Ẹzi Ọfuafo Na Ọ Rẹ K’omai Ẹgba Fi Odawọ Kpobi Kparobọ

“Mẹ rẹ sai ru eware kpobi eva ọnọ ọbe kẹ omẹ eri.”—FIL. 4:13.

1. Fikieme edawọ sa-sa i bi ro te idibo Jihova?

IDIBO Jihova a be rẹriẹ ovao dhe idabolo sa-sa. Sebaẹgba mai hayo uyerakpọ nana o be wha edawọ jọ se omai. Egrẹ nọ ọ rrọ udevie enọ e be gọ Ọghẹnẹ gbe enọ e be gọe he o be wha uye se omai re. (Emu. 3:15) No emuhọ akpọ na ze, Ọghẹnẹ o bi fi obọ họ kẹ idibo riẹ thihakọ ukpokpoma egagọ, otunyẹ ọhwa, gbe idabolo efa. Ẹzi ọfuafo riẹ ọ rẹ sai fi obọ họ kẹ omai thihakọ re.

Ukpokpoma Egagọ

2. Eme họ ẹjiroro ukpokpoma egagọ, kọ oghẹrẹ vẹ o rẹ rọ roma via?

² Ukpokpoma egagọ họ olahiẹ hayo uye nọ a rẹ rọ kẹ ahwo fiki ẹrọwọ rai. Ẹjiroro ukpokpoma na họ re enọ e rrọ egagọ na a no egagọ na, whaha ẹvaha egagọ na, hayo raha ẹgbakiete enọ e rrọ egagọ na. Ukpokpoma o rẹ roma via evaọ oghoghẹrẹ, ejọ i re kpomafihọ, efa e vẹ nyaze evaọ idhere ẹghẹ. Ebaibol e rehọ edawọ Setan dhesẹ epanọ okpohrokpo gbe oriọvọ e rẹ họre erao efa.—Se Olezi 91:13.

3. Eme họ ukpokpoma nọ o wọhọ ohọre okpohrokpo gbe orọ oriọvọ?

³ Wọhọ okpohrokpo, Setan ọ be rọ ukpokpoma nọ u kpomafihọ rọ họre omai, ẹkwoma ukpe, efihọ uwou-odi, hayo awhaha iruo mai. (Ol. 94:20) Ma rẹ sae jọ Yearbook ọ Isẹri Jihova erọ oke mai na ruẹ ikuigbe ukpokpoma sa-sa itieye. Evaọ eria buobu, isu-egagọ hayo ahwo nọ a wọ isuẹsu họ uzou a koko ahwo họ rọ họre idibo Jihova no. Ikpokpoma nana nọ e wọhọ ohọre okpohrokpo na i ru umutho ahwo jọ kie no ukoko no. Wọhọ oriọvọ, Ẹdhọ o re je si oma no, ọ vẹ vẹruọ ahwo idudhe re ọ ruẹse raha iroro rai jẹ viẹ ae họ ru oreva riẹ. Ẹjiroro edawọ itieye na họ re i whrehe ẹrọwọ mai. Rekọ ẹzi ọfuafo na ọ rẹ sai fi obọ họ k’omai mudhe kẹ eghẹrẹ edawọ ivẹ na.

4, 5. Edhere vẹ ọ mai woma nọ ma rẹ rọ ruẹrẹ oma kpahe kẹ ukpokpoma, kọ fikieme? Kẹ oriruo jọ.

⁴ Re ma ruẹrẹ oma kpahe kẹ ukpokpoma orọnikọ ma re roro kpahe oghoghẹrẹ ukpokpoma nọ e rẹ sai te omai hi. Uzẹme na họ, ma rẹ sae riẹ oghẹrẹ ukpokpoma nọ u ti te omai hi, fikiere erere ọvo o ti noi ze he re ma ruawa kpahe eware nọ e sae te tubẹ via ha. Rekọ oware jọ o riẹ nọ ma sai ru. Ahwo buobu nọ a thihakọ ukpokpoma no a sai ru ere keme a bi roro kpahe emamọ uzuazọ nọ idibo Ọghẹnẹ a yeri no nọ a kere fihọ Ebaibol na, gbe iwuhrẹ avọ oriruo Jesu. Onana u ru uyoyou rai kẹ Jihova diwi ziezi no. Uyoyou yena u fi obọ họ kẹ ae fi edawọ kparobọ no.

