‘Oke Udhedhẹ’ O Kẹlino!
“Koware koware kpobi ọvuọ ezi riẹ, . . . oke jọ ẹmo-ofio, oke jọ udhedhẹ.”—ỌTAUSIUWOMA NA 3:1, 8.
1. Didi uyero okpẹtu o rọ ikpe-udhusoi avọ 20 na kpahe ẹmo gbe udhedhẹ?
AVỌ emamọ ẹjiroro, ahwo buobu a bi siuru udhedhẹ. Udhedhẹ o kare ikpe-udhusoi avọ 20 na vi ikpe-udhusoi kpobi evaọ ikuigbe. U gbunu gaga keme a te daoma t’enẹ ẹdọvo ho re a ruẹsi wo udhedhẹ. Evaọ 1920 a fa Ọvọ Erẹwho na. Evaọ 1928 Ẹgwa-Udhedhẹ Kellogg-Briand, onọ obe jọ u se “omodawọ ẹyọrọ udhedhẹ nọ o mae rro kpobi nọ Ẹmo Akpọ I ọ vrẹ no,” o were “enwene erẹwho akpọ na kpobi eva . . . rọwo nọ a re ru ei fihọ uzi orẹwho soso re a siobọno ẹmo.” Kẹsena, evaọ 1945 a tẹ rehọ Okugbe Erẹwho na mu re o rehọ ẹta Ọvọ Erẹwho na nọ u bi fu no na.
2. Eme họ ute Okugbe Erẹwho na, kọ ẹvẹ o kparobọ te?
2 Wọhọ Ọvọ na, ute Okugbe Erẹwho na họ re u le udhedhẹ akpọ t’obọ. Rekọ obokparọ riẹ u tulo ho. Uzẹme, uvumọ oria o rọ akpọ na nọ a bi jo fiẹmo nọ ọ rro te emo akpọ ivẹ na ha. Ghele na, ozighi esese buobu i bi mi idu egba ahwo buobu udhedhẹ rai, ekwakwa rai makọ izuazọ rai dede. Kọ ma rẹ sae gbaudu ta nọ Okugbe Erẹwho na o ti nwene ikpe-udhusoi avọ 21 na fihọ ‘oke udhedhẹ’?
Ehri Uvi Udhedhẹ
3. Fikieme uvi udhedhẹ o gbẹ rọ jọ oria nọ omukpahe ọ rọ họ?
3 Udhedhẹ evaọ udevie ahwo gbe erẹwho o gwọlọ vi ẹkẹ uvẹ onuje. Kọ ohwo jọ ọ sae ghinẹ jọ udhedhẹ kugbe ohwo nọ o mukpahe? Ijo, wọhọ epanọ 1 Jọn 3:15 o ta: “Kohwo kohwo nọ o mukpahe omoni riẹ họ ojihẹ.” Wọhọ epanọ ikuigbe ọgbọna i dhesẹ, omukpahe ọgaga o re su kpohọ ozighi vẹrẹ vẹrẹ.
4. Amono ọvo a rẹ sai wo udhedhẹ, kọ fikieme?
4 Nọ Jihova ọ rọ “Ọghẹnẹ udhedhẹ” na, ahwo nọ a you Ọghẹnẹ je wo adhẹẹ odidi kẹ ehri-izi riẹ ọvo họ enọ e rẹ sai wo udhedhẹ. U re vevẹ, orọnikọ ahwo kpobi Jihova ọ rẹ kẹ udhedhẹ hẹ. “Udhedhẹ o rọ kẹ ahwo omuomu hu, ere Ọghẹnẹ mẹ ọ tae.” Onana o rọ ere keme irumuomu na a se nọ ẹzi ọfuafo Ọghẹnẹ ọ kpọ ae, onọ ubi riẹ jọ o rọ udhedhẹ.—Ahwo Rom 15:33; Aizaya 57:21; Ahwo Galesha 5:22.
