Hai Dhesẹ Edẹro Ẹsikpobi
‘Kọ ẹvẹ iroro ra e ghare kẹ omẹ te, O Ọghẹnẹ! Ẹvẹ ekele rai i bu te!’—OLEZI 139:17.
1, 2. Fikieme ma je rri Ebaibol na ghaghae, kọ eme ọso-ilezi na ọ ta ro dhesẹ edẹro riẹ?
OWARE nọ a ruẹ a re gbiku riẹ hẹ. Okenọ a jẹ ruẹrẹ etẹmpol Jihova evaọ Jerusalẹm, Hilkaya Ozerẹ Okpehru na ọ tẹ ruẹ “obe-izi ỌNOWO na nọ ọ rọ kẹ Mosis na,” ababọ avro onọ Mosis ọ rehọ obọ riẹ kere oware wọhọ ikpe 800 nọ e vrẹ! Kọ whọ sai roro epanọ oma o jọ Josaya Ovie na, ọnọ ọ jẹ dhozọ Ọghẹnẹ, evaọ okenọ a rọ obe na kẹe? O rri rie ghaghae, ọ tẹ nwane ta kẹ Shafan, okere-obe na, inọ o sei do via.—2 Iruẹru-Ivie 34:14-18.
2 Nẹnẹ, ima-idu ahwo buobu a rẹ sai se oma Ebaibol na soso hayo abọ riẹ jọ. Kọ oyena u ru nọ Ikereakere na e gbẹ rọ ghare tere he? Vievie! Whaọ eme ọ Erumeru na e rrọ eva riẹ, onọ a kere re e kẹ omai erere. (2 Timoti 3:16) Bi dhesẹ epanọ o rri Ikereakere na, Devidi ọso-ilezi na o kere nọ: ‘Kọ ẹvẹ iroro ra e ghare kẹ omẹ te, O Ọghẹnẹ! Ẹvẹ ekele rai i bu te!’—Olezi 139:17.
3. Eme u dhesẹ inọ Devidi yọ ohwo nọ o se usu riẹ kugbe Ọghẹnẹ gboja?
3 Oghẹrẹ nọ Devidi o rri Jihova, Ikereakere na, gbe ọruẹrẹfihotọ riẹ kẹ egagọ uzẹme ghare te o kiekpo ho. A rẹ jọ ilezi buobu nọ Devidi o kere na ruẹ epanọ o ja riẹ oma. Wọhọ oriruo, eva Olezi 27:4, o kere nọ: “Oware ovo mẹ jọ obọ ỌNOWO guọlọ, onọ mẹ rẹ te nọ e na; re mẹ jọ uwou ỌNOWO bẹdẹ nọ me re whuẹ, re me riwi eru ỌNOWO, re me he kpohọ uwou egagọ-ode riẹ.” Evaọ ẹvẹrẹ Hibru ọsosuọ, otofa eme nọ a jọ etenẹ fa nnọ “re me riwi” na họ re a fi ẹro họ oware, re a kiẹ oware riwi, re a no oware riwi avọ isiuru. Avro o riẹ hẹ inọ Devidi yọ ohwo nọ o se usu riẹ kugbe Ọghẹnẹ gboja, ọnọ o wo edẹro kpahe eware kpobi nọ Jihova o ru no re ọ sae bọ ẹrọwọ riẹ ga, yọ o se uzẹme nọ Ọghẹnẹ ọ ferevia no gboja gaga. U fo inọ a raro kele oriruo edẹro nọ o wo.—Olezi 19:7-11.
