Wo Erere No Isukulu Odibọgba Ọghẹnẹ ọrọ 1996 na Ze—Abọ 1
1 Kọ who se ehrẹ nọ e rọ “Oma Isukulu Odibọgba Ọghẹnẹ ọrọ 1996” na no? Kọ who muẹrohọ inwene jọ? No amara January rite April, Ẹme Avọ 3 o re ti no obe Reasoning (Ajiroro) na ze, yọ no amara May rite December, a te rehiẹe no obe kpokpọ Eriariẹ nọ a siobọ no na ze. Ẹme Avọ 4 ọ te t’ẹme kpahe ikuigbe ohwo Ebaibol jọ sasa koka koka.
2 Eme Ọmọ-Uwuhrẹ: A rẹ rọ Ẹme Avọ 3 kẹ oniọvo-ọmọtẹ. Nọ a tẹ rehiẹe no obe Reasoning ze, ọruẹrẹhọ ẹkeria na o re kugbe isẹrise nuwou ruọ uwou hayo isẹrise ọnyakuo. A tẹ rehiẹe no obe Eriariẹ na ze, a re ru ei wọhọ ozihebro hayo obe uwuhrẹ Ebaibol. Onana u re ti fiobọhọ gaga, keme a rẹ te rehọ obe Eriariẹ na ru iwuhrẹ Ebaibol gaga.
3 Ọruẹrẹfihọ ẹkeria na ọ tẹ rọ ọrọ obe uwuhrẹ Ebaibol, inievo-emetẹ ivẹ na a rẹ sae keria. Muọ uwuhrẹ na họ ovavo ẹkwoma eme erovie kpẹkpẹ nọ whọ rẹ ta, whọ vẹ nọ enọ nọ e rọ obe na. Ohwo nọ o wo uwou na o re ru ẹkẹ-abọ riẹ wọhọ epanọ ahwo obọ otafe a re ru. Oke o tẹ riẹ, eria ikereakere nọ a fodẹ na a re se ai. Oniọvo-ọmọtẹ na o re dhesẹ ona ewuhrẹ ẹkwoma enọ nọ ọ rẹ rọ riẹ eva ohwo nọ o wo uwou na jẹ jiroro kugbei no ikereakere nọ a fodẹ na ze.
4 Eme a re ru otẹrọnọ ikereakere e rọ ẹme na nọ a sae rọ iminiti isoi se re he? Salọ ikere nọ e rọ igogo eme na lahwe. Otẹrọnọ ikereakere nọ e riẹ i bu hu, whọ vẹ rehọ oke ru igogo ẹme nọ a be ta kpahe na vevẹ viere. Ẹsejọ, a rẹ sai se edhe-ẹme hayo uye ẹme no obe na ze a vẹ rehiẹe t’ẹme kugbe ọnọ o wo uwou na.
5 Owhowho-uvie nọ ẹme riẹ o te edhe-ẹme urere uzou-ẹme na ọ sae rehọ etehe nọ o wo uzoẹme ọ “Dawo Eriariẹ Ra” na, nọ a rẹ jọ urere uzou ovuovo obe Eriariẹ na ruẹ, ro ru ọkiẹriwo kpẹkpẹe. Itehe evuẹ nọ e rọ idhe-ẹme nọ ẹme na o no ze na a sae jẹ t’ẹme kpahe ai nọ oke o tẹ riẹ. Otẹrọnọ etehe ovuẹ ọ roma via evaọ udevie eme ivẹ, oniọvo-ọmọtẹ nọ o bi ru ẹme ọsosuọ na ọ sae t’ẹme kpahiẹe. A rẹ sae t’ẹme kpahe iwoho nọ e rọ evaọ obe na nọ i te kpomahọ ẹme nọ a be ta na.
6 Ẹme Avọ 4 ọ rẹ sasa oma je ruiruo gaga. Koka koka o te t’ẹme kpahe ikuigbe ohwo jọ—no Ebaibol na ze. Roma kpotọ kiẹ oware nọ obe Insight Volume 1 e ta kpahe ohwo Ebaibol na. Ru re ẹme na o dhẹ uzoẹme na duwu, jẹ salọ igogo ikere Ebaibol nọ i ti fiobọhọ kẹ ogbotu na rẹriẹ ova ku uzoẹme na gbe oware jọ nọ ma rẹ sai wuhrẹ noi tha, kugbe uruemu ohwo na, hayo iroro riẹ nọ ma gwọlọ rọ aro kele hayo whaha. Ikereakere nọ e nwani kpomahọ ohwo Ebaibol na ha a rẹ sae t’ẹme kpahe ai otẹrọnọ i dhesẹ epanọ Jihova o riwi iruemu iwoma hayo iyoma jọ hayo i te wo abọ kpahe uzoẹme ẹme na.
7 Ma tẹ rehọ uvẹ uwuhrẹ nọ a be jọ isukulu na k’omai, ma rẹ gbẹ te “vuẹ ovuẹ ẹme na” viere evaọ edhere nọ u re dhesẹ ‘ona ewuhrẹ.’—2 Tim. 4:2.