5. Eme ọ kare iroro kẹ uvi Ileleikristi?
5 Re a fi ibe ahwo-akpọ ẹmo—wọhọ epanọ enọ i se oma rai Ileleikristi a be hai ru na, maero evaọ ikpe-udhusoi avọ 20 na—o rọ oware nọ o kare iroro kẹ uvi Ileleikristi. (Jemis 4:1-4) Uzẹme, a bi lele iwuhrẹ nọ i bi rri Ọghẹnẹ vo fiẹmo, rekọ a bi fiẹmo nana ro fiobọhọ kẹ ahwo, orọnikọ re a nwa ae oma ha. Re a lahiẹ amọfa fiki ohẹriẹ egagọ hayo re a nwa amọfa oma evaọ ohọre kẹ orẹwho ohwo o hẹrioma gaga no uvi Egagọ-Ileleikristi. Pọl ọ hrẹ Ileleikristi evaọ Rom nọ: “Otẹ make bẹ, epa umutho nọ orọ owhai oma na, wha rehọ [udhedhẹ] lele ahwo kpobi ria.”—Ahwo Rom 12:17-19; 2 Timoti 2:24, 25.
6. Diẹse ọvo a sae jọ ruẹ uvi udhedhẹ nẹnẹ?
6 Nẹnẹ, evaọ udevie uvi egegagọ Jihova Ọghẹnẹ ọvo a rẹ jọ ruẹ udhedhẹ Ọghẹnẹ. (Olezi 119:165; Aizaya 48:18) Uvumọ ohẹriẹ esuo o be raha okugbe rai hi, keme evaọ oria kpobi a kẹnoma kẹ esuo. (Jọn 15:19; 17:14) Fikinọ a rọ “iroro gbe oziẹ-obro ọvo,” uvumọ ohẹriẹ egagọ u bi kpokpo udhedhẹ rai hi. (1 Ahwo Kọrint 1:10) Udhedhẹ nọ Isẹri Jihova a be reawere riẹ yọ oware igbunu ọgbọna, onọ Ọghẹnẹ ọ whaze rọwo kugbe eyaa riẹ: “Me re ti ru enọ e rọ isu rai re a wo udhedhẹ, gbe ilori rai re a jọ ahwo okiẹrẹe.”—Aizaya 60:17; Ahwo Hibru 8:10.
Fikieme ‘Oke Ẹmo-Ofio’ O jẹ Riẹ?
7, 8. (a) Ghelọ edikihẹ udhedhẹ rai, ẹvẹ Isẹri Jihova a rri oke nana? (b) Eme họ ugogo okwakwa ẹmo-ofio Oleleikristi?
7 Ghelọ edikihẹ udhedhẹ rai, Isẹri Jihova a rri oke nana wọhọ ‘oke ẹmo-ofio.’ Orọnikọ ẹmo ugbobọ họ, keme re a rehọ ohọre gba ovuẹ Ebaibol na họ amọfa u re mukpahe uzizie Ọghẹnẹ nọ o ta nọ, ‘kohwo kohwo nọ ọ gwọlọ o mi ame uzuazọ na ọvọvẹ.’ (Eviavia 22:17) Orọnikọ a rẹ gba ohwo họ kurẹriẹ hẹ! Ẹmo nọ Isẹri Jihova a bi fi orọ abọ-ẹzi. Pọl o kere nọ: “Ekuakua ẹmo mai erọ erọ akpọ na ha, rekọ orọ ogaga Ọghẹnẹ nọ a rẹ rọ raha eria nọ egae.”—2 Ahwo Kọrint 10:4; 1 Timoti 1:18.
8 Onọ o karo evaọ “ekuakua ẹmo mai” na họ “ọgbọdọ Ẹzi na, ọnọ ọrọ ẹme Ọghẹnẹ.” (Ahwo Ẹfẹsọs 6:17) Ọgbọdọ nana ọ rọ gaga. “Ẹme Ọghẹnẹ ọ rẹjọ bẹdẹ, avọ iruo, ọ da vi ọpia akọava, nọ o re duwu lafiẹ udevie ẹwẹ gbe ẹzi te ezo-oma, gbe eriare ighogho obọ enwa, gbe eva ekiẹ jẹ riẹ ẹjiroro obọ eva.” (Ahwo Hibru 4:12) Ẹkwoma efihiruo ọgbọdọ nana, Ileleikristi a be sae “whaha avro oyoma, je gbe koware koware nọ umukpahe eriariẹ Ọghẹnẹ.” (2 Ahwo Kọrint 10:5) O be lẹliẹ ae rovie iwuhrẹ erue via, iruemu enwoma, gbe ereghẹ-ididi nọ i bi dhesẹ ereghẹ ahwo-akpọ viukpe erọ Ọghẹnẹ.—1 Ahwo Kọrint 2:6-8; Ahwo Ẹfẹsọs 6:11-13.
