Gbẹ Hae Nya Evaọ Edhere Jihova

“Hẹrẹ ỌNOWO whọ nya edhere riẹ, ọ rẹ te kpare owhẹ kpehru re whọ reuku otọ na.”—OLEZI 37:34.

1, 2. Eme ẹnya evaọ edhere Jihova o gwọlọ mi Devidi ovie na, kọ eme o gwọlọ mi omai nẹnẹ?

“WUHRẸ omẹ edhere nọ mẹ rẹ nya, keme whẹ mẹ kpare ẹzi mẹ kpehru kẹ.” (Olezi 143:8) Ileleikristi nẹnẹ a be rọ udu kpobi wariẹ eme ọ Devidi ovie eyena. A ghinẹ gwọlọ ru Jihova eva were re a jẹ nya evaọ edhere riẹ. Eme onana o gwọlọ? Rọ kẹ Devidi, u dhesẹ ekoko uzi Ọghẹnẹ. O gwọlọ evaifihọ Jihova viukpọ usu kugbe erẹwho na. Ẹhẹ, u dhesẹ ẹgọ Jihova avọ omarokpotọ, orọnikọ eghẹnẹ ahwo nọ e kẹle riẹ hẹ. Rọ kẹ Ileleikristi, ẹnya evaọ edhere Jihova o gwọlọ viere.

² Evaọ abọjọ, ẹnya evaọ edhere Jihova nẹnẹ o gwọlọ ẹrọwọ nọ a re fihọ idhe ẹtanigbo Jesu Kristi, re a vuhu iei mu wọhọ “edhere na, gbe uzẹme, gbe uzuazọ.” (Jọn 3:16; 14:6; Ahwo Hibru 5:9) U te je dhesẹ erugba “uzi Kristi na,” onọ u kugbe edhesẹ uyoyou kẹ ohwohwo, maero rọ kẹ inievo Jesu nọ a wholo na. (Ahwo Galesha 6:2; Matiu 25:34-40) Ahwo nọ a be nya evaọ edhere Jihova a re you ehri-izi gbe ijaje riẹ. (Olezi 119:97; Itẹ 4:5, 6) A re rri uvẹ-ọghọ rai nọ a bi ro w’obọ evaọ odibọgba Oleleikristi na ghaghae. (Ahwo Kọlọsi 4:17; 2 Timoti 4:5) Olẹ o rọ abọ ekẹse kẹse uzuazọ rai. (Ahwo Rom 12:12) Yọ a re ‘fiẹrohọ otọ re a seba ẹnya wọhọ igheghẹ rekọ wọhọ iwareghẹ.’ (Ahwo Ẹfẹsọs 5:15) A re gbolo efe abọ-ẹzi họ akotọ kẹ efe ubroke hayo isiuru ethọthọ iwo ho. (Matiu 6:19, 20; 1 Jọn 2:15-17) Ofariẹ, omarokpotọ kẹ Jihova gbe eva nọ a re fihọ iẹe e r’oja. (2 Ahwo Kọrint 1:9; 10:5; Ahwo Ẹfẹsọs 4:24) Fikieme? Keme uyero mai o wọhọ orọ Izrẹl anwae na.

