UWUHRẸ AVỌ 10

Enwene Urru

Itẹ 8:4, 7

OWARE NỌ O GWỌLỌ: Ta ẹme vevẹ jẹ kpare isiuru ahwo ẹkwoma urru ra nọ whọ rẹ kpare kpehru jẹ rọ ziọ otọ, edo uvou ra nọ who re nwene, gbe ẹme nọ whọ rẹ ta kpata hayo ta kpẹlẹ.

EPANỌ A RE RO RU EI:

Kpare urru ra kpehru jẹ rọ unu kpotọ. Kpare urru ra kpehru ro fiẹgba họ eme nọ i wuzou, je ro ru re enọ e be gaviezọ kẹ owhẹ na a jowọ. Ru epọvo na nọ who te bi se iziẹibro nọ e rrọ Ebaibol na. Rọ unu kpotọ ro ru ahwo rẹro oware nọ whọ gwọlọ ta hayo ro dhesẹ ozọ hayo awaọruọ.

Whọ kpare urru ra kpehru ẹsikpobi hi ogbẹrọ ere he, a ve ti roro nọ who bi doku ae. Whọ nwani ru ei ga hrọ họ re o siọ oma-udhesẹ ba ẹjọ.
Hai nwene edo uvou ra. U te kiehọ evaọ ẹvẹrẹ ra, kpare edo uvou ra kpehru ro fi ọwhọ họ ẹme na, hayo ro dhesẹ epanọ oware o rro te hayo u thabọ te. Rọ edo uvou ra ziọ otọ ro dhesẹ uweri hayo awaọruọ.
Ta ẹme kpata hayo kpẹlẹ. Dina ta ẹme kpata evaọ oware nọ who wo omaweromẹ kpahe. Ta ẹme ẹrera nọ whọ tẹ be fodẹ eware nọ i wuzou.

Re enọ e be gaviezọ kẹ owhẹ a seba ereghe no, who nwene ẹkpata ẹme ra ẹsiẹvo idudhe he. Whọ ta ẹme kpata te epanọ eme ra e gbẹ rọ gba ha ha.