9. Fikieme ma gbe fiabọ h’otọ họ evaọ ẹmo mai mukpahe oma uzioraha na?
9 Ẹmo-ofio abọ-ẹzi ọfa họ onọ ma bi fi mukpahe uwo uzioraha na. Ileleikristi a re lele oriruo Pọl, ọnọ ọ rọwo nọ: “Mẹ rẹ nyẹ-oma mẹ, mẹ vẹ ta hiẹ obọ, [ogbẹrọ] ere he, mẹ nọ mẹ vuẹ amọfa no na mẹ vẹ te jọ ọnọ a rẹ sia.” (1 Ahwo Kọrint 9:27) A hrẹ Ileleikristi evaọ obọ Kọlọsi re a “kpe abọ akpọ nọ e [rọ] oma rai no: igberedia, egbegbe, uru-usio nọ o rẹ vrẹ ẹta, eware iyoma eguọlọ gbe eware amọfa eguọlọ, onọ orọ edhọ egọ.” (Ahwo Kọlọsi 3:5) Yọ Jud okere Ebaibol na ọ hrẹ Ileleikristi re a “họre kẹ orọwọ na onọ a rehọ kẹ erezi na kpobi ẹsiẹvo ọvo” na. (Jud 3) Fikieme ma je ru onana? Pọl ọ kuyo nnọ: “Wha te lele epanọ uwo orọ ro yeri, wha re ti whuẹ, rekọ re wha tẹ rọ fiki Ẹzi kpe iruẹru uwo, wha rẹ te zọ.” (Ahwo Rom 8:13) Fiki ẹme ovevẹ nana, ma rẹ sai fiabọ h’otọ họ evaọ ẹmo mai kpahe iroro iyoma.
10. Eme ọ via evaọ 1914, nọ u ti su kpohọ eme evaọ obaro kẹle na?
10 Ẹjiroro ọfa nọ a re ro rri oke nana wọhọ oke ẹmo họ “ẹdẹ orukele Ọghẹnẹ mai” ọ kẹlino. (Aizaya 61:1, 2) Oke nọ Jihova o fihọ u te evaọ 1914 re ọ rehọ Uvie Mesaya na mu re ọ jẹ kẹe udu re o fi eyero Setan ẹmo. Oke nọ a fihọ kẹ ahwo-akpọ re a su omobọ rai ababọ omadhehọ Ọghẹnẹ u kuhọ eva oke oyena. Ukpenọ a rẹ jẹ Osu Mesaya Ọghẹnẹ rehọ, ahwo buobu a gbẹ be siẹe, wọhọ epanọ ibuobu i ru evaọ ikpe-udhusoi ọsosuọ na. (Iruẹru 28:27) Koyehọ, fiki ọwọsuọ Uvie na, o gba Kristi họ re ọ “jọ eva evie ewegrẹ [riẹ] tahọ ae obọ!” (Olezi 110:2) Avọ evawere, Eviavia 6:2 o y’eyaa nnọ a ti “kpe avọ obọ-okparọ.” O ti ru onana evaọ “ẹdẹ ẹmo ologbo Ọghẹnẹ Erumeru na . . . , nọ a rẹ rọ unu Hibru se nọ Amagẹdon.”—Eviavia 16:14, 16.
‘Oke nọ A rẹ Rọ Ta Ẹme’ Ona
11. Fikieme Jihova o ro diodi t’enẹ, rekọ eme ọ te tha hrọ?
11 Anwọ oke ekurẹriẹ iruẹru ohwo-akpọ ọrọ 1914, ikpe 85 e vrẹ no. Jihova o wo odi gaga kẹ ohwo-akpọ no. O ru Isẹri riẹ vuhu ẹkpata oke nana mu no. Izuazọ ima buobu e rọ awa. U fo re a vẹvẹ ogbotu nana unu keme “Ọnowo na . . . ọ guọlọ nọ ohwo ọvo o whu hu, rekọ ahwo kpobi a zite ekurẹriẹ.” (2 Pita 3:9) Rekọ, kẹle na “Ọnowo mai Jesu Kristi ọte via no odhiwu tha avọ otu ikọ-odhiwu iride riẹ.” Kẹsena, enọ i keke aro fihọ siọ ovuẹ Uvie Ọghẹnẹ a te ruẹ “uye,” onọ Jesu ọ te wha te “enọ e riẹ Ọghẹnẹ hẹ, gbe enọ e kezọ usiuwoma Jesu Ọnowo mai hi.”—2 Ahwo Tẹsalonika 1:6-9.
