Jihova Ọ Rehọ Emọ Buobu Ziọ Oruaro
“Whaọ u ghine fo [kẹ Ọghẹnẹ], . . . epanọ ọ rọ rehọ emọ buobu ze eva oruaro, ọ rẹ sai ti ru epanọ a sai ro wo esiwo nọ ọ gbakiete fiki uye riẹ.”—AHWO HIBRU 2:10.
1. Fikieme o jẹ sai mu omai ẹro inọ ẹjiroro Jihova kẹ ahwo-akpọ o ti rugba?
JIHOVA ọ ma otọakpọ na re o jọ uwou ibẹdẹ bẹdẹ kẹ uviuwou ogbagba ohwo-akpọ nọ o rẹ reawere uzuazọ ribri. (Ọtausiuwoma Na 1:4; Aizaya 45:12, 18) Uzẹme, ọsẹ-ologbo mai Adamu ọ th’uzi, ọ tẹ rọ ere kpeze uzioraha gbe uwhu se emọ riẹ. Rekọ ẹjiroro Ọghẹnẹ kẹ ohwo-akpọ u ti rugba ẹkwoma Ubi Eyaa riẹ, Jesu Kristi. (Emuhọ 3:15; 22:18; Ahwo Rom 5:12-21; Ahwo Galesha 3:16) Uyoyou kẹ akpọ ahwo o wọ Jihova re ọ rehọ “Ọmọvo riẹ kẹ, re kohwo kohwo nọ ọ rọwo riẹ o gbe vrẹ hẹ rekọ o re wo uzuazọ ebẹdẹ bẹdẹ.” (Jọn 3:16) Yọ uyoyou o wọ Jesu re ọ “rọ uzuazọ riẹ ta ibuobu.” (Matiu 20:28) “Ẹtanigbo ẹrẹrẹ” ọnana o dẹ uvẹ gbe ẹruore nọ Adamu o kufiẹ na zihe ze, u te je ru uzuazọ ebẹdẹ bẹdẹ lọhọ.—1 Timoti 2:5, 6, NW; Jọn 17:3.
2. Ẹvẹ a ro dhesẹ efihiruo idhe ẹtanigbo Jesu na eva Ẹdẹ Omavoro ẹsiẹvo-ẹgbukpe Izrẹl?
2 A je ru oware nọ o rọ uwoho idhe ẹtanigbo Jesu na evaọ Ẹdẹ Omavoro ẹsiẹvo-ẹgbukpe na. Evaọ ẹdẹ ọyena, ozerẹ okpehru Izrẹl ọ rẹ kake rehọ eruẹ dheidhe wọhọ idhe uzioraha, ọ vẹ rehọ azẹ riẹ dheidhe eva Okọ-Ọvọ ọrẹri na evaọ Ọrẹri Erẹri uwou-udhu na, uwhremu na kọ evaọ etẹmpol. O re ru onana k’omobọ riẹ, uviuwou riẹ, gbe orua Livai. Epọvo na, Jesu Kristi ọ kake rehọ aghare azẹ riẹ kẹ Ọghẹnẹ re u ruru izieraha “inievo” abọ-ẹzi riẹ. (Ahwo Hibru 2:12; 10:19-22; Iruo-Izerẹ 16:6, 11-14) Evaọ Ẹdẹ Omavoro na, ozerẹ okpehru na ọ rẹ jẹ rehọ ẹwe dheidhe wọhọ idhe uzioraha ọ vẹ rehọ azẹ riẹ kẹ evaọ Ọrẹri Erẹri na, ọ vẹ rọ enẹ voro oma ọ erua 12 Izrẹl nọ e rọ izerẹ hẹ na. Epọvo na, Ozerẹ Okpehru na Jesu Kristi ọ te rehọ azẹ uzuazọ riẹ kẹ fiki ahwo-akpọ nọ i fi ẹrọwọ họ iẹe, o ve voro izieraha rai no.—Iruo-Izerẹ 16:15.
