Ufuoma Oruaro Emọ Ọghẹnẹ O Kẹlino

“Keme enama na e jọ ọthobọ eware ifofe . . . fiki epa ọnọ o ru họ ọtahobọ eva ẹruore; kemena ukpuzou enama na a reti si ei no igbo egbogbo eruọ eva uvẹ oruaro emọ Ọghẹnẹ.”—AHWO ROM 8:20, 21.

1. Ẹvẹ a dhesẹ idhe Jesu evaọ Ẹdẹ Omavoro na?

JIHOVA ọ rehọ Ọmọ ọvo riẹ kẹ wọhọ idhe ẹtanigbo nọ u rovie edhere uzuazọ odhiwu kẹ ahwo 144,000 gbe ẹruore ebẹdẹ bẹdẹ otọakpọ kẹ ahwo-akpọ nọ i kiọkọ. (1 Jọn 2:1, 2) Wọhọ epanọ ma jọ uwuhrẹ n’ukpo muẹrohọ na, idhe Jesu kẹ Ileleikristi nọ a kẹ ẹzi a dhesẹ i rie okenọ ozerẹ okpehru Izrẹl ọ rehọ eruẹ dheidhe wọhọ idhe uzioraha kẹ omobọ riẹ, uviuwou riẹ, gbe orua Livai evaọ Ẹdẹ Omavoro ẹsiẹvo-ẹgbukpe na. Evaọ ẹdẹ ọvo ọyena, ọ rẹ rehọ ẹwe dheidhe wọhọ idhe uzioraha kẹ emọ Izrẹl efa kpobi, nwane wọhọ epanọ idhe Kristi o te kẹ ahwo-akpọ kpobi erere na. Ẹwe ọkpokpọ ọ vẹ wha izieraha ahwo na kpobi evaọ ukpe n’ukpo na vrẹ, nya ruọ igbrẹwọ na.a—Iruo-Izerẹ 16:7-15, 20-22, 26.

2, 3. Eme ẹme Pọl nọ a kere eva Ahwo Rom 8:20, 21 na u dhesẹ?

² Nọ ọ fodẹ ẹruore ahwo-akpọ nọ i ti zihe ruọ “emọ Ọghẹnẹ” obọ odhiwu no, Pọl ukọ na ọ tẹ ta nọ: “Keme ọwhọ ẹruore enama ọ be hẹrẹ odhesẹvia emọ Ọghẹnẹ. Keme enama na e jọ ọthobọ eware ifofe, orọnikọ oreva riẹ hẹ, rekọ fiki epa ọnọ o ru họ ọtahobọ eva ẹruore; kemena ukpuzou enama na a reti si ei no igbo egbogbo eruọ eva uvẹ oruaro emọ Ọghẹnẹ.” (Ahwo Rom 8:14, 17, 19-21) Eme họ otofa ẹme ọnana?

³ Okenọ a ma ọsẹ-ologbo mai Adamu wọhọ ohwo ọgbagba, ọ jọ “ọmọ Ọghẹnẹ.” (Luk 3:38) Fiki uzioraha, ọ tẹ ziọ otọ “igbo egbogbo” o te kpeze uyero onana se uyẹ ohwo-akpọ. (Ahwo Rom 5:12) Ọghẹnẹ ọ tẹ kẹ ahwo-akpọ uvẹ re a yẹ ai avọ ‘ufofe’ nọ o rẹriẹ ova ku ai fiki sebaẹgba nọ a reuku riẹ, rekọ ọ rehọ ẹkwoma “ubi” na, Jesu Kristi, kẹ ẹruore. (Emuhọ 3:15; 22:18; Ahwo Galesha 3:16) Eviavia 21:1-4 o riobọ kpohọ oke nọ ‘uwhu, uweri, oviẹ, gbe edada e gbẹ te jọ họ.’ Nọ onana o rọ eyaa kẹ “ahwo” na, o k’omai imuẹro inọ ukoko ahwo otọakpọ okpokpọ nọ e te rria otọ esuo Uvie na a te ruẹ ezihetha iroro gbe ugboma kpohọ uvi omokpokpọ gbe uzuazọ ebẹdẹ bẹdẹ wọhọ ‘emọ otọakpọ Ọghẹnẹ.’ Evaọ etoke Esuo Odu Ikpe Kristi, a ti si ahwo-akpọ ẹmeoyo “no igbo egbogbo.” Nọ a tẹ roma kpotọ kẹ Jihova evaọ etoke odawọ urere na no, a ti wo ufuoma bẹdẹ bẹdẹ no uzioraha gbe uwhu nọ a reuku riẹ. (Eviavia 20:7-10) Enọ e rọ otọakpọ a ve ti wo “uvẹ oruaro emọ Ọghẹnẹ.”

