Rri Ẹgba Ebaibol Na!

Evaọ oghẹrẹ vẹ? Ẹkwoma eriwo ividio na The Bible—Its Power in Your Life. (Ebaibol na—Ẹgba Riẹ Evaọ Uzuazọ Ra) Oye họ orọ avesa evaọ unojọ-utọjọ ọrọ ekasẹte ọ ividio nọ u wo uzoẹme na The Bible—A Book of Fact and Prophecy.

Kọ whọ gwọlọ orọo obokparọ? Kọ whọ gwọlọ obufihọ nọ who re ro fi etoke ebẹbẹ kparobọ? Ẹvẹ izoge a sae rọ rro kpako ruọ ekpako nọ i w’areghẹ? Ebaibol na ọ sai fiobọhọ, wọhọ epanọ ividio nana u dhesẹ na. Yo eme nọ ahwo a be ta kpahe ẹgba ewoma nọ Ebaibol na o wo no evaọ izuazọ rai. Gaviezọ kẹ ae nọ a bi dhesẹ epanọ ehri-izi riẹ i ro fiobọhọ kẹ ae rẹriẹ ovao dhe ebẹbẹ uzuazọ ọgbọna no.

Ividio nana yọ okwakwa oghaghae orọ obufihọ kẹ ahwo ọkpokpọ nọ a wo isiuru re a ruẹ irere ọ eroruiruo Ẹme Ọghẹnẹ wọhọ oware nọ o rẹ kpọ izuazọ rai. Enẹna Society o wo The Bible—Its Power in Your Life. Whọ sae yare ọjọ ẹkwoma odibo nọ ọ be sẹro ebe evaọ ukoko na.