12. (a) Fikieme ekele oke nọ uye ulogbo na u ti ro muhọ u gbe ro fioka ha? (b) Okpẹtu vẹ evaọ onana Jesu ọ vẹvẹ unu kpahe?
12 Oke vẹ odiri Jihova o ti ro t’oba? Ekele oke nọ “uye obẹbẹ” na u ti ro muhọ yọ okioraha gheghe. Jesu ọ ta vevẹ nnọ: “Ẹdẹ ọyena gbe oke oyena ohwo ọvo ọ riẹ hẹ.” Evaọ abọdekọ riẹ, ọ hrẹ nọ: “Wha roro, keme wha riẹ ẹdẹ nọ Ọnowo rai ọ rẹ te tha ha. . . . Wha [ruẹrẹ oma kpahe] re; keme okenọ wha roro ho Ọmọ ohwo ọ rẹ tha.” (Matiu 24:21, 36, 42, 44) Eme na i re vevẹ, u te dhesẹ nọ kẹdẹ kẹdẹ ma re muẹrohọ iruẹru akpọ je wo emuhọ uye ulogbo na họ iroro. (1 Ahwo Tẹsalonika 5:1-5) Ẹvẹ o rẹ jọ enwoma te re ma roro nọ ma rẹ sae r’awọ siotọ, rria uyero nọ a bi se emamọ uzuazọ, hẹrẹ re ma ruẹ epanọ eware e te nya riwi! Jesu ọ ta nọ: “Wha yọrọ oma rai ogbẹrọ ere he emuọriọ obuobu gbe edada ibuobu, gbe iroro akpọ na, i ve ti ru owhai zoruẹ, re ẹdẹ ọyena ọ se owhai ba emu idudhe wọhọ agbefẹ.” (Luk 21:34, 35) Onana o rẹ sai mu omai ẹro: “Ifou ene” ọraha nọ “ikọ-odhiwu ene” Jihova i kru daji na a ti kru rai daji bẹdẹ bẹdẹ hẹ.—Eviavia 7:1-3.
13. Eme enwenọ ahwo ima ezeza a vuhumu no?
13 Fiki ẹdẹ ẹdhoguo ọnana nọ ọ be dhẹze kpata kpata na, eme ọ Solomọn kpahe ‘oke nọ a rẹ rọ ta ẹme’ na i wo otofa obọdẹ viere. (Ọtausiuwoma Na 3:7) Nọ a vuhumu no nnọ oke nana họ oke nọ a rẹ rọ ta ẹme, enwenọ ima ezeza Isẹri Jihova a be rọ ọwhọ t’ẹme kpahe oruaro ọkwa-ovie Ọghẹnẹ jẹ be vẹvẹ unu kpahe ẹdẹ orukele riẹ. A be rọ oma rai kẹ nevaze evaọ ẹdẹ ogbaẹmo Kristi na.—Olezi 110:3; 145:10-12.
Enọ E Be Ta nọ “ ‘Udhedhẹ,’ Evaọ Okenọ Udhedhẹ O Rọ Họ”
14. Eruẹaro erue vẹ e jariẹ evaọ ikpe-udhusoi avọ ihrẹ B.C.E. na?
14 Evaọ etoke ikpe-udhusoi avọ ihrẹ B.C.E., Jerimaya gbe Izikiẹl, eruẹaro Ọghẹnẹ, a whowho ovuẹ ẹdhoguo Ọghẹnẹ mukpahe Jerusalẹm fiki edhere aghẹmeeyo rai kẹ Ọghẹnẹ. Ọraha nọ a t’ẹme te ọ ze evaọ 607 B.C.E., dede nọ isu ikpahwo egagọ na a wọso ewhovuẹ Ọghẹnẹ na. Ahwo otiọye na a te ti zihe ro “eruẹaro igheghẹ [enọ i] . . . su ahwo [Ọghẹnẹ] thọ, be ta nọ, ‘Udhedhẹ,’ evaọ okenọ udhedhẹ o rọ họ.”—Izikiẹl 13:1-16; Jerimaya 6:14, 15; 8:8-12.
