Epanọ A rẹ rọ Bọ Uvi Uyoyou
“Uyoyou họ ifue rọkẹ ebẹbẹ uzuazọ kpobi; uyoyou họ uzuazọ.”—Obe na Living to Purpose, onọ Joseph Johnson o kere evaọ 1871.
ẸVẸ ohwo-akpọ o re ro wuhrẹ epanọ a re you? Ẹkwoma ewuhrẹ iroro gbe uruemu ohwo-akpọ? Ẹkwoma ebe obufihọ omobọ-ohwo nọ o re se? Ẹkwoma ighe obẹlẹ nọ o re rri? Vievie. Ahwo-akpọ a rẹ kaki wuhrẹ epanọ a re you no oriruo gbe ewuhrẹ esẹgbini rai ze. Emọ i re wuhrẹ kpahe oware nọ uyoyou o rrọ evaọ okegbe nọ ọ rrọ whẹtiẹwhẹtiẹ, nọ a jẹ be ruẹ esẹgbini rai nọ e be thọ ae jẹ kẹ ae emu re, be t’ẹme kugbe ae je wo uvi isiuru rọ kẹ ae. A re je wuhrẹ epanọ a re you eva okenọ esẹgbini rai a te bi wuhrẹ ae re a koko obọdẹ ehri-izi erọ oware nọ u woma gbe onọ u yoma.
Uvi uyoyou u vi ọdawẹ hayo ororokẹ udu gheghe. Kẹse kẹse o rẹ gwọlọ ru uvi ewoma kẹ amọfa, o tẹ make rọnọ a re wo ovuhumuo kẹe eva oke yena ha, nwane wọhọ epanọ o rẹ mae jọ kẹ emaha na evaọ okenọ a tẹ be rehọ edhere uyoyou whọku ae. Oriruo ọgbagba ọrọ ohwo nọ o re dhesẹ uyoyou nọ o kare oriobọ họ Ọnọma na omariẹ. Pọl ukọ na o kere nnọ: ‘Ọmọ mẹ, wha ri uwuhrẹ Ọnowo na vovovo ho, hayo udu u bru owhai hi nọ ọ tẹ kẹ owhai uye. Keme ọnọ Ọnowo na o you ọye ọ rẹ whọku.’—Ahwo Hibru 12:5, 6.
Eyewọ, ẹvẹ wha sae rọ raro kele Jihova evaọ uyoyou udhesẹ kẹ uviuwou rai? Kọ ẹvẹ oriruo nọ wha re fihọ otọ eva usu rai kugbe ohwohwo wọhọ ọzae avọ aye o w’uzou te?
Rehọ Oriruo Ra Wuhrẹ Amọfa Uyoyou
Whọ tẹ rrọ ọzae uwou-orọo, kọ who bi rri aye ra ghaghae jẹ rehọ ọghọ gbe adhẹẹ lele ei rria? Whọ tẹ rrọ aye, kọ who bi you jẹ tha ọzae ra uke? Ebaibol na e ta nnọ ọzae avọ aye a re dhesẹ uyoyou gbe adhẹẹ kẹ ohwohwo. (Ahwo Ẹfẹsọs 5:28; Taitọs 2:4) Nọ a te bi ru ere, etẹe emọ rai a jẹ kake ruẹ uyoyou Oleleikristi nọ o rrọ iruo. Ẹgba gbe aghare uwuhrẹ riẹ u w’iruo kẹhẹ!