Wo Ovuhumuo kẹ Uvẹ nọ Whọ rọ Riẹ Uzẹme Ebaibol
4. Eme o lẹliẹ Jesu “ghọghọ eva Ẹzi Ẹri”?
4 O gwọlọ nọ ohwo ọ rẹ riobe gaga hayo kpohọ isukulu akpọ na re o te wo otoriẹ Ẹme Ọghẹnẹ hẹ, keme eware itieye na e rẹ wha omoya ze. Re a wo otoriẹ Ẹme Ọghẹnẹ, o gwọlọ aruoriwo Jihova, onọ ọ rẹ rọ kẹ ahwo omarokpotọ, erọ udu-oruọzewọ nọ i se ẹgwọlọ abọ-ẹzi rai gboja. (Matiu 5:3; 1 Jọn 5:20) Nọ Jesu ọ kareghẹhọ inọ ahwo-akpọ sebaẹgba jọ a bi ru re a kere edẹ rai fihọ obọ odhiwu, “ọ tẹ ghọghọ eva Ẹzi Ẹri anọ, ‘Ọsẹ Ọnowo Odhiwu gbe akpọ, me yere owhẹ epanọ who ku eware enana dhere iwoareghẹ gbe erieriariẹ, whọ tẹ rehọ ae via kẹ emọ-efofa.’ ”—Luk 10:17-21.
5. Fikieme ilele Jesu a gbe ro riwi eriariẹ kpahe Uvie Ọghẹnẹ nọ a be fere via kẹ ae na evevere he?
5 Nọ ọ lẹ olẹ yena no, Jesu ọ tẹ rẹriẹ ovao ku ilele riẹ, ta nọ: “Aro nọ e ruẹ eware nọ wha ruẹ na i wo oghale! Keme mẹ ta kẹ owhai nọ eruẹaro gbe ivie buobu a guọlọ re a ruẹ eware nọ wha ruẹ, a ruẹ rae [he], jegbe re a yo eware nọ wha yo, a yo rai hi.” Ẹhẹ, Jesu ọ be tuduhọ ilele riẹ awọ inọ obọdẹ eriariẹ gbe orimuo kpahe Uvie Ọghẹnẹ nọ ọ be fere via kẹ ae na a rri rie evevere he. A dhesẹ eware nana via kẹ idibo Ọghẹnẹ nọ e vrẹ no ho, yọ a dhesẹ i rai via kẹ “iwoareghẹ gbe erieriariẹ” erọ edẹ Jesu hu!—Luk 10:23, 24.
6, 7. (a) Ẹjiroro vẹ ma wo nọ uzẹme nọ u no obọ Ọghẹnẹ ze o jẹ da omai ẹro? (b) Didi ohẹriẹ o rrọ udevie egagọ uzẹme gbe ọrọ erue nẹnẹ?
6 Evaọ edẹ mai na, ma re yere Ọghẹnẹ fiki eriariẹ nọ i bi no obọ riẹ ze keme Jihova, ọ rọ ẹkwoma ‘ọrigbo nọ o wo ẹrọwọ avọ areghẹ na,’ kẹ ahwo riẹ otoriẹ odidi no kpahe Ebaibol na. (Matiu 24:45; Daniẹl 12:10) Kpahe oke urere na, Daniẹl ọruẹaro na o kere nọ: “Ibuobu e rẹte dhẹ kpemu-kpo-aro, eriariẹ i veti vihọ.” (Daniẹl 12:4) Kọ whọ gbẹ rọwo inọ eriariẹ Ọghẹnẹ i “vihọ” no nẹnẹ gbe nnọ idibo Jihova a be re eva vọ evaọ abọ-ẹzi?
7 Ohẹriẹ nọ o rrọ eva nọ ahwo Ọghẹnẹ a be re vọ evaọ abọ-ẹzi gbe ozighi nọ ọ rrọ Babilọn Ologbo na kpahe iwuhrẹ Ebaibol o rro kẹhẹ. Fiki onana, ibuobu nọ egagọ erue e bẹ t’unu no a bi kurẹriẹ ziọ egagọ uzẹme. Ahwo nana yọ enọ e wọhọ igodẹ nọ e gwọlọ lele Babilọn Ologbo na “ru umuemu riẹ je lele iei ruẹ uye riẹ” hẹ. Jihova avọ idibo riẹ a bi zizie utiọ ahwo nana kpobi inọ a ziọ uvi ukoko Ileleikristi na.—Eviavia 18:2-4; 22:17.