A be Ta nọ “Nyaze”!

4. Eme u dhesẹ re a rehọ ‘ame uzuazọ ọvọvẹ’?

⁴ Ẹvẹ ẹruore nọ ọ rọ obaro ahwo-akpọ o gbunu te! Agbẹta nọ Ileleikristi nọ ẹzi o yẹ nọ e gbẹ rọ otọakpọ a be rọ rehọ ọwhọ kobaro evaọ ẹtakẹ amọfa kpahe iẹe na! Wọhọ enọ e te jọ abọ “ọva” ọrọ Omogodẹ oruaro na, Jesu Kristi, okiọkotọ nọ a kẹ ẹzi na a w’obọ eva orugba eme eruẹaruẹ enana: “Ẹzi na avọ Ọva na a tẹ ta nọ, ‘Nyaze.’ Jọ ohwo nọ o yo kpobi ọ za nọ, ‘Nyaze.’ Whai e nọ uruame u re kpe a nyaze obonẹ re wha mi ame uzuazọ na, okẹ ọvọvẹ rọ kẹ ahwo nọ a guọlọ e riẹe.” (Eviavia 21:2, 9; 22:1, 2, 17) Ijo, irere idhe ẹtanigbo Jesu e rọ kẹ umutho ahwo 144,000 nọ a kẹ ẹzi na ọvo ho. Ẹzi Ọghẹnẹ ọ be gbẹ jọ oma utu ọva nọ i kiọkọ otọakpọ na ruiruo be ta nọ, “Nyaze.” A zizie ohwo nọ o yo kpobi ọnọ uruame ẹrẹreokie u bi kpe re ọ ta nọ “Nyaze,” re o wo erere no ọruẹrẹfihotọ obuobu Jihova ze kẹ esiwo.

5. Amono o be were Isẹri Jihova re a wo evaọ udevie rai?

⁵ Isẹri Jihova a wo ẹrọwọ fihọ ọruẹrẹfihotọ Ọghẹnẹ kẹ uzuazọ ẹkwoma Jesu Kristi. (Iruẹru 4:12) Eva e be were ai nnọ a jọ udevie rai wo ahwo udu oruọzewọ nọ e gwọlọ wuhrẹ kpahe ẹjiroro Ọghẹnẹ je ru oreva riẹ. Egwae Uvie rai i rovie fihọ kẹ ahwo kpobi nọ e gwọlọ ‘rehọ ame uzuazọ ọvọvẹ’ evaọ “oke urere” onana.—Daniẹl 12:4.

Inwene nọ E Roma Via No

6. Ẹvẹ ẹzi Ọghẹnẹ o ruiruo no evaọ oma idibo Jihova evaọ etoke sa-sa?

⁶ Ọghẹnẹ o wo oke nọ ọ rẹ rọ wha ẹjiroro riẹ haro, yọ onana u kpomahọ oghẹrẹ nọ o bi yeri kugbe ahwo-akpọ. (Ọtausiuwoma Na 3:1; Iruẹru 1:7) Dede nọ ẹzi Ọghẹnẹ ọ jọ oma idibo riẹ taure oke Ileleikristi u te ti te, a yẹ rai wọhọ emọ ẹzi riẹ hẹ. Dede na, muhọ kugbe Jesu, oke Jihova u te no re ọ rehọ abọ-ẹzi ọfuafo yẹ ezae gbe eyae nọ e roma kẹ kpohọ ukuoriọ odhiwu. Kọ ẹvẹ kpahe edẹ mai? Ẹzi ọvo na ọ be jọ oma “igodẹ efa” Jesu ruiruo, rekọ o be kẹ ae ẹruore gbe isiuru uzuazọ odhiwu hu. (Jọn 10:16) Avọ uzuazọ ebẹdẹ bẹdẹ evaọ otọakpọ aparadase wọhọ ẹruore rai nọ Ọghẹnẹ ọ kẹ rai, a be rọ oghọghọ tha ikiọkotọ nọ a kẹ ẹzi na uke evaọ isẹri-ise evaọ etoke enwene ọnana no akpọ anwae na kpohọ akpọ ọkpokpọ okiẹrẹe Ọghẹnẹ.—2 Pita 3:5-13.

