Kọ Who Ti Dhesẹ Oruaro Ọghẹnẹ Via?

“Ma bi . . . dhesẹ oruaro Jihova via wọhọ ughẹgbe.”—2 AHWO KỌRINT 3:18, NW.

1. Eme Mosis ọ ruẹ, kọ eme ọ via nọ oyena o vrẹ no?

OJỌ eruaruẹ nọ o mae kẹ ọwhewhe kpaobọ nọ ohwo-akpọ ọ rẹro ruẹ no. A kuyo ayare oghẹrẹsa Mosis jọ okenọ ọ jọ goli eva ehru Ugbehru Sainai. A kẹ riẹ uvẹ re ọ ruẹ oware nọ ohwo-akpọ ọ re ruẹ ẹdẹvo ho—oruaro Jihova. Uzẹme, Mosis ọ ruẹ Jihova ovao dhe ovao ha. Elo nọ o bi no oma Ọghẹnẹ zẹ ọ ga te epanọ ohwo ọvuọvo ọ rẹ sae rue riẹ re ọ gbẹ jọ uzuazọ họ. Ukpoye, Jihova ọ rehọ “obọ” riẹ ruru Mosis bẹsenọ Ọ rọ nyavrẹ, avro ọ riẹ hẹ, ẹkwoma enjẹle riẹ O ro ru onana. Kẹsena Jihova ọ tẹ kẹ Mosis uvẹ re ọ ruẹ elo nọ o lele oruaro riẹ. Jihova ọ tẹ jẹ rehọ ẹkwoma enjẹle ta ẹme kugbe Mosis. Ebaibol na i dhesẹ oware nọ o via inọ: “Okenọ Mosis o no ugbehru Sainai ze otọ . . . ovao riẹe u [te] bi lo . . . fiki epanọ o je lele Ọghẹnẹ ta ẹme.”—Ọnyano 33:18–34:7, 29.

2. Eme Pọl ukọ na o kere kpahe oruaro nọ Ileleikristi a bi dhesẹ?

² Dae rehọ iẹe nọ whọ jọ kugbe Mosis eva ugbehru yena. Ẹvẹ o rẹ jọ oware urirẹ te re whọ ruẹ elo ọnwranwra Erumeru na jẹ gaviezọ kẹ eme nọ ọ be ta! Ẹvẹ o rẹ jọ oware uvẹ-ọghọ te re whẹ avọ Mosis nọ ọ rrọ ọtota ọvọ Uzi na wha gadiẹ ruotọ no Ugbehru Sainai ze! Kọ whọ gbẹ riẹ nọ evaọ oghẹrẹ jọ Ileleikristi uzẹme a bi dhesẹ oruaro Ọghẹnẹ evaọ edhere nọ u tube vi oghẹrẹ nọ Mosis o dhesẹ i rie? A re duku uzẹme yena nọ o gbunu gaga na evaọ ileta nọ Pọl ukọ na o kere. O kere inọ Ileleikristi a ‘bi dhesẹ oruaro Ọnowo na wọhọ ughẹgbe.’ (2 Ahwo Kọrint 3:7, 8, 18) Evaọ oghẹrẹ jọ, Ileleikristi nọ i wo ẹruore ẹrria otọakpọ a bi dhesẹ oruaro Ọghẹnẹ re.

Epanọ Ileleikristi A bi ro Dhesẹ Oruaro Ọghẹnẹ Via

3. Ẹvẹ ma rọ riẹ Jihova evaọ idhere nọ Mosis ọ sae riẹ te he?

