Whọ r’Oja kẹ Amọfa!
1 N’oke ruoke, iwuhrẹ ukoko e sai vo omai ẹsiẹvo hayo bu viere, bi roro nọ ‘mẹ te j’oja kẹ ohwo ọvo ho; a ti tube muẹrohọ sọ mẹ jariẹ dede he.’ Oyena yọ uzẹme he! Wọhọ epaọ abọ jọ ugboma na, mai kpobi ma wo abọ iruo nọ u w’uzou evaọ ẹnyaharo ukoko na. (1 Kọr. 12:12) Nọ ma gbe kpohọ uwuhrẹ ọ ẹkpoka jọ họ, o rẹ sai kpomahọ omakpokpọ ẹzi amọfa nọ e nya. Otẹrọnọ whọ gbẹ riẹ hẹ, jọ u mu owhẹ ẹro nọ—whọ r’oja kẹ amọfa!
2 Abọ Iruo Ologbo nọ Who re Ru: O jọ irẹro Pọl re o kuomagbe inievo riẹ. Ahwo Rom 1:11, 12 u dhesẹ oware nọ o soriẹ: ‘Re mẹ ruẹse ghale okẹ ẹzi jọ kẹ owhai . . . re ma tudu họ ohwohwo awọ ẹkwoma ẹrọwọ ohwohwo, te o rai te omẹ.’ Epavo na re, ẹkwoma ọkpahe-fihọ mai, abọ nọ ma re wo evaọ ewuhrẹ na, gbe uzedhe ẹjọkugbe mai, ma re ru abọ ologbo evaọ ẹbọga ohwohwo re ma gbẹ nyaharo evaọ edhere ẹrọwọ.—1 Tẹs. 5:11.
3 Kọ whọ gbẹ be hai rẹro re whọ ruẹ amọfa evaọ iwuhrẹ ukoko? Whọ rẹ gaviezọ kẹ ẹkpahe-fihọ rai gaga je wo ovuhumuo kẹ odhesẹvia ẹrọwọ rai. Ekẹ ẹzi rai e rẹ zọhọ fihọ ọbọga ra. O hae jọ nọ a ziọ ewuhrẹ hẹ, o hae te jọ owhẹ oma wọhọ ẹsenọ oware jọ nọ u w’uzou u vru no. Ere o rẹ jọ inievo emetẹ gbe emezae ra oma kpahe owhẹ re otẹrọnọ whọ gbẹ riẹ hẹ.
4 Abọ Ologbo nọ Iwuhrẹ I re Ru: Okejọ Uwou-Eroro Na o ta kpahe epanọ iwuhrẹ na i w’uzou te kẹ azọ mai evaọ abọ ẹzi, ta nọ: “Evaọ akpọ ọnana nọ ozighi ọ bẹre no na, nọ ọ vọ avọ ọfariẹ-ogbe na, ukoko Ileleikristi na yọ uvi adhẹzọ ẹzi . . . , oria omakọkọ udhedhẹ gbe uyoyou. Fikiere, hae jọ iwuhrẹ riẹ kpobi.” (w93-E 8/15 11) Evaọ kẹdẹ kẹdẹ, ma rẹ rẹriẹ aro ku iyero nọ e rẹ rọ omai oma evaọ abọ ẹzi. Ma gbẹ yọrọ oma ha, awa-ọruọ mai ọ rẹ rehọ iroro mai te epanọ ma gbẹ ruẹ ẹgwọlọ ẹzi nọ ọ mai w’uzou hu. Mai kpobi ma rọ ẹro so ohwohwo rọkẹ uduotahawọ nọ ma gwọlọ re ma ruẹsi wo okugbe gbe ọwhọ evaọ egagọ Ọghẹnẹ.—Hib. 10:24, 25.
5 O r’oja re ma kpohọ iwuhrẹ. Ẹyao hayo oware idudhe o sae kru omai kpemu ẹsejọ. O gbẹ rọ utioye he, jọ ma ru ọtamuo re ẹsikpobi a hai kele omai fihọ udevie ogbotu nọ i kokohọ enọ i bi jiri Jihova kugbe!—Ol. 26:12.