7. Didi iruo ivuẹvu Emọ-Iwuhrẹ Ebaibol a se gboja, rekọ eme a riẹ kpahe aparadase?

⁷ Ọghẹnẹ o muọ ‘emọ buobu họ ẹrehọ ziọ oruaro’ evaọ eku kuọ ẹzi ọfuafo eva Pẹntikọst 33 C.E., yọ wọhọ epanọ a sae ruẹ, o fi oke họ kẹ eru vọ ‘Izrẹl abọ-ẹzi Ọghẹnẹ’ nọ i bu te 144,000. (Ahwo Hibru 2:10; Ahwo Galesha 6:16; Eviavia 7:1-8) Muhọ evaọ 1879, a jẹ hae fodẹ iruo ivuẹvu Ileleikristi nọ a kẹ ẹzi na ẹsikpobi evaọ emagazini ọnana. Rekọ Emọ-Uwuhrẹ Ebaibol na (enọ a bi se Isẹri Jihova enẹna) a tẹ jẹ riẹ nọ Ikereakere na e kẹ ẹruore uzuazọ ebẹdẹ bẹdẹ evaọ otọakpọ aparadase. Wọhọ oriruo, Uwou-Eroro ọ July 1883 (ọrọ Oyibo) o ta nọ: “Okenọ Jesu ọ tẹ rehọ uvie riẹ mu no, raha eyoma no, gbe eware efa, otọakpọ na u ve ti zihe ruọ aparadase, . . . enọ e rọ uki rai kpobi a vẹ te kparoma ze eva riẹ. Yọ a te yoẹme kẹ izi riẹ a sae rria bẹdẹ bẹdẹ evaọ eva riẹ.” Nọ oke o be nyaharo na, ivuẹvu enọ a kẹ ẹzi i te kpotọ, yọ ẹmẹrera, ahwo nọ a wo ẹruore odhiwu hu a te vu ai ziọ ukoko Jihova. Oke onana kpobi, Ọghẹnẹ ọ kẹ idibo riẹ nọ a kẹ ẹzi, Ileleikristi nọ a wariẹ yẹ no, ereghẹ igbunu.—Daniẹl 12:3; Ahwo Filipai 2:15; Eviavia 14:15, 16.

8. Ẹvẹ otoriẹ ẹruore otọakpọ o rọ roma via evaọ emuhọ 1930?

⁸ Maero no 1931 ze, enọ i wo ẹruore otọakpọ na a be rọ nyusu kugbe ukoko Ileleikristi na. Evaọ ukpe oyena, Jihova ọ rọ elo kẹ okiọkotọ Ileleikristi nọ ẹzi o yẹ re a ruẹ nọ Izikiẹl uzou 9 o ta kpahe utu otọakpọ onana, enọ a bi kpoka họ kẹ azọ ruọ akpọ ọkpokpọ Ọghẹnẹ. Evaọ 1932, a te kuei họ inọ ahwo itieye nọ e wọhọ igodẹ na a dikihẹ kẹ Jonadab (Jehonadab), ogbẹnyusu Jehu. (2 Ivie 10:15-17) Evaọ 1934, a ru rie vevẹ inọ “otu Jonadab” a rẹ “roma kẹ,” hayo rọ oma rai mudhe kẹ Ọghẹnẹ. Evaọ 1935 “ogbotu obuobu,” hayo “otu obuobu” na—enọ a kaki roro vẹre wọhọ utu abọ-ẹzi avivẹ nọ e te jọ “egbẹnyusu” ọva Kristi evaọ odhiwu—a te vuhu ai wọhọ igodẹ efa nọ i wo ẹruore otọakpọ. (Eviavia 7:4-15; 21:2, 9; Olezi 45:14, 15) Yọ maero no anwọ 1935 ze enọ a kẹ ẹzi na a be kobaro evaọ ẹgwọlọ ahwo nọ i kiete nọ i wo isiuru ẹrria bẹdẹ bẹdẹ evaọ otọakpọ aparadase.