³ Ẹvẹ ma sai ro dhesẹ oruaro Ọghẹnẹ via? Ma re ruẹ hayo yo nọ Jihova ọ be ta ẹme wọhọ epanọ o jọ kẹ Mosis na ha. Dede na, ma riẹ Jihova enẹna evaọ idhere nọ Mosis ọ sae riẹ te oke yena ha. Jesu ọ roma via wọhọ Mesaya na ha bẹsenọ oware wọhọ ikpe 1,500 e rọ vrẹ nọ Mosis o whu no. Fikiere Mosis ọ rẹ sae riẹ oghẹrẹ nọ Uzi hayo Ikereakere na i ti ro rugba kpahe Jesu hu, ọnọ o whu re ọ ruẹse ta ahwo-akpọ no igbo uzioraha gbe uwhu. (Ahwo Rom 5:20, 21; Ahwo Galesha 3:19) Ofariẹ, edhere jọ kakao ọvo Mosis ọ sae rọ ruẹ ẹjiroro ogbunu Jihova, onọ Uvie Mesaya na u ti rugba gbe Aparadase otọakpọ nọ o te wha ze. Rekọ rono iwuhrẹ Ebaibol ze, ma be rehọ ibiaro ẹrọwọ ruẹ oruaro Jihova orọnikọ ibiaro gheghe he. Ofariẹ, ma yo urru Jihova no orọnikọ ẹkwoma enjẹle he rekọ ẹkwoma Ebaibol na, maero kọ ikere Usiuwoma na nọ i dhesẹ iwuhrẹ gbe odibọgba Jesu totọ.

4. (a) Ẹvẹ Ileleikristi nọ a wholo na a bi ro dhesẹ oruaro Ọghẹnẹ via? (b) Evaọ idhere vẹ enọ i wo ẹruore otọakpọ na a sai ro dhesẹ oruaro Ọghẹnẹ via?

⁴ Dede nọ Ileleikristi a bi dhesẹ oruaro Ọghẹnẹ via evaọ edhere nọ ovao rai u bi ro lo nwranwranwra ha, umutho elo u bi no ovao rai ze nọ a be vuẹ amọfa kpahe oruaro orọ ẹjiroro gbe ekwakwa-aghae Jihova na. Nọ ọ jẹ ta kpahe edẹ mai na, Aizaya ọruẹaro na ọ ta nọ idibo Ọghẹnẹ a ti “dhesẹ oruaro [Jihova] via rọkẹ erẹwho na.” (Aizaya 66:19) Ofariẹ, ma se eva 2 Ahwo Kọrint 4:1, 2 nọ: “Nọ oma wo iruo nana no, . . . ma siọ eware idhere omovuọ ba no, ma gbe bi ru eware ẹghẹ hẹ, hayo kọ ẹme Ọghẹnẹ o kro evevere he, rekọ fiki odhesẹvia uzẹme na ma re ro dhesẹ oma mai kẹ iroro ohwo kpobi eva aro Ọghẹnẹ.” Ileleikristi nọ a wholo na họ ugogo ahwo nọ Pọl ọ jẹ ta ẹme nana kpahe, enọ e rrọ “iruiruo ọvọ ọkpokpọ na.” (2 Ahwo Kọrint 3:6) Rekọ iruo odibọgba rai i kpomahọ ahwo buobu nọ a wo ẹruore uzuazọ ebẹdẹ bẹdẹ no evaọ otọakpọ. Odibọgba ọrọ itu ivẹ na o gwọlọ nọ a re dhesẹ elo Jihova via orọnikọ evaọ eware nọ a re wuhrẹ amọfa ọvo ho rekọ te evaọ uruemu rai. O rrọ owha-iruo mai, o tẹ jẹ rrọ uvẹ-ọghọ re ma dhesẹ oruaro Ọghẹnẹ Erumeru na via!