Enọ I Wo Ovuhumuo A Bi Zurie Bru Ọghẹnẹ
8, 9. Oghẹrẹ vẹ eme ọ Hagai 2:7 i bi ro rugba nẹnẹ?
8 Jihova ọ ruẹaro kpahe etẹmpol ẹwoho riẹ nọ: “Me ve ti nyuhu erẹwho kpobi, efe erẹwho na kpobi e vẹ te ze, me ve ti ru uwou onana, o vẹ te vọ avọ eru ọnwranwra.” (Hagai 2:7) Eruẹaruẹ igbunu nana i wo orugba riẹ evaọ oke Hagai nọ ahwo Ọghẹnẹ nọ i no igbo ze no a wariẹ bọ etẹmpol na evaọ Jerusalẹm. Nẹnẹ, eme ọ Hagai e be jọ oma etẹmpol ologbo abọ-ẹzi ọrọ Jihova wo orugba ọfa.
9 Ima ahwo buobu a zurie kpohọ etẹmpol ẹwoho na no re a ruẹse rọ “ẹzi gbe uzẹme” gọ Ọghẹnẹ, yọ kukpe kukpe idu ahwo nana buobu, enọ e wọhọ “efe erẹwho na,” a bi zurie ze. (Jọn 4:23, 24) Wọhọ oriruo, iyẹrẹ akpọ-soso ọrọ ukpe iruo 2006 na i dhesẹ nnọ ahwo 248,327 họ enọ e họ-ame ro dhesẹ oma nọ a ro mudhe kẹ Jihova. A tẹ ghale iẹe, koyehọ ahwo 680 họ enọ e họ-ame kẹdẹ kẹdẹ! Uyoyou rai kẹ uzẹme na avọ isiuru nọ a be rọ gọ Jihova wọhọ iwhowho Uvie e be kẹ imuẹro inọ Ọghẹnẹ o gine si rai rehọ.—Jọn 6:44, 65.
10, 11. Gbiku jọ onọ u dhesẹ epanọ ahwo a ro muọ uzẹme Ebaibol na họ e rri ghaghae.
10 Ukoko na u si ahwo udu-oruọzewọ buobu urru keme a ruẹ ohẹriẹ nọ o rrọ udevie “enọ ikiẹrẹe gbe iruimuomu, gbe ọnọ ọ be gọ Ọghẹnẹ gbe ọnọ ọ be gọ e he.” (Malakae 3:18) Rehọ oriruo Wayne avọ Virginia, ọzae-gbe-aye nọ e rrọ ichọche Protẹstant, enọ i wo enọ buobu kpahe Ebaibol na nọ a be ruẹ iyo rai hi. A mukpahe ẹmo, yọ o jẹ kẹ ai uye gaga nọ a tẹ ruẹ ilorida ichọche nọ e be lẹ kẹ elakpa-ẹmo jẹ lẹ fihọ ekwakwa-ẹmo. Nọ ọzae-avọ-aye na a be kpako na, ahwo ichọche na a gbẹ jẹ nọ ae he, dede nọ Virginia o wuhrẹ ahwo Ebaibol evaọ ichọche na ikpe buobu no. A ta nọ: “Uvumọ ohwo o weze bru omai ze te nọ kpahe epanọ ma bi wo ẹnyaharo te evaọ ichọche na ha. Oware nọ ichọche na ọ gwọlọ kpobi họ igho mai. O kẹ omai uye gaga.” Oware nọ ọ mai tubẹ kẹ ai uye họ ichọche na ọ daezọ họ nọ uruemu ọ ezae-duezae o ruọ ichọche rai.
