“Thomavẹre kẹ Iruo Iwoma I Ruo Kpobi”
1 A rọ efe emu abọ-ẹzi buobu ghale ahwo Jihova nẹnẹ. (Aiz. 25:6) Ebe nọ a kere no Ikereakere ze buobu e riẹ nọ ma be reawere rai ẹkwoma uwuhrẹ omobọ ohwo gbe uviuwou jegbe eva iwuhrẹ ukoko, ikokohọ esese gbe ilogbo. Kọ ma be rehọ uvẹ nana kpobi ruiruo ziezi avọ iroro ọ ‘ẹgba kiete, jẹ thomavẹrẹ kẹ iruo iwoma kpobi i ruo’?—2 Tim. 3:17.
2 Dai roro kpahe oma ọ emu abọ-ẹzi kẹ ukpe 1998 na, nọ u te udevie no na! Ẹkwoma iwuhrẹ ẹkpoka ukoko na, ma bi wuhrẹ eware jọ no ebe 23 erọ Ikereakere Griki Ileleikristi na ze, be kiẹ iyẹrẹ nọ e rọ Okugbe Evaọ Egagọ Ọghẹnẹ Uzẹme Ọvo Na kpobi riwi. Ma be jẹ kiẹ abọvo-abasa obe Eriariẹ na riwi, enwenọ oma ọ obe Evawere Uviuwou na soso. Ofariẹ, a be ko omai ẹkwoma uvitha 12 erọ Odibọgba Uvie Mai, izoẹme uwuhrẹ 52 erọ Uwou-Eroro Na, gbe enwenọ unu evuẹ ogbotu itieye na kpahe izoẹme Ebaibol sa-sa. Obọdẹ oma ọ ikokohọ ilogbo gbe esese i kuomagbe enana kpobi. Eware iwoma abọ-ẹzi nọ a rọ k’omai na i bu kẹhẹ!
3 Wo Ovuhumuo Kẹ Eruẹrẹfihọ Jihova: Re ma wo erere vọvọ, o gwọlọ re ma vuhu oware nọ Jihova ọ jẹ kẹ emu abọ-ẹzi otiọye na buobu. Nọ ma tẹ be rehọ eware iwoma enana ko oma mai o rẹ bọ ẹrọwọ mai ga jẹ bọ usu mai kugbei gaga. (1 Tim. 4:6) Dede na, orọnikọ fiki uthubro mai ọvo a jẹ be kẹ emu abọ-ẹzi na ha. O rẹ wọ omai re ma ghale uzẹme na kugbe amọfa jẹ thomai vẹrẹ re ma ru ere ziezi wọhọ egbodibo ọ emamọ usi na.—2 Tim 4:5.
4 Joma rri ẹgwọlọ abọ-ẹzi mai vo ho, rekọ ẹsikpobi ma hae kọ isiuru kẹ eruẹrẹfihọ ibuobu erọ abọ-ẹzi nọ e rẹ v’eva nọ i bi no emẹjẹ Jihova ze. (Mat. 5:3; 1 Pita 2:2) Re a wo erere vọvọ o gwọlọ nọ a rẹ ruẹrẹ oke jọ fihọ kẹ eware itieye nọ i w’uzou na wọhọ uwuhrẹ omobọ ohwo ẹsikpobi gbe uwuhrẹ Ebaibol uviuwou jegbe ekpohọ ewuhrẹ ukoko na. (Ẹf. 5:15, 16) Osohwa evawere nọ u re noi ze o rẹ rọwokugbe uduotahawọ nọ Pọl o kere se Ileleikristi ẹrọwọ Hibru, wọhọ epanọ a kere fihọ Ahwo Hibru 13:20, 21 na.