5. Imuẹro vẹ ma wo no ẹnyaharo abọ-ẹzi mai ze?

⁵ Nẹnẹ, a bi whowho oruaro usiuwoma Uvie Ọghẹnẹ evaọ erẹwho akpọ na kpobi wọhọ epanọ Jesu ọ ruẹaro riẹ. (Matiu 24:14) Ahwo erẹwho, erua gbe erọo-unu kpobi a rehọ ajọwha kezọ kẹ emamọ usi na no, a te je nwene uzuazọ rai no re a ruẹsi ru oreva Ọghẹnẹ. (Ahwo Rom 12:2; Eviavia 7:9) Wọhọ Ileleikristi ọsosuọ, a rẹ sae siọ eware nọ a ruẹ je yo ba ẹta ha. (Iruẹru 4:20) Ahwo nọ a bu vi ima-ezeza, nọ u dhesẹ ẹvi nọ a re ruẹ anwọ ikuigbe ohwo-akpọ ze he a bi dhesẹ oruaro Ọghẹnẹ via nẹnẹ. Kọ whẹ yọ omọvo rai jọ? Ẹnyaharo abọ-ẹzi ọrọ idibo Ọghẹnẹ o be kẹ imuẹro ọthọwẹ gbe eghale Jihova. Ẹnyaharo nọ ma bi wo ghelọ egaga ilogbo nọ e rọ so omai o tubẹ mae kẹ imuẹro inọ ẹzi Jihova ọ rrọ kugbe omai. Joma ruẹ oware nọ o jẹ rrọ ere.

A te Fare Idibo Ọghẹnẹ Unu Hu

6. Fikieme o rọ gwọlọ ẹrọwọ gbe uduowha re ma ruẹsi dikihẹ kẹ Jihova?

⁶ Ma rehọ iẹe nọ a se owhẹ re wo se isẹi kpe ohwo-ugbarugba jọ evaọ okọto. Whọ riẹ nọ ohwo-ugbarugba na o wo ukoko idhere jọ nọ u wo ẹgba gaga yọ ọ te dawo ẹgba riẹ kpobi re ọ ruẹ nọ whọ siọ isẹi ba ese kpei. Re whọ sai se isẹi kpe ohwo-ugbarugba otiọye na o gwọlọ aruọwha gbe udufihọ inọ o ga kẹhẹ egọmeti ọ te thọ owhẹ no obọ riẹ. Ma rrọ oghẹrẹ uyero ovona. Nọ ma bi se isẹi kẹ Jihova gbe ẹjiroro riẹ na yọ ma bi se isẹi kpe Setan Ẹdhọ na, be fere iẹe via wọhọ ojihẹ gbe ọtọrue nọ o bi su akpọ na soso thọ. (Jọn 8:44; Eviavia 12:9) Re whọ ruẹsi dikihẹ kẹ Jihova je mugba kẹ Ẹdhọ o gwọlọ ẹrọwọ gbe uduowha.

7. Ẹvẹ Setan o wo ẹgba te, kọ eme ọ be daoma gwọlọ ru?

⁷ Uzẹme o rrọ, Jihova họ Ọnọ Ọmai Kpehru. O wo ogaga nọ u kpehru thesiwa vi orọ Setan. O rẹ sai mu omai ẹro inọ orọnikọ Jihova ọ rẹ sae thọ omai ọvo ho rekọ o rrọ isiuru riẹ gaga re o ru ere nọ ma be gọe avọ omurokpotọ na. (2 Iruẹru-Ivie 16:9) Dede na, o rẹ thọrọ omai ẹro ho inọ Setan họ ọnọ o bi su idhivẹri na gbe ahwo-akpọ nọ a hẹriẹ oma no Ọghẹnẹ no. (Matiu 12:24, 26; Jọn 14:30) Fikinọ a le rie ziọ otọakpọ no avọ “ofu ọgaga” nọ ọ riẹe eva, Setan o bi dhuaro wọso idibo Jihova jẹ be rehọ akpọ nọ o bi su rọ gwọlọ fare unu ahwo kpobi nọ a be ta usiuwoma na. (Eviavia 12:7-9, 12, 17) Ẹvẹ o bi ro ru onana? O tẹ kawo, evaọ idhere esa.

8, 9. Ẹvẹ Setan ọ be rrọ rehọ urusio kẹ eware akpọ na ru iruo, kọ fikieme ma jẹ yọrọ oma nọ ma tẹ be salọ egbẹnyusu mai?

