Si Kẹle Ọghẹnẹ

“Ọghẹnẹ Omosasọ Kpobi”

2 Ahwo Kọrint 1:3, 4

EWARE buobu evaọ uzuazọ—uye-oruẹ, irẹro nọ a sai wo tobọ họ, iroro inọ ohwo ọvo ọ be daezọ mai hi—e rẹ sae wha uweri hayo ọkora ze. Evaọ etoke otiọye na, whọ rẹ sae nọ inọ, ‘Diẹse mẹ jẹ sai wo obufihọ?’ Eme ọ Pọl ukọ na nọ e rrọ 2 Ahwo Kọrint 1:3, 4, i dhesẹ oria nọ u muẹro nọ ma rẹ sae jọ wo omosasọ ẹsikpobi—Jihova Ọghẹnẹ.

A jọ owọ avọ 3 se Ọghẹnẹ “Ọsẹ ohrọ.” Eme oyena u dhesẹ? Ẹme Griki nọ a fa “ohrọ” na o rẹ sai dhesẹ arodawẹ nọ a re wo kẹ ohwo nọ ọ be ruẹ uye.a Obe jọ nọ a kere kpahe Ebaibol na o ta nọ a rẹ sae fa ẹme nana inọ “re ohrọ” hayo “re a daezọ omọfa.” “Ohrọ” Ọghẹnẹ o rẹ wọe jowọ. Kọ okwakwa aghae Ọghẹnẹ nana nọ ma riẹ na o gbẹ wọ omai si kẹle iẹe?

Pọl o se Jihova “Ọghẹnẹ omosasọ kpobi” re. Ẹme nọ Pọl ọ rọ tẹme evaọ etenẹ na u kie kpahe “epanọ a rẹ sasa ahwo nọ a rrọ uye hayo uweri oma gbe epanọ a re ro fi obọ họ kẹ ae hayo ta udu họ ae awọ.” The Interpreter’s Bible o ta nọ: “Re a fi obọ họ kẹ ohwo nọ ọ be ruẹ uye wo udu nọ o re ro thihakọ uye riẹ oye họ omosasọ.”

Whọ rẹ sae nọ inọ, ‘Kọ oghẹrẹ vẹ Ọghẹnẹ ọ rẹ rọ sasa omai oma jẹ kẹ omai udu nọ ma re ro thihakọ edada?’ Edhere nọ ọ be mai ro ru onana họ ẹkwoma Ẹme riẹ, Ebaibol na gbe olẹ. Pọl ọ ta inọ fiki uyoyou nọ Ọghẹnẹ o wo kẹ omai ọ rọ kẹ omai Ẹme riẹ, “re ma rehọ fiki odiri gbe eri ikereakere na, wo ẹruore.” U te no ere no, ẹkwoma olẹ nọ ma rẹ lẹ nọ udu ze, ma rẹ sai wo “udhedhẹ Ọghẹnẹ nọ uvi eriariẹ kpobi.”—Ahwo Rom 15:4; Ahwo Filipai 4:7.

Ẹvẹ omosasọ nọ Jihova ọ be kẹ idibo riẹ o kẹre te? Pọl ọ ta inọ Ọghẹnẹ ọ be sasa omai oma ‘eva uye mai kpobi.’ (2 Ahwo Kọrint 1:4) Oghẹrẹ ọyawọ, oja, hayo uye kpobi nọ u te omai kẹhẹ, Ọghẹnẹ ọ rẹ sae kẹ omai udu gbe ẹgba nọ ma re ro thihakọ riẹ. Kọ onana o gbẹ rrọ oware omosasọ?

Omosasọ nọ Ọghẹnẹ ọ rẹ kẹ o rẹ jọ oma omọvo nọ a rehọ e riẹ kẹ na kuhọ họ. Pọl o fibae inọ Ọghẹnẹ ọ be sasa omai oma “re ma ruẹse sasa enọ erọ eva uye kpobi oma, fiki omosasọ nọ mai oma mai a jọ obọ Ọghẹnẹ wo.” Omosasọ nọ ma wo evaọ uye mai u re ru omai wo ọdawẹ kẹ amọfa jẹ wọ omai fi obọ họ kẹ enọ e rrọ uye.

Jihova ọ rẹ nwani si ebẹbẹ hayo edada mai no idudhe fikinọ ọ rrọ “Ọghẹnẹ omosasọ kpobi” hi. Rekọ oware jọ u muẹro, nọ ma te bo bru ei kẹ omosasọ, ọ rẹ sae kẹ omai ẹgba nọ ma re ro thihakọ uweri hayo ẹbẹbẹ kpobi nọ o te omai. Ọghẹnẹ ohrọ gbe ọdawẹ nana o te ọnọ ma re jiri jẹ gọ.

[Oruvẹ-obotọ]