Dhesẹ Obe ọ Ria Bẹdẹ Bẹdẹ na k’Ahwo Ziezi
1 Jesu o dhesẹ ona evaọ emuhọ ẹme riẹ. Ọ riẹ ẹme nọ ọ rẹ ta re ọ kpare isiuru ahwo. Evaọ ojọ o mu ẹme họ kugbe aye Sameria ẹkwoma ame nọ ọ rẹ da nọ ọ yare riẹ. Onana o tẹ nwani ru ei gaviezọ keme na ‘ahwo Ju avọ ahwo Sameria a re ru oware ovo kugbe he.’ Uwhremu riẹ ẹmeọta nọ o no rie ze o te fiobọhọ kẹe gbe amọfa buobu kurẹriẹ. (Jọn 4:7-9, 41) Ma rẹ sai wuhrẹ no oriruo riẹ ze.
2 Okenọ whọ be ruẹrẹ oma họ re who fi obe ọ Ria Bẹdẹ Bẹdẹ na họ ada, nọ oma ra nnọ, ‘Didi oware o rọ ọdawẹ ahwo nọ a rọ ẹkwotọ mai? Eme o ti si ọmọ-uzoge urru, ọkpako, ọzae-orọo, hayo aye-orọo?’ Whọ rẹ sae ruẹrẹ ẹme-emuhọ fihọ vrẹ ọvo jẹ m’oma re whọ rehọ onọ o mai kiehọ uyero na ro ruiruo.
3 Nọ ọwhrẹkpo uzuazọ uviuwou o rọ ọdawẹ kẹ ibuobu na, whọ sae ta nọ:
■ “Otunyẹ ikẹdẹ kẹdẹ ọrọ uzuazọ u fi olahiẹ ulogbo họ uviuwou inẹnẹ no. Kọ diẹse a jẹ sai wo obufihọ? [Kuvẹ kẹ uyo.] Ebaibol na o sae jọ uvi obufihọ k’omai. [Se 2 Timoti 3:16, 17.] Ikereakere na e kẹ ekpọvio nọ e vọ avọ erere nọ e rẹ sai fiobọhọ kẹ iviuwou nọ e jẹ zọ. Muẹrohọ ẹme nọ a ta evaọ edhe-ẹme avọ 3 evaọ ẹwẹ-obe avọ 238 ọrọ obe onana, Whọ Sae Ria Bẹdẹ Bẹdẹ eva Aparadase ọ Otọakpọ.” Se edhe-ẹme avọ 3, re who fi obe na họ ada.
4 Ibuobu e be ruawa kpahe eviharo ẹbẹbẹ egbulegbu. Whọ rẹ sae ta ẹme-emuhọ ọnana:
■ “Ma be t’ẹme kugbe ahwo kpahe ufuoma omobọ ohwo. Egbulegbu ọ wariẹ omai họ, yọ o kpoma họ izuazọ mai. Kọ eme who roro nọ o rẹ gwọlọ re oma o f’omẹ avọ owhẹ evaọ iyẹrẹ na eva aso?” Whọ sai se Olezi 37:10, 11 jẹ riobọhọ eghale nọ Uvie Ọghẹnẹ o te whaze, evaọ ẹwẹ-obe avọ 156-158 ọrọ obe ọ Ria Bẹdẹ Bẹdẹ na.
5 Otẹrọnọ whọ gwọlọ emuhọ ọlọlọhọ, whọ sae ta nọ:
■ “Ma be tudu họ erivẹ mai awọ re a roro kpahe obaro ogbunu nọ Ebaibol na ọ y’eyaa riẹ k’omai. [Se Eviavia 21:3, 4.] Kọ onana u si owhẹ urru? [Kuvẹ kẹ uyo.] Uzou avọ 19 orọ obe onana u fielo họ eghale efa nọ ahwo ẹmeoyo a ti wo evaọ otọ Uvie Ọghẹnẹ.” Otẹrọnọ ohwo na o wo isiuru, fi obe ọ Ria Bẹdẹ Bẹdẹ na họ ada kẹe.
6 Oma nọ a rẹ ruẹrẹhọ kẹ emuhọ-ẹme obọdẹ o rẹ sai fiobọhọ k’owhẹ re whọ nyate enọ ohọo ẹrẹreokie u bi kpe.—Mat. 5:6.