Ẹgwọlọ kẹ Evaifihọ gbe Omarokpotọ

3. Fikieme omarokpotọ, ẹrọwọ, gbe evaifihọ i re ro fiobọhọ k’omai daji edhere Jihova?

³ Izrẹl yọ orẹwho osese nọ erivẹ ewegrẹ nọ i re ru ehaa ethọthọ evaọ egagọ eghẹnẹ emedhọ e wariẹhọ. (1 Iruẹru-Ivie 16:26) Izrẹl ọvo họ ọnọ ọ jẹ gọ Ọghẹnẹ uzẹme ọvo nọ a rẹ ruẹ hẹ na, Jihova, yọ ọ gwọlọ nọ a rẹ yọrọ ute uruemu ukpehru. (Iziewariẹ 6:4) Epọvo na nẹnẹ, ima ahwo kakao jọ ọvo a be gọ Jihova, yọ a be rria akpọ ahwo nọ a bu te ima-idu ezeza, enọ eriwo ute gbe egagọ rai e hẹrioma gaga no erai. Ma tẹ rọ usu ima ahwo ekakao eyena, ma rẹ yọrọ oma hrọ re edhere ọthọthọ ọ se omai oma ba ekpehọ. Evaọ oghẹrẹvẹ? Omarokpotọ kẹ Jihova Ọghẹnẹ, ẹrọwọ nọ ma re fihọ iẹe, gbe evaifihọ egaga inọ o ti ru eyaa riẹ gba i re fiobọhọ. (Ahwo Hibru 11:6) Onana u re ru ei nọ ma gbe ro fieva mai họ eware nọ akpọ na o fi ẹruore họ họ.—Itẹ 20:22; 1 Timoti 6:17.

4. Fikieme erẹwho na a rọ rọ ‘ebi iroro’?

⁴ Pọl ukọ na o dhesẹ epanọ Ileleikristi a rẹ hẹrioma no akpọ na te nọ o kere nọ: “Onana mẹ tae, je se isẹi eva Ọnowo na, re nọ umuo na vrẹ wha siọ epanọ ahwo Egedhọ a rẹ nya ba ẹnya, eva iroro diodi eva rai; nọ otoriẹ rai u re biebi, nọ i vru nọ uzuazọ nọ Ọghẹnẹ ọ kẹ rae fiki ogbori nọ rọ eva rai, fiki eva egaga rai.” (Ahwo Ẹfẹsọs 4:17, 18) Jesu họ “uvi elo” na. (Jọn 1:9) Ohwo nọ ọ se riẹ kpobi hayo nọ ọ ta nọ ọ rọwo e riẹ rekọ o bi yoẹme kẹ “uzi Kristi na” ha ọ rọ ‘ebi iroro.’ Ukpenọ a nya evaọ edhere Jihova, a “vru nọ uzuazọ nọ Ọghẹnẹ ọ kẹ” rai no. Epanọ a roro nọ a wo areghẹ te kẹhẹ evaọ edhere akpọ, a rọ “ogbori” kpahe eriariẹ ọvo nọ u re su kpohọ uzuazọ na, eriariẹ Jihova Ọghẹnẹ gbe Jesu Kristi.—Jọn 17:3; 1 Ahwo Kọrint 3:19.

5. Dede nọ elo uzẹme na ọ be jọ akpọ na lo, fikieme idu ahwo buobu e rọ rrọ gaga?

⁵ Ghele na, elo uzẹme na ọ be jọ akpọ na lo! (Olezi 43:3; Ahwo Filipai 2:15) “Areghẹ o bi bo via evaọ obọ iyẹrẹ.” (Itẹ 1:20) Ukpe n’ukpo, Isẹri Jihova a raha bu vi euwa ima-odu rọ ta kẹ erivẹ rai kpahe Jihova Ọghẹnẹ gbe Jesu Kristi. Ahwo idu egba buobu a dede onana rehọ. Kọ u re gb’omai unu nọ amọfa buobu a dede onana rehọ họ? Ijo. Pọl ọ ta kpahe “iroro diodi eva rai.” Ahwo jọ a wo idu nọ i re yoẹme he fiki oriobọ hayo uyoyou ugho. Egagọ erue hayo eriwo okọ akpọ na nọ o rọ odode nẹnẹ i bi kpomahọ amọfa. Ẹgaga uzuazọ o wọ ahwo jọ kiemu ku Ọghẹnẹ no. Amọfa a se nọ a rẹ nyate ute uruemu ukpehru Jihova. (Jọn 3:20) Kọ udu ohwo nọ ọ be nya evaọ edhere Jihova o sae jọ gaga evaọ abọ eyena?

6, 7. Dede nọ a jọ egegagọ Jihova Ọghẹnẹ, etoke vẹ emọ Izrẹl a ro kie, kọ fikieme?