11 Nọ onana kpobi o be via na, yọ ọmọ-oruọmọ rai o zihe ruọ omọvo Isẹri Jihova no, uwhremu na oni ọmọ na o te je kurẹriẹ. Dede nọ onana o dha Wayne avọ Virginia eva evaọ oke ọsosuọ, a te ti nwene iroro rai, a tẹ te rọwo inọ a wuhrẹ Ebaibol kugbe ai. Wayne ọ ta nnọ: “Eware nọ ma wuhrẹ evaọ emerae esa ọvo i bu vi enọ ma wuhrẹ evaọ ikpe 70 nọ i kpemu! Ma riẹ kakaka ha inọ odẹ Ọghẹnẹ họ Jihova, yọ ma riẹ uvumọ oware kpahe Uvie na gbe otọakpọ Aparadase he.” U ri kri hi na, ọzae-avọ-aye nana a te muọ iwuhrẹ họ ekpohọ, a te je muọ usiuwoma họ ẹta. Virginia ọ ta nnọ: “Ma gwọlọ vuẹ ahwo kpobi uzẹme Ebaibol na.” Ọzae-avọ-aye nana a jọ ikpe 80 gbọ nọ a họ-ame evaọ 2005. A ta nnọ: “Ma duku uvi Ileleikristi no, enọ e wọhọ inievo k’omai.”
Wo Edẹro Fikinọ A ‘Thọ Omai Kpahe no kẹ Iruo Iwoma I Ruo Kpobi’
12. Eme Jihova ọ rẹ kẹ idibo riẹ ẹsikpobi, kọ eme ma re ru hrọ re ma wo erere noi ze?
12 Ẹsikpobi Jihova o re fi obọ họ kẹ idibo riẹ ru oreva riẹ. Wọhọ oriruo, Ọghẹnẹ ọ kẹ Noa ithubro vevẹ kpahe epanọ o re ku okọ na wọhọ epanọ a gwọlọ dẹẹ! Yọ ere o ginẹ jọ. Fikieme? Fikinọ Noa o ‘ru eware na kpobi wọhọ epanọ Ọghẹnẹ ọ ta kẹ e.’ (Emuhọ 6:14-22) Nẹnẹ re, Jihova o bi wuhrẹ idibo riẹ re a ru oreva riẹ. Uzẹme o rrọ inọ ugogo iruo mai họ re ma whowho emamọ usi Uvie Ọghẹnẹ nọ a ro mu no na re ma je fi obọ họ kẹ enọ i te re a zihe ruọ ilele Jesu Kristi. Yọ wọhọ epanọ o jọ kẹ Noa, oware nọ o rẹ lẹliẹ omai kparobọ họ ẹmeoyo. Ma rẹ roma totọ lele uthubro nọ Jihova ọ be rọ ẹkwoma Ebaibol na gbe ukoko riẹ rọ kẹ omai.—Matiu 24:14; 28:19, 20.
13. Ẹkwoma eme Jihova o bi ro wuhrẹ omai?
13 Re ma sai ru iruo yena gbunu, ma re wuhrẹ epanọ ma rẹ rọ “yọrọ” Ebaibol na “ziezi,” onọ o rrọ ugogo okwakwa mai, nọ o rrọ “erere rọ kẹ ewuhrẹ gbe ozọ-usio, avọ ọkpọvio gbe odhesẹkẹ eva ẹrẹreokie. Re ohwo Ọghẹnẹ na ọ ruẹse gba kiete, ọ vẹ jẹ thomavẹre kẹ iruo iwoma i ruo kpobi.” (2 Timoti 2:15; 3:16, 17) Wọhọ epanọ o jọ evaọ ikpe-udhusoi ọsosuọ na, Jihova ọ be rehọ ẹkwoma ukoko Ileleikristi na wuhrẹ omai ziezi. Nẹnẹ, evaọ ikoko nọ i bu te 99,770 evaọ akpọ na soso, a be jọ ru Isukulu Odibọgba Esuo-Ọghẹnẹ gbe Ewuhrẹ Odibọgba na k’oka k’oka re i fi obọ họ kẹ omai evaọ odibọgba na. Kọ who bi dhesẹ ovuhumuo ra kẹ obọdẹ iwuhrẹ nana ẹkwoma iwuhrẹ na nọ who re kpohọ ẹsikpobi gbe efihiruo eware nọ whọ be jọ eva rai wuhrẹ?—Ahwo Hibru 10:24, 25.
