Enọ Ahwo nọ A s’Ebe

Kọ Pọl ukọ na o si obọ no ẹrọwọ Oleleikristi riẹ okenọ ọ jọ iraro Sanhẹdrin ta nọ: “Mẹ ohwo Farisi”?

Re ma wo otoriẹ eme Pọl nọ e rrọ Iruẹru 23:6 na, u fo re ma se eme nọ e wariẹ e riẹ họ.

Okenọ otu ugbarugba ahwo Ju a họre iẹe no evaọ Jerusalẹm, Pọl ọ tẹ ta ẹme kẹ ogbotu na. Ọ ta nọ “evaọ ẹwho [Jerusalẹm] a jẹ yọrọ omẹ whẹro, evaọ awọ Gamaliẹl, wuhrẹ wọhọ epanọ oruwha uzi esẹ [na] orọ.” Dede nọ ogbotu na a gaviezọ kẹe omojọ nọ o bi gu ẹkẹ unu riẹ na, okenọ eva e dha ae, elakpa nọ i je rou Pọl na a te su ei kpohọ ogba elakpa na. Nọ a tọlọ eviaviẹ nnọ a rẹ fae, Pọl ọ tẹ nọ inọ: “Ufo re who mu ọmuyẹ Rom fa, ababọ obrukpe?”—Iruẹru 21:27–22:29.

Okiokiọ riẹ, oletu na ọ tẹ rehọ Pọl kpohọ Sanhẹdrin, okọto ukpehru ahwo Ju na. Pọl o te muẹrohọ ae ziezi, ọ tẹ ruẹ nnọ ahwo Sadusi gbe ahwo Farisi a rrọ ogbẹgwae Sanhẹdrin na. Ọ tẹ ta nọ: “Imoni, mẹ ohwo Farisi, ọmọzae ohwo Farisi; fiki ẹruore gbe ẹkparomatha iwhuowhu a je se omẹ ze ẹdhọ-oguo na.” Fiki eme nana, ẹwhọ ọ tẹ ruọ udevie ahwo Farisi gbe ahwo Sadusi na, “keme ahwo Sadusi a ta nọ ẹkparomatha iwhuowhu ọ rọ họ, hayo kọ ukọ-odhiwu hayo ẹzi ọ rọ gbehe; rekọ ahwo Farisi a rọwo rai ekuivẹ na.” Ejọ nọ e rrọ utu Farisi na a te je ru edo nọ: “Ma jọ obọ ohwo ọnana ruẹ oware uyoma ha.”—Iruẹru 23:6-10.

Nọ a riẹe wọhọ Oleleikristi nọ o wo ọwhọ gaga na, u du gwọlọ nọ Pọl ọ rẹ rehọ unu riẹ ta kẹ ogbẹgwae Sanhẹdrin na ha inọ uvi ohwo Farisi ọ rrọ. Otu Farisi na a hae jẹe rehọ họ ọ gbẹ rọwo iwuhrẹ rai hi. Fikiere eme Pọl inọ ohwo Farisi ọ rrọ i dhesẹ nnọ abọjọ ọvo ọ rọ rrọ ohwo Farisi, yọ ere ahwo Farisi nọ a jọ etẹe a wo otoriẹ eme Pọl na.

Nọ ọ ta nnọ fiki ẹruore ẹkparomatha no iwhuowhu ze a bi ro gu ei ẹdhọ na, Pọl ọ be ta vevẹ inọ evaọ abọ nana ọ wọhọ ohwo Farisi. Otẹrọnọ avro jọ ọ riẹ kpahe ẹme ẹkparomatha, a re rri Pọl wọhọ omọvo ahwo Farisi viukpọ omọvo ahwo Sadusi, enọ e rọwo ẹkparomatha ha.

Oware nọ Pọl ọ rọwo o wọso enọ otu Farisi na a rọwo ho evaọ eme wọhọ ẹkparomatha, ijẹle, gbe abọjọ Uzi na. (Ahwo Filipai 3:5) Fikiere Pọl ọ sae rehọ fiki iwuhrẹ nana se oma riẹ ohwo Farisi, yọ fiki iwuhrẹ nana ahwo nọ a jọ Sanhẹdrin na a sae rọ ta nọ Pọl ginọ ohwo Farisi. Fikiere, ọ jẹ rehọ ohwo Ju nọ ọ rrọ na raha egrẹ nọ okọto ologbo ahwo Ju na a wo kpahe iẹe.

Dede na, ọjẹrehọ Jihova nọ o gbe wo họ imuẹro nọ e mae rro inọ Pọl o si obọ no ẹrọwọ riẹ hẹ. Evaọ aso ẹdẹ nọ Pọl ọ rọ ta ẹme yena, Jesu ọ ta kẹ Pọl nọ: “Ozọ u mu owhẹ hẹ, epanọ whọ se isẹi kẹ omẹ obọ Jerusalem na, se isẹi kẹ omẹ erere obọ Rom.” Nọ o rọnọ Pọl o wo ọjẹrehọ Ọghẹnẹ na, ma rẹ sai ku ei họ inọ Pọl o si obọ no ẹrọwọ Oleleikristi riẹ hẹ.—Iruẹru 23:11.