Fiobọhọ Kẹ ai re A Wariẹ Muhọ Ẹgọ
1 Nọ o muẹrohọ enwoma ẹzi nọ e rọ kẹ ibe Ileleikristi riẹ no, Pọl ukọ na o te kere nọ: “Oke ute no enẹna no wha rọ rọwo no owezẹ tha. Keme usiwo ubikẹle omai enẹna vi [oke] no ma to rọwo.” (Rom 13:11) Pọl o je roro kpahe inievo riẹ nọ owezẹ ẹzi u je su; ọ jẹ ruawa re ọ rọwo ae re a zoma mu iruo ekpokpọ họ.
2 A rẹ sae ghinẹ ta nọ aso akpọ anwae ọnana o re no yọ ẹkiọ akpọ kpokpọ ọ nwane rọ obaro. (Rom 13:12) Ma wo emamọ ẹjiroro nọ ma re je roro kpahe inievo mai nọ e gbẹ be nyusu kugbe omai hi wọhọ iwhowho emamọ usi na. Ukpe n’ukpo, evaọ Nigeria ọvo, iwhowho-uvie nọ i bu vi 1,500 eye a wariẹ jaja vi. Ẹvẹ ma sai ro fiobọhọ kẹ amọfa nọ e whrẹrẹ kpemu no re a wariẹ mu Jihova họ ẹgọ?
3 Oware nọ Ekpako-Ukoko A rẹ Sae Ru: Ahwo buobu nọ e whrẹrẹ kpemu a rẹ te nyase uzẹme na ba ha; a se usiuwoma ota ba fiki oyẹlẹ, ebẹbẹ obọ rai, isiuru-ekwakwa efe, hayo awa uzuazọ efa. (Luk 21:34-36) O tẹ lọhọ, o mai woma re a fiobọhọ kẹ ai taure a tẹ te whrẹrẹ kpemu. Okere-obe ukoko na ọ rẹ jọ osuiruo ọ Uwuhrẹ Obe Ukoko na riẹ okenọ owhowho-uvie ọ gbẹ be niyẹrẹ iruo riẹ kẹse kẹse he. A rẹ sae ru ọruẹrẹfihọ iweze ẹruorote. A rẹ gwọlọ riẹ otọ oware nọ o so ẹbẹbẹ na ze gbe epanọ a sae ro fiobọhọ.—Riwi Uwou-Eroro Na, ọrọ September 15, 1993, ewẹ-obe 20-23 (ọrọ Oyibo).
4 Epanọ Amọfa A Sae ro Fiobọhọ: Ibuobu mai a riẹ ohwo jọ nọ ọ whrẹrẹ kpemu no. O sae jọ nọ ohwo ọyena ọ jọ ogbẹnyusu mai vẹre. Eme ma rẹ sai ru ro fiobọhọ? Keme jabọ who gbe weze bru ei omoke kpẹkpẹe he. Vuẹe nọ ẹro riẹ ọ ghae. Jọ whẹtiẹwhẹtiẹ avọ eriwo-owoma. T’ẹme kpahe ororokẹ ra ababọ edhesẹ nọ o wo ẹyao ẹzi. Gbiku ọbọga kpahe eware nọ e via hayo emamọ eware efa nọ ukoko na u ru no. Ta kẹe avọ ajọwha kpahe Okokohọ Ubrotọ “Ewhovuẹ Udhedhẹ Ọghẹnẹ,” jẹ tudu hiẹe awọ re ọ nya. Re ọ wariẹ nyusu kugbe ukoko na o sai fiobọhọ kẹe vi oware ofa kpobi. Dhesẹ nọ who ti su ei kpohọ iwuhrẹ na. Vuẹ ekpako ukoko na kpahe uruemu nọ o dhesẹ k’owhẹ.
5 Okenọ ohwo nọ ọ whrẹrẹ kpemu o te mu iwuhrẹ họ ẹnyaze, oma o rẹ jariẹe oghẹrẹ jọ nọ ọ tẹ ruẹ amọfa nọ ọ riẹ vẹre. Whọ nọe nọ, “Bovẹ whọ nya anwẹdẹ?” hẹ. Ikpoye, dede iei rehọ. T’ẹme kugbei. Dhesẹe kẹ ahwo nọ ọ riẹ hẹ. Keria kugbei evaọ etoke ewuhrẹ na, jọ u mu owhẹ ẹro nọ o wo obe-ile gbe obe nọ a bi wuhrẹ na. Tudu hiẹe awọ re o zihe ze, fiobọhọ otẹrọnọ ọ gwọlọ obufihọ ra.
6 Ewo arodawẹ kẹ ahwo nọ a vru siọ uzẹme na ba, Jihova gbe Jesu a rẹ ghọghọ okenọ itieye na a tẹ jaja aro vi evaọ ẹzi. (Mal. 3:7; Mat. 18:12-14) Ma rẹ sae ruẹ oghọghọ ovona otẹrọnọ ma wo obokparọ evaọ obufihọ kẹ amọfa re a wariẹ mu Jihova họ ẹgọ.