14. Ẹvẹ idibo Jihova a bi ro dhesẹ ovuhumuo rai kẹ uvẹ-ọghọ nọ a be rọ gọ Ọghẹnẹ? (Kpahe ẹme fihọ omaa-iruo nọ o rrọ ẹwẹ-obe avọ 27-30 na.)
14 Ima ahwo Ọghẹnẹ buobu evaọ akpọ na soso a bi dhesẹ ovuhumuo rai kẹ eware nọ a bi wuhrẹ ẹkwoma ọwhọ nọ a bi ro ruiruo evaọ odibọgba na. Wọhọ oriruo, evaọ ukpe iruo 2006 na, iwhowho Uvie 6,741,444 a raha euwa 1,333,966,199 evaọ kabọ kabọ iruo na, onọ u kugbe iwuhrẹ Ebaibol 6,286,618 nọ a ru. Enana họ eware isiuru jọ nọ e rrọ iyẹrẹ akpọ-soso na. Ma zizie owhẹ inọ whọ roma totọ rri iyẹrẹ nana re e kẹ owhẹ uduotahawọ, wọhọ epanọ iyẹrẹ ẹnyaharo iruo usiuwoma ota evaọ ikpe-udhusoi ọsosuọ na o jọ uduotahawọ kẹ inievo na.—Iruẹru 1:15; 2:5-11, 41, 47; 4:4; 6:7.
15. Fikieme ohwo ọvo ọ gbẹ rọ jọ ọkora ha fiki uthoma riẹ kpobi nọ o bi ru kẹ Jihova?
15 Unuahwo gbidi gbidi nọ i bi jiri Ọghẹnẹ kukpe kukpe u bi dhesẹ ovuhumuo odidi nọ idibo Jihova a wo kẹ uvẹ-ọghọ nọ a rọ riẹ Jihova je bi se isẹri kẹe. (Aizaya 43:10) Uzẹme, a sae rehọ usiuwoma ota ọrọ inievo mai jọ nọ e kpako no, enọ e be mọ, gbe enọ e ko ro dhesẹ unevaze aye-uku na. Rekọ jọ o thọrọ omai ẹro ho inọ Jihova avọ Ọmọ riẹ a re rri enọ e be rehọ udu rai kpobi gọ Ọghẹnẹ ghaghae, nọ a be daoma ru uthoma rai na.—Luk 21:1-4; Ahwo Galesha 6:4.
16. Ebe vẹ Ọghẹnẹ ọ rọ kẹ omai no re ma ro wuhrẹ amọfa evaọ ikpe nọ i kpemu na?
16 U te no odibọgba na nọ Jihova o bi wuhrẹ omai fihọ no, ọ be jẹ rehọ ẹkwoma ukoko riẹ kẹ omai ebe nọ ma re ro wuhrẹ amọfa. Evaọ ikpe nọ i kpemu na, usu ebe nana jọ họ Uzẹme nọ U re Suohwo kpo Uzuazọ Ebẹdẹbẹdẹ, Whọ Sae Ria Bẹdẹ Bẹdẹ eva Aparadase ọ Otọakpọ, Eriariẹ Nọ I Re Su Kpohọ Uzuazọ Ebẹdẹ Bẹdẹ , yọ kẹle na, Eme Ebaibol na O Gine Wuhrẹ? Enọ i se ebe nana gb’oja a rẹ rehọ ai ruiruo ziezi evaọ odibọgba na.
