Ọtamuo Mai—Re Ma Le Edhere Uzuazọ Jihova
1 Abọ ologbo jọ ọrọ Ikokohọ “Edhere Uzuazọ Ọghẹnẹ” na họ ọtamuo nọ ma rọwo kugbe evaọ ẹme ekuhọ na. O rehọ owhowhovia na muhọ inọ: “Ma rọwo no udu kpobi ze inọ edhere Ọghẹnẹ họ edhere uzuazọ nọ ọ mai woma.” Kareghẹhọ eme isiuru jọ evaọ ọtamuo ọyena nọ ma jọ yo nnọ, “E!” na.
2 O rọ ọtamuo mai re ma jọ fuafo evaọ aro Jihova jẹ kare epe no akpọ nana. Ma ti gbe fi oreva Ọghẹnẹ họ oware ọsosuọ evaọ izuazọ mai. Ẹkwoma Ẹme riẹ, Ebaibol na, nọ ma re ro ruiruo wọhọ oware nọ o rẹ kp’omai, ma te rẹriẹ kpohọ ẹkpẹlobọ hayo obọze he, ma vẹ rehọ ere k’imuẹro nnọ edhere Ọghẹnẹ o kpehru vi edhere akpọ na thethabọ.
3 Akpọ soso o wo orivo kẹ edhere uzuazọ Ọghẹnẹ avọ iyẹrẹ iyoma nọ i bi noi ze. (Jeri. 10:23) Fikiere Owuhrẹ Ologbo mai, Jihova, o re gbe wuhrẹ mai hrọ, ọnọ ọ ta nọ: “Ọnana họ edhere na. Wha nya e.” (Aiz. 30:21) Edhere uzuazọ Jihova, wọhọ epanọ a rẹ ruẹ evaọ Ikereakere na, oye o mai kpehru evaọ abọ kpobi. Re ma ruẹsi le edhere ọyena, o r’oja re ma rehọ uvẹ kpobi nọ Jihova o bi ro wuhrẹ omai ruiruo ziezi.
4 Omaa Ewuhrẹ Jihova nọ O Mai Kpehru: Jihova o bi wuhrẹ omai uvi ẹjiroro uzuazọ gbe epanọ ma sae rọ rehọ uzuazọ mai ruiruo nọ o rẹ mai kẹ erere. O bi wuhrẹ omai epanọ ma sai ro wo ẹnyaharo evaọ ewoma izuazọ mai evaọ abọ iroro, uruemu, gbe abọ-ẹzi. O bi wuhrẹ omai epanọ ma sae rọ rria dhedhẹ kugbe inievo mai, uviuwou mai, gbe erivẹ mai. O bi ru onana ẹkwoma obe riẹ, Ebaibol na, gbe ẹkwoma ukoko riẹ.
5 Iwuhrẹ ukoko mai e r’oja gaga evaọ abọ ọnana. Nọ ma bi kpohọ je w’obọ kẹse kẹse evaọ iwuhrẹ isoi na kpobi na, ma bi wo ewuhrẹ ọkẹkẹe wọhọ egbodibo emamọ usi na gbe obọdẹ ewuhrẹ ọliọliọ kpahe uzuazọ Oleleikristi. (2 Tim. 3:16, 17) Owuhrẹ Ologbo mai ọ be kẹ ewuhrẹ uvie ọfa ẹkwoma ikokohọ esese gbe ilogbo. Ute mai o rẹ jọ inọ uvumọ ewuhrẹ hayo abọ riẹ jọ ọ rẹ vrẹ omai vievie he otẹrọnọ oma mai o ga yọ uyero mai o k’omai uvẹ nọ ma rẹ rọ nya.
6 Joma gbe le edhere uzuazọ Ọghẹnẹ avọ osegboja evaọ edẹ obaro na, rọ kẹ ujiro Jihova gbe erere ebẹdẹ bẹdẹ mai!—Aiz. 48:17.