Esẹgbini e rẹ jẹ wha uyoyou h’aro evaọ uwou na nọ a te fi itee ikpekpehru họ kẹ uviuwou na eva eware wọhọ aruọzaha ọ omawere, ẹfuọ uruemu, gbe eware nọ e mae r’oja. Evaọ akpọ na soso, ahwo a riẹ Ebaibol na no wọhọ obufihọ ulogbo evaọ efihọ itee uviuwou, onọ o kẹ imuẹro inọ “Ọghẹnẹ o [ghine] gie ẹwolo ku [Ebaibol na] . . . re e jọ erere rọ kẹ ewuhrẹ gbe ozọ-usio, avọ ọkpọvio gbe odhesẹkẹ eva ẹrẹreokie.” (2 Timoti 3:16) Eva uzẹme, a jọ oria kpobi vuhumu no inọ izi uruemu gbe ọkpọvio uzuazọ nọ a re duku evaọ Ovuẹ obọ Ugbehru na ọvo dede i wo ibe he.—Matiu, uzou avọ 5 rite 7.
Okenọ uviuwou na soso u te bi rri bru Ọghẹnẹ rọkẹ ọkpọvio jẹ be nya lele itee riẹ, udu u re kie omomọvo vi, yọ emọ e rẹ te rro re a wo uyoyou jẹ rehọ adhẹẹ kẹ esẹgbini rai. Wo ohẹriẹ, evaọ uwou nọ u wo itee agbava, itee ethọthọ, hayo enọ e rrọ whrehewhrehe, emọ e rẹ sai muofu, dheva, jẹ wọso.—Ahwo Rom 2:21; Ahwo Kọlọsi 3:21.
Kọ ẹvẹ kpahe ọyewọ ọvo? Kọ ẹbẹbẹ ọ riẹ gaga re a sai wuhrẹ emọ esese rai kpahe uyoyou? O nwane rrọ ere he. Dede nọ uvumọ oware o rẹ sae rehọ ẹta ọsẹ avọ oni nọ a bi ruiruo kugbe ziezi hi, eware nọ e via no i dhesẹ inọ ọriẹyero uviuwou ọ rẹ sai dina ru abọjọ iruo ọsẹ hayo oni nọ ọ riẹ hẹ. Whọ tẹ rrọ ọyewọ ọvo, daoma fi ehri-izi Ebaibol h’iruo evaọ uwou ra. Ẹhẹ, itẹ jọ e ta kẹ omai nnọ: “Rehọ ẹroọrọsuọ ra kpobi kpahe ỌNOWO na whọ rehọ eva kpahe ẹriẹ omobọ ra ha. Eva idhere ra kpobi ọ thọrọ owhẹ ẹro ho, o ve ti ruọ idhere ra kpọvi”—kugbe edhere ọkwa-iruo ọyewọ.—Itẹ 3:5, 6; Jemis 1:5.
A yọrọ emamọ emoha buobu evaọ uviuwou ọyewọ ọvo yọ a be rehọ ẹrọwọ gọ Ọghẹnẹ enẹna evaọ idu ikoko erọ Isẹri Jihova wariẹ akpọ na họ. Onana yọ imuẹro inọ eyewọ ọvo a rẹ sae kparobọ re evaọ emọ rai nọ a re wuhrẹ kpahe uyoyou.
Epanọ Ahwo Kpobi A Sae rọ Bọ Uyoyou
Ebaibol na e ruẹaro nnọ oware jọ nọ u ti kpoka họ “edẹ urere” na họ “eva egaga,” koyehọ ababọ ororokẹ nọ ahwo uviuwou a re wo kẹ ohwohwo. (2 Timoti 3:1, 3) Ghele na, makọ ahwo nọ a whẹro evaọ okegbe nọ ọ kare edhesẹ ọdawẹ a rẹ sai wuhrẹ re a bọ uyoyou. Oghẹrẹ vẹ? Ẹkwoma ewuhrẹ mi Jihova, ọnọ ọ rrọ uzedhe Ehri uyoyou gbe ọnọ o re dhesẹ uyoyou gbe ọdawẹ kẹ ahwo kpobi nọ a rehọ ẹwẹ rai kpobi kurẹriẹ bru ei. (1 Jọn 4:7, 8) Ọso-ilezi jọ ọ ta nọ: “Ọsẹ gbe oni mẹ a tẹ se omẹ, Ọnowahwo o re ti kru omẹ rehọ.”—Olezi 27:10.