⁸ Omawere uzuazọ yọ edhere jọ nọ Setan ọ be rọ daoma gwọlọ kpọ iroro mai. Ahwo edẹ urere nana a you igho, oma-obọrai je you omawere. A wo uyoyou kẹ Ọghẹnẹ hẹ. (2 Timoti 3:1-4) Fikinọ a du oma le no họ iruẹru uzuazọ ikẹdẹ kẹdẹ, ahwo buobu a be “riẹ” hayo fi ẹro hotọ kẹ emamọ usi nọ ma be wha se ai hi. A bi dhesẹ isiuru kpahe ewuhrẹ uzẹme Ebaibol na ha. (Matiu 24:37-39) A sae whẹ oghẹrẹ uruemu utioye na họ omai, nọ o rẹ sae lẹliẹ omai jọ whrehewhrehe evaọ abọ-ẹzi. Nọ ma tẹ kuvẹ kẹ isiuru ekwakwa efe gbe omawere akpọ na ole, uyoyou mai kẹ Ọghẹnẹ u re ti kiekpo.—Matiu 24:12.

⁹ Fiki iroro nana, u fo re Ileleikristi a yọrọ oma nọ a tẹ be salọ ahwo nọ a re lele nya usu. Solomọn ovie na o kere nọ: “Ọnọ ọ nya lele ahwo owareghẹ o re wo areghẹ, rekọ usu igheghẹ o rẹ nwa ohwo oma.” (Itẹ 13:20) Joma “nya” lele ahwo nọ a bi dhesẹ oruaro Ọghẹnẹ via. U re woma kẹhẹ nọ ma te ru ere! Nọ ma bi kuomagbe inievo abọ-ẹzi mai eva iwuhrẹ Ileleikristi gbe oke ofa na, yọ ma bi wo uduotahawọ no uyoyou nọ a bi dhesẹ, ẹrọwọ, oghọghọ, gbe areghẹ rai ze. Emamọ omakugbe utioye na o rẹ bọ ọtamuo mai ga nọ ma re ro thihakọ evaọ iruo odibọgba mai na.

10. Idhere vẹ Setan ọ rọ rehọ ẹkoko wọso ahwo nọ a bi dhesẹ oruaro Ọghẹnẹ via no?

¹⁰ Edhere avivẹ nọ Setan ọ be rọ daoma gwọlọ whaha Ileleikristi kpobi re a siọ oruaro Ọghẹnẹ ba edhesẹvia họ ẹkwoma ẹkoko. U fo re ẹghẹ nana ọ jọ oware nọ u re gb’omai unu hu. Eva etoke odibọgba riẹ evaọ otọakpọ, a se Jesu Kristi ẹkoko—a rehọ iẹe je ijehwẹ, je tube nweya ku ei. (Mak 5:40; Luk 16:14; 18:32) A se Ileleikristi ọsosuọ ẹkoko re. (Iruẹru 2:13; 17:32) Epọvo na a be poviẹ idibo Jihova ọgbọna. Wọhọ epanọ Pita ukọ na ọ ta, a ti se ai “eruẹaro erue.” Pita ọ ta nọ: “eva edẹ uwremu iseẹkoko e rẹ te tha avọ ẹkoko-ose, bi lele urusio iwo obọ rai. A nọ, ‘Bovẹ eya ẹtha riẹ na e rọ? . . . eware kpobi e gbẹ rọ wọhọ epanọ e rọ nọ emuhọ ẹma akpọ na ze.’ ” (2 Pita 3:3, 4) A bi se idibo Ọghẹnẹ ẹkoko inọ a rovie aro ho. Akpọ na o rri itee uruemu ezi nọ e rrọ Ebaibol na wọhọ oware nọ u kiekpo no. Ahwo buobu a rri ovuẹ nọ ma bi whowho na wọhọ oware ugheghẹ. (1 Ahwo Kọrint 1:18, 19) Wọhọ Ileleikristi, ma rẹ sae rẹriẹ ovao dhe ẹkoko evaọ obọ isukulu, oria iruo, makọ te evaọ iviuwou mai dede. Ababọ uke nọ ma re si kpemu, ma rẹ ruabọhọ dhesẹ oruaro Ọghẹnẹ via ẹkwoma iruo usiuwoma ota mai na, avọ ewo ọkpọ ovuhumuo Jesu inọ Ẹme Ọghẹnẹ họ uzẹme.—Jọn 17:17.