9. Nọ 1935 o vrẹ no, fikieme Ileleikristi jọ a rọ siọ ebrẹdi gbe udi na ba ẹrehọ eva Emu Owọwọ Olori na?

⁹ Nọ 1935 ọ vrẹ no, Ileleikristi jọ nọ e jẹ re ebrẹdi jẹ da udi evaọ Emu Owọwọ Olori na a tẹ seba. Fikieme? Keme a vuhumu nnọ ẹruore rai ọ rọ otọakpọ, orọnikọ odhiwu hu. Enẹ aye jọ nọ ọ họ-ame evaọ 1930 ọ ta: “Dede nọ [ẹre gbe ẹda] yọ oware nọ a roro nọ u fo eruo, maero rọ kẹ egbodibo ọwhọ oke-kpobi, u mu omẹ ẹro ẹdọvo ho inọ me wo ẹruore odhiwu. Kẹsena, evaọ 1935, a te ru ei vevẹ k’omai inọ a bi koko otu obuobu họ avọ ẹruore ẹrria bẹdẹ bẹdẹ evaọ otọakpọ. Ibuobu mai a ghọghọ nọ ma wo otoriẹ nnọ ma rọ abọ otu obuobu ọyena, ma tẹ siọ ebrẹdi gbe udi na ba ẹrehọ.” Makọ oghẹrẹ nọ a je kere ebe Ileleikristi dede u nwene. Nọ a jẹ hai kere erọ ọsosuọ kpahe ilele Jesu nọ a kẹ ẹzi na, no umuo 1935 ze, Uwou-Eroro Na gbe ebe ‘ọrigbo ẹrọwọ’ efa na e tẹ kẹ emu abọ-ẹzi nọ o fo kẹ ẹgwọlọ enọ a kẹ ẹzi na gbe egbẹnyusu rai nọ i wo ẹruore otọakpọ.—Matiu 24:45-47.

10. Ẹvẹ a sai ro nwene ọnọ a wholo nọ o kie?

¹⁰ Kọ otẹrọnọ ọnọ a kẹ ẹzi o kie. Kọ a re nwene iei? Pọl o dhesẹ ẹme ọnana vevẹ evaọ ẹme riẹ kpahe ure olivi ọtadhesẹ na. (Ahwo Rom 11:11-32) U te fo nọ a nwene ọnọ ẹzi o yẹ, ẹsejọhọ Ọghẹnẹ ọ rẹ rehọ use odhiwu na kẹ omọfa nọ ọ jọ egagọ riẹ dhesẹ uvi ẹrọwọ evaọ ikpe buobu no.—Wawo Luk 22:28, 29; 1 Pita 1:6, 7.

Ẹjiroro Buobu kẹ Uyere

11. Makọ oghẹrẹ nọ ẹruore mai ọ rọ, didi imuẹro Jemis 1:17 o k’omai?

¹¹ Oria kpobi nọ ma be jọ gọ Jihova evaọ ẹrọwọ, o ti ru ẹgwọlọ gbe isiuru iwoma mai gba. (Olezi 145:16; Luk 1:67-74) Makinọ ma wo uvi ẹruore odhiwu hayo ẹruore mai ọ tẹ rọ otọakpọ, uvi ẹjiroro buobu e riẹ nọ ma je yere Ọghẹnẹ. O re ru eware nọ e rẹ wha erere se enọ i you rie kpobi. Jemis olele na ọ ta nọ “kokẹ uwoma kokẹ uwoma avọ okẹ nọ o gba kiete kpobi obọ ehru u re notha, i no obọ Ọsẹ ilo tha,” Jihova Ọghẹnẹ. (Jemis 1:17) Joma muẹrohọ umutho ekẹ gbe eghale enana jọ.

12. Ẹvẹ ma sae rọ ta nọ Jihova ọ kẹ idibo ẹrọwọ riẹ kpobi ẹruore ogbunu?