Jihova o bi dhesẹ uyoyou riẹ k’omai evaọ oghẹrẹ idhere buobu. Enana i kugbe ọkpọvio ọsẹ nọ ọ be k’omai ẹkwoma Ebaibol na, obufihọ ẹzi ọfuafo na, gbe uketha osasa orọ okugbe-inievo Ileleikristi. (Olezi 119:97-105; Luk 11:13; Ahwo Hibru 10:24, 25) Roro kpahe epanọ eruẹrẹfihotọ esa nana e sai ro fi obọ họ k’owhẹ rro h’aro evaọ uyoyou rọkẹ Ọghẹnẹ gbe erivẹ.
Ọkpọvio Ọsẹ nọ A Rehọ Ẹgba Ẹzi Kere
Re ma ruẹse bọ usu osasa kugbe ohwo, ma rẹ riẹ ohwo na ziezi tao hrọ. Ẹkwoma omariẹ nọ o dhesẹ via evaọ Ebaibol na, Jihova o zizie omai re ma si kẹle ẹe. Dede na, re a se Ebaibol na ọvo u te he. Re ma wo irere noi ze, ma re fi iwuhrẹ riẹ h’iruo hrọ. (Olezi 19:7-10) “Mẹ họ ỌNOWO na Ọghẹnẹ ra, ọnọ o [bi] wuhrẹ owhẹ wo erere, ọnọ [o bi su] owhẹ nya edhere nọ o fo ẹnya,” ere Aizaya 48:17 o tae. Uzẹme, Jihova, ọnọ ọ rrọ uzedhe ehri uyoyou na, o bi wuhrẹ omai rọkẹ erere mai—orọnikọ re ọ gwọlọ rehọ izi gbe ijaje gba omai yao otọ họ.
Eriariẹ egbagba Ebaibol na e sai je fi obọ họ kẹ omai rro evaọ uyoyou rọkẹ erivẹ mai. Onana o rrọ ere keme uzẹme Ebaibol na u wuhrẹ omai eriwo Ọghẹnẹ kpahe ahwo-akpọ, je dhesẹ ehri-izi nọ e rẹ kpọ oghẹrẹ nọ ma re yeri kugbe ohwohwo. Avọ evuẹ itieye na, ma wo uvi iroro nọ ma rẹ rọ bọ uyoyou ọrivẹ. Pọl ukọ na ọ ta nọ: ‘Mẹ lẹ kẹ owhai re uyoyou rai u hedhe ẹruẹruọ, eva eriariẹ egbagba gbe areghẹ kpobi.’—Ahwo Filipai 1:9.
Re ma dhesẹ epanọ “eriariẹ egbagba” e sae rọ kpọ uyoyou ziezi, roro kpahe uzẹme nọ u w’uzou nọ a kere họ Iruẹru Ikọ Na 10:34, 35 na: “Ọghẹnẹ ọ [rrọ ọriẹwẹ hẹ], rekọ evaọ korẹwho korẹwho ọnọ ọ jarae dhẹe o je ru onọ ukiẹrẹe ọ rẹ rehọ iẹe.” Otẹrọnọ iruo ikiẹrẹe gbe ozodhẹ Ọghẹnẹ nọ a dhesẹ oye Ọghẹnẹ o re ro bruoziẹ ahwo, orọnikọ uyẹ hayo ovioma rai hi, kọ ma gbẹ rehọ ababọ ọriẹwẹ ọvona rri erivẹ mai?—Iruẹru 17:26, 27; 1 Jọn 4:7-11, 20, 21.