11. Ẹvẹ Setan ọ rọ daoma gwọlọ rehọ ukpokpoma whaha iruo Ileleikristi na no?

¹¹ Ẹghẹ avesa nọ Ẹdhọ ọ be rọ daoma gwọlọ whaha omai usiuwoma ota họ, ọwọsuọ hayo ukpokpoma. Jesu ọ ta kẹ ilele riẹ nọ: “A re ti fi owhai họ uye obẹbẹ, a re ti kpe owhai; erẹwho na kpobi i re ti mukpahe owhai fiki odẹ mẹ.” (Matiu 24:9) Evaọ uzẹme, wọhọ Isẹri Jihova, ma rẹriẹ ovao ku ukpokpoma egaga evaọ eria sa-sa akpọ na no. Ma riẹ nọ Jihova ọ ta ikpe buobu nọ i kpemu inọ egrẹ ọ te jọ udevie idibo Ọghẹnẹ avọ ahwo nọ a rrọ abọ Setan Ẹdhọ na. (Emuhọ 3:15) Ma tẹ jẹ riẹ nọ ma tẹ yọrọ ẹgbakiete eva otọ odawọ, yọ ma bi dhesẹ inọ Jihova o gine te osu-ehrugbakpọ na. Nọ ma te vuhu onana mu, o rẹ sai fi obọ họ kẹ omai dikihẹ ga eva otọ iyero ebẹbẹ nọ e mae ga. Ukpokpoma ovuovo o te sae whaha omai riẹriẹriẹ hẹ, otẹrọnọ o rrọ ọtamuo mai ẹsikpobi inọ ma re dhesẹ oruaro Ọghẹnẹ via.

12. Fikieme ma jẹ ghọghọ nọ ma be yọrọ ẹrọwọ mai eva otọ ọwọsuọ Setan na?

¹² Kọ whọ be whaha urusio akpọ na je kru ẹrọwọ ra ghelọ ẹkoko gbe ọwọsuọ? O tẹ rọ ere kiyọ who wo ẹjiroro nọ whọ rẹ rọ ghọghọ. Jesu ọ ta udu họ enọ e rẹ te jọ ilele riẹ awọ avọ imuẹro inọ: “Eva e were owhai nọ ahwo a tẹ la owhai eka, a vẹ kẹ owhai uye, a vẹ ta erue oghẹrẹ eware iyoma kpobi họ uzou rai fiki mẹ. Ghọghọ, eva e were owhai hrọ keme osa rai nọ o rọ obọ odhiwu o rẹ ruaro, keme ere a kẹ eruẹaro nọ e kake rọ owhai jọ uye.” (Matiu 5:11, 12) Akothiwo ra o kẹ imuẹro inọ ogaga ulogbo ẹzi ọfuafo Jihova o rrọ kugbe owhẹ, nọ o be kẹ owhẹ ẹgba nọ who bi ro dhesẹ oruaro riẹ via.—2 Ahwo Kọrint 12:9.

Obọ Jihova Akothiho O re n’Otha

13. Ugogo ẹjiroro vẹ o soriẹ ze nọ ma bi ro thihakọ evaọ iruo odibọgba Ileleikristi mai?

¹³ Uyoyou nọ ma wo kẹ Jihova họ ugogo oware nọ o be lẹliẹ omai thihakọ evaọ iruo odibọgba na, o tẹ jẹ rrọ isiuru mai re ma dhesẹ oruaro riẹ via. Ahwo-akpọ a rẹ gwọlọ raro kele ahwo nọ a you jẹ be rehọ adhẹẹ kẹ, yọ ohwo ọvuọvo nọ o fo aruorokele vi Jihova Ọghẹnẹ ọ rrọ họ. Fiki uyoyou ulogbo riẹ o ro vi Ọmọ riẹ ziọ otọakpọ re o sisẹi kẹ uzẹme na, re o je siwi ahwo-akpọ ẹmeoyo. (Jọn 3:16; 18:37) Wọhọ uruemu nọ Ọghẹnẹ o dhesẹ, o rrọ isiuru mai re oghẹrẹ ahwo kpobi a kurẹriẹ je wo esiwo; oyejabọ nọ ma be rọ ta usiuwoma kẹ ai. (2 Pita 3:9) Isiuru nana, gbe ọtamuo mai inọ ma rẹ raro kele Ọghẹnẹ o be wọ omai thihakọ dhesẹ oruaro riẹ via ẹkwoma iruo odibọgba mai.