⁶ Onana o via kẹ Izrẹl anwae, wọhọ epanọ Pọl o dhesẹ. O kere nọ: “Whaọ eware nana e rọ unu ovẹvẹ kẹ omai re eware iyoma e se omai uru ba esio, wọhọ epanọ u si rai uru. Wha jọ egedhọ gbe he wọhọ epanọ otu rai jọ a jọ, wọhọ epanọ a kere nọ, ‘Ahwo a keria a jẹ re da, a vẹ kparoma kọ eha igbe.’ Ma rẹ sae rọ oma mai kẹ igberẹ-ibro ho, wọhọ epanọ otu rai jọ o ru, nọ ahwo odu udhegbesa a je kie whu eva ẹdẹ ọvo.”—1 Ahwo Kọrint 10:6-8.

⁷ Pọl ọ kake ta kpahe okenọ Izrẹl ọ rọ gọ ọmọ-eruẹ oro eva otọ Ugbehru Sainai. (Ọnyano 32:5, 6) Onana o rọ uzou-uveghe kẹ ujaje Ọghẹnẹ nọ a rọwo nọ a re koko umutho eka jọ nọ e vrẹ na. (Ọnyano 20:4-6; 24:3) Kẹsena, Pọl ọ tẹ ta kpahe okenọ Izrẹl o ro lele emetẹ Moab r’uzou kpotọ kẹ Ebale. (Ikelakele 25:1-9) Egagọ ọmọ-eruẹ o vọ avọ omawere odode kpobi, “eha igbe.”a Egagọ Ebale avọ ọfariẹ-ogbe usu. (Eviavia 2:14) Eme jabọ emọ Izrẹl a ro ru imuemu enana? Keme a kẹ idu rai uvẹ re ‘a siuru eware iyoma’—makọ edhọgọ na hayo iruemu ethọthọ nọ i re lele iei.

8. Eme ma rẹ sai wuhrẹ no oriruo Izrẹl ze?

⁸ Pọl o dhesẹ nọ ma re wuhrẹ no eware enana ze. Wuhrẹ eme? O rọ oware ugheghẹ re Oleleikristi o ruwẹ kẹ ọmọ-eruẹ oro hayo ọghẹnẹ Moab anwae jọ. Rekọ ẹvẹ kpahe ọfariẹ-ogbe hayo omawere odode nọ a rẹ kpọ họ? Enana e rọ odode nẹnẹ, yọ ma tẹ kuvẹ re isiuru rai e rro evaọ idu mai, e rẹ hẹriẹ omai no Jihova. O rẹ wọhọ epaọ ẹsenọ ma gẹdhọ—omahẹriẹ no Ọghẹnẹ. (Wawo Ahwo Kọlọsi 3:5; Ahwo Filipai 3:19.) Uzẹme, Pọl o ku ẹmeọta eware enana họ ẹkwoma udu nọ ọ ta họ ibe enọ e rọwo nọ: “Siọ edhegọ ba.”—1 Ahwo Kọrint 10:14.

Obufihọ Evaọ Ẹnya Edhere Ọghẹnẹ

9. (a) Didi obufihọ ma wo re ma ruabọhọ ẹnya evaọ edhere Jihova? (b) Ovẹ họ edhere jọ nọ ma be rọ jọ ‘emu mai yo ẹme’?