15. Eruẹaro erue itieye e riẹ nẹnẹ? Ru ei vẹ.
15 Wọhọ “eruẹaro igheghẹ” oke oyena, isu egagọ buobu nẹnẹ e be vuẹ ahwo kpahe ẹtha ẹdẹ ẹdhoguo Ọghẹnẹ hẹ. Ukpoye, a be ta ewoma ẹko isuẹsu inọ kẹle na a te wha udhedhẹ gbe omofọwẹ ze. Fikinọ a gwọlọ ru ahwo eva were viukpọ Ọghẹnẹ, a rẹ ta kẹ ahwo rai oware nọ a gwọlọ yo ukpenọ a ta kẹ ae nnọ a rehọ Uvie Ọghẹnẹ mu no evaọ obọ odhiwu gbe nnọ Ovie Mesaya na ọ te kparobọ kẹle na. (Daniẹl 2:44; 2 Timoti 4:3, 4; Eviavia 6:2) Wọhọ eruẹaro erue, ae omarai a be ta kpahe “ ‘udhedhẹ,’ evaọ okenọ udhedhẹ o rọ họ.” Rekọ imuẹro rai i ti zihe ruọ okpẹtu idudhe okenọ a te rẹriẹ ovao ku ofu Ọnọ a bi rri vo na gbe ọnọ a wha ekela buobu se odẹ riẹ no na. Isu isuẹsu egagọ ọrue akpọ na, enọ a jọ Ebaibol dhesẹ wọhọ aye ogbọfariẹ na, a ti whu evaọ okenọ a gbe bi bubo eviẹhọ udhedhẹ rai na.—Eviavia 18:7, 8.
16. (a) Didi emamọ odẹ Isẹri Jihova a ru no? (b) Ẹvẹ a rọ hẹrioma no enọ i bi b’ubo “ ‘udhedhẹ,’ evaọ okenọ udhedhẹ o rọ họ”?
16 Inọ isu ikpahwo buobu e ruabọhọ eyaa eviẹhọ udhedhẹ rai u nuhu evaifihọ enọ i fi ẹrọwọ họ eyaa uvi udhedhẹ Ọghẹnẹ hẹ. Bu viọ ikpe-udhusoi no na, a riẹ Isẹri Jihova no wọhọ enọ e be rọ oruọzewọ tha Ẹme Ọghẹnẹ uke, enọ e wharo wọso egagọ erue, gbe enọ e rọ aruọwha be tha Uvie Ọghẹnẹ uke. Ukpenọ a rẹ rọ eme-awere udhedhẹ fou ahwo họ owezẹ, a be daoma jaja ai aro vi inọ nẹnẹ họ oke ẹmo.—Aizaya 56:10-12; Ahwo Rom 13:11, 12; 1 Ahwo Tẹsalonika 5:6.
Jihova O Du Lahwe
17. Eme u dhesẹ inọ Jihova o ti rovie unu kẹle?
17 Solomọn ọ ta nọ: “Ọghẹnẹ o ti bruoziẹ ikiẹrẹe gbe iruimuomu, keme o fi oke họ kẹ oware kpobi.” (Ọtausiuwoma Na 3:17) Ẹhẹ, Jihova o wo oke nọ o fihọ kẹ ẹdhoguo obrukpe ọrọ egagọ erue gbe “ivie akpọ na [nọ] i mugba . . . kpahe Ọnowo jẹ kpahe ọ riẹ nọ a wholo na.” (Olezi 2:1-6; Eviavia 16:13-16) Nọ oke oyena u te te no, edẹ Jihova nọ o ro “fibo” i ve ti t’oba. (Olezi 83:1; Aizaya 62:1; Jerimaya 47:6, 7) Ẹkwoma Ovie Mesaya riẹ nọ o ro mu, Jesu Kristi, ọ te “ta ẹme” evaọ ẹvẹrẹ ọvuọvo nọ ewegrẹ riẹ i re yo: “ỌNOWO ọ nyavia wọhọ ohwo ologbo, wọhọ ogbaẹmo nọ ọ nyaze avọ ofu; o te bovia, woro via, o te dhesẹ oma riẹ wọhọ ọgba rọkẹ ewegrẹ riẹ. Me wo odiri kri no, mẹ tẹ fọ tou mẹ tẹ yọrọ oma mẹ; enẹna me re bovia wọhọ aye nọ ọ rọ othuẹ eyẹ, me reti muọwhọ variẹ. Mẹ rẹte raha igbehru gbe ikpehru na fihọ otọ, je ru ebe nọ e riẹ kpobi yamu; mẹ rẹte rẹriẹ ithẹ na họ etegwe, je ru etẹre na kpọ. Me re ti su ituaro na evaọ edhere nọ a riẹ hẹ, evaọ eda-edhere nọ a riẹ hẹ me jeti su ai. Mẹ rẹte rẹriẹ ebi rai zihe ruọ elo, eria ikothi zihe ruọ paprara. Enana họ eware nọ Me reti ruẹ, mẹ rẹte se ae ba ha.”—Aizaya 42:13-16, ẹjẹlẹ ibiẹme na ọmai.
