Iwhowho Uvie A N’iyẹrẹ
Obufihọ kẹ Oghẹrẹ Ahwo Kpobi Evaọ Netherlands
ABRAHAM yọ ohwo nọ a rẹ ruẹ obọ ẹrọwọ riẹ hẹ. Pọl ukọ na ọ ta nọ: “Okenọ a sei,” Abraham o yo urru Ọghẹnẹ “ọ tẹ nya vrẹ, yọ ọ riẹ obo nọ o re kpohọ họ.” Nọ ọ kwa uviuwou riẹ kpobi no, Abraham ọ tẹ “ria otọ eya na” evaọ etoke ikpe udhusoi uzuazọ riẹ nọ i kiọkọ.— Ahwo Hibru 11:8, 9.
Epọvo na nẹnẹ, Isẹri Jihova buobu a jẹ use-abọ na rehọ onọ a rẹ rọ kwa kpohọ orẹwho ofa re a sae ta usiuwoma evaọ oria nọ ẹgwọlọ ọ mae jọ rro. Efa i wuhrẹ ẹvẹrẹ ọfa no re a sai se isẹri kẹ erara nọ e kwa ziọ orẹwho rai. Wọhọ epanọ iriruo obotọ na i dhesẹ, emamọ ẹzi ọnana u rovie ‘ẹthẹ ologbo nọ u re su kpohọ iruo’ fihọ no evaọ Netherlands, oria nọ ahwo ima ọvo evaọ usu ima ahwo 15 a jo no ekwotọ efa ze.—1 Ahwo Kọrint 16:9.
◻ Bahram, ọnọ ọ jọ owuhrẹ ọ ohọre Kung Fu vẹre, o no orẹwho obọ Udevie Ovatha-Ọre jọ ze. Ọ dẹ Ebaibol gbe ebe Watch Tower jọ. Etoke amara ọvo, Bahram o te vuhumu nnọ ọ ruẹ uzẹme na no. A te muọ ewuhrẹ họ kugbei avọ aye riẹ, rekọ ẹbẹbẹ jọ ọ jariẹ — owuhrẹ Ebaibol rai ọ rẹ ta ẹvẹrẹ rai hi. “T’abọ t’awọ a jẹ rọ t’ẹme” wọhọ epanọ a kareghẹhọ. U kri hi, Bahram avọ aye riẹ a te duku ukoko nọ a be jọ ta ẹvẹrẹ rai, a te ru ẹnyaharo kpata kpata. Obọnana Bahram yọ Osẹri nọ ọ họ-ame no.
◻ Ọzae gbe aye ekobaro Dutch jọ a nyabru ọzae Indonesia jọ nọ o dikihẹ aro uwou-eki jọ. U gbe rie unu gaga avọ evawere nnọ ọzae gbe aye na a ta ẹvẹrẹ riẹ kẹe. A te ru ọruẹrẹfihotọ re a weze bru ei evaọ uwou riẹ. A tẹ ruẹ nọ ọ rria Russia vrẹ ikpe 20 no, evaọ etoke nọ o ro wuhrẹ kpahe ẹyao eyae. Ọ ta nnọ ọ rọwo Ọghẹnẹ hẹ, rekọ ọ f’eva nọ oke kpobi nọ o yẹ aye, u re gbei unu ọvo, “Ugboma ohwo na o gba kẹhẹ! U gbunu kẹhẹ!” Ọ tẹ rọwo nọ o re wuhrẹ Ebaibol, ọ tẹ te rọwo nnọ Ọnọma nọ ọ be daezọ ahwo-akpọ ọ rọ. (1 Pita 5:6, 7) Obọnana ọ họ-ame no yọ ọ rọ ukoko Indonesia evaọ Amsterdam.
◻ Evaọ Rotterdam, unueri ovo jọ evaọ usu enọ e mae jọ akpọ na soso rro nọ ekọ-iyibo e rẹ kpahe na, ekobaro jọ a daoma no re a ta usiuwoma kẹ ahwo evẹrẹ sa-sa nọ i re bi ekọ kpahe iẹe kẹdẹ kẹdẹ. Fiki iruo etausiuwoma ọwhọ nana, ibiekọ buobu, kugbe ọjọ nọ o wuzou okọ jọ, gbe ohwo jọ nọ o je roiro vẹre, a tẹ jẹ uzẹme na rehọ. Obọnana a bi fiobọhọ whowho emamọ usi Uvie Ọghẹnẹ evaọ akpọ-soso.—Matiu 24:14.
Wọhọ epanọ o rọ evaọ abọ ọfa akpọ na kpobi, Isẹri Jihova evaọ Netherlands a gba riẹ mu no re a ru ẹkẹ abọ rai evaọ ewhowho usiuwoma ebẹdẹ bẹdẹ na kẹ orẹwho, orua, ẹvẹrẹ, gbe ahwo kpobi.—Eviavia 14:6.