¹² Jihova ọ kẹ idibo ẹrọwọ riẹ kpobi ẹruore ogbunu no. O se ejọ kpohọ uzuazọ obọ odhiwu. Rọ kẹ isẹri riẹ taure oke Ileleikristi u te ti te, Jihova ọ kẹ rai obọdẹ ẹruore ẹkparomatha kpohọ uzuazọ ebẹdẹ bẹdẹ evaọ otọakpọ. Wọhọ oriruo, Abraham o wo ẹruore fihọ ẹkparomatha na ọ tẹ hẹrẹ “ẹwho nọ o wo emamọ otọhotọ”—Uvie obọ odhiwu nọ a te jọ kpare iẹe ziọ uzuazọ otọakpọ. (Ahwo Hibru 11:10, 17-19) Evaọ oke urere onana, Ọghẹnẹ ọ be wariẹ rehọ ẹruore uzuazọ ebẹdẹ bẹdẹ evaọ otọakpọ aparadase kẹ ima ahwo. (Luk 23:43; Jọn 17:3) Uzẹme, ahwo nọ Jihova ọ rehọ ẹruore ogbunu ọyena kẹ kpobi a rẹ kẹ uyere gaga fiki riẹ.

13. Ẹvẹ ẹzi ọfuafo Ọghẹnẹ ọ jọ oma ahwo riẹ ruiruo no?

¹³ Jihova ọ be rehọ ẹzi ọfuafo riẹ kẹ ahwo riẹ wọhọ okẹ. A rọ ẹzi ọfuafo wholo Ileleikristi nọ a kẹ ẹruore obọ odhiwu. (1 Jọn 2:20; 5:1-4, 18) Ghele na, idibo Ọghẹnẹ nọ i wo ẹruore otọakpọ a wo obufihọ gbe ọkpọvio ẹzi na. Evaọ usu enana họ Mosis, ọnọ o wo ẹzi Jihova, jegbe ezae 70 nọ a ro mu re a fiobọhọ kẹe. (Ikelakele 11:24, 25) Evaọ otọ okpomahọ ẹzi ọfuafo na, Bẹzalẹl o je ruiruo wọhọ ọwena evaọ ebabọ uwou-udhu Izrẹl na. (Ọnyano 31:1-11) Ẹzi Ọghẹnẹ ọ ruọ Gidiọn oma, Jẹfta, Samsin, Devidi, Elaeja, Elaesha, gbe amọfa. Dede nọ a te rehọ ahwo anwae enana kpohọ oruaro obọ odhiwu vievie he, ẹzi ọfuafo ọ kpọ rai je fiobọhọ kẹ ae, wọhọ epanọ o rọ kẹ igodẹ efa Jesu nẹnẹ na. Fikiere, ewo ẹzi Ọghẹnẹ o nwani dhesẹ nọ ma wo use odhiwu hu. Ghele na, ẹzi Jihova ọ rẹ k’omai ọkpọvio, fiobọhọ k’omai ta usiuwoma je ru iruo Ọghẹnẹ efa gba, o rẹ k’omai ogaga nọ o thesiwa, o vẹ jẹ jọ oma mai mọ ibi uyoyou, oghọghọ, udhedhẹ, uye-oruẹ-krẹkri, ẹwo, ewoma, ẹrọwọ, omarokpotọ, gbe oma-oriẹsuo. (Jọn 16:13; Iruẹru 1:8; 2 Ahwo Kọrint 4:7-10; Ahwo Galesha 5:22, 23) Kọ ma gbẹ kẹ uyere fiki okẹ oruaro Ọghẹnẹ onana?

14. Ẹvẹ ma ro wo erere no ekẹ eriariẹ gbe areghẹ Ọghẹnẹ ze?

