Iwhowho Uvie A N’iyẹrẹ

Ẹriẹ Ọghẹnẹ Oyoyou Na

OKENỌ ọ jọ ikpe 16, yọ akpọ ọ bẹ ọmọ Brazil jọ nọ a re se Antônio no. Fikinọ ọ riẹ onọ o re ru hu o te muọ imu egaga họ ẹlọ je muọ idi họ ẹda. Ẹsibuobu o roro kpahe ethuwhu. Oke nana ọ rọ kareghẹhọ eme nọ oni riẹ ọ ta kẹe vẹre: “Ọghẹnẹ họ uyoyou.” (1 Jọn 4:8) Rekọ diẹse Ọghẹnẹ oyoyou nana ọ rrọ?

Re ọ ruẹse siọ imu egaga ba ẹlọ jẹ siọ idieda ba, Antônio ọ tẹ gwọlọ obufihọ mi ozerẹ ichọche jọ. Dede nọ Antônio o kru oma ga evaọ Ichọche Kathọlik na, o gbe wo enọ buobu. Wọhọ oriruo, eme ọ Jesu na, “Wha rẹ te riẹ uzẹme na, uzẹme na u re ti ru owhai emuyẹ” e kẹ riẹ idhọvẹ. (Jọn 8:32) Didi ufuoma Jesu ọ y’eyaa riẹ na? Ichọche na i wo uvumọ uyo nọ o rẹ veva kẹ enọ riẹ hẹ. Uwhremu na, Antônio o te zihe kpohọ uruemu anwae riẹ. Evaọ uzẹme, uruemu imu elọ riẹ u te yoma viere.

Evaọ oke nana, aye Antônio, Maria, o te muọ Ebaibol họ ewuhrẹ kugbe Isẹri Jihova. Dede nọ ọ jẹ wọso ewuhrẹ riẹ hẹ, Antônio o je rri Isẹri na wọhọ “egagọ America enọ i bi ruiruo kẹ ewoma esuo-ọgbahọ America.”

Avọ ithihakọ, Maria ọ tẹ jẹ nyasiọ emagazini Uwou-Eroro gbe Awake! nọ e ta kpahe eware nọ ọ riẹ nọ i ti si Antônio urru ba eria sa-sa uwou na. Nọ isase e rẹ were Antônio na, ẹsejọ ọ rẹ dhẹ emagazini na duwu evaọ okenọ aye riẹ ọ riẹ hẹ. Evaọ orọ ọsosuọ evaọ uzuazọ riẹ, ọ tẹ ruẹ iyo kẹ enọ Ebaibol riẹ. Ọ kareghẹhọ nọ: “Me te je bi muẹrohọ uyoyou gbe ẹwo nọ aye mẹ gbe Isẹri na a bi dhesẹ kẹ omẹ.”

Evaọ udevie ukpe 1992, Antônio ọ tẹ jiroro nọ ọ gwọlọ wuhrẹ Ebaibol kugbe Isẹri Jihova re. Ghele na, ọ ruabọhọ imu elọ gbe idieda. Udeviaso jọ tei te ogbẹnyusu riẹ a te je zihe no iwhre jọ ze, iporisi i te kru rai. Okenọ iporisi na e ruẹ ige evaọ ẹkpa Antônio, a te mu ei họ ekpe. Iporisi jọ o te gele iei kie fihọ ọloho jẹ rọ ugbeke dhei ovao. Iporisi ọdekọ na o te bo nọ: “Sai kpe!”

Nọ Antônio o kiẹzẹ ọloho na, o te je roro kpahe uzuazọ riẹ. Eware ezi nọ ọ sae kareghẹhọ kpobi họ uviuwou riẹ gbe Jihova. Ọ tẹ lẹ kpẹkpẹe, be yare obufihọ Jihova. Gheghe gheghe na, iporisi na a tẹ nya siẹe ba. Ọ tẹ kparoma kpo, avọ imuẹro nnọ Jihova ọ thọ riẹ na.

Antônio o te muọ Ebaibol họ ewuhrẹ avọ ọwhọ ọkpokpọ. O te muọ inwene họ e ru ẹmẹrera re ọ ruẹsi ru Jihova eva were. (Ahwo Ẹfẹsọs 4:22-24) Ẹkwoma ẹbọ oma-oriẹsuo, o te muọ oma họ ẹdawo fihọ ẹbẹbẹ ogbẹlọ imu riẹ. Ghele na, ọ gwọlọ obufihọ edọkita. Emerae ivẹ nọ ọ raha evaọ uwou-imu nọ a jọ fiobọhọ kẹe o kẹ riẹ uvẹ se ebe buobu nọ a kporo no Ebaibol ze, kugbe obe na Eriariẹ Nọ I Re Su Kpohọ Uzuazọ Ebẹdẹ Bẹdẹ. Antônio ọ tẹ rọ eware nọ o wuhrẹ no ebe nana ze t’ẹme kugbe amọfa nọ a wo ẹbẹbẹ ọvo na.

Nọ Antônio o no uwou-imu na ze no, ọ tẹ ruabọhọ ewuhrẹ Ebaibol na kugbe Isẹri na. Nẹnẹ na, Antônio, Maria, emetẹ ivẹ rai, gbe oni Antônio a be gọ Jihova kugbe wọhọ uviuwou evawere okugbe. Enẹ Antônio ọ ta: “Obọnana me wo otoriẹ uzẹme eme na no ‘Ọghẹnẹ họ uyoyou.’ ”

[Uwoho nọ o rrọ ẹwẹ-obe avọ 18]

Usiuwoma ota evaọ Rio de Janeiro