Fiobọhọ kẹ Ahwo Kpokpọ Wo Otoriẹ
1 Ẹkwoma iruo aru-ilele na, ma je wuhrẹ amọfa oware nọ Ọghẹnẹ ọ gwọlọ mi ai. (Mat. 28:19, 20) Isẹri nọ i bu vi ima isoi a be daoma gaga evaọ akpọ na soso re a ruẹse ru erei. Oware nọ u re dhesẹ obokparọ na orọnikọ unu euwa nọ a raha, ebe nọ a fihọ ada, hayo iwuhrẹ Ebaibol nọ a muhọ họ. Ute mai họ re ma ru ahwo wo otoriẹ a vẹ jẹ j’owọ lele oware nọ a wuhrẹ na.
2 Obufihọ kẹ amọfa evaọ ẹzi u kpomahọ “otoriẹ rọ kẹ enọ e riẹ ovuovo ho.” (Ol. 119:130) Ẹme na o re duobọ te ahwo udu o vẹ jẹ wọ ai ruiruo otẹrọnọ a ‘wo otoriẹ ẹme na.’ (Mat. 15:10) Nọ iruo mai e be kẹre je bu viere na, ma rẹ riẹ ẹgwọlọ nọ ma rẹ rọ t’ẹme je wuhrẹ ahwo na lọlọhọ viere. Oye jabọ nọ Ukoko-Ulogbo o je kporo ibroshọ na Eme Ọghẹnẹ Ọ Gwọlọ Mi Omai? Igogo iwuhrẹ Ebaibol nọ a re wuhrẹ e riẹe eva. Iwuhrẹ riẹ e rọ kpẹkpẹe, eme riẹ e ga ha, yọ o re lọlọhọ re a wo otoriẹ eme riẹ, oyena u te ru ibroshọ na be were ahwo buobu.
3 A re ti fi ibroshọ na họ ada gbe emagazini evaọ etoke emerae April gbe May. U fo nọ whọ tẹ be m’oma iruo usiuwoma ota ẹkpoka ra, whọ rẹ ruẹrẹ oma họ re who ru ahwo vi ebe je fi ibroshọ na họ ada evaọ odibọgba ra ẹsikpobi. Rehọ ibroshọ na se ahwo nọ e rẹ rehọ ebe anwẹdẹ. Kareghẹhọ nọ u re woma gaga re a rehọ iẹe wuhrẹ emaha, ahwo nọ a bi yo ẹvẹrẹ ra ziezi hi, gbe ahwo nọ e riẹ ese t’ere he.
4 Jọ Eme ọ Emuhọ E jọ Lọlọhọ: Nọ who te bi fi ibroshọ Ọghẹnẹ Ọ Gwọlọ na họ ada, rovie kpohọ ẹwẹ-obe avọ 2 na, oria nọ o jẹ ta nọ “a ru ibroshọ onana re ojọ ọruẹrẹfihotọ kẹ ewuhrẹ Ebaibol.” Riobọ kpohọ edhe-ẹme avọ 3 eva ẹwẹ-obe avọ 3 ro dhesẹ oware nọ u je fo nọ ohwo na o re wuhrẹ Ebaibol na. Rehọ izoẹme na jọ nọ i dhesẹ izẹme elọlọhọ Ebaibol rọ kpare isiuru riẹ. Dhesẹ epanọ ibroshọ ọnana ọ rẹ lẹliẹ ewuhrẹ jọ oware omawere, jẹ ta kẹe nọ who ti fiobọhọ kẹe.
5 Ru Uwuhrẹ nọ O rẹ Nyaharo: Ute mai họ re ma ru vrẹ iwuhrẹ nọ ma re ru ọvo—ma gwọlọ ru ilele nọ e rẹ tha egagọ uzẹme uke ziezi. A rẹ sae wuhrẹ ibroshọ na re evaọ umutho eka jọ u ve su ovavo kpohọ uwuhrẹ evaọ obe Eriariẹ na. (Rri eme obotọ nọ o rọ ẹwẹ-obe avọ 31 na.) No emuhọ ze, fiobọhọ kẹ ọmọ-uwuhrẹ na vuhu ukoko Jihova. (Rri obe ọ Reasoning, ewẹ-ebe 283-284.) Fiẹgba họ epanọ iwuhrẹ ukoko i wuzou te, je ru ei vẹ nọ ekpohọ iwuhrẹ na o rẹ lẹliẹ otoriẹ riẹ kpahe egagọ uzẹme kẹre.—Hib. 10:24, 25.
6 Ababọ avro re a w’abọ evaọ iruo obọdẹ onana evaọ April gbe May o te wha oghọghọ nọ u re no obufihọ kẹ ahwo evezi se omai re a “wo areghẹ” nọ u re su kpohọ uzuazọ.—Itẹ 4:5.