A Rehọ E Rai Ze Oruaro
3. Wọhọ epanọ Ahwo Hibru 2:9, 10 o ta, eme Ọghẹnẹ o bi ru anwọ ikpe 1,900 na ze?
3 Anwọ ikpe 1,900 ze, Ọghẹnẹ o bi ru oware igbunu kpahe “inievo” Jesu. Kpahe onana, Pọl ukọ na o kere nọ: “Rekọ ma ruẹ Jesu, ọnọ a ru kao vi ikọ-odhiwu uthokejọ, nọ ọ jẹ ruẹ uye uwhu no a tẹ rehọ oruaro gbe adhẹe ro tu [ei etu-uvie], kpere ọ rehọ fiki aruoriwo Ọghẹnẹ whu uwhu kẹ ohwo kpobi. Whaọ u ghine fo kẹe [Jihova Ọghẹnẹ], ọ ye nọ eware kpobi e rọ fiki riẹ, epanọ ọ rọ rehọ emọ buobu ze eva oruaro, ọ rẹ sai ti ru [Osu Esiwo rai] gbakiete fiki uye riẹ.” (Ahwo Hibru 2:9, 10) Osu Esiwo na họ Jesu Kristi, ọnọ o wuhrẹ ẹmeoyo ọgbagba evaọ uye nọ u te rie okenọ ọ jẹ rria wọhọ ohwo evaọ otọakpọ. (Ahwo Hibru 5:7-10) Jesu họ ohwo ọsosuọ nọ a yẹ wọhọ ọmọ abọ-ẹzi Ọghẹnẹ.
4. Okevẹ gbe oghẹrẹvẹ a ro yẹ Jesu wọhọ Ọmọ abọ-ẹzi Ọghẹnẹ?
4 Jihova ọ rehọ ẹzi ọfuafo riẹ, hayo ogaga iruo riẹ, ro yẹ Jesu wọhọ Ọmọ abọ-ẹzi riẹ, re ọ ruẹse rehọ iẹe ziọ oruaro odhiwu. Okenọ ọye ọvo ọ jọ kugbe Jọn Ọhọahwo-Ame na, Jesu o te duoma họ ame le no ro dhesẹ oma nọ ọ rọ kẹ Ọghẹnẹ. Enẹ Usiuwoma Luk o ta: “Koyehọ nọ ọ họ ahwo kpobi ame no, nọ ọ jẹ lẹ, ehru o te rovie. Ẹzi Ẹri ọ tẹ rehọ oghẹrẹ oma, wọhọ erueruẹ bru ei ze, jegbọ uru nọ o ta no ehru ze nọ, ‘Whẹ họ Ọmọ oyoyou mẹ, whọ were omẹ hrọ.’ ” (Luk 3:21, 22) Jọn ọ ruẹ ẹzi ọfuafo na nọ o bru Jesu ze o te je yo urru Jihova nọ ọ jẹ riẹ rehọ vevẹ wọhọ Ọmọ oyoyou Riẹ. Evaọ okioye gbe ẹkwoma ẹzi ọfuafo, Jihova o te yẹ Jesu wọhọ ọrọ ọsosuọ evaọ usu ‘emọ buobu nọ a te rọ ziọ oruaro.’
5. Amono họ ahwo ọsosuọ nọ i wo erere no idhe Jesu ze, kọ bro ahwo?
5 “Inievo” Jesu họ erọ ọsosuọ nọ i wo erere no idhe riẹ ze. (Ahwo Hibru 2:12-18) Evaọ eruẹaruẹ, Jọn ukọ na ọ rue rai nọ a rọ eva oruaro no evaọ Ugbehru Zayọn obọ odhiwu avọ Omogodẹ na, Olori na Jesu Kristi nọ ọ kparoma ze no. Jọn ọ tẹ jẹ fodẹ unu rai via, ta nọ: “Me riwi mẹ tẹ ruẹ Omogodẹ na nọ o dikihẹ ugbehru Zayọn, avọ ahwo idu udhuhrẹ gbe ene, enọ a kere odẹ riẹ gbe odẹ Ọsẹ riẹ fihọ aruezo rai. . . . Enana a ta no udevie ezae na ze, a jẹ rọ ibi ọsosuọ kẹ Ọghẹnẹ avọ Omogodẹ na. A jọ unu rai ruẹ ọrue vievie he; keme a kare epe.” (Eviavia 14:1-5) Fikiere ‘emọ buobu nọ a rọ ziọ oruaro’ na evaọ odhiwu a bu te 144,001 ọvo—Jesu avọ inievo abọ-ẹzi riẹ.