Uyoyou—Ubi Ẹzi Ọghẹnẹ
Wọhọ epanọ oso ẹruoke nọ ọ rrọ fihọ ọgbọ ọ rẹ wha emamọ ivuẹvu ze na, ere ẹzi Ọghẹnẹ ọ rẹ bọ ekwakwa nọ Ebaibol na i dhesẹ wọhọ “ubi Ẹzi” na họ ahwo evezi. (Ahwo Galesha 5:22, 23) Orọ ọsosuọ ubi nana họ uyoyou. (1 Ahwo Kọrint 13:13) Rekọ ẹvẹ ma sai ro wo ẹzi Ọghẹnẹ? Obọdẹ edhere jọ họ ẹkwoma olẹ. Ma tẹ lẹ kẹ ẹzi Ọghẹnẹ, ọ te rehọ iẹe kẹ omai. (Luk 11:9-13) Kọ whọ ‘be ruabọhọ’ olẹ rọkẹ ẹzi ọfuafo? Who te bi ru ere, koyehọ ubi oghaghae riẹ, onọ u kugbe uyoyou, u ti dhesẹ oma via viere eva uzuazọ ra.
Dede na, oghẹrẹ ẹzi ọfa ọ riẹ nọ o bi ruiruo wọso ẹzi Ọghẹnẹ. Ebaibol na i se ọnana “ẹzi akpọ na.” (1 Ahwo Kọrint 2:12; Ahwo Ẹfẹsọs 2:2) O rrọ okpomahọ emuemu, yọ ehri riẹ họ Setan Edhọ na, ‘osu akpọ’ ahwo nọ e hẹriẹ oma no Ọghẹnẹ. (Jọn 12:31) Wọhọ ofou nọ ọ rẹ whẹ ovu gbe erara, “ẹzi akpọ na” ọ rẹ kpare isiuru enwoma nọ e rẹ raha uyoyou, isiuru nọ e rẹ dhẹ lele ewhrehe iwo.—Ahwo Galesha 5:19-21.
Ahwo a re se ẹzi oyoma yena rehọ okenọ a te kpe oma rai fihọ kẹ ilale efe, iroro oriobọ, iruẹru ozighi, avọ eriwo ọthọthọ uyoyou nọ ọ da akpọ na fia. Whọ tẹ gwọlọ rro evaọ obọdẹ uyoyou, whọ rẹ dadamu wọso ẹzi akpọ na hrọ. (Jemis 4:7) Dede na, who fi eva họ ẹgba obọ ra ha; bo se Jihova kẹ obufihọ. Ẹzi riẹ—ẹgba nọ ọ mae ga kpaobọ evaọ ehrugbakpọ na—ọ rẹ sae k’owhẹ ẹzẹ avọ obokparọ.—Olezi 121:2.
Wuhrẹ Uyoyou Mi Okugbe-Inievo Na
Wọhọ epanọ emọ i re wuhrẹ epanọ a re ro dhesẹ uyoyou nọ a tẹ be jọ obọ uwou rue riẹ na, ere mai kpobi—te emaha te ekpako—a rẹ sae rro evaọ uyoyou ekwoma oma nọ ma re kugbe ibe Ileleikristi. (Jọn 13:34, 35) Uzẹme, obọdẹ iruo ukoko Ileleikristi na jọ họ, re o kẹ uyero nọ omomọvo ọ sae rọ “jaja ọrivẹ riẹ oma, re o wo uyoyou, je ru iruo ezi kpobi.”—Ahwo Hibru 10:24.
Uyoyou utioye na o rẹ mae were ahwo nọ ‘a rrọ oyoya jẹ vaha abọ’ evaọ akpọ nọ ọ kare uyoyou nọ ọ wariẹ omai họ na. (Matiu 9:36) Eware nọ e via i dhesẹ no inọ ọkpako ọ rẹ bọ jẹ sae reawere usu uyoyou nọ o wo ho eva okenọ ọ jọ ọmaha. Nọ o rrọ ere na, ẹvẹ u w’uzou te re Ileleikristi kpobi nọ e r’oma mudhe no a rehọ eva kpobi dede ahwo ekpokpọ nọ e ziọ udevie rai rehọ!