¹⁴ Eriariẹ avọ areghẹ yọ ekẹ nọ i no obọ Ọghẹnẹ ze, enọ ma rẹ rọ fiki rai kẹ uyere, makọ ẹruore mai ọrọ odhiwu hayo otọakpọ. Eriariẹ egbagba Jihova i re fiobọhọ k’omai ‘fiẹro họ eware nọ e mai wuzou’ je “yeri uzuazọ, nọ u fo rọ kẹ Ọnowo na, onọ o rẹ weriẹe.” (Ahwo Filipai 1:9-11; Ahwo Kọlọsi 1:9, 10) Areghẹ Ọghẹnẹ o rọ ethathọ gbe ẹkpọ evaọ uzuazọ. (Itẹ 4:5-7; Ọtausiuwoma Na 7:12) Uvi eriariẹ gbe areghẹ e rọ evaọ Ẹme Ọghẹnẹ, yọ umutho enọ a kẹ ẹzi nọ i kiọkọ na a wo isiuru kpahe oware nọ o ta kpahe ẹruore odhiwu rai gaga. Ghele na, uyoyou kẹ Ẹme Ọghẹnẹ gbe uvi otoriẹ riẹ o nwane rọ edhere nọ Ọghẹnẹ o re ro dhesẹ nọ a se omai kpohọ uzuazọ obọ odhiwu no ho. Ezae wọhọ Mosis avọ Daniẹl a tube kere abọ jọ Ebaibol na dede, rekọ a te kpare ai ziọ uzuazọ evaọ otọakpọ. Makọ ẹruore mai ọrọ odhiwu hayo otọakpọ, mai kpobi a bi wo emu abọ-ẹzi ẹkwoma ‘ọrigbo ẹrọwọ avọ areghẹ’ nọ Jihova ọ jẹrehọ na. (Matiu 24:45-47) Ẹvẹ eva e rẹ were omai kpobi te kẹ eriariẹ nọ ma wo no na!

15. Ovẹ họ okẹ Ọghẹnẹ jọ nọ o mae rro, kọ ẹvẹ who rri rie?

¹⁵ Ovo jọ evaọ usu ekẹ Ọghẹnẹ nọ e mae rro họ ọruẹrẹfihotọ oyoyou ọrọ idhe ẹtanigbo Jesu, onọ o rẹ k’omai erere makọ ma wo ẹruore odhiwu hayo ọrọ otọakpọ. Ọghẹnẹ o you akpọ ahwo “hrọ, ọ jẹ rehọ Ọmọvo riẹ kẹ, re kohwo kohwo nọ ọ rọwo riẹ o gbe vrẹ hẹ rekọ o re wo uzuazọ ebẹdẹ bẹdẹ.” (Jọn 3:16) Yọ uyoyou Jesu o wọ riẹ re ọ ‘rehọ uzuazọ riẹ kẹ wọhọ ẹtanigbo fiki ahwo buobu.’ (Matiu 20:28) Wọhọ epanọ Jọn ukọ na o ru rie vevẹ na, Jesu Kristi “họ okiofu izieraha mai [enọ a kẹ ẹzi na], orọnọ rọ kẹ izieraha mai evo ho rekọ rọ kẹ izieraha akpọ na ọsoso.” (1 Jọn 2:1, 2) Fikiere, mai kpobi a rẹ kẹ uyere gaga kẹ ọruẹrẹfihotọ oyoyou ọnana kẹ esiwo kpohọ uzuazọ ebẹdẹ bẹdẹ.b

Kọ Whọ Te Jariẹ?

16. Ehaa ologbo vẹ a ti ru nọ ọre o te kiediwi no evaọ April 11, 1998, kọ amono a rẹ jariẹ?

¹⁶ Uyere kẹ ẹtanigbo nọ Ọghẹnẹ ọ rọ ẹkwoma Ọmọ riẹ kẹ na o rẹ wọ omai re ma kpohọ Egwa Uvie hayo eria efa nọ Isẹri Jihova a ti kokohọ nọ ọre o te kiediwi no evaọ April 11, 1998, rọ kẹ ehaa uwhu Kristi. Okenọ ọ rehọ ehaa nana mu kugbe ikọ ẹrọwọ riẹ evaọ aso urere uzuazọ otọakpọ riẹ, Jesu ọ ta nọ: “Wha ru onana roro omẹ.” (Luk 22:19, 20; Matiu 26:26-30) Umutho enọ a wholo nọ i gbe kiọkọ na a te re ebrẹdi nọ e kare ẹvi na, onọ u dikihẹ kẹ ugboma ohwo-akpọ Jesu nọ o kare uzioraha, gbe udi owawae gheghe, onọ u dikihẹ kẹ azẹ riẹ nọ o hwẹ evaọ idhe. Ileleikristi nọ ẹzi o yẹ ọvo a rẹ re jẹ da keme ae ọvo a rọ evaọ ọvọ ọkpokpọ na jẹ rọ evaọ ọvọ Uvie na a te je wo isẹri ẹzi ọfuafo Ọghẹnẹ nọ a rẹ vro ho inọ ẹruore odhiwu a wo. Ima ahwo efa a te jariẹ wọhọ iriughe adhẹwẹ nọ e vọ avọ uyere rọkẹ uyoyou nọ Ọghẹnẹ avọ Kristi a dhesẹ ẹkwoma idhe Jesu na nọ u ru uzuazọ ebẹdẹ bẹdẹ lọhọ.—Ahwo Rom 6:23.