‘Enọ A Yẹ No Obọ Ọghẹnẹ Ze’
6, 7. Amono ‘a yẹ no obọ Ọghẹnẹ ze,’ kọ eme onana u dhesẹ kẹ ai?
6 Jihova họ ọnọ o yẹ enọ ‘a yẹ no obọ Ọghẹnẹ ze na.’ Jẹ t’ẹme kẹ ahwo otiọye na, Jọn ukọ na o kere nọ: ‘Ohwo ọvo nọ Ọghẹnẹ o yẹ nọ ọ rẹ ruabọhọ uzioraha ọ rọ họ; keme ubi eyẹ Ọghẹnẹ o rọ eva riẹ, ọ gbẹ sae raha uzi hi keme a yẹ rai no obọ Ọghẹnẹ ze.’ (1 Jọn 3:9) “Ubi eyẹ” ọnana họ ẹzi ọfuafo Ọghẹnẹ. Bi ruiruo kugbe ẹme riẹ, o kẹ omomọvo erọ 144,000 na ‘eyẹ ọkpokpọ’ no kpohọ ẹruore odhiwu.—1 Pita 1:3-5, 23.
7 Jesu yọ Ọmọ Ọghẹnẹ no eyẹ ohwo-akpọ riẹ ze, wọhọ epanọ ọzae ọgbagba na Adamu ọ jọ “ọmọ Ọghẹnẹ” na. (Luk 1:35; 3:38) Dede na, nọ Jesu ọ họ-ame no, o jọ oware isiuru nọ Jihova o whowho nọ: “Whẹ họ Ọmọ oyoyou mẹ, whọ were omẹ hrọ.” (Mak 1:11) Ẹkwoma ewhowho ọnana nọ u lele ekuku ọ ẹzi ọfuafo na, o jọ vevẹ inọ Ọghẹnẹ ọ jọ oke oyena yẹ Jesu wọhọ Ọmọ abọ-ẹzi Riẹ. O tẹ wọhọ ẹsenọ a rehọ ‘eyẹ ọkpokpọ’ kẹ Jesu no avọ udu nọ ọ rẹ rọ wariẹ wo uzuazọ wọhọ Ọmọ ẹzi Ọghẹnẹ evaọ odhiwu. Wọhọ iẹe, inievo abọ-ẹzi 144,000 riẹ a wo “ọwariẹ yẹ.” (Jọn 3:1-8; rri Uwou-Eroro Na, November 15, 1992 [ọrọ Oyibo], ẹwẹ-obe 3-6.) Ofariẹ, wọhọ Jesu, Ọghẹnẹ ọ kẹ rai ẹzi o te je vi ai re a whowho emamọ usi na.—Aizaya 61:1, 2; Luk 4:16-21; 1 Jọn 2:20.
Imuẹro Eyẹ Ẹzi
8. Imuẹro eyẹ ẹzi vẹ a ruẹ evaọ oma (a) Jesu (b) ilele ọsosuọ riẹ?
8 Imuẹro e jariẹ inọ a rehọ ẹzi yẹ Jesu. Jọn Ọhọahwo-Ame na ọ ruẹ ẹzi na nọ o kiemu Jesu uzou o te je yo urru Ọghẹnẹ kpahe ọkwa-ọmọ Mesaya abọ-ẹzi ọkpokpọ nọ a wholo. Rekọ ẹvẹ ilele Jesu a rẹ rọ riẹ sọ a rọ ẹzi yẹ ai? Whaọ, evaọ ẹdẹ nọ o ro tovrẹ kpohọ odhiwu, Jesu ọ ta nọ: “Ame Jọn ọ ghinẹ jẹ rọ họ ahwo ame, rekọ nọ umuo nana vrẹ u re ti krẹ re wha tẹ rehọ [ẹzi ẹri] rọ họ ahwo ame he.” (Iruẹru 1:5) A rehọ ‘ẹzi ọfuafo họ’ ilele Jesu ame evaọ ẹdẹ Pẹntikọst 33 C.E. ‘Edo jọ nọ o no odhiwu ze wọhọ edo ofou ọgaga’ o lele ekuku ọ ẹzi ọyena, avọ “ikoliko erae nọ e wọhọ ẹrọo” nọ i kiemu ilele na ọvuọvo. Oware nọ o mai gbunu họ ẹgba nọ ilele na a jẹ rọ ‘ta evẹrẹ efa, wọhọ epanọ ẹzi na ọ kẹ rai udu.’ Fikiere imuẹro nọ a rẹ ruẹ gbe enọ a yo e jariẹ inọ edhere kpohọ oruaro odhiwu wọhọ emọ Ọghẹnẹ u rovie fihọ no kẹ ilele Kristi.—Iruẹru 2:1-4, 14-21; Joẹl 2:28, 29.