14. Ẹvẹ Jihova ọ be rrọ bọ omai ga thihakọ evaọ iruo odibọgba mai?

¹⁴ Dede na, Jihova họ ọnọ ọ be mae kẹ omai ẹgba nọ ma bi ro thihakọ evaọ iruo odibọgba Ileleikristi na. Ọ be rehọ ẹkwoma ẹzi riẹ, ukoko riẹ, gbe Ẹme riẹ, Ebaibol na rọ sẹro mai jẹ kẹ omai ẹgba. Jihova ọ be rehọ “odiri” kẹ ahwo nọ u no eva ze nọ a re dhesẹ oruaro riẹ via. O bi yo elẹ mai jẹ kẹ omai areghẹ nọ ma re ro yerikugbe edawọ. (Ahwo Rom 15:5; Jemis 1:5) Fiba oyena, Jihova ọ rẹ kuvẹ kẹ odawọ nọ ma rẹ sai thihakọ riẹ hẹ re u te omai hi. Otẹrọnọ ma fi eva họ Jihova, ọ te gbẹ edhere kẹ omai nọ ma te sae rọ ruabọhọ dhesẹ oruaro riẹ via.—1 Ahwo Kọrint 10:13.

15. Eme o bi fi obọ họ kẹ omai thihakọ?

¹⁵ Akothiwo mai evaọ iruo odibọgba na o be kẹ imuẹro inọ ẹzi Ọghẹnẹ ọ rrọ kugbe omai. Wọhọ oriruo: Ma rehọ iẹe nọ ohwo jọ ọ ta kẹ owhẹ nọ whọ ghale ebrẹdi no uwou ruọ uwou ọvọvẹ. A ta kẹ owhẹ nọ oke obọ ra who re ro ru iruo na, yọ araha obọ ra who re ro te oria na je no uwou ruọ uwou. Ofariẹ, o raha oke he who te vuhumu nọ kpakọ umutho ahwo jọ ọvo a ginẹ gwọlọ ebrẹdi na; amọfa a be tubẹ wọso omodawọ nọ whọ be rọ ghale ebrẹdi na. Kọ who roro nọ whọ te ruabọhọ iruo yena no amara te amara, no ukpe te ukpe? Ẹsejọhọ whọ te sai ru ei hi. Ghele na, whọ ya gaga no be rehọ oke gbe araha obọ ra whowho usiuwoma na no ukpe te ukpe, tubọ anwọ ikpe buobu ze na. Fikieme? Kọ o gbẹ rọnọ fiki Jihova nọ who you ọ tẹ jẹ be rehọ ẹkwoma ẹzi riẹ fi obọ họ kẹ owhẹ thihakọ evaọ omodawọ ra? Avro ọ riẹ hẹ!