⁵ Roro kpahe inievo-emetẹ ivẹ mai jọ nọ e rrọ obọ Malawi. Re a ruẹse gba ae họ dẹ ekade nọ a re ro votu, otu-ugbarugba o te mu ai họ ekpe, ba ae fihọ, jẹ ta kẹ ae nọ a te gba ae du. Otu-ugbarugba na a tẹ lẹliẹ ae họ inọ inievo nọ e rrọ obọ Ebẹtẹle dede a dẹ ekade nana no. Eme inievo-emetẹ nana a kpahe kẹ ae? A ta nọ: “Jihova Ọghẹnẹ ọvo ma be gọ. Fikiere, otẹrọnọ inievo mai nọ e rrọ obọ Ebẹtẹle a dẹ ekade na no, oyena u t’omai hi. Wha tẹ make ta nọ wha re kpe omai no, ma be dẹ hẹ!” Nọ a rọ ududu ta ere no, a te siobọno ai.

6, 7. Ẹvẹ Jihova ọ be rọ kẹ idibo riẹ ẹgba nọ a tẹ rẹriẹ ovao dhe ukpokpoma?

⁶ Pọl ukọ na ọ ta inọ Ileleikristi obọ Tẹsalonika a jẹ ẹme Ọghẹnẹ rehọ “eva uye obẹbẹ,” ghele na avọ “oghọghọ nọ Ẹzi Ẹri na ọ kẹ” rae. (1 Tẹs. 1:6) Evaọ uzẹme, Ileleikristi buobu erọ oke anwae gbe erọ oke nana nọ e rẹriẹ ovao ku ukpokpoma no a ta inọ nọ uye na o ga raha no, udhedhẹ o tẹ vọ ae oma, onọ o rrọ abọjọ ọrọ ubi ẹzi ọfuafo Ọghẹnẹ. (Gal. 5:22) Udhedhẹ yena u fi obọ họ kpọ idu gbe iroro rai. Ẹhẹ, Jihova ọ rẹ rehọ ẹzi riẹ kẹ idibo riẹ ẹgba re a thihakọ edawọ re a jẹ rọ areghẹ su oma rai nọ ukpokpoma u te du lahwe.a

⁷ U gbe ahwo buobu unu no nọ a ruẹ ọtamuo nọ ahwo Ọghẹnẹ a be rọ yọrọ ẹgbakiete rai ghelọ ukpokpoma ogaga. O wọhọ ẹsenọ a kẹ Isẹri na ogaga nọ o thesiwa, yọ ere o ginẹ rrọ. Pita ukọ na ọ tuduhọ omai awọ nọ: “Otẹrọnọ a be rọ owhẹ se ọliọ fiki odẹ Kristi, who wo oghale, keme yọ ẹzi oruaro avọ orọ Ọghẹnẹ erọ owhẹ oma.” (1 Pita 4:14) Ukpokpoma nọ u bi te omai fiki izi Ọghẹnẹ nọ ma bi koko na u dhesẹ inọ ọ jẹ omai rehọ. (Mat. 5:10-12; Jọn 15:20) Eva e be were omai inọ Jihova ọ jẹ omai rehọ.

Otunyẹ Ọhwa

8. (a) Eme o fi obọ họ kẹ Joshua avọ Kelẹb mugba kẹ otunyẹ ọhwa? (b) Eme ma rẹ sai wuhrẹ no oriruo Joshua avọ Kelẹb ze?

⁸ Ọwọsuọ ẹghẹ jọ nọ Ileleikristi a re mugba kẹ họ otunyẹ ọhwa. Rekọ fikinọ ẹzi Jihova o wo ẹgba gaga vi ẹzi akpọ na, ma rẹ sai fi enọ i bi se omai ẹkoko kparobọ, enọ e be rọ unu raha omai, enọ e be gwọlọ gba omai họ ru ẹgwọlọ rai. Wọhọ oriruo, fikieme Joshua avọ Kelẹb a gbẹ rọ rọwo kugbe eme nọ ekiotọ ikpe edekọ nọ a vi kpohọ ẹkwotọ Kenan na a ta ha? Ẹzi ọfuafo ọ kẹ rai oghẹrẹ “ẹzi sa.”—Se Ikelakele 13:30; 14:6-10, 24.

9. Fikieme Ileleikristi a gbe ro kie lele oware nọ amọfa a bi ru hu?

⁹ Ere re, ẹzi ọfuafo na ọ kẹ ikọ Jesu ẹgba yoẹme kẹ Ọghẹnẹ, orọnikọ isu egagọ nọ ahwo a jẹ kẹ adhẹẹ a je yoẹme kẹ hẹ. (Iruẹru 4:21, 31; 5:29, 32) Ahwo buobu a rẹ gwọlọ kie lele oware nọ amọfa a bi ru re a se ae uye ba ẹkẹ. Rekọ uvi Ileleikristi a rẹ ruabọhọ oware nọ a riẹ nọ u woma. Dede nọ a wo ohẹriẹ, ozọ u bi mu ai hi keme ẹzi Ọghẹnẹ ọ be kẹ ae ẹgba. (2 Tim. 1:7) Joma ta kpahe otunyẹ ọhwa jọ nọ ma re kie kẹ hẹ.