9. Didi imuẹro e jariẹ inọ ẹzi o yẹ ahwo Sameria, Kọniliọs, gbe amọfa erọ ikpe-udhusoi ọsosuọ na?
9 Okiofa jọ, Filip ọtausiuwoma na ọ tẹ ta usiuwoma evaọ Sameria. Dede nọ ahwo Sameria a jẹ ovuẹ riẹ rehọ jẹ họ-ame, a kare imuẹro inọ Ọghẹnẹ o yẹ rai wọhọ emọ riẹ. Okenọ Pita avọ Jọn ikọ na a lẹ jẹ rọ abọ kpahe izou eyena nọ e rọwo na, ‘a te wo ẹzi ẹri na’ evaọ edhere nọ o jọ vevẹ kẹ iriughe. (Iruẹru 8:4-25) Onana o jọ imuẹro inọ a rehọ ẹzi yẹ ahwo Sameria nọ a rọwo na no wọhọ emọ Ọghẹnẹ. Epọvo na, evaọ 36 C.E., Kọniliọs avọ ahwo orẹwho Egedhọ efa a tẹ jẹ uzẹme Ọghẹnẹ rehọ. U gbe Pita avọ ahwo Ju nọ e rọwo enọ i lele i rie unu “fiki epanọ a ku okẹ Ẹzi Ẹri ku ahwo Egedhọ no re. Keme a yo rai nọ a jẹ rọ [ẹrọo-unu] ta ẹme jẹ rọ oro kẹ Ọghẹnẹ.” (Iruẹru 10:44-48) ‘Okẹ ẹzi’ u te Ileleikristi ikpe-udhusoi ọsosuọ buobu obọ, wọhọ ẹta evẹravẹrẹ. (1 Ahwo Kọrint 14:12, 32) Ahwo nana a te wo imuẹro ivevẹ inọ a rehọ ẹzi yẹ ai no. Rekọ ẹvẹ Ileleikristi obaro a te rọ riẹ sọ a rọ ẹzi yẹ ai no hayo a yẹ rai hi?
Osẹri Ẹzi Na
10, 11. Ro no Ahwo Rom 8:15-17 ze, ẹvẹ whọ sae rọ ta nọ ẹzi na o re se isẹri kugbe enọ e rọ ibe ereuku Kristi?
10 Ileleikristi 144,000 nọ a kẹ ẹzi na kpobi a wo imuẹro inọ a wo ẹzi Ọghẹnẹ. Kpahe onana, Pọl o kere nọ: “Wha mi ẹzi nọ o ru owhai emọ, onọ ma je bo nọ, ‘Abba! Ọsẹ!’ Ukpuzou oma Ẹzi na ọvo ọrọ izi mai isẹri ese kẹ nọ mai arọ emọ Ọghẹnẹ. Ma tẹ rọ emọ, koyehọ ereuku; ereuku Ọghẹnẹ, ereuku kugbe Kristi; thakpinọ ma lele irie gbẹ ruẹ uye re ma gbe lele ie wo oruaro re.” (Ahwo Rom 8:15-17) Ileleikristi nọ a kẹ ẹzi a wo ẹzi ọmọ rọkẹ Ọsẹ obọ odhiwu rai, uzedhe ẹzi ọkwa-ọmọ. (Ahwo Galesha 4:6, 7) U mu rai ẹro riẹriẹriẹ inọ Ọghẹnẹ ọ dẹ rai no kpohọ ọkwa-ọmọ abọ-ẹzi wọhọ ibe ereuku kugbe Kristi evaọ Uvie odhiwu. Evaọ onana, ẹzi ọfuafo Jihova o bi wo abọ ologbo.
