UWUHRE AVO 18

Ẹme nọ Ogbotu na O re Wuhrẹ Oware No Ze

1 Ahwo Kọrint 9:19-23

OWARE NỌ O GWỌLỌ: Fiobọhọ kẹ ahwo nọ a be gaviezọ kẹ owhẹ roro kpahe oware nọ a bi wuhrẹ na didi, re ukuhọ riẹ a vẹ ruẹ nọ a wuhrẹ obọdẹ oware jọ.

EPANỌ A RE RO RU EI:

Roro kpahe oware nọ ahwo nọ a te gaviezọ kẹ owhẹ na a riẹ no vẹre. Ukpenọ whọ rẹ wariẹ ta oware nọ a yo no vẹre ọvo, ru re a ruẹ eware ekpokpọ efa nọ a ri roro te he evaọ ẹme yena.

Whọ raha oke ga hrọ họ nọ whọ tẹ be ta kpahe eware nọ ahwo na a riẹ no vẹre, rekọ rọ ẹmẹrera ta kpahe eware ekpokpọ nọ e rrọ ẹme na.
Ru ekiakiẹ je roro didi. O tẹ lọhọ, fi eware jọ nọ ahwo a riẹ tere he nọ e rrọ uzẹme hayo eware jọ nọ e via kẹle ba ẹme na ro ru igogo eme jọ vẹ. Se je roro didi kpahe ẹme ra na gbe oghẹrẹ nọ ẹme ra na avọ eware nọ whọ gwọlọ rọ kẹ oriruo na e rọ jẹhọ ohwohwo.

Nọ who bi se jẹ kiẹ ẹme na riwi na, roro didi kpahe eware nọ who bi se na jẹ nọ omara enọ wọhọ ‘eme, fikieme, okevẹ, diẹse, ono, gbe ẹvẹ.’ Ru uwuhrẹ ra daruọ ahwo oma ẹkwoma enọ nọ whọ rẹ nọ jẹ kẹ iyo enọ itieye na jọ evaọ etoke ẹme na kpobi.
Dhesẹ epanọ ẹme ra na o ti ro fiobọhọ. Dhesẹ oghẹrẹ nọ eme nọ whọ be rehọ no Ikereakere na ze i ti ro fiobọhọ kẹ enọ e be gaviezọ kẹ owhẹ na evaọ uzuazọ rai kẹdẹ kẹdẹ. Ta ẹme kpahe igogo eware jọ evaọ uzuazọ, gbe iruemu jọ nọ ahwo nọ a be gaviezọ kẹ owhẹ na a riẹ.