10. Ẹbẹbẹ vẹ Ileleikristi jọ a rẹ rẹriẹ ovao dhe?

¹⁰ Izoge jọ a rẹ riẹ onọ a re ru hu otẹrọnọ ogbẹnyusu rai ọ thuzi ulogbo jọ. A re roro nọ a tẹ ta oware nọ ogbẹnyusu rai o ru na via kẹ ekpako ukoko yọ a vivie ogbẹnyusu rai na no; fikiere a vẹ ko ẹme na dhere. Ọnọ ọ thuzi ọ sae tubẹ ta kẹ egbẹnyusu riẹ inọ a ko ẹme na dhere. Evaọ uzẹme, orọnikọ izoge ọvo a wo ẹbẹbẹ nana ha. Makọ ahwo jọ nọ e kpako no a rẹ gwọlọ vuẹ ekpako ukoko kpahe uzioraha egbẹnyusu hayo ahwo uviuwou rai hi. Kọ eme uvi Ileleikristi a re ru kpahe otunyẹ otiọye?

11, 12. Eme ọ mai fo eruo otẹrọnọ ohwo jọ evaọ ukoko na ọ ta kẹ owhẹ nnọ whọ ta iruthọ riẹ via ha, kọ fikieme?

¹¹ Roro kpahe onana. Dae rehọ iẹe nnọ Enahoro o yo inọ Ọthuke nọ ọ rrọ ogbẹnyusu riẹ evaọ ukoko na, ọ be hai rri ifoto ẹbẹba. Enahoro ọ tẹ ta kẹ Ọthuke inọ oware nọ o bi ru na u woma ha. Rekọ Ọthuke ọ kezọ kẹe he. Nọ Enahoro ọ tuduhọ iẹe awọ re ọ nyae ta kẹ ekpako na, Ọthuke ọ tẹ kpahe kẹe inọ otẹrọnọ Enahoro yọ emamọ ogbẹnyusu riẹ, o re fi obọ họ kẹe ko oware nọ o ru na dhere. Kọ u fo re Enahoro ọ fare unu riẹ re usu na o seba ẹfa? Ẹsejọhọ Enahoro ọ be jọ udu riẹ roro inọ otẹrọnọ Ọthuke ọ gbenu, ẹme ono ekpako na a te rọwo? Ghele na, otẹrọnọ Enahoro ọ fare unu riẹ, ẹbẹbẹ nọ Ọthuke o wo na o ti kuhọ họ. Evaọ uzẹme, o sae raha usu nọ Ọthuke o wo kugbe Jihova. U fo re Enahoro ọ kareghẹhọ inọ “ozodhẹ ohwo okpahe ẹta, rekọ ọnọ o fievahọ ỌNOWO na oma o rẹ fọ e.” (Itẹ 29:25) Eme ọfa Enahoro o re ru? Ọ sai zihe bru Ọthuke re a t’ẹme kpahe ẹbẹbẹ na. Oyena o gwọlọ udu. Ẹsejọhọ Ọthuke ọ te gwọlọ ta kpahe ẹbẹbẹ riẹ na. Enahoro ọ vẹ wariẹ tuduhọ iẹe awọ re ọ nyae ta kẹ ekpako na, inọ otẹrọnọ ọ ta ha nọ omoke jọ o tẹ vrẹ no, ọye ọvo ọ te ta kẹ ae.—Izerẹ 5:1.

¹² Who te ru ere, ẹsejọhọ ogbẹnyusu ra ọ te riẹ oware ezi nọ who ru kẹe okioke yena ha. Rekọ evaọ obaro, ọ sai vuhumu inọ oware ezi who ru kẹe na. Otẹrọnọ ọnọ ọ thuzi na ọ jẹ obufihọ na rehọ, eva e te were iẹe ẹsikpobi inọ whẹ yọ uvi ogbẹnyusu. Evaọ abọdekọ riẹ, o te mukpahe owhẹ fikinọ whọ ta ẹme na via, kiyọ ohwo nọ who re gine mu usu kugbe? Re ma ru Jihova eva were họ oware nọ o mai fo eruo. Nọ ma tẹ rọ Jihova karo, enọ i you rie a te kẹ omai adhẹẹ, a ve ti mu omai egbẹnyusu. Ma rẹ kuvẹ kẹ Ẹdhọ vievie he evaọ ukoko Ileleikristi na. Ma tẹ kẹe uvẹ, kiyọ ma be kpọ ẹzi ọfuafo Jihova eva. Rekọ nọ ma tẹ be daoma ru ukoko Ileleikristi na fo, yọ ma bi ru eva were ẹzi na.—Ẹf. 4:27, 30.