“Uyoyou U re Re He”
Ebaibol na e ta nnọ “uyoyou u re re he.” (1 Ahwo Kọrint 13:8) Ẹvẹ o rọ rrọ ere? Pọl ukọ na ọ ta k’omai nọ: “Uyoyou u re wo odiri krẹkri, avọ ọriẹruo; uyoyou u wo ihrieriọ họ hayo eha-ise he; u wo omovia ha, hayo u re ru eware etọtọ họ oma riẹ hẹ. Uyoyou o rẹ guọlọ orọ obọ riẹ hẹ; o rẹ kpare ẹme ọgaga avọ ofu hu.” (1 Ahwo Kọrint 13:4, 5) U re vevẹ, uyoyou onana orọnikọ oware nọ o rẹ dhẹ ruọ ohwo iroro gheghe he. Ukpoye—ahwo nọ a bi dhesẹ iẹe a riẹ je vuhu edada gbe ẹruore-ofofe uzuazọ mu, rekọ a be kuvẹ kẹ enana re e raha uyoyou nọ a wo kẹ ọrivẹ hẹ. Uyoyou utioye na o ghinẹ rrọ “ọwhẹgbe eware kpobi.”—Ahwo Kọlọsi 3:12-14.
Roro kpahe oriruo ọmọtẹ Oleleikristi ikpe 17 jọ evaọ Korea. Nọ o mu Jihova Ọghẹnẹ họ ẹgọ, uviuwou riẹ o rọwo kugbei hi, onọ o soriẹ ze nọ o ro no uwou. Ghele na, ukpenọ ọ dheva, o te fi ẹme na họ olẹ, k’uvẹ kẹ Ẹme gbe ẹzi Ọghẹnẹ re e kpọ iroro riẹ. Nọ oyena o vrẹ no, ọ tẹ jẹ hai kere ileta se uviuwou riẹ, ọ jẹ hai jọ ileta na kere kpahe uyoyou osasa nọ o wo kẹ ae. Fiki onana, inievo-emezae ekpako ivẹ riẹ a te mu Ebaibol họ ewuhrẹ yọ a rrọ Ileleikristi nọ e r’oma mudhe no enẹna. Oni riẹ gbe oniọvo-ọmọzae ọmaha riẹ a te ti kurẹriẹ re. Ukuhọ riẹ, ọsẹ riẹ nọ ọ jẹ wọso gaga vẹre na, o te nwene iroro riẹ. Osẹri ọmọtẹ na o kere nnọ: “Mai emọ na kpobi ma rọo inievo Ileleikristi, enẹna mai ahwo uviuwou mai nọ ma be gọ evaọ okugbe ọvo ma te ahwo 23.” Obokparọ nọ u no edhesẹ uyoyou ze o rro kẹhẹ!
Kọ whọ gwọlọ bọ uvi uyoyou je fi obọ họ kẹ amọfa ru ere? Koyehọ who re bru Jihova, Ehri okwakwa oghaghae yena. Ẹhẹ, si Ẹme riẹ te iroro, lẹ kẹ ẹzi ọfuafo, re who je kuomagbe inievo Ileleikristi ẹsikpobi. (Aizaya 11:9; Matiu 5:5) Ẹvẹ o sasa oma te re ma riẹ nnọ kẹle na irumuemu kpobi e gbẹ te jariẹ hẹ, ahwo nọ a bi dhesẹ uvi uyoyou Ileleikristi ọvo a ti kiọkọ! Eva uzẹme, uyoyou họ usiavẹ evawere gbe uzuazọ.—Olezi 37:10, 11; 1 Jọn 3:14.
[Iwoho nọ e rrọ ẹwẹ-obe avọ 6]
Olẹ gbe ewuhrẹ Ẹme Ọghẹnẹ i ti fi obọ họ k’omai bọ uvi uyoyou