: “Ọghẹnẹ ọ tẹ ruẹ nọ eware kpobi nọ ọ ma na i re wowoma.” (Emuhọ 1:31) O hae jọnọ a yo ẹme kẹ Ọghẹnẹ, a hai ti yẹ emọ egbagba, otọakpọ na soso o hae te jọ aparadase, oria nọ ahwo a hae te jọ bẹdẹ bẹdẹ evaọ udhedhẹ gbe evawere.

Ọghẹnẹ ọ rehọ okẹ oghaghae ọrọ ufuoma iroro-ejẹ kugbe rọ ma Adamu avọ Ivi. A wọhọ ẹjini nọ a ku nọ o re ru oware nọ a ta kẹe nọ o ru ọvo ho. Dede na, a tẹ gwọlọ nnọ evawere rai e rẹ tọ, a rẹ rehọ ufuoma iroro-ejẹ rai ru iruo evaọ edhere nọ o kiehọ—ẹme nọ a re yo kẹ izi Ọghẹnẹ. Wọhọ epanọ Ọghẹnẹ ọ ta: ‘Mẹ họ ỌNOWO na Ọghẹnẹ ra, ọnọ o bi wuhrẹ owhẹ wo erere, ọnọ o bi su owhẹ nya edhere nọ o fo ẹnya.’ (Aizaya 48:17) Nọ o rọnọ a ma ahwo-akpọ re a kparobọ ababọ obufihọ Ọghẹnẹ hẹ na, eroruiruo thọthọ ọrọ ufuoma iroro-ejẹ o re su kpohọ okpẹtu. Ebaibol na e ta nọ: “Ohwo o wo iroro obọ riẹ hẹ, ohwo o wo ogaga nọ o ro su oma obọ riẹ hẹ.”—Jerimaya 10:23.

Uyoma kẹhẹ, ọsẹgboni ọsosuọ mai a roro nọ a rẹ sai si oma no Ọghẹnẹ re a je yeri uzuazọ obokparọ ghele. Rekọ nọ a si oma no esuo riẹ no, Ọghẹnẹ ọ gbẹ sẹro rai evaọ otọ ẹgbagba ha. Fikiere a te muhọ ẹwho ẹmẹrera, uwhremu na a te whu. Fikinọ mai yọ emọ Adamu avọ Ivi, ma reuku sebaẹgba gbe uwhu no obọ rai ze.—Ahwo Rom 5:12.

Ẹme-Avro na—Ohwo nọ O Wo Udu nọ O re ro Su

Fikieme Ọghẹnẹ ọ gbẹ nwane kpe Adamu avọ Ivi no re ọ ma imava efa ha? Fikinọ a se udu-esuo ehrugbakpọ Ọghẹnẹ abọ. Onọ na họ, Ono o wo udu nọ o re ro su, kọ esuo ono ọ mai kiehọ? Ẹme na họ, Kọ o rẹ mai woma kẹ ahwo-akpọ a te si oma no otọ esuo Ọghẹnẹ? Ẹkwoma uvẹ nọ ọ kẹ rai lelele re a ru onọ u je rai, Ọghẹnẹ o ti dhesẹ fuafo sọ o rẹ mai woma kẹ ai nọ a tẹ rrọ otọ esuo riẹ hayo esuo obọrai. Oke nọ a kẹ rai u re te epanọ ahwo-akpọ a rẹ rọ dao oghẹrẹ isuẹsu, uzuazọ uyero, eyero-okọ, gbe egagọ sa-sa ababọ ọkpọvio Ọghẹnẹ.

Eme o no rie ze no? Idu ikpe buobu nọ e vrẹ no evaọ ikuigbe ohwo-akpọ e kẹ omai imuẹro inọ uye-oruẹ u bi dhe ẹgẹga. Evaọ ikpe udhusoi nọ e vrẹ na, ahwo-akpọ a ruẹ uye nọ o ga vi epaọ anwẹdẹ kpobi no. A kpe ima ahwo buobu eva etoke Ẹmo-Akpọ avivẹ na. A jọ emo kpe ahwo bu vi ima 100 no. Ethube gbe ozighi e da oria kpobi fia. Ogbẹrehọ imu o dhẹ akpọ soso wariẹ họ no. Eyao igberẹ nọ i re vo i bi dhe ebuebu. Ima ahwo buobu a bi whu kukpe kukpe fiki ohọo gbe ẹyao. Uzuazọ uviuwou gbe uruemu ezi u bi kie kpo evaọ oria kpobi. Esuo ohwo-akpọ ọvuọvo ọ be sai ku ebẹbẹ nana họ họ. Ọvuọvo rai ọ re sai si owho, ẹyao, gbe uwhu no otọ no ho.