Oghẹrẹ Okpẹtu Kpobi

13. Okpẹtu sa-sa vẹ idibo Jihova a be rẹriẹ ovao dhe, kọ fikieme i je bu tere nẹnẹ?

¹³ Okpẹtu ọ rẹ sae roma via evaọ idhere sa-sa, o sae jọ ekọ nọ i kie, iruo nọ a si ohwo no, ọraha nọ uvumọ ohwo ọ so ho, ohwo nọ ma you nọ o whu, ẹyao, gbe eware efa. Nọ ma be rria “oke obẹbẹ” na, ma re rẹro inọ oghẹrẹ edawọ jọ e sai te omai. (2 Tim. 3:1) Nọ o tẹ via ere, joma nuhu hu. Ẹzi ọfuafo na ọ rẹ sae kẹ omai ẹgba thihakọ oghẹrẹ ebẹbẹ kpobi.

14. Eme o fi obọ ho kẹ Job thihakọ edawọ nọ i te rie?

¹⁴ Job ọ ruẹ uye edawọ sa-sa. Eyero akpọ riẹ kpobi o vru mi ei, emọ gbe idibo riẹ i whu, ọ mọ okpẹyao, yọ aye riẹ o gbe fi ẹrọwọ họ Jihova ha. (Job 1:13-19; 2:7-9) Ghele na, Elaihu ọ jọ uvi ogbẹnyusu kẹ Job. Uduotahawọ nọ Elaihu gbe Jihova a jẹ kẹ Job họ: “Fọtou re who roro eware igbunu Ọghẹnẹ.” (Job 37:14) Eme o fi obọ họ kẹ Job thihakọ edawọ riẹ? Kọ eme ọ rẹ sai fi obọ họ kẹ omai thihakọ edawọ? Eware sa-sa nọ Jihova ọ rọ ogaga gbe ẹzi ọfuafo riẹ ru nọ ma rẹ kareghẹhọ je roro kpahe. (Job 38:1-41; 42:1, 2) Ẹsejọhọ ma kareghẹhọ ẹbẹbẹ jọ nọ ma wo nọ Jihova o fi obọ họ kẹ omai fi kparobọ. Jihova o gbe wo isiuru kpahe omai nẹnẹ.

15. Eme ọ kẹ Pọl ukọ na ẹgba thihakọ edawọ?

¹⁵ Pọl ukọ na o thihakọ edawọ egaga buobu fiki ẹrọwọ riẹ. (2 Kọr. 11:23-28) Ẹvẹ ọ sai ro dhomamu evaọ otọ iyero ebẹbẹ yena? Ẹkwoma olẹ gbe ẹrorọsuọ Jihova. Kpahe iye sa-sa nọ i te rie taure o te ti whu, Pọl o kere nọ: “Ọnowo na o dikihẹ gba omẹ ọ tẹ kẹ omẹ ogaga ro woro ẹme na gbagba, re ahwo [Egedhọ] kpobi a yo i. Fikiere o te si omẹ no eva unu okpohrokpo.” (2 Tim. 4:17) Fiki eware nọ Pọl ọ rọ ẹro ruẹ, ọ sae ta udu họ ibe Ileleikristi awọ inọ a “ruawa oware ovo ho.”—Se Ahwo Filipai 4:6, 7, 13.

16, 17. Kẹ oriruo jọ ro dhesẹ epanọ Jihova ọ be rọ kẹ idibo riẹ ẹgba thihakọ edawọ nẹnẹ.