⁹ Ma tẹ gwọlọ nọ ma rẹ ruabọhọ ẹnya evaọ edhere Jihova, ma wo imuẹro obufihọ. Aizaya ọ ruẹaro nọ: “Ezọ rai i re ti yo ẹme evaọ obọ emu rai nọ, ‘Ọnana họ edhere na, wha nya e,’ okenọ wha ri obọze hayo ẹkpẹlobọ.” (Aizaya 30:21) Ẹvẹ ‘ezọ mai’ i bi ro yo ‘ẹme evaọ emu mai’? Whaọ, ohwo ọvo nẹnẹ o ri yo urru hayo wo ovuẹ no obọ Ọghẹnẹ ze he. “Ẹme” nọ a yo na u bru omai kpobi ze evaọ edhere ọvo na. Orọ ọsosuọ, u no Ikereakere efuafo na ze, Ebaibol na, onọ u wo iroro Ọghẹnẹ gbe okerefihotọ iruẹru riẹ kugbe ahwo-akpọ. Nọ o rọnọ kẹdẹ kẹdẹ ma rẹriẹ ovao ku ehri iroro otu “nọ i vru nọ uzuazọ nọ Ọghẹnẹ ọ kẹ rae” no na, rọkẹ emamọ omokpokpọ abọ-ẹzi, u fo re ma se Ebaibol na je roro kpahe iẹe ẹsikpobi. Onana u re fiobọhọ k’omai whaha “eware diodi” re ma jẹ “thomavẹre kẹ iruo iwoma i ruo kpobi.” (Iruẹru 14:14, 15; 2 Timoti 3:16, 17) O te k’omai ẹgba, ru omai ga, je fiobọhọ k’omai ‘ru edhere mai kparobọ.’ (Joshua 1:7, 8) Fikiere, Ẹme Jihova o tudu họ nọ: “Whaọ enẹna, emọ mẹ, gaviezọ mẹ; eva ewerọ i te otu nọ o bi lele idhere mẹ. Yo uwuhrẹ na re who wo areghẹ, whọ jẹ e kufiẹ hẹ.”—Itẹ 8:32, 33.

10. Ovẹ họ edhere avivẹ nọ ma be rọ jọ ‘emu mai yo ẹme’?

¹⁰ ‘Ẹme nọ ọ rọ emu mai na’ o rẹ jẹ nyaze ẹkwoma ‘ọrigbo ẹrọwọ avọ areghẹ na,’ ọnọ ọ be k’omai ‘emuore evaọ ẹruoke’ na. (Matiu 24:45-47) Edhere jọ nọ a be rọ kẹ emuore na họ ebe nọ a bi kporo no Ebaibol ze, yọ evaọ ikpe jọ nọ e vrẹ na, emuore nana o bu gaga no. Wọhọ oriruo, ẹkwoma emagazini Uwou-Eroro Na, otoriẹ mai kpahe eruẹaruẹ na o nyaharo no. Evaọ emagazini ọnana, a tuduhọ omai awọ no re ma thihakọ evaọ iruo usiuwoma ota gbe eruo-ilele na makọ ababọ isiuru nọ u bi vihọ, a fiobọhọ k’omai no re ma whaha ekiero ẹta, yọ a tuduhọ omai awọ no re ma wo ekwakwa iwoma Oleleikristi. Ẹvẹ emuore evaọ ẹruoke otiọye na o ghare omai obọ te!

11. Dhesẹ edhere avesa nọ ma be rọ jọ ‘emu mai yo ẹme.’

¹¹ Ọrigbo ẹrọwọ avọ areghẹ na ọ be jẹ k’omai emuore ẹkwoma iwuhrẹ ẹsikpobi mai. Enana i kugbe iwuhrẹ ukoko mai, ikokohọ ivẹ ẹgbukpe na, gbe ikokohọ ilogbo. Oleleikristi ẹrọwọ vẹ o rri omukokohọ itieye na ghare he? E rọ obọdẹ obufihọ re e thomai uke nya evaọ edhere Jihova. Nọ ahwo buobu a rẹ raha oke buobu eva obọ iruo hayo evaọ isukulu evaọ udevie enọ i wo ẹrọwọ mai hi na, usu ẹsikpobi kugbe Ileleikristi u re siwi uzuazọ. Iwuhrẹ e rẹ k’omai obọdẹ uvẹ nọ ma rẹ rọ ‘kpakpa amọfa kẹ uyoyou gbe iruo ezi.’ (Ahwo Hibru 10:24) Ma you inievo mai, yọ ma you usu rai.—Olezi 133:1.