11 Evaọ otọ okpomahọ ẹzi ọfuafo Ọghẹnẹ, ẹzi, hayo iroro eva, orọ enọ a kẹ ẹzi na o be wọ ae re a kuyo ziezi kẹ oware nọ Ẹme Ọghẹnẹ ọ ta kpahe ẹruore odhiwu na. Wọhọ oriruo, nọ a te se oware nọ Ikereakere na e ta kpahe emọ abọ-ẹzi Jihova, a rẹ kuyo no eva obọrai ze inọ eme itieye na i kie kpahe ae. (1 Jọn 3:2) A riẹ nọ a ‘họ rae ame fihọ Kristi Jesu no’ je fihọ uwhu riẹ. (Ahwo Rom 6:3) Imuẹro egaga rai họ emọ abọ-ẹzi Ọghẹnẹ a rọ, enọ i re whu a vẹ jẹ kpare ai kpohọ oruaro odhiwu, epanọ o via kẹ Jesu.
12. Eme ẹzi Ọghẹnẹ o fihọ Ileleikristi nọ a kẹ ẹzi oma no?
12 Re a yẹ ohwo kpohọ ọkwa-ọmọ abọ-ẹzi o rọ ẹgwọlọ nọ ohwo ọ kọ h’eva ha. Enọ a rọ ẹzi yẹ na a gwọlọ kpohọ odhiwu fiki uye ọbẹwẹ nọ ọ rọ otọakpọ na ha. (Job 14:1) Ukpoye, ẹzi Jihova o fi ẹruore gbe isiuru nọ ahwo-akpọ kpobi a wo ho họ evaọ enọ a ghinẹ kẹ ẹzi na. Itieye na nọ a yẹ na a riẹ nnọ uzuazọ ebẹdẹ bẹdẹ evaọ ẹgbagba ohwo-akpọ evaọ otọakpọ aparadase nọ o te vọ avọ uviuwou gbe egbẹnyusu evawere o te gbunu. Ghele na, uzuazọ utioye na họ isiuru nọ a mai wo fihọ udu hu. Ẹruore odhiwu enọ a kẹ ẹzi na o ga te epanọ u ro no ai eva ze re a siobọno irẹro gbe ute otọakpọ kpobi.—2 Pita 1:13, 14.
13. Wọhọ epanọ 2 Ahwo Kọrint 5:1-5 o ta, eme họ ‘isiuru egaga’ Pọl, kọ eme onana u dhesẹ kpahe enọ a kẹ ẹzi na?
13 Ẹruore uzuazọ odhiwu nọ Ọghẹnẹ ọ kẹ o jọ eva ahwo itieye na ga te epanọ eme rai e rọ rọ wọhọ erọ Pọl, ọnọ o kere nọ: “Keme ma riẹ nọ uwou ẹkpẹ oma mai onana o tẹ raha, ma wo uwou nọ uno obọ Ọghẹnẹ ze, uwou nọ a rọ abọ ru hu, o rọ ebẹdẹ, obọ eva odhiwu. Eva oma onana ma je bi dimẹ, je bi rẹro ẹbọ oria ẹria obọ odhiwu, re nọ ma tẹ whẹ e họ no, a gbẹ ruẹ ẹba mai hi. Keme nọ oma gbẹ rọ eva uwou nana, ma bi dimẹ avọ ọwhọ; orọnọ ma rẹ te jọ ẹbẹba ha, rekọ a rẹ te gọ omai ẹgọ viere, re oma nọ u re gbo na uzuazọ o vẹ rehọ ẹta riẹ. Whaọ ọnọ ọ ruẹrẹ omai kpahe kẹ oware ovo onana họ Ọghẹnẹ, ọnọ ọkẹ omai imuẹro Ẹzi.” (2 Ahwo Kọrint 5:1-5) ‘Isiuru egaga’ Pọl họ re a kpare iẹe kpohọ odhiwu wọhọ omama ẹzi nọ u re whu hu. Be ta kpahe ugboma ohwo-akpọ, ọ rehọ oriruo uwou ẹkpẹ nọ o rẹ raha t’ẹme, oria ẹrria odedeghe nọ o rẹ jọ ubroke nọ a tẹ rehọ iẹe wawo emamọ uwou. Dede nọ a be rria otọakpọ evaọ ugboma uwo, onọ u re whu, Ileleikristi nọ i wo ẹzi na wọhọ oka ọ uzuazọ odhiwu nọ o be tha a bi rri kpohọ “uwou nọ uno obọ Ọghẹnẹ ze,” ugboma ẹzi nọ u re whu hu, onọ o kare egbogbo. (1 Ahwo Kọrint 15:50-53) Wọhọ Pọl, a rẹ sae ta n’udu ze nọ: “Udu orọ omai awọ, uteje kiehọ re ma hẹriẹ no oma na, re ma jọ kugbe Ọnowo na.”—2 Ahwo Kọrint 5:8.
