Zizie Ai re A Nyaze
1 Uzizie jọ nọ a kẹ ikpe udhusoi nọ i kpemu u bi do via enẹna evaọ ekwotọ 233 wariẹ akpọ na họ: “Wha nyaze ma kpohọ ugbehru ỌNOWO na, . . . re o wuhrẹ omai edhere riẹ, re ma nya evaọ idhere [riẹ].” (Aiz. 2:3) Ahwo nọ ma rẹ kpọ kpohọ ukoko Jihova yọ edhere jọ nọ ọ mai woma nọ ma sai ro fiobọhọ kẹ ae re a ru ẹnyaharo abọ-ẹzi nọ o re su kpohọ uzuazọ ebẹdẹ bẹdẹ.
2 Iwhowho-uvie jọ a re siukekpemu evaọ ezizie ahwo kpohọ obọ Ọgwa Uvie bẹsenọ a rẹ k’imuẹro ọ ẹnyaharo evaọ obe uwuhrẹ Ebaibol no tao. Rekọ, evaọ ẹsejọ ahwo a re muọ iwuhrẹ ukoko họ ẹnya taure a te ti tube muọ uwuhrẹ Ebaibol họ kugbe ai dede. U fo re ma ru ulehie he evaọ uzizie gbe uduotahawọ nọ u n’evaze nọ ma rẹ kẹ ahwo re a ziọ iwuhrẹ.
3 Oware nọ Ma re Ru: Rehọ obe-uzizie ruiruo ziezi rọ vuẹ ahwo kpahe iwuhrẹ mai. Fodẹ nnọ iwuhrẹ na ọvọvẹ gbe nnọ ma re ghoro umudo vievie he. Dhesẹ oghẹrẹ nọ a re ru iwuhrẹ na. Fodẹ nọ iwuhrẹ na ghinọ iwuhrẹ ọ Ebaibol gbe nnọ a rẹ rọ obe ọ uwuhrẹ na kẹ ahwo kpobi re a lele uwuhrẹ na. Si ẹjiroro kpohọ otọhotọ gbe uyerakpọ sa-sa orọ ahwo nọ a te jọ iwuhrẹ na. Fodẹ nnọ ahwo na a no okegbe yena ze gbe nnọ a re dede emaha unuikpe kpobi rehọ. U fo re ma zizie ahwo nọ ma bi wuhrẹ obe kugbe, fialoma re ma thọ ae uke evaọ edhere kpobi re a nya.
4 Oware urere jọ nọ a kere evaọ Ebaibol họ uzizie oruọruọ jọ re a w’obọ evaọ eruẹrẹfihọ Jihova kẹ uzuazọ: “Ẹzi na avọ Ọva na a tẹ ta nọ, ‘Nyaze.’ . . . Whai e nọ uruame u re kpe a nyaze obonẹ re wha mi ame uzuazọ na, okẹ ọvọvẹ rọ kẹ ahwo nọ a guọlọ e riẹe.” (Evia. 22:17) Uvumọ oware o rẹ sai nwene ẹta amọfa nọ a re zizie re a ziọ iwuhrẹ mai hi.
5 Aizaya 60:8 o jọ eruẹaruẹ dhesẹ egba ọ idu erọ eso-ujiro ekpokpọ nọ e be ziọ ukoko ahwo Ọghẹnẹ wọhọ ilekuku nọ i “bi su wọhọ ẹgho, nọ e wọhọ ilekuku nọ e be ra ruọ [inwido] rai.” Mai kpobi ma sai zizie ahwo ọkpokpọ kpohọ iwuhrẹ mai jẹ sasa ae oma. Evaọ edhere ọnana, yọ ma bi yoẹme kẹ Jihova nọ o bi ru iruo ọ ekokohọ ahwo vẹrẹ vẹrẹ na.—Aiz. 60:22.