¹⁶ Ọkobaro jọ nọ a re se Roxana ọ ruẹ epanọ Jihova ọ be rọ rẹrote idibo riẹ. Okejọ nọ Roxana o mi ọga-iruo riẹ uvẹ re ọ sai kpohọ okokohọ ubrotọ mai jọ, ọga na ọ tẹ ta kẹe avọ evedha inọ o te kpohọ okokohọ na, o ti si ei no iruo. Roxana o kpohọ okokohọ na ghele, rekọ ọ lẹ se Jihova gaga re a se iẹe ba esino iruo. Nọ ọ lẹ no, udu u gbe bru ei hi. Nọ Roxana o kpohọ iruo nọ o no okokohọ na ze no, ọga riẹ o te si ei no iruo. Roxana ọ tẹ jẹ ruawa. Ọ gwọlọ iruo na dede nọ osa riẹ u bu hu, re ọ sae ruẹ ugho fi obọ họ kẹ uviuwou riẹ. Ọ tẹ wariẹ lẹ se Jihova, jẹ kareghẹhọ inọ wọhọ epanọ Ọghẹnẹ ọ rọ ẹkwoma okokohọ na rẹrote ẹgwọlọ abọ-ẹzi riẹ na, ọ te rẹrotei evaọ abọ-iwo. Nọ o je zihe no oria iruo na kpo, ọ tẹ ruẹ oria jọ nọ a kere fihọ nọ a gwọlọ ohwo nọ ọ rẹ sae rọ ijini ilogbo ro ko eware, koyehọ ọ nya re a rehọ iẹe iruo. Ọga-iruo na o te muẹrohọ nọ Roxana ọ riẹ iruo na ha, rekọ ọ tẹ rehọ iẹe iruo ghele, yọ osa nọ a te hwae o te rọ enwenọ akuava bu vi onọ a jẹ hwae vẹre. Roxana ọ tẹ riẹ nọ Ọghẹnẹ ọ kuyo olẹ riẹ no. Rekọ oware nọ o mae rro kpobi họ, o je wo uvẹ nọ ọ rẹ rọ ta usiuwoma kẹ ibe-iruiruo riẹ buobu. Ibe-iruiruo ene riẹ, kugbe ọga-iruo na, a te kurẹriẹ jẹ họ-ame.

¹⁷ Evaọ ẹsejọ, o rẹ wọhọ nọ a be kuyo elẹ mai hi evaọ oke gbe oghẹrẹ nọ ma gwọlọ. O tẹ rrọ ere, uvi ẹjiroro jọ o riẹ nọ Jihova ọ gbẹ re rọ kuyo olẹ na ha. Jihova ọ riẹ ẹjiroro na, rekọ ma sae te riẹ kpahe ẹjiroro na evaọ obaro. Oware jọ nọ o rẹ sai mu omai ẹro họ, Ọghẹnẹ o re gbabọkẹ idibo ẹrọwọ riẹ hẹ.—Hib. 6:10.

Efikparobọ Edawọ Sa-Sa

18, 19. (a) Fikieme ma je rẹro edawọ? (b) Eme ọ rẹ sai fi obọ họ kẹ owhẹ thihakọ edawọ?

¹⁸ U re gbe idibo Jihova unu hu nọ a tẹ rẹriẹ ovao ku edawọ, elọhoma, ukpokpoma, gbe otunyẹ ọhwa. Akpọ na o mukpahe omai. (Jọn 15:17-19) Ghele na, ẹzi ọfuafo na ọ rẹ sai fi obọ họ kẹ omai fi use-abọ kpobi nọ ma rẹriẹ ovao dhe kparobọ evaọ egagọ Ọghẹnẹ. Jihova ọ te kuvẹ hẹ re odawọ nọ o rro vi omai u te omai. (1 Kọr. 10:13) O ti vu omai wa vievie he. (Hib. 13:5) Ẹmeoyo kẹ izi riẹ ọ rẹ thọ omai. Ofariẹ, ẹzi Ọghẹnẹ ọ sae wọ ibe eg’Ọghẹnẹ re a dhogbo bru omai ze.

¹⁹ Jọ mai kpobi ma hae rọ ẹkwoma olẹ gbe ese Ikereakere na yare obufihọ ẹzi ọfuafo na. Jọ Ọghẹnẹ ọ rehọ “ogaga kpobi kẹ [omai] eri, wọhọ epa ogaga oruaro riẹ, e ruọ odiri kpobi gbe [uye-oruẹ] avọ oghọghọ.”—Kọl. 1:11.

[Oruvẹ-obotọ]

Ẹvẹ Whọ te k’Uyo?

• Ẹvẹ whọ sae rọ ruẹrẹ oma kpahe re who thihakọ ukpokpoma?

• Eme who re ru nọ ohwo jọ ọ tẹ lẹ owhẹ re whọ siọ uzioraha riẹ ba ẹta via?

• Imuẹro vẹ whọ rẹ sai wo nọ whọ tẹ rẹriẹ ovao ku edawọ?

[Uwoho nọ o rrọ ẹwẹ-obe avọ 28]

Eme ma rẹ sai wuhrẹ mi Joshua avọ Kelẹb?

[Uwoho nọ o rrọ ẹwẹ-obe avọ 29]

Ẹvẹ whọ sai ro fi obọ họ kẹ ogbẹnyusu ra nọ ọ raha uzi?