Rehọ Obe ọ Ebaibol Wuhrẹ na Ruiruo Ziezi
17, 18. (a) Oria vẹ ọrọ obe Ebaibol Wuhrẹ na whọ rẹ gwọlọ kaki dhesẹ evaọ odibọgba ra? (b) Eme ọsẹro okogho jọ ọ ta kpahe obe Ebaibol Wuhrẹ na?
17 Avọ izou 19 nọ o wo, eme-ofiba riẹ nọ e rrọ vevẹ, gbe epanọ o lọhọ ese te, obe na Eme Ebaibol na O Gine Wuhrẹ? o bi fi obọ họ gaga evaọ odibọgba na. Wọhọ oriruo, uzoẹme avọ 12 o ta kpahe “Ẹrria Uzuazọ nọ O rẹ Were Ọghẹnẹ.” Uzou nana o re dhesẹ kẹ ọmọ-uwuhrẹ Ebaibol na epanọ ọ sae rọ jọ ogbẹnyusu Ọghẹnẹ, oware nọ ahwo buobu a ri roro kpahe he, hayo nọ a tube roro nnọ o lọhọ họ. (Jemis 2:23) Ẹvẹ ahwo a rri obe nana no?
18 Ọsẹro okogho jọ evaọ obọ Australia ọ ta inọ obe Ebaibol Wuhrẹ na “o rẹ dhẹ ruọ ohwo oma, yọ u re ru ei lọhọ gaga re a rehọ iẹe mu ẹme họ kugbe ahwo.” O fibae inọ o lọhọ gaga re a rehọ obe na wuhrẹ ahwo te epanọ “u ro fi obọ họ kẹ iwhowho Uvie buobu no re a wo udu gbe oghọghọ evaọ odibọgba na. Agbẹta nọ ahwo jọ a bi ro se obe na ubi igoru na!”
19-21. Gbiku iriruo jọ nọ i dhesẹ aghare obe Ebaibol Wuhrẹ na.
19 Aye jọ evaọ obọ Guyana ọ ta kẹ ọkobaro jọ nọ ọ ziọ uwou riẹ nọ: “Ọghẹnẹ o vi owhẹ ze.” U ri kri hi nọ ọzae aye na ọ rọ dhẹ siẹe avọ emọ esese ivẹ ba. Ọkobaro na o rovie obe Ebaibol Wuhrẹ na kpohọ uzou 1 o te se edhe avọ 11 do via, evaọ otọ uzoẹme osese na “Ẹvẹ Ọghẹnẹ O rri Okienyẹ nọ Ọ Rrọ Otọ Nẹnẹ Na?” “Ọkobaro na ọ ta nnọ: “Eme na i duobọte aye na udu gaga. Aye na ọ kpama, o te kpobọ emu uwou, ọ tẹ viẹ gaga.” Oniọvo-ọmọtẹ jọ o bi wuhrẹ Ebaibol kugbe aye nana ẹsikpobi, yọ o bi wo ẹnyaharo ziezi.
20 José, ọnọ ọ be rria obọ Spen, aye riẹ o whu evaọ asidẹnte omoto. O te muọ imu egaga họ ẹlọ re ọ sae rọ kpairoro, ọ tẹ jẹ wha ẹbẹbẹ riẹ bru enọ i wuhrẹ kpahe iroro. Rekọ, ahwo nana a sae za onọ nọ o be mai kpokpo José he: “Eme Ọghẹnẹ ọ rọ kuvẹ re aye mẹ o whu?” Ẹdẹ jọ José ọ tẹ ruẹ Francesc, ọnọ a gbẹ rrọ ekọmpene ọvona ruiruo. Francesc ọ tẹ ta kẹe inọ a se uzou avọ 11 ọrọ obe Ebaibol Wuhrẹ na kugbe, onọ uzoẹme riẹ o ta nnọ “Fikieme Ọghẹnẹ Ọ jẹ Kuvẹ kẹ Uye-Oruẹ?” Oghẹrẹ nọ Ikereakere na i dhesẹ ẹme nana vevẹ avọ ọtadhesẹ kpahe iticha avọ ọmọ eklase na e were José gaga. O te muọ Ebaibol họ ewuhrẹ avọ osegboja, kpohọ okokohọ okogho, yọ enẹna o bi kpohọ iwuhrẹ eva Ọgwa Uvie.
