Si Kẹle Ọghẹnẹ

“Wọ Ọmọzae Ra”

2 IVIE 4:8-37

UWHU ọmọ o rrọ usu eware nọ e rẹ mae da kpaobọ. Jihova Ọghẹnẹ o wo ogaga nọ ọ sae rọ kpare ohwo no iwhuowhu ze. Ma riẹ nọ onana uzẹme keme ọ kẹ ahwo jọ ẹgba evaọ oke nọ u kpemu nọ a rọ kpare ahwo nọ a whu. A gbiku onana jọ fihọ 2 Ivie 4:8-37, nọ Elaesha ọruẹaro na ọ rọ kpare ọmọzae jọ.

Ẹwho Shunẹm onana o jọ via. Ọzae avọ aye jọ nọ a wo ọmọ họ a jẹ hai dhesẹ ẹwo kẹ Elaesha, a jẹ hae kẹe uwou nọ o re wohọ gbe emu ẹsikpobi. Fikinọ ọghoruo rai ọ da riẹe ẹro fia, ẹdẹjọ ọruẹaro na ọ tẹ ta kẹ aye na nọ: “Epaọ oke utiona ukpe nọ otha whọ rẹ te wọ ọmọ họ obọ.” Oware nọ o rẹro ẹdẹvo ho na o tẹ te via, o yẹ ọmọzae wọhọ epanọ Elaesha ọruẹaro na ọ ta kẹe. Rekọ oghọghọ aye na o tọ họ. Ikpe jọ kakao nọ i lele i rie, uzou ogaga o tẹ jẹ da ọmọ na ẹdẹjọ nọ o lele ọsẹ riẹ kp’ẹwọ, a tẹ wọe kpo, o te ti whu uwhremu na evaọ “awọ oni riẹ.” (Owọ avọ 16, 19, 20) Oni nọ uweri o da oma fia na ọ tẹ wọ ọmọ owhuowhu na họ ehru ewha nọ ọruẹaro na o re kiẹzẹ nọ ọ tẹ ziọ uwou rai.

Ababọ oke-oraha, nọ ọ vuẹ ọzae riẹ no, ọ tẹ ruọ edhere nya emaele udhe kpobọ Ugbehru Kamẹl nyae ruẹ Elaesha. Nọ o te etẹe, o weri hi, ọ viẹ hayo roma fotọ họ. Kọ o sae jọnọ ẹsejọhọ fikinọ o yo nọ Elaeja, ọruẹaro nọ ọ karo kẹ Elaesha na ọ kpare ọmọ aye-uku jọ nọ o whu? (1 Ivie 17:17-23) Kọ o sae jọnọ aye Shunẹm na o wo ẹrọwọ nọ Elaesha o ti ru epọvo na kẹ ọmọ riẹ? Oghẹrẹ kpobi nọ o jọ kẹhẹ, ọ rọwo nọ o re kpo ho ajokpanọ Elaesha o re lele iei.

Nọ a te Shunẹm, Elaesha ọvo ọ tẹ ruọ ubrukpẹ nọ ọ be hai wohọ anwẹdẹ na, ọ tẹ ruẹ ọmọ owhuowhu na evaọ “ehwa riẹ.” (Owọ avọ 32) Ọruẹaro na ọ tẹ lẹ se Jihova gaga. Nọ Elaesha ọ rọ oma te ọmọ na, ẹmẹrera na “oma ọmọ na o te muhọ ẹroro.” Ubiudu ọmọ nọ o s’ẹwẹ họ vẹre no na o tẹ wariẹ muhọ ekie! Elaesha o te se oni na jẹ ta eme nọ i ru uweri riẹ zihe ruọ oghọghọ inọ: “Wọ ọmọzae ra.”—Owọ avọ 34, 36.

Ikuigbe ọmọzae aye obọ Shunẹm nọ a kpare no uwhu ze na e rẹ kẹ omai ẹruore gbe omosasọ. Jihova ọ riẹ epanọ o rẹ da te nọ ọmọ o te whu ku ọyewọ. U woma kẹhẹ, o rrọ isiuru riẹ re ọ kpare iwhuowhu na ze. (Job 14:14, 15) Ahwo nọ Elaesha gbe idibo Ọghẹnẹ efa e kpare no uwhu ze nọ a gbiku rai fihọ Ebaibol na yọ ẹmẹvo gheghe ọrọ oware nọ Jihova o ti ru evaọ akpọ ọkpokpọ riẹ nọ ọ be tha na.a

Ẹruore ẹkparomatha nọ ọ rrọ Ebaibol na o rẹ nwane whaha edada nọ i re noi ze he nọ ohwo o te whu ku omai. Ọzae Oleleikristi jọ nọ ọmọvo nọ o wo o whu, ọ ta nọ: “Edada mẹ e te sai n’otọ riẹriẹriẹ hẹ bẹsenọ mẹ te wariẹ ruẹ ọmọ mẹ dede rehọ no uwhu ze.” Dai roro epanọ o te jọ oware oghọghọ te re whọ wariẹ ruẹ ahwo nọ who you nọ a whu no. Iroro epanọ whọ te rọ gbalọ ae họ oma ọvo dede o rẹ sai ru edada na kawo omojọ. Kọ oma o be wọ owhẹ re who wuhrẹ kpahe Ọghẹnẹ nọ ọ kẹ omai obọdẹ ẹruore nana?

[Oruvẹ-obotọ]