17. Eme ma rẹ kareghẹhọ kpahe eromuo ẹzi?

¹⁷ Iruemu egagọ anwae, iroro ididi nọ i re no uwhu ọnọ a you ze, ọbẹwẹ nọ ọ rọ uzuazọ otọakpọ enẹna, hayo iroro inọ ohwo o wo obọdẹ oghale jọ no obọ Jihova ze no e rẹ sae lẹliẹ ejọ roro thọthọ inọ a wo uzuazọ odhiwu. Rekọ mai kpobi a rẹ kareghẹhọ inọ orọnikọ Ikereakere na e ta k’omai nọ ma re ebrẹdi jẹ da udi Ekareghẹhọ na ro dhesẹ uyere mai kẹ idhe ẹtanigbo Kristi na ha. Ofariẹ, ẹzi nọ o re yẹ ohwo orọnọ “oreva ohwo hayo kọ iruo riẹ hẹ, rekọ ajokpa ohrọ Ọghẹnẹ,” Ọnọ o yẹ Jesu wọhọ Ọmọ abọ-ẹzi gbe ọnọ ọ rehọ emọ 144,000 efa ọvo ziọ oruaro na.—Ahwo Rom 9:16; Aizaya 64:8.

18. Rọ kẹ ahwo buobu nọ e be gọ Jihova nẹnẹ, didi eghale e rọ obaro?

¹⁸ Uzuazọ ebẹdẹ bẹdẹ evaọ otọakpọ aparadase họ ẹruore nọ Ọghẹnẹ ọ rọ kẹ ahwo buobu nọ e be gọ Jihova evaọ edẹ urere enana. (2 Timoti 3:1-5) Kẹle na, a te reawere aparadase ogbunu ọnana. Emọ-ivie i ve ti su iruẹru otọakpọ evaọ otọ esuo odhiwu. (Olezi 45:16) Iyero udhedhẹ e te jọ nọ ahwo otọakpọ a ti yoẹme kẹ izi Ọghẹnẹ je wuhrẹ viere kpahe idhere Jihova na. (Aizaya 9:6, 7; Eviavia 20:12) Iruo buobu e te jariẹ, ẹbọ iwou gbe ẹruorote otọakpọ na. (Aizaya 65:17-25) Je roro kpahe okuomagbe evawere uviuwou nọ iwhuowhu i ti zihe ziọ uzuazọ na! (Jọn 5:28, 29) Nọ odawọ urere na o tẹ vrẹ no, emuemu kpobi o ve ti kuhọ. (Eviavia 20:7-10) No okioye rite ebẹdẹ bẹdẹ, otọakpọ na o vẹ te vọ avọ ahwo-akpọ egbagba nọ e ‘rọ emuyẹ no egbogbo gbe enọ i wo uvẹ oruaro emọ Ọghẹnẹ.’

[Footnotes]

Ẹvẹ Whọ te k’Uyo?

◻ Eme u dhesẹ re a ‘rehọ ame uzuazọ ọvọvẹ’?

◻ Makọ ẹruore mai ọrọ odhiwu hayo otọakpọ, didi ẹjiroro ma wo nọ ma re ro yere Ọghẹnẹ?

◻ Ehaa ẹsiẹvo-ẹgbukpe vẹ mai kpobi na a re kpohọ?

◻ Rọ kẹ ahwo Jihova buobu, eme ọ rọ obaro?

[Picture on page 14]

Ima ahwo buobu a muọ ‘ame uzuazọ ọvọvẹ họ ẹrehọ no.’ Kọ whọ rọ usu rai?