12. Didi ọtamuo Isẹri Jihova a wo, kọ ẹvẹ a ro dhesẹ iẹe kẹle na?

¹² Avọ ẹgba no emuore abọ-ẹzi otiọye na ze, enwenọ ima ahwo ezeza nẹnẹ e be nya evaọ edhere Jihova, yọ ima efa i bi wuhrẹ Ebaibol na re a wuhrẹ epanọ a re ro ru ere. Kọ udu u bi no ai awọ no fikinọ a rọ kakao a tẹ rehọ ai wawo ima-idu nọ e rọ otọakpọ na? Vievie! O rọ ọtamuo rai re a gbe yo ‘ẹme nọ ọ rọ emu rai na,’ be rọ omakpotọ ru oreva Jihova. Wọhọ odhesẹvia ẹgbede ọrọ ọtamuo ọnana, evaọ Ikokohọ Ubrotọ gbe erọ Akpọ-Soso “Edhere Uzuazọ Ọghẹnẹ” ọrọ 1998-1999, ahwo nọ a jọ okokohọ na a te ru ọtamuo jọ bi dhesẹ edikihẹ eva rai. Eme ọtamuo na ena.

Ọtamuo

13, 14. Didi eriwo areghẹ ọrọ uyero akpọ na Isẹri Jihova a wo?

¹³ “Mai, wọhọ Isẹri Jihova nọ i kokohọ eva Okokohọ “Edhere Uzuazọ Ọghẹnẹ” na, ma rọwo no udu kpobi ze inọ edhere Ọghẹnẹ họ edhere uzuazọ nọ ọ mai woma. Ma vuhumu, dede, inọ ogbotu ahwo-akpọ nẹnẹ na a rri rie ere he. Ukoko ahwo-akpọ o dawo ẹjiroro, ereghẹ-ididi, gbe iwuhrẹ egagọ buobu riwi no kpahe oware nọ edhere uzuazọ o rọ. Eriwo oruọzewọ ọrọ ikuigbe ohwo-akpọ gbe iyero akpọ nẹnẹ na o kẹ imuẹro uzẹme ovuẹ Ọghẹnẹ nọ a kere fihọ Jerimaya 10:23 na: ‘Ohwo o wo ogaga nọ o ro su oma obọ riẹ hẹ.’

¹⁴ “Kẹdẹ kẹdẹ ma be ruẹ imuẹro efa nọ i bi sisẹri kpahe uzẹme eme eyena. Evaọ abọ ologbo, ukoko ohwo-akpọ u wo orivo kẹ edhere uzuazọ Ọghẹnẹ. Ahwo a bi le oware nọ a roro nọ u kiehọ evaọ aro rai. Iyẹrẹ iyoma i no rie ze no—uzuazọ uviuwou nọ o be whọlọ kuotọ, bi fi emọ họ ababọ ọkpọvio; ogbotu ahwo nọ a bi le ekwakwa iwo, ukuhọ riẹ kọ ufofe gbe idhọvẹ; ugbarugba gbe ozighi, nọ o bi kpe ahwo nọ a w’unu hu; ozighi uyẹ gbe emo, nọ i bi kpe izuazọ ahwo gbidigbidi; ọfariẹ-ogbe nọ ọ d’otọ fia, nọ o be lẹliẹ eyao igberẹ-ibro nọ i re vo viharo. Enana yọ umutho jọ evaọ ebẹbẹ ilogbo nọ e rẹ whaha ilale ọ evawere, udhedhẹ, gbe omofọwẹ.

15, 16. Kpahe edhere uzuazọ Ọghẹnẹ, didi ọtamuo a dhesẹ via?

¹⁵ “Fiki uyero iyẹ ohwo-akpọ gbe esikẹle ‘ẹdẹ ẹmo ologbo Ọghẹnẹ Erumeru,’ nọ a re se Amagẹdọn na (Eviavia 16:14, 16), mai wọhọ Isẹri Jihova ma gba riẹ mu no inọ:

¹⁶ “Orọ ọsosuọ: Ma rri omobọ mai wọhọ nnọ Jihova Ọghẹnẹ họ ọnọ o w’omai, nọ mai omomọvo ma rehọ oma mai kpobi mudhe kẹe no, yọ ma te yọrọ ẹrọwọ nọ o re nuhu hu evaọ ọruẹrẹfihọ Jihova ọrọ ẹtanigbo na ẹkwoma Ọmọ riẹ, Jesu Kristi. Ma gba riẹ mu no re ma nya evaọ edhere uzuazọ Ọghẹnẹ, gọe wọhọ Isẹri riẹ jẹ roma kpotọ kẹ esuo-okpehru riẹ nọ u bi dhesẹ oma via ẹkwoma isuẹsu Jesu Kristi.

