Ẹkpẹti Onọ

◼ Didi obe a re wuhrẹ kugbe ahwo ọkpokpọ re a tẹ te họ-ame?

Taure ohwo ọ tẹ te rehọ uzuazọ riẹ mudhe kẹ Jihova jẹ họ-ame, o re wo eriariẹ egbagba hrọ. (Jọn 17:3) Ọ rẹ riẹ eware nọ i fo kẹe ẹkwoma ewuhrẹ ọ te ibroshọ na Eme Ọghẹnẹ Ọ Gwọlọ Mi Omai? gbe obe ọ Eriariẹ Nọ I Re Su Kpohọ Uzuazọ Ebẹdẹ Bẹdẹ na. Evaọ ẹsibuobu ibroshọ Gwọlọ na a rẹ kaki wuhrẹ. Dede na, otẹrọnọ obe ọ Eriariẹ a ro muọ uwuhrẹ na họ, a re wuhrẹ ibroshọ Gwọlọ na evaọ okenọ a te wuhrẹ obe na re no. Fikieme onana o jẹ r’oja?

Ibroshọ Gwọlọ na o kẹ eriwo ọkpẹkpẹe ọrọ iwuhrẹ ọsosuọ Ebaibol na. A tẹ rehọ iẹ muhọ, o rẹ kẹ ọmọ-uwuhrẹ na otoriẹ ọsosuọ orọ itee nọ a rẹ nyate re a ru eva were Jihova. A te wuhrẹ iẹ whremu, o rẹ jọ obọdẹ ọkiẹkpemu ọrọ eware nọ a wuhrẹ evaọ obe Eriariẹ na. Onọ who ru evaọ ivẹ na kpobi, tuduhọ ọmọ-uwuhrẹ na awọ re o se ikereakere nọ e tha eme na uke na re o je roro kpahe ae. Ruẹ nọ who dhesẹ iwoho na vevẹ, keme e rrọ obọdẹ obufihọ kẹ ewuhrẹ.—Rri Uwou-Eroro Na ọrọ January 15, 1997 (ọrọ Oyibo), ẹwẹ-obe avọ 16-17.

Nọ ọmọ-uwuhrẹ Ebaibol ọ tẹ nwani wuhrẹ ebe ivẹ na re no, ọ rẹ sae k’iyo enọ kpobi nọ ekpako na a te rọ kiẹe evaọ ẹruẹrẹ kpahe riẹ kẹ ame-ọhọ. Otẹrọ ere, o sai du fo ho re a wuhrẹ obe ofa kugbe ei, dede nọ ọnọ o wuhrẹ obe kugbei na o re gbe ruiruo ziezi kpahe ẹnyaharo riẹ.—Rri Uwou-Eroro Na ọrọ February 1, 1996, ẹwẹ-obe avọ 6, 7, 10.

Evaọ abọdekọ riẹ, a sae kẹ ọmọ-uwuhrẹ nọ ọ riobe tere he uvẹ re ọ họ-ame nọ o te wuhrẹ ibroshọ Gwọlọ na re no, o tẹ make rrọ nọ o ti wuhrẹ obe ọ Eriariẹ na re no ho. Uzẹme, u fo re o wo otoriẹ uzẹme na ziezi re ọ sai wo otoriẹ jẹ k’iyo enọ nọ e rrọ omobe ọ Iwuhrẹ Ọsosuọ Ebaibol rọkẹ ahwo nọ a gwọlọ họ-ame na. Oghẹrẹ nọ o rrọ kpobi, a re ru obe uwuhrẹ evaọ obe Eriariẹ na haro bẹsenọ u re re no nọ ọ tẹ make họ-ame no.