Wuhrẹ Amọfa Oware nọ Ọghẹnẹ Ọ Gwọlọ
1 A rẹ gbẹ ruẹ ahwo buobu enọ a gbọ ogbọ ẹzi “ẹme ỌNOWO na o yo.” (Emọs 8:11) Nọ ejọ a rọwo nọ Ọghẹnẹ ọ rọ uzuazọ na, a riẹ kpahe ẹjiroro gbe ẹgwọlọ riẹ hẹ. Fikiere, ẹgwọlọ ọ riẹ re ma wuhrẹ ai uzẹme Uvie nọ o rẹ kẹ uzuazọ. Ẹkwoma oma nọ ma rẹ thọ vẹrẹ re ma sisẹri evaọ uvẹ kpobi, ma jẹ sae nyate ahwo nọ e gwọlọ wuhrẹ kpahe oware nọ Jihova ọ gwọlọ.
2 Evaọ etoke April gbe May, ma ti wo emamọ Uwou-Eroro Na gbe Awake! nọ ma rẹ ghale. Fiba onana, evaọ oke ọsosuọ kpobi, ma ti fi ibroshọ na Eme Ọghẹnẹ Ọ Gwọlọ Mi Omai? họ ada. Ifoto isiuru gbe enọ riẹ nọ e rẹ kpare iroro e te lẹliẹ ibroshọ ọnana were ahwo. A kẹ ezọhọfihọ enana re i fiobọhọ k’omai rehọ ebe obọdẹ mai nana ruiruo ziezi.
3 Gwọlọ Ahwo: Evaọ eria nọ ahwo buobu a rẹ kake jọ uwou hu nọ ma tẹ rọ usiuwoma n’uwou ruọ uwou, o be hẹ kẹ erere re ma gwọlọ jẹ t’ẹme kugbe ahwo evaọ oria nọ ma rẹ jọ duku ai kpobi—evaọ iyẹrẹ, evaọ ofa-edhere, eria arozaha, eria nọ imoto e rẹ kpahe gbe eria ekiọthuọ. U fo re ma gwọlọ uvẹ nọ ma rẹ rọ ta usiuwoma ọnyakuo. Wọhọ oriruo, oniọvo-ọmọtẹ jọ nọ ọ rọ ọkobaro o te kpohọ obọ ogba-erao ọ tẹ rehọ Awake! ọ August 8, 1996, lele oma nọ u wo uzoẹme “Erao nọ E rọ Ọza—Fikieme Ma jẹ Ruawa?” Evaọ auwa ọvo, o te fi 40 họ ada kugbe ahwo nọ erao e rẹ were! Didi obokparọ whọ reawere riẹ no evaọ ẹta usiuwoma na evaọ eria kpobi? Uwou-Eroro Na gbe Awake! je kugbe ibroshọ Ọghẹnẹ Ọ Gwọlọ na i fo oghẹrẹ isẹri ise kpobi, keme i wo izoeme nọ i kpomahọ izuazọ ahwo kpobi je duobọ te iroro rai.
4 Emuhọ Ẹmeọta: Ẹwẹ-obe urere Odibọgba Uvie Mai ọrọ October 1996 ọ jiroro epanọ whọ rẹ sae rọ ruẹrẹ eme obọ ra họ evaọ efihọ ada emagazini Uwou-Eroro Na gbe Awake! Ẹjiroro evo na i ti wo iruo ziezi nọ ma tẹ be ruẹrẹ oma kpahe re ma fi ibroshọ Ọghẹnẹ Ọ Gwọlọ na họ ada. Eme nọ ma rẹ ta e rẹ jọ kpẹkpẹe hayo theri te epanọ ma re ro ku Ikereakere jọ gbei. U wuzou re ma salọ eme nọ ma ti ro muhọ ziezi, keme u re dhesẹ sọ ohwo nọ whọ nyabru na ọ te gbẹ gaviezọ. Ahwo jọ a wo obokparọ no evaọ eme emuhọ enana: “Me se eme jọ nọ e k’omẹ uduotahawọ, yọ mẹ gwọlọ nọ me re dhesẹ iẹe k’owhẹ.” Hayo whọ sae nọ onọ isiuru jọ re ohwo ọdekọ na ọ kpahe ẹme fihọ iẹe.
