Vuẹ Emamọ Usi na Avọ Ọwhọ
1 “Uru ẹruẹ rai u bi siomẹ . . . O rọ eva mẹ kpobi nọ mẹ rẹ ta usiuwoma na kẹ owhai.” Enẹ Pọl ukọ na ọ ta eva riẹ via evaọ emuhọ ileta riẹ ro se inievo obọ Rom. Fikieme Pọl o je ro mu ọwhọ re o weze bru ai? Ọ ta nọ: “Re mẹ jọ udevie rai, . . . kọrọ ibi jọ re . . . Keme mẹ sae vuọoma usiuwoma na ha: keme oye họ ogaga usiwo Ọghẹnẹ.”—Rom 1:11-16.
2 Pọl o dhesẹ ọwhọ ọvo nana evaọ ẹme nọ ọ ta kẹ ekpako Ẹfẹsọs. Ọ kareghẹhọ ae nọ: “No ẹdẹ ọsosuọ nọ mẹ rọ j’owọ ruọ ubrotọ Esia ze, . . . [me] . . . wuhrẹ owhai evaọ ẹgbede gbe n’uwou ruọ uwou. Rekọ me se-isẹri kẹ ahwo Ju gbe ahwo Grik.” (Iruẹru 20:18-21, NW ) Evaọ ẹkwotọ iruo riẹ kpobi, o jọ Pọl oja re ọ vaha emamọ usi orọ usiwo na gbe ewo ubi Uvie na. Ẹvẹ ẹzi na o woma te re a raro kele iei!
3 Ma sae nọ oma mai nọ: ‘Kọ me bi dhesẹ ọwhọ ọvona evaọ ewhowho emamọ usi na evaọ okegbe mẹ? Ukpenọ me re riwi iruo usiuwoma na wọhọ owha-iruo gheghe, kọ me bi mu ọwhọ re mẹ ghale emamọ usi na kugbe ahwo buobu te epanọ o rẹ lọhọ te? Kọ me roro kpahe iyero mẹ avọ oma olẹ no? Kọ mẹ dawo idhere kpobi nọ e rẹ sae lọhọ evaọ ẹkwotọ mai no, wọhọ usiuwoma ọ n’uwou ruọ uwou, evaọ iyẹrẹ, evaọ eria enuokọ, ẹkwoma ifonu, gbe edhere ọnyakuo?’
4 W’obọ Avọ Ọwhọ Evaọ April: Amara April na yọ obọdẹ oke nọ ma re ro ru ẹkabọ mai viharo evaọ iruo usiuwoma na. U fo re unu euwa nọ a bru no na u ru ei lọhọ k’amọfa buobu re a ru iruo ọkobaro ubroke. Utiẹsejọ iyero ra e te k’owhẹ uvẹ re who ruiruo wọhọ ọkobaro ubroke evaọ April gbe May. Hayo whọ sae fi odẹ h’otọ wọhọ ọkobaro oke-kpobi fiki ute euwa nọ a nwene na. Otẹrọnọ whẹ yọ owhowho-uvie ukoko, kọ whọ sae raha oke vi epaọ anwẹdẹ evaọ iruo na evaọ amara ọnana gbe ọnọtha, re who fiobọhọ k’ahwo nọ a be sai ru iruo ọkobaro na? Oyena u ti ru udu Jihova ghọghọ!
5 Wọhọ Pọl, u fo re iwhowho Uvie a ruabọhọ edhesẹ ọwhọ ẹkwoma ẹkẹre haro evaọ iruo usiuwoma na. Uthoma mai nọ ma re ru evaọ odibọgba na o rẹ wha uvi oghọghọ s’omai. Pọl o wo oghọghọ onana evaọ iruo efuafo riẹ. U woma re ma raro kele obọdẹ oriruo riẹ.—Rom 11:13; 1 Kọr. 4:16.