Ma rẹ “Vuẹ Ovuẹ Ẹme Na”
1 Nwane wọhọ epanọ Ebaibol o dhesẹ “edẹ urere” na, ahwo buobu nẹnẹ a wo “oghẹrẹ egagọ” ọvo. (2 Tim. 3:1, 5) Onana o rọ ere keme isu egagọ a be sae rehọ ọkpọvio ẹzi kẹ uthuru rai hi. Isu-egagọ Kristẹndọm a be t’ẹme te Ebaibol na ha. O rẹ mae were ae re a t’ẹme kpahe iwuhrẹ egbaeriariẹ gbe ewuhrẹ egagọ hayo re a fiẹgba họ eme uyerakpọ gbe isuẹsu viukpọ Ẹme Ọghẹnẹ nọ a re whowho. Isu egagọ buobu a rọwo Ebaibol na ha. A rẹ kuvẹ kẹ ẹdhọgọ ẹsibuobu evaọ udevie ahwo rai viukpenọ a rẹ dadamu ewuhrẹ ovevẹ Ebaibol na. Isu-egagọ buobu a be tubẹ rehọ odẹ-oma Ọghẹnẹ ruiruo ho, yọ a wo avro kpahe esino riẹ no efafa Ebaibol ọgbọna ha.
2 Wọhọ epanọ o jọ uzẹme kpahe isu egagọ evaọ edẹ Jesu, isu-egagọ inẹnẹ a be ta usiuwoma ufofe. (Mat. 15:8, 9) O nwane wọhọ epanọ Emọs ọruaro na ọ ruẹaro. Ohọo o riẹ “orọnọ ohọo emuore, hayo orọ uru-ame he, rekọ o rọ ẹme [Jihova] o yo.” (Emọs 8:11) Maerro vi oware ofa kpobi, ahwo a gwọlọ emuore ẹzi evaọ Ẹme Ọghẹnẹ.
3 Epanọ A re ro Ru Ẹgwọlọ Ẹzi Ahwo Gba: Pọl ọ tudu họ Timoti awọ re ọ ruabọhọ “ikere ẹri na, enọ i re ru [ohwo] wha ẹro te usiwo,” fikiere o te juzi kẹe re ọ “vuẹ ovuẹ ẹme na” kẹ amọfa. (2 Tim. 3:14, 15; 4:2) Wọhọ Isẹri Jihova, okenọ ma te bi wuhrẹ ma rẹ dadamu oware nọ Ebaibol o wuhrẹ hrọ, erei ma rẹ rọ raro kele Oriwiruo mai, Jesu, ọnọ ọ ta nọ: “Ewuhrẹ mẹ ọ rọ ọrobọ mẹ hẹ, rekọ ọrọ ọnọ o vi omẹ.” (Jọn 7:16) Ma rẹ rehọ Ẹme Ọghẹnẹ ruiruo wọhọ ehri uwuhrẹ mai keme ma vuhumu nọ u wo ereghẹ Ọghẹnẹ, yọ ma gwọlọ nọ ahwo a riẹ ehri ovuẹ nọ ma be ghale kugbe ai.—1 Kọr. 2:4-7.
4 Ahwo a rẹ kaki yo uzẹme na no Ebaibol na ze hrọ re a sai wuhrẹ kpahe Jihova je fi ẹrọwọ hiẹe. Pọl o kere gbagba nọ: “Ẹvẹ a rẹ te rọ rọwo ohwo nọ a ti yo usi riẹ hẹ? Ẹvẹ a re ro yo ababọ ọtusiuwoma?” (Rom 10:14) Ẹkwoma ewhowho Ẹme Ọghẹnẹ, ma re ro fiobọhọ kẹ amọfa wo ẹrọwọ ẹkwoma eriariẹ egbagba. Eriariẹ eyena e rẹ sae ghine nwene izuazọ kpohọ onọ o mai woma. Okereobe Oyibo jọ Charles Dickens o kere kpahe Ebaibol na nọ: “Oye họ obe nọ o mai woma kpobi nọ a kere hayo nọ o te jọ akpọ na, keme u re wuhrẹ ohwo obọdẹ iwuhrẹ nọ o rẹ kpọ ohwo kpobi nọ ọ be daoma rria avọ uzẹme gbe ẹrọwọ.”
5 Ahwo nọ ohọo uzẹme ẹzi u bi kpe a zoma ti vuhumu no nọ udu Ẹme Ọghẹnẹ oye o tha riẹ uke. Kpemu evaọ ukpe 1913, wọhọ ọmoha ekọleji, a kẹ Frederick W. Franz omobe nọ uzoẹme riẹ o jọ Where Are the Dead? Okenọ o se uyo Ebaibol kẹ onọ nana avọ isiuru ologbo no, ọ tẹ ta nọ: “Onana họ uzẹme na.” Epọvona o rọ re kẹ ima ahwo buobu nọ e be gwọlọ uzẹme na. Joma gbẹ hae whowho Ẹme na haro avọ ajọwha re ma rọ ere ghale oghọghọ na nọ ma bi yo nọ amọfa a be ta nọ: “Onana họ uzẹme na.”