21 Roman, ọzae ikpe 40 jọ evaọ obọ Poland, o wo adhẹẹ kẹ Ebaibol na no otọ avọ otọ ze. Rekọ fikinọ ọ rehọ oma riẹ kpobi kẹ iruo riẹ, ọ gbẹ be nyaharo tere he evaọ uwuhrẹ Ebaibol riẹ. Rekọ, nọ o kpohọ okokohọ ubrotọ, a tẹ jọ obei kẹe obe Ebaibol Wuhrẹ na. No umuo oke yena vrẹ, o te ru inwene gaga. Ọ ta nnọ: “Obe nana ọ whẹ iwuhrẹ Ebaibol na kpobi gbe.” Ma be t’ẹme na, Roman o bi wuhrẹ Ebaibol na ẹsikpobi yọ o bi wo ẹnyaharo ziezi.
Gbẹ Hae Rro Evaọ Ovuhumuo Ra
22, 23. Ẹvẹ ma sai gbe ro dhesẹ ovuhumuo mai kẹ ẹruore nọ a fihọ aro mai?
22 Wọhọ epanọ a jọ Okokohọ Ubrotọ “Esiwo Ọ Kẹlino!” nọ o sasa oma gaga na dhesẹ, uvi Ileleikristi a bi rẹro ‘esiwo ebẹdẹ bẹdẹ’ onọ Ọghẹnẹ ọ yeyaa riẹ gbe onọ azẹ Jesu Kristi u ru lọhọ. Edhere nọ ọ mai woma nọ ma re ro dhesẹ ovuhumuo kẹ ẹruore ọghaghae nana họ oma mai nọ ma re ru fo no ‘iruo iwhuowhu re ma sae gọ Ọghẹnẹ uzuazọ na.’—Ahwo Hibru 9:12, 14.
23 Ẹhẹ, oware igbunu o ginẹ rrọ inọ ahwo nọ i bu vi ima ezeza a gbe bi thihakọ evaọ egagọ Ọghẹnẹ evaọ oke nana nọ ahwo kpobi a bi jo le isiuru obọ rai na. O tẹ jẹ rrọ imuẹro inọ idibo Jihova a rri ọghọ nọ a be rọ gọ Ọghẹnẹ ghaghae, keme a riẹ nnọ “iruo rai eva Ọnowo na e rọ ivrẹvru hu.” Jọ ovuhumuo yena o gbẹ hai dhe ẹruẹro!—1 Ahwo Kọrint 15:58; Olezi 110:3.
Ẹvẹ Whọ te k’Uyo?
• Eme ọso-ilezi na o wuhrẹ omai kpahe ovuhumuo kẹ Ọghẹnẹ gbe eware nọ ọ kẹ omai nọ e rẹ bọ ẹrọwọ mai ga?
• Ẹvẹ eme ọ Hagai 2:7 i bi ro rugba nẹnẹ?
• Ẹvẹ Jihova ọ rọ thọ ahwo riẹ kpahe no re a gọe ziezi?
• Eme whọ rẹ sai ru ro dhesẹ ovuhumuo ra kẹ ewoma Jihova?
[Iwoho nọ e rrọ ẹwẹ-obe avọ 25]
Jihova ọ be thọ omai kpahe ziezi kẹ eruo oreva riẹ