17, 18. Didi oria Isẹri Jihova a gbe dikihẹ kpahe ute uruemu gbe eyero-inievo Ileleikristi?

¹⁷ “Orọ avivẹ: Ma te gbẹ nya lele ute uruemu ukpehru gbe ute abọ-ẹzi Ebaibol na. Ma gba riẹ mu no re ma kẹnoma no epanọ erẹwho na e be nya evaọ iroro ifofe eva rai. (Ahwo Ẹfẹsọs 4:17-19) O rọ ọtamuo mai re ma jọ fuafo evaọ aro Jihova jẹ kare epe no akpọ ọnana.—Jemis 1:27.

¹⁸ “Orọ avesa: Ma te yọrọ edikihẹ Ikereakere mai whawha wọhọ eyero inievo Ileleikristi akpọ-soso. Ma te yọrọ seomabaedhehọ ọrọ Ileleikristi evaọ udevie erẹwho na, ma rẹ yọrọ oma re omukpahe hayo omohẹriẹ ovioma, orẹwho, hayo uyẹ o siọ omai ba ekru.

19, 20. (a) Eme eyewọ Ileleikristi a ti ru? (b) Ẹvẹ Ileleikristi uzẹme kpobi a ti gbe ro dhesẹ oma rai wọhọ ilele Kristi?

¹⁹ “Orọ avọ ene: Mai nọ e rọ eyewọ ma ti wuhrẹ emọ mai kpahe edhere Ọghẹnẹ. Ma ti dhesẹ emamọ oriruo evaọ uzuazọ Oleleikristi, nọ o kẹre te isase Ebaibol ẹsikpobi, uwuhrẹ uviuwou, gbe abọ owo evaọ ukoko Ileleikristi no ẹwẹ-kpobi ze jegbe evaọ usiuwoma ota na.

²⁰ “Orọ avọ isoi: Mai kpobi ma te daoma kọ ekwakwa Ọghẹnẹ nọ Ọnọma omai ọ kẹ oriruo riẹ na, yọ ma te daoma raro kele uruemu riẹ gbe idhere riẹ, wọhọ epanọ Jesu o ru. (Ahwo Ẹfẹsọs 5:1) Ma gba riẹ mu no re ma ru eware mai kpobi avọ uyoyou, ma vẹ rehọ ere dhesẹ oma mai wọhọ ilele Kristi.—Jọn 13:35.

21-23. Eme Isẹri Jihova a ti gbe ru, kọ imuẹro eme a wo?

²¹ “Orọ avọ ezeza: Ma te ruabọhọ ẹvuẹ emamọ usi Uvie Ọghẹnẹ haro ababọ eriosehọ, ru ilele, yọ ma ti wuhrẹ ai kpahe edhere uzuazọ Ọghẹnẹ jẹ tudu họ ae awọ re a gbe wuhrẹ viere evaọ iwuhrẹ ukoko na.—Matiu 24:14; 28:19, 20; Ahwo Hibru 10:24, 25.

²² “Orọ avọ ihrẹ: Wọhọ omomọvo jẹ wọhọ ukoko egagọ, ma ti gbe fi oreva Ọghẹnẹ họ oware ọsosuọ evaọ izuazọ mai. Ẹkwoma Ẹme riẹ, Ebaibol na, nọ ma re ro ruiruo wọhọ oware nọ o rẹ kp’omai, ma te rẹriẹ kpohọ ẹkpẹlobọ hayo obọze he, ma vẹ rehọ ere k’imuẹro nọ edhere uzuazọ Ọghẹnẹ o kpehru vi idhere akpọ na thethabọ. Ma gba riẹ mu no re ma le edhere uzuazọ Ọghẹnẹ—gaga avọ omurokpotọ, enẹna gbe bẹdẹ bẹdẹ!

