Oghẹrẹ nọ A rẹ Nọ Enọ

Matiu 16:13-16

OWARE NỌ O GWỌLỌ: Rọ areghẹ nọ enọ rọ kpare isiuru ahwo je ru ai gbẹ gwọlọ riẹ kpahe oware nọ whọ be ta, rọ enọ fiobọhọ kẹ ai roro didi kpahe ẹme na, je ro fiẹgba họ eme nọ i wuzou.

EPANỌ A RE RO RU EI:

• Kpare isiuru ahwo je ru ai gbe wo isiuru na rite ekuhọ ẹme na. Nọ enọ nọ o gwọlọ nọ a rẹ kẹ uyo rai hi, nọ e rẹ lẹliẹ ohwo roro ọvo hayo nọ e rẹ lẹliẹ ohwo wo isiuru kpahe ẹme nọ whọ gwọlọ ta.

• Nọ enọ nọ i re fiobọhọ kẹ ohwo roro didi kpahe ẹme nọ ọ rrọ otọ. Nọ enọ sa-sa nọ i re fiobọhọ kẹ enọ e be gaviezọ kẹ owhẹ ruẹ oware nọ o gba nọ u fo nọ a rẹ rọwo.

• Nọ enọ ro fiẹgba họ eme nọ i wuzou. Nọ onọ nọ o rẹ kpare isiuru ahwo nọ whọ tẹ gwọlọ ta ẹme jọ nọ o wuzou evaọ ovuẹ ra. Nọ who te ku ẹme jọ nọ o wuzou họ no hayo nọ who te ku ẹme ra kpobi họ no, nọ enọ ọkiẹkpemu nọ e rẹ lẹliẹ ahwo kareghẹhọ eware nọ i wuzou evaọ ẹme na.