Ẹgba-Iroro Owha-Ogbẹgbẹdẹ Manikọ Okwakwa-Erere?

‘UDU mẹ u bi kpokpo omẹ!’ Noke ruoke, unwenọ omai kpobi a re wo obrukpe iroro. Ekpokpo iroro itieye na i re no awaọruọ ohwo ze nọ e rẹ tubẹ rro kpohọ edada akọriọ dede. Iroro obrukpe o rẹ sae tubẹ wha ọkora ze hayo iroro nnọ ohwo o fioka ha.

Kọ ma te rri rie no ofẹ onana ze, kọ ẹgba-iroro na o gbẹ rọ owha-ogbẹgbẹdẹ? Ahwo jọ a re roro nọ ere o rọ. Ahwo oke anwae a je rri ẹgba-iroro na wọhọ ẹgba jọ nọ a kugbe ro yẹ ohwo. Ahwo jọ a roro nọ o rọ oware nọ o rẹ kpọ uruemu ohwo nọ Ọghẹnẹ omariẹ ọ rọ kẹ. Fikiere a dhesẹ ẹgba-iroro na no wọhọ “ẹria Ọghẹnẹ evaọ oma ohwo,” “oghẹrẹ ohwo nọ ma rọ,” jẹ tubẹ ta kpahiẹe no wọhọ “urru Ọghẹnẹ” dede.

Ghele na, evaọ umutho ikpe jọ nọ e vrẹ no na, u zihe ruọ oware odode no re a rọwo inọ ẹgba-iroro na yọ okwakwa nọ ohwo o wuhrẹ—oware nọ ohwo o wuhrẹ no oma ọsẹ gbe oni riẹ ze gbe oria nọ a jọ yọrọ iẹe. Wọhọ oriruo, ahwo jọ nọ a wuhrẹ kpahe ẹgba-iroro no a vravro nọ ọmọ ọ rẹ mae dhozọ uruemu othọthọ fiki uye nọ ọsẹ gbe oni riẹ a rẹ kẹe, rọwo inọ oware nọ ma bi se ẹgba-iroro na o rọ iruemu gbe orọwọ nọ ọsẹ gbe oni a kọ họ ọmọ eva. Amọfa a be riobọ họ abọ nọ okegbe o wo evaọ ekpeze iruemu gbe ute. Ahwo jọ a bi rri ekpokpo ẹgba-iroro na wọhọ ohọre nọ o rọ udevie oware nọ ma gwọlọ ru gbe onọ okegbe ọgbahọ o be gwọlọ nọ ma ru!

Makọ oghẹrẹ nọ a dhesẹ i rie fihọ dede, ẹsibuobu ahwo a rẹ wọso ọsẹ gbe oni rai, iviuwou rai, gbe okegbe soso fikinọ ẹgba-iroro rai o ta kẹ ai nọ a ru erei. U tube no ahwo jọ eva ze no dede re a whu fiki ẹgba-iroro rai! Yọ makọ oghẹrẹ nọ iruemu sa-sa nọ e rọ akpọ na e hẹriẹ te, iruemu wọhọ ohwo-okpe, ujitho, ẹnwae-obro, ọrueta, gbe ẹnwae-obro imoni a jọ akpọ na soso rri rai thọ. Kọ onana u gbe dhesẹ nọ a yẹ ohwo avọ ẹgba-iroro?

Ẹgba-Iroro—Eriwo Ebaibol Na

Ohwo nọ o ghine w’udu evaọ ẹme ọnana họ Jihova Ọghẹnẹ. Keme, Ọghẹnẹ họ ọnọ “ọ ma omai, je wo omai.” (Olezi 100:3) Ọ riẹ totọ oghẹrẹ nọ a rọ m’omai. Ẹme Ọghẹnẹ, Ebaibol na, ọ ta via nọ a ma ohwo evaọ “uwoho” Ọghẹnẹ. (Emuhọ 1:26) A ma ohwo avọ areghẹ oware nọ u woma gbe onọ u yoma; no emuhọ ze, a ma ohwo avọ ẹgba-iroro.—Wawo Emuhọ 2:16, 17.

Pọl ukọ na ọ rọwo kugbe onana evaọ ileta riẹ se ahwo Rom, nọ o kere nọ: “Keme okenọ otu Egedhọ na nọ a wo uzi na ha a rọ ẹkẹ-ẹmema rai ru eware nọ e rọ eva uzi na gba a maki wo uzi na ha; a ru rie họ uzi kẹ oma obọ rai. Enọ i dhesẹ iruẹru uzi nọ a kere họ evaọ eva rai, oma obọ rai dede u sisẹi kẹ ae; jegbe iroro obọ rai okenọ a make be poviẹ ae yoyoma hayo unoma uguo ohwo suọ ohwo.” (Ahwo Rom 2:14, 15) Muẹrohọ nọ ahwo buobu nọ a rehọ Uzi Ọghẹnẹ nọ a rọ kẹ ahwo Ju na yọrọ họ a gbe bi lele abọ jọ uzi Ọghẹnẹ na, orọnikọ avọ ọgbahọ no udogbe rai ze he, rekọ wọhọ “ẹkẹ-ẹmema rai”!

Fikiere, thabọ no owha-ogbẹgbẹdẹ nọ o rọ, ẹgba-iroro na o rọ okẹ Ọghẹnẹ, okwakwa-erere. Uzẹme, o rẹ sae wha edada se omai. Rekọ nọ a te yoẹme kẹe ziezi, o rẹ sae rehọ iroro edẹro ididi gbe udhedhẹ obeva hwa omai osa. O rẹ sae kpọ, sẹro, jẹ wọ omai. The Interpreter’s Bible o ta nọ: “Ohwo nọ ọ rẹ yọrọ omakpokpọ iroro gbe uruemu họ ọnọ ọ be dao ẹgba riẹ kpobi re o ru oware nọ u fo nọ a re ru.” Ẹvẹ ohwo ọ sai ro ru omodawọ otiọye na? Kọ o lọhọ re ohwo ọ kpọ hayo wuhrẹ ẹgba-iroro riẹ? Ma te t’ẹme kpahe enọ enana evaọ uzoẹme obaro na.