18. Edhere vẹ ahwo Ọghẹnẹ a te rọ “fọ tou” kẹle na?
18 Okenọ Jihova ọ tẹ ‘ta ẹme’ evaọ ẹthọ ọkwa-Ọghẹnẹ riẹ, o gbẹ te gwọlọ re ahwo riẹ a du t’ẹme rọ thọ oma rai hi. O te jọ oke nọ a rẹ rọ “fọ tou.” Wọhọ epanọ o jọ kẹ idibo Ọghẹnẹ evaọ oke anwae, eme nana i ti w’iruo: “Wha re ti du họre eva ẹmo nana ha; dikihẹ ẹta ra, wha mudhe oria ovo re wha te ruẹ obokparọ ỌNOWO na fiki rai.”—2 Iruẹru-Ivie 20:17.
19. Didi uvẹ-ọghọ inievo abọ-ẹzi Kristi a ti wo kẹle?
19 Ẹvẹ onana o te jọ ukie te kẹ Setan gbe ukoko riẹ! Inievo oruaro Kristi a ti w’abọ evaọ obokparọ urere kẹ ẹrẹreokie na, rọwo kugbe eyaa na: “Ọghẹnẹ udhedhẹ ọ rẹ te thahe Setan fihọ otọawọ rai obọ na.” (Ahwo Rom 16:20) Oke udhedhẹ nọ ma be hẹrẹ anwẹdẹ o ze no.
20. Oke eme u ti te kẹle?
20 Ẹvẹ oghale na o te rro te kẹ enọ e te jọ otọakpọ nọ e zọ vrẹ odhesẹvia ogaga Jihova nana! Kẹsena ezae gbe eyae ẹrọwọ erọ oke anwae nọ oke ẹkparomatha rai u te no a vẹ te nya via. Esuo Odu Ikpe Kristi o te ghinẹ jọ ‘oke ekakọ . . . , oke esiwo . . . , oke ebabọ . . . , oke ohwẹ . . . , oke nọ a re ro duola . . . , oke edede gbe . . . oke nọ a re ro you.’ Ẹhẹ, o te jọ ‘oke udhedhẹ’ bẹdẹ bẹdẹ!—Ọtausiuwoma Na 3:1-8; Olezi 29:11; 37:11; 72:7.
Didi Uyo Whọ te Kẹ?
◻ Eme họ ehri udhedhẹ ebẹdẹ bẹdẹ?
◻ Fikieme Isẹri Jihova a je rri oke nana wọhọ ‘oke ẹmo-ofio’?
◻ Okevẹ ahwo Ọghẹnẹ a rẹ rọ “ta ẹme,” kọ okevẹ a rẹ rọ “fọ tou”?
◻ Oghẹrẹ vẹ gbe okevẹ Jihova o ti ro rovie unu?
[Box/Picture on page 24]
Jihova O Wo Oke nọ O Fihọ Kẹ
◻ ẹbẹbẹhọ Gọg ruọ ẹhọre ahwo Ọghẹnẹ.—Izikiẹl 38:3, 4, 10-12
◻ efihọ evaọ idu isu ahwo-akpọ na re a raha Babilọn Ologbo na.—Eviavia 17:15-17; 19:2
◻ eruo orọo Omogodẹ na.—Eviavia 19:6, 7
◻ emuhọ ẹmo Amagẹdọn.—Eviavia 19:11-16, 19-21
◻ ẹgba Setan re Esuo Odu Ikpe Jesu o muhọ.—Eviavia 20:1-3.
Ma kere eviavia enana evaọ oghẹrẹ nọ a rọ t’ẹme kpahe ae evaọ Ikereakere na. U mu omai ẹro nnọ eviavia isoi nana e te via evaọ othotha nọ Jihova ọ ruẹrẹhọ kẹ ae gbe uzedhe oke nọ u je rie.
[Pictures on page 26]
Esuo Odu Ikpe Kristi o te ghinẹ jọ oke . . .
nọ a rẹ rọ hwẹ . . .
nọ a re ro dede . . .
nọ a re ro you . . .
nọ a rẹ rọ kọ . . .
nọ a re ro duola . . .
nọ a rẹ rọ bọ . . .