²³ “Ma ru ọtamuo ọnana fikinọ ma fievahọ eyaa iyoyou Jihova vọvọ inọ ọnọ o ru oreva Ọghẹnẹ ọ te jọ bẹdẹ bẹdẹ. Ma ru ọtamuo ọnana fikinọ u mu omai ẹro nnọ ẹria lele ehri-izi, uthubro, gbe ohrẹ Ikereakere na u re dhesẹ edhere uzuazọ nọ o mai woma nẹnẹ je fi otọhotọ uwoma họ kẹ obaro, re ma sae gbobọ kru uvi uzuazọ na. (1 Timoti 6:19; 2 Timoti 4:7b, 8) Maero, ma ru ọtamuo nana fikinọ ma you Jihova Ọghẹnẹ no udu mai kpobi ze, ẹwẹ, iroro, gbe ẹgba!

24, 25. Didi uyo a kẹ kpahe ọtamuo na, kọ eme họ ọtamuo enọ e be nya evaọ edhere Jihova?

²⁴ “Ahwo kpobi nọ e rọ okokohọ nana nọ e jẹ ọtamuo nana rehọ, iviena wha bo nọ EE!”

²⁵ Afe-aroza udhusoi buobu nya akpọ wariẹ i nuhu nọ ahwo nọ a jọ okokohọ na kpobi a kuyo nọ “EE!” Isẹri Jihova a wo avro ho inọ a te ruabọhọ ẹnya evaọ edhere Jihova. A fievahọ Jihova vọvọ avọ ẹrọwọ nnọ o ti ru eyaa riẹ gba. A roma kpotọ kẹe, makọ oware nọ o via kpobi. Yọ a gba riẹ mu no nnọ a re ru oreva riẹ.

“Ọghẹnẹ Ọ rọ Abọ Mai”

26. Eme họ uyero evawere orọ enọ e be nya evaọ edhere Jihova?

²⁶ Isẹri Jihova a kareghẹhọ uduotahawọ ọso-ilezi na: “Hẹrẹ ỌNOWO whọ nya edhere riẹ, ọ rẹ te kpare owhẹ kpehru re whọ reuku otọ na.” (Olezi 37:34) Eme ọ uduotahawọ Pọl e rẹ thọrọ ai ẹro ho: “Otẹrọnọ Ọghẹnẹ ọ rọ abọ mai no, kọ ono ọ rẹ rọ suọ omai? Ọnọ ọ gboke Ọmọ riẹ hẹ, rekọ ọ tẹ rehọ iẹ kẹ omai kpobi, kẹvẹ ọ rẹ rọ siọ omai eware edekọ gheghe ba ẹkẹ?” (Ahwo Rom 8:31, 32) Ẹhẹ, ma tẹ ruabọhọ ẹnya evaọ edhere Jihova, ọ te k’omai “eware kpobi nọ e rẹ kẹ evawere.” (1 Timoti 6:17) Diẹse ọfa u woma vi oria nọ ma rọ na—ẹnya evaọ edhere Jihova, kugbe inievo eghaghae mai. Nọ Jihova ọ rọ abọ mai na, jọ o jọ ọtamuo mai re ma daji etẹe je thihakọ rite urere, avọ evaifihọ vọvọ inọ evaọ ẹruoke riẹ, ma te ruẹ epanọ a ti ro ru eyaa riẹ kpobi gba.—Taitọs 1:2.

[Footnotes]

Kọ Whọ Kareghẹhọ?

◻ Eme o gwọlọ re Oleleikristi ọ nya evaọ edhere Jihova?

◻ Fikieme u je fo nọ ma re wo omarokpotọ je fievahọ Jihova?

◻ Didi obufihọ ma wo nọ ma be nya evaọ edhere Jihova na?

◻ Fodẹ eme obọdẹ jọ evaọ ọtamuo nọ a ru eva Ikokohọ “Edhere Uzuazọ Ọghẹnẹ” na.

[Pictures on page 16]

A ru emamọ ọtamuo jọ eva Ikokohọ Akpọ-Soso gbe Ubrotọ “Edhere Uzuazọ Ọghẹnẹ” na