Nọ Ma tẹ be Mọ Okpẹyao

“Nọ edọkita ọ vuẹ omẹ nọ ẹyao ọta ọ rrọ irue gbe ivu mẹ, o jọ omẹ oma wọhọ ẹsenọ a bruoziẹ uwhu kpe omẹ. Rekọ nọ me no ẹsipito te uwou no evaọ ẹdẹ yena, mẹ tẹ vuẹ omamẹ nọ, ‘me rẹro onana ha, rekọ mẹ rẹ gwọlọ edhere nọ me re ro thihakọ riẹ.’ ”—Linda, ikpe 71.

“Mẹ be mọ ẹyao jọ nọ ọ rẹ lẹliẹ iriẹ nọ e rrọ ẹkpẹlobọ ovao mẹ da omẹ gaga. Ẹsejọ, edada na e rẹ wha ọkora fihọ omẹ oma. Ẹsibuobu, oma o rẹ jọ omẹ goli, yọ me re tube roro epanọ me re ro kpe omamẹ no dede.”—Elise, ikpe 49.

Ọzae nọ ọ be mọ nọ ọ keria akaba-ọmo nọ a re ghelie, yọ ahwo uviuwou riẹ a rrọ kugbei

OTẸRỌNỌ whẹ hayo ohwo uviuwou ra jọ ọ be mọ okpẹyao nọ ọ rẹ sae wha uwhu ze, whọ riẹ epanọ o rẹ kuye te. Ẹyao na ọ rẹ sae lẹliẹ owhẹ avọ ahwo uviuwou ra ruawa gaga, jẹ tubẹ lẹliẹ ofu dhe owhai dede. Awaọruọ nana ọ rẹ ga viere oke kpobi nọ whọ tẹ gwọlọ nyae ruẹ edọkita, nọ o tẹ rrọ bẹbẹ re a riẹ oghẹrẹ usiwo-imu nọ u fo, nọ ugho o gbẹ riẹ nọ a rẹ rọ dẹ imu hu, hayo nọ imu nọ whọ be rehọ fihọ ẹyao na e tẹ be kẹ owhẹ uye. A rẹ ruẹ unu gbiku iroro nọ okpẹyao o rẹ wha se ohwo ho.

Eme ọ rẹ sai fiobọhọ kẹ omai thihakọ? Ahwo buobu a ruẹ nọ oware nọ o be mai fiobọhọ kẹ ai họ, olẹ nọ a rẹ lẹ se Ọghẹnẹ gbe eria ikere nọ e rẹ kẹ omosasọ nọ a re se evaọ Ebaibol na. Oware ofa nọ u re fiobọhọ gaga họ, nọ ahwo uviuwou gbe egbẹnyusu ohwo a tẹ be hai dhesẹ uyoyou kẹe jẹ thae uke.

EWARE NỌ I FIOBỌHỌ KẸ AHWO JỌ NO

Ọzae jọ nọ a re se Robert nọ ọ rrọ ikpe 58 ọ ta nọ: “Fi ẹrọwọ họ Ọghẹnẹ evaọ okenọ whọ tẹ be mọ, o ti fiobọhọ kẹ owhẹ thihakọ ẹyao na. Hae lẹ se Jihova. Horie eva ra kpobi kẹe. Yare iẹe kẹ ẹzi ọfuafo riẹ. Lẹ sei re ọ kẹ owhẹ ẹgba nọ whọ rẹ rọ jọ ọbọga gbe uduotahawọ kẹ ahwo uviuwou ra, je ru udu kie owhẹ vi nọ who bi thihakọ ẹyao na.

“U re fiobọhọ gaga nọ ahwo uviuwou ra a tẹ be hae tuduhọ owhẹ awọ. Kẹdẹ kẹdẹ, omọvo hayo imava a rẹ rọ ifonu se omẹ jẹ nọ omẹ nọ, ‘Ẹvẹ omara?’ Egbẹnyusu mẹ nọ e rrọ eria sa-sa a rẹ tuduhọ omẹ awọ gaga re. Onana u fiobọhọ kẹ omẹ gaga nọ mẹ be sai ro thihakọ.”

Otẹrọnọ whọ gwọlọ weze bru ohwo ra jọ nọ oma o ga ha, muẹrohọ ẹme nana nọ aye nọ a re se Linda ọ ta na: “Uzẹme riẹ họ, orọnikọ ẹsikpobi ohwo nọ ọ be mọ ọ rẹ gwọlọ ta ẹme kpahe ẹyao na ha keme ọ gwọlọ yeri uzuazọ riẹ vrẹ. Fikiere, ta ẹme kpahe eware efa nọ wha rẹ ta kpahe vẹre.”

Avọ obufihọ Ọghẹnẹ, omosasọ nọ Ikereakere na e rẹ kẹ, gbe uduotahawọ nọ ma re wo no obọ ahwo uviuwou gbe egbẹnyusu mai ze, ma rẹ sai yeri uzuazọ mai vrẹ ghele o tẹ make rọnọ ma be mọ okpẹyao.

Eria Ikere nọ E rẹ Sai Fiobọhọ

Rẹroso Ọghẹnẹ.

“Mẹ nekpẹ mi Jihova, ọ tẹ kẹ omẹ uyo. O siwi omẹ no eware nọ i je ru ozọ mu omẹ kpobi. Oruori nana o bo sei, Jihova o te yo.”—Olezi 34:4, 6.

Linda nọ ma fodẹ no vẹrẹ na ọ ta nọ: “Mẹ lẹ ẹdẹ ọvo ho inọ, ‘Jọ ẹyao mẹ o kpo.’ Olẹ nọ mẹ jẹ hae lẹ ẹsikpobi họ, ‘Kẹ omẹ ẹgba, je fiobọhọ kẹ omẹ thihakọ ẹyao mẹ na.’ ”

Wo ẹgba no isase Ebaibol ze.

“Ohwo ọvo nọ ọ be rria ẹkwotọ na nọ ọ te ta nọ, ‘Mẹ be mọ’ ọ te jariẹ hẹ.”—Aizaya 33:24.

Hai roro kpahe eyaa nọ Ọghẹnẹ ọ ya kpahe obaro, who ti wo ẹruore, yọ onana o te kẹ owhẹ ẹgba nọ who ti ro thihakọ.

Ta kẹ ahwo uviuwou gbe egbẹnyusu ra re a fiobọhọ kẹ owhẹ.

“Emamọ ogbẹnyusu o re dhesẹ uyoyou ẹsikpobi, ọ tẹ jẹ rrọ oniọvo nọ a yẹ fiki oke idhọvẹ.”—Itẹ 17:17.

Elise nọ ma fodẹ no vẹre na ọ ta nọ: “Who siomano ahwo ho. Kuvẹ re egbẹnyusu ra a fiobọhọ kẹ owhẹ. Oma o sae jọ owhẹ goli ẹsejọ, yọ whọ sai roro nọ Ọghẹnẹ ọ be gaviezọ kẹ owhẹ hẹ, ghele na who siomano ahwo ho.”