Uyero ahwo-akpọ o nwane wọhọ epanọ Ebaibol e ruẹaro riẹ kpahe oke mai na. Ẹme Ọghẹnẹ o dhesẹ etoke mai na wọhọ “edẹ urere” ọrọ uyero akpọ nana nọ o te jọ “oke ẹbẹbẹ.” Yọ nwane wọhọ epanọ Ebaibol e ta, ‘ahwo omuomu gbe otu eviẹhọ a no eyoma ruọ onọ o mai yoma no.’—2 Timoti 3:1-5, 13.

Uye-Oruẹ O Kẹle Ekuhọ No

Eware nọ e be via kpobi i dhesẹ inọ uye-oruẹ ẹsọ na o kẹle ekuhọ no, onọ ohwo-akpọ ọ be rọ dawo sọ ọ rẹ sai gine su omariẹ ababọ obufihọ Ọghẹnẹ. U dhesẹ oma via vevẹ no inọ esuo ahwo-akpọ o rẹ sae kparobọ họ ababọ obufihọ Ọghẹnẹ. Esuo Ọghẹnẹ ọvo ọ rẹ sae wha udhedhẹ, evawere, omokpokpọ, gbe uzuazọ ebẹdẹ bẹdẹ ze. Fikiere uvẹ nọ Jihova ọ kẹ emuemu gbe uye-oruẹ o kẹle ekuhọ no. Kẹle na, Ọghẹnẹ o ti dhoma họ iruẹru ahwo-akpọ ẹkwoma ẹraha akpọ nana kpobi nọ ọ be sai ru ẹgwọlọ ahwo-akpọ gba ha na.

Eruẹruẹ Ebaibol e ta nọ: “Evaọ ezi ivie eyena [ivie ahwo-akpọ nọ i bi su enẹna], Ọghẹnẹ obọ odhiwu na ọ rẹte rehọ uvie nọ a rẹ raha ha muẹ [evaọ obọ odhiwu], . . . Ọ rẹte whọlọ ivie na kpobi [nọ i bi su enẹna] ọ vẹte rehọ ai ze oba, ọ vẹte jọ bẹdẹ.” (Daniẹl 2:44) Ẹkpare kpehru esuo Jihova, udu nọ o re ro su, ẹkwoma Uvie obọ odhiwu riẹ họ ugogo uwuhrẹ Ebaibol na. Nọ ọ jẹ ruẹaro kpahe ugogo abọjọ oka “edẹ urere” na, Jesu ọ ta nọ: “A rẹ te vuẹ ovuẹ usiuwoma uvie na kẹ akpọ na kpobi, re o jọ isẹi kẹ erẹwho akpọ na kpobi; kẹsena urere u te zi te.”—Matiu 24:14.

Nọ urere na o tẹ ze, ono ọ te zọ? Ebaibol na e kuyo nọ: “Okiẹrẹe ọ rẹ te ria otọ na, ahwo oruọzewọ a rẹ te ria ae eva; rekọ a re ti kpe ahwo omuomu no otọ na.” (Itẹ 2:21, 22) Ahwo okiẹrẹe họ enọ i wuhrẹ oreva Jihova je ru ei. Jesu Kristi ọ ta nọ: “Onana họ uzuazọ ebẹdẹ bẹdẹ, re a riẹ owhẹ nọ whẹ ọvo họ uvi Ọghẹnẹ, gbe Jesu Kristi ọnọ who vi.” (Jọn 17:3) Ẹhẹ, “akpọ na . . . rẹ te vrẹ, rekọ ohwo nọ o re ru oreva Ọghẹnẹ ọ rẹ jọ bẹdẹ.”—1 Jọn 2:17.

Ajokpa nọ a dhesẹ ofa jọ, isase Ikereakere nọ a se evaọ omobe ovẹvẹ nana a rehọ e rai no Ebaibol Ẹri Na ze.