Iruo nọ A rẹ Kareghẹhọ

16. Eme o re no akothiwo nọ ma re wo evaọ iruo odibọgba na ze te omai gbe ahwo nọ a gaviezọ kẹ omai?

¹⁶ Iruo odibọgba ọvọ ọkpokpọ na yọ okẹ nọ u wo ibe he. (2 Ahwo Kọrint 4:7) Epọvo na re, iruo odibọgba Ileleikristi nọ igodẹ efa na a be wha haro eva akpọ soso na yọ efe. Wọhọ epanọ Pọl o kere se Timoti, nọ who bi thihakọ evaọ odibọgba ra na, whọ sai “siwi oma ra gbe ahwo [nọ] a be kezọ ẹme ra.” (1 Timoti 4:16) Rri epanọ oyena u wuzou te. Usiuwoma nọ whọ be ta o rẹ kẹ amọfa uvẹ nọ a rẹ rọ rria bẹdẹ bẹdẹ. Whọ sai wo obọdẹ usu kugbe ahwo nọ who fi obọ họ kẹ eva abọ-ẹzi. Dai roro epanọ oghọghọ riẹ o te rro te, re whọ rria bẹdẹ bẹdẹ evaọ Aparadase kugbe ahwo nọ who fi obọ họ kẹ wuhrẹ kpahe Ọghẹnẹ! Evaọ uzẹme, omodawọ nọ who ro fi obọ họ kẹ ai o te thọrọ ai ẹro ho. O ginẹ rrọ oware nọ o te kẹ evevọwẹ!

17. Fikieme oke mai na o rọ rrọ etoke oghẹrẹsa evaọ ikuigbe ohwo-akpọ?

¹⁷ Whọ be rria etoke oghẹrẹsa ọrọ ikuigbe ohwo-akpọ. A gbẹ te wariẹ ta usiuwoma na eva akpọ nọ ọ hẹriẹ oma no Ọghẹnẹ ofa ha. Noa ọ rria akpọ otiọye na yọ ọ rẹro ruẹ ọraha riẹ. A rẹ sai gbiku oghọghọ nọ o wo ho nọ ọ ruẹ nọ o ku okọ wọhọ epanọ Ọghẹnẹ o vi rie, onọ o soriẹ ze nọ tei te uviuwou riẹ a rọ zọ! (Ahwo Hibru 11:7) Whọ sai wo oghọghọ utioye na re. Dai rri epanọ o te jọ owhẹ oma evaọ akpọ ọkpokpọ na nọ who te roro kpemu jẹ kareghẹhọ iruo odibọgba nọ who je ru evaọ edẹ urere na, avọ imuẹro inọ whọ daoma ra kpobi wha isiuru Uvie na haro.

18. Imuẹro gbe uduotahawọ vẹ Jihova ọ kẹ idibo riẹ?

¹⁸ Fikiere, joma ruabọhọ dhesẹ oruaro Ọghẹnẹ via. Erere nọ o ti no ere oruo ze o te jọ oware nọ ma te kareghẹhọ bẹdẹ bẹdẹ. Jihova ọ be kareghẹhọ iruo mai re. Ebaibol na e kẹ uduotahawọ nana: “Ọghẹnẹ ọ kare ọ rọ ẹrẹreokie he nọ iruo rai i re vẹro ho gbe uyoyou nọ owha be rehọ fiki riẹ [dhesẹ] gbe epanọ wha be ga erezi na, wọhọ epa o nọ wha ruẹabọhọ na. Whaọ ma guọlọ re ohwo kpobi o dhesẹ ajọwha otiọyena via eva ẹriẹ evavọ umuẹro ẹruore na rite urere. Re wha siọ emoyẹlẹ ba ẹ jọ, rekọ wha rehọ a ro kele e nọ e rehọ fiki odiri gbe orọwọ reuku eya na.”—Ahwo Hibru 6:10-12.

Kọ Whọ Sae k’Iyo Nana Vevẹ?

• Ẹvẹ Ileleikristi a bi ro dhesẹ oruaro Ọghẹnẹ via?

• Eghẹ jọ vẹ Setan ọ be rrọ gwọlọ daoma whaha usiuwoma ota idibo Ọghẹnẹ?

• Imuẹro vẹ i dhesẹ nọ ẹzi Ọghẹnẹ ọ rrọ kugbe omai?

[Uwoho nọ o rrọ ẹwẹ-obe avọ 5]

Elo oruaro o no ovao Mosis ze

[Iwoho nọ e rrọ ẹwẹ-obe avọ 6, 7]

Ma bi dhesẹ oruaro Ọghẹnẹ via evaọ iruo odibọgba mai