5 U te fo evaọ oria ra, whọ rẹ sae daoma nọ enọ enana evaọ ebe fihọ ada ra evaọ amara ọnana:
◼ “Nẹnẹ ma be ruẹ eware etọtọ buobu gbe enua. Eme o gwọlọ re a ru otọakpọ na fo je ru ei fihọ emamọ oria nọ a rẹ rria?” Kuvẹ kẹ uyo, je ru ei vevẹ nọ who wo ovuẹ nọ o k’omai imuẹro kpahe oghẹrẹ gbe oke nọ otọakpọ na kpobi o ti ro zihe ruọ ogege owowoma akpọ soso. Se eme jọ kẹe, ikereakere kpẹkpẹe jọ, je dhesẹ ifoto ekọlọ jọ no emagazini ọkpokpọ jọ ze, who ve ru ei vi emagazini evaọ unuigho riẹ. Taure who te ku ẹme na họ, daoma ruẹrẹhọ re wha ta ẹme na haro okiofa.
◼ “Kọ who roro nọ Ọghẹnẹ ọ gwọlọ nọ ma rria udevie ebẹbẹ wọhọ enọ ma rẹriẹ ova ku nẹnẹ na?” Nọ ohwo na ọ tẹ kuyo no, whọ rẹ sae ta nọ: “Ẹsejọ whọ riẹ kpahe olẹ nọ Jesu o wuhrẹ ilele riẹ nọ a lẹ, inọ a yare re Uvie Ọghẹnẹ o ze. Kọ who roro oware nọ Uvie Ọghẹnẹ o ghinẹ rọ no?” Rovie kpohọ uwuhrẹ avọ 6 evaọ ibroshọ Ọghẹnẹ Ọ Gwọlọ na, who ve se enọ nọ e rọ emuhọ uwuhrẹ na. Nọ who bi se edhe-ẹme 1 na, riobọhọ uyo onọ ọsosuọ na. Ru ei vevẹ nọ enọ edekọ na i wo ẹkẹ iyo rai. Fi ibroshọ na họ ada evaọ azọhọ ₦25, jẹ ta nọ who ti zihe ze re whọ rehọ evuẹ efa ze kpahe Uvie na.
◼ “Ahwo iroro buobu a muọ egagọ akpọ na họ eriwi no wọhọ ehri nọ e be wha ebẹbẹ ohwo-akpọ ze ukpenọ e jọ ifue rai. Kọ eme who roro kpahe onana?” Nọ whọ tẹ gaviezọ kẹ iroro ohwo na no, dhesẹ oware jọ no emagazini ọkpokpọ jọ ze nọ o rẹ sae kpare isiuru riẹ kpahe ekie egagọ hayo ọraha riẹ nọ ọ be tha who ve ru ei vi emagazini. Kẹe odẹ ra jẹ rehọ odẹ riẹ, jẹ ta nọ whọ te wariẹ zihe ze re whọ ta oware nọ o soriẹ nọ egagọ uzẹme o gbe ri ru ohwo-akpọ oma vo ho.
◼ “Avọ ebẹbẹ buobu nọ e rọ uzuazọ uviuwou nẹnẹ, kọ who roro no ẹdẹjọ kpahe edhere didi nọ a re ro wo evawere uviuwou?” Hẹrẹ kẹ uyo, je ru ei vevẹ nọ evaọ Ebaibol na Ọghẹnẹ o rovie uzedhe edidi ọ evawere uviuwou via. Whọ rẹ sai se Aizaya 48:17. Who ve rovie kpohọ uwuhrẹ avọ 8 evaọ ibroshọ Ọghẹnẹ Ọ Gwọlọ na, whọ vẹ riobọhọ awọ Ebaibol jọ nọ a kere nọ e kẹ ọkpọvio nọ a re fievahọ rọ kẹ omomọvo evaọ uviuwou na. Se enọ nọ e rọ emuhọ uwuhrẹ na kpobi. Nọ ohwo na sọ ọ gwọlọ se iyo na. Ọ tẹ gwọlọ, fi ibroshọ na họ ada kẹe evaọ unu azọhọ riẹ. Ta nọ who ti zihe ze okiofa re wha gbẹ t’ẹme kugbe kpahe ọkpọvio efa nọ e rọ eva Ebaibol na kẹ evawere uzuazọ uviuwou.
6 Uko obeva Odibọgba Uvie Mai ọrọ March 1997 o tudu họ omai awọ re ma wo udu evaọ eruo izihebro. O jiroro nọ ma rehọ ibroshọ Ọghẹnẹ Ọ Gwọlọ na mu iwuhrẹ Ebaibol họ evaọ ozihebro, otẹrọnọ o lọhọ evaọ iweze ọsosuọ họ. Ẹgwọlọ ohwo-akpọ nọ o mae rro họ re a wuhrẹ oware nọ Ọghẹnẹ ọ gwọlọ a ve je ru ei. (Kọl. 1:9, 10) Ma te jọ ehri obufihọ kẹ ahwo gaga evaọ etoke April gbe May otẹrẹnọ ma re mu ai họ ewuhrẹ oware nọ ma riẹ kpahe ẹgwọlọ Jihova kẹ uzuazọ.—1 Kọr. 9:23.