Oghẹrẹ nọ Etoke Aye-Uku O Kpomahọ Eyae Ivẹ

SANDRA yọ aye-uku nọ ọ be rria evaọ Australia. Okenọ ọzae riẹ o whu ikpe jọ nọ e vrẹ, iguegue e tẹ ruọ Sandra oma idudhe. “Evuhumu inọ ọrivẹ gbe ogbẹnyusu obọdẹ mẹ o vru siọ omẹ ba no idudhe o k’omẹ idhọvẹ gaga. Mẹ sae ghinẹ kareghẹhọ epanọ me ro zihe no ẹsipito na kpo hayo oware nọ me ru evaọ ẹdẹ ọyena kpobi hi. Evaọ etoke ekpoka nọ i lele i rie, ozodhẹ mẹ u te zihe ruọ edada ugboma ikẹse kẹse.”

Sandra o wo ogbẹnyusu jọ nọ ọ kpako vi ei, Elaine, ọnọ ọ rọ aye-uku te ikpe ezeza no. Elaine ọ rẹrote ọzae riẹ, David, evaọ emerae ezeza taure ẹyao-ọta o te ti kpei. Uweri riẹ o ga te epanọ, u kri hi nọ ọzae riẹ o whu no, o ro tuaro evaọ ubroke. Ikpe ivẹ nọ i lele i rie ọ tẹ fiakie evaọ ẹgbede. Edọkita riẹ ọ ruẹ oka ẹyao ugboma ọvuọvo evaọ oma riẹ hẹ. Rekọ, edọkita na ọ ruẹ nọ Elaine ọ be ko uweri riẹ dhere, fikiere ọ tẹ hrẹ riẹ nọ o kpo re ọ daoma viẹ via. Elaine ọ rọwo nọ: “O rehọ omodawọ gaga re me ku uweri mẹ họ,” o te fibae nọ evaọ oke ọkora, “mẹ rẹ tubẹ nya kpohọ obọ ukpẹ mẹ vẹ v’ovao tu iwu David.”

Ẹhẹ, uwhu ọrivẹ-orọo oyoyou o rẹ sae wha okpomahọ sa-sa ze, keme etoke aye-uku o gwọlọ vi ẹrria ababọ ọzae ọvo. Wọhọ oriruo, Sandra o je roro evaọ etoke jọ nnọ ọ gbẹ rọ oghẹrẹ ohwo nọ ọ jọ vẹre he. Wọhọ amọfa buobu nọ a zihe ro eyae-uku kẹle na, o roro nọ o kpoma fihọ kẹ enwoma, jẹ kare adhẹzọ. Sandra ọ kareghẹhọ nọ: “Nọ orọnọ ọzae mẹ ọye o re ru ẹjiroro urere vẹre na, ọ tẹ nyasiọ omẹ ba idudhe re mẹ jiroro eyena. O jẹ whaha omẹ owezẹ. Oma o rẹ rọ omẹ. O jọ bẹbẹ re mẹ riẹ oware nọ me re ru.”

Oghẹrẹ ikuigbe ọ Sandra gbe Elaine na e be roma via kẹdẹ kẹdẹ wariẹ akpọ na họ. Ẹyao, asidẹnte, emo, okpemuotọ uyẹ, gbe ozighi evaọ abọ riẹ kpobi yọ eware nọ i bi kuobọgbe ubu unu eyae-uku.a Ibuobu eyae enana e be ruẹ-uye imimẹ, a riẹ oware nọ a re ru hu. Eme egbẹnyusu gbe imoni a rẹ sai ru ro fiobọhọ kẹ enọ i bi muabọ kugbe etoke aye-uku? Uzoẹme n’otha na u wo iroro-ejẹ jọ nọ e rẹ sai fiobọhọ.

[Oruvẹ-obotọ]