Ẹrehọ Fihọ Evọ Obọdẹ
14. Okenọ ọ jẹ rehọ ehaa Ekareghẹhọ na mu, ọvọ vẹ Jesu ọ kake fodẹ, kọ didi iruo o wo kpahe Izrẹl abọ-ẹzi?
14 Ileleikristi nọ a kẹ ẹzi na a wo imuẹro inọ a rehọ e rai fihọ evọ obọdẹ ivẹ. Jesu ọ fodẹ ọvo jọ evaọ enana okenọ ọ rehọ ebrẹdi nọ e kare ẹvi gbe udi ro ru ehaa Ekareghẹhọ uwhu riẹ nọ o be tha ọ tẹ ta kpahe egho udi na nọ: “Egho ọnana họ ọvọ ọkpokpọ azẹ mẹ ọ nọ o hwẹ fiki rai na.” (Luk 22:20; 1 Ahwo Kọrint 11:25) Amono a rọ eva ọvọ ọkpokpọ na? Jihova Ọghẹnẹ avọ ahwo Izrẹl abọ-ẹzi na—enọ Jihova ọ jiroro nọ ọ rẹ rehọ ziọ oruaro odhiwu. (Jerimaya 31:31-34; Ahwo Galesha 6:15, 16; Ahwo Hibru 12:22-24) Avọ azẹ Jesu nọ u fi rie họ iruo, ọvọ ọkpokpọ na ọ jọ udevie erẹwho na rehọ ahwo kẹ odẹ Jihova u te ru Ileleikristi nọ a kẹ ẹzi fihọ abọ “ubi” Abraham. (Ahwo Galesha 3:26-29; Iruẹru 15:14) Ọvọ ọkpokpọ na ọ kẹ emọ Izrẹl abọ-ẹzi kpobi uvẹ nọ a rẹ rọ rehọ ai ziọ oruaro ẹkwoma ẹkparoma kpohọ uzuazọ seba-ewhu evaọ odhiwu. Nọ o rọ “ọvọ ibẹdẹ na,” irere riẹ e rẹ jọ bẹdẹ bẹdẹ. Ma riẹ hẹ sọ ọvọ ọnana o ti wo iruo evaọ idhere efa evaọ etoke Odu-Ikpe na gbe obaro riẹ.—Ahwo Hibru 13:20.
15. Rọwo kugbe Luk 22:28-30, ọvọ ọfa vẹ a jẹ rehọ ilele Jesu nọ a kẹ ẹzi rueva, kọ okevẹ?
15 “Emọ buobu” nọ Jihova ọ jiroro nọ ọ te ‘rehọ ziọ oruaro’ a rehọ e rai ọvuọvo ziọ ọvọ na no kẹ Uvie odhiwu. Kpahe ọvọ ọnana evaọ udevie riẹ avọ ilele riẹ nọ i lele ithihi riẹ, Jesu ọ ta nọ: “Whai họ enọ ilele omẹ gbẹ jọ eva ẹdawọ mẹ; Epanọ ọsẹ mẹ ọ [re ọvọ] kẹ omẹ, ere mẹ [re ọvọ] kẹ owhai re. Re wha re, jẹ da eva emẹjẹ mẹ eva uvie mẹ, jegbe re wha keria egbara uvie re wha bruoziẹ erua kpegbivẹ Izrẹl.” (Luk 22:28-30) A rehọ ọvọ Uvie na mu okenọ a kẹ ilele Jesu ẹzi eva Pẹntikọst 33 C.E. Ọvọ ọyena o wo iruo bẹdẹ bẹdẹ evaọ udevie Kristi avọ ibe ivie riẹ. (Eviavia 22:5) Fikiere, u mu Ileleikristi nọ a kẹ ẹzi na ẹro inọ a rọ ọvọ ọkpokpọ na jẹ rọ ọvọ kẹ Uvie na. Fikiere, evaọ ehaa Emu Owọwọ Olori na, umutho enọ a kẹ ẹzi nọ e gbẹ rọ otọakpọ na ọvo họ enọ e rẹ re ebrẹdi na, nọ u dikihẹ kẹ ugboma ohwo-akpọ ọgbagba Jesu, avọ udi na, nọ u dikihẹ kẹ azẹ ọgbagba riẹ nọ o hwẹ evaọ uwhu o tẹ lẹliẹ ọvọ ọkpokpọ na w’iruo.—1 Ahwo Kọrint 11:23-26; rri Uwou-Eroro Na, February 1, 1989 (ọrọ Oyibo), ẹwẹ-obe avọ 17-20.
Enọ A Se, Salọ, je Wo Ẹrọwọ
16, 17. (a) Re a rehọ ziọ oruaro, eme o gwọlọ mi 144,000 na kpobi? (b) Amono họ “ivie ikpe” na, kọ eme a bi ru okiọkotọ otọakpọ “inievo” Kristi na?
16 Efihiruo ọsosuọ ọrọ idhe ẹtanigbo Jesu u ru rie lọhọ kẹ 144,000 re a se ai kpohọ uzuazọ odhiwu jẹ salọ ai ẹkwoma ẹzi nọ Ọghẹnẹ o ro yẹ ai. Rekọ, re a rehọ ai ziọ oruaro, a rẹ ‘daoma re a ru use gbe ẹsalọ rai muẹro,’ a ve je wo ẹrọwọ rite uwhu. (2 Pita 1:10; Ahwo Ẹfẹsọs 1:3-7; Eviavia 2:10) Umutho okiọkotọ nọ a kẹ ẹzi nọ e gbẹ rọ otọakpọ na a bi kru ẹgbakiete rai dede nọ “ivie ikpe” nọ i dikihẹ kẹ egaga esuo kpobi na a be wọso ai. Ẹnjẹle jọ ọ ta nọ: “A re ti lele Omogodẹ na fiẹmo, Omogodẹ na ọ vẹ te kparobọ vi ai, keme ọye họ Olori ilori, Ovie ivie, enọ aviẹe a gbẹrọ enọ ọ hae nọ i wo orọwọ.”—Eviavia 17:12-14.
17 Isu ahwo-akpọ a sai ru Jesu, “Ovie ivie” na oware ovo ho, keme ọ rọ obọ odhiwu. Rekọ a bi dhesẹ egrẹ kẹ okiọkotọ “inievo” riẹ enọ e gbẹ rọ otọakpọ. (Eviavia 12:17) Oyena u ti kuhọ eva ẹmo Ọghẹnẹ ọrọ Amagẹdọn, oria nọ obokparọ u je muẹro kẹ “Ovie ivie” na gbe “inievo” riẹ—‘enọ a se, salọ, je wo orọwọ.’ (Eviavia 16:14, 16) Bọo okioye, Ileleikristi nọ a kẹ ẹzi a bi ruiruo gaga. Eme a bi ru enẹna re Jihova ọ tẹ rehọ ai kpohọ oruaro?
Didi Uyo Whọ te Kẹ?
◻ Amono Ọghẹnẹ ọ ‘rehọ ziọ oruaro odhiwu’?
◻ Eme u dhesẹ re ‘Ọghẹnẹ o yẹ ohwo’?
◻ Ẹvẹ ‘ẹzi na o ro se isẹri’ kugbe Ileleikristi jọ?
◻ Evọ vẹ a rehọ enọ a kẹ ẹzi na kpohọ?
[Picture on page 11]
Eva Pẹntikọst 33 C.E., a kẹ imuẹro inọ edhere